2 Caw naatil jix cancan teꞌ Scaẍail Swa Kꞌane Jehová bꞌey Quiriat-jearim, 20 abꞌil jix cancan teꞌ tituꞌ, masanil ebꞌ conobꞌ Israel chi yal sbꞌa ebꞌ tet Jehová. 3 Yu jun tuꞌ, yuxan jix yal naj Samuel tet masanil ebꞌ yet Israelal jaxca tiꞌ: Ta yel yetoj masanil je cꞌul, catuꞌ che yaon oc je bꞌa yul skꞌabꞌ Jehová, sowalil che yiꞌeltej wan comon dios eyoctoj yul je na, cꞌal wan yechel dios chi yij Astarté, catuꞌ chex oc je jijen tzet chi yal Jehová, tol asanxane tet Naj chex oc yin eyilal. Ta jaxca tuꞌ oj je yunne, oj jex col-le el yul skꞌabꞌ ebꞌ Filisteo, ẍi naj Samuel.

4 Yu tuꞌ xin, jix sjijen ebꞌ conobꞌ Israel yiꞌon eltej comon sdiosal ebꞌ yul-laj sna, jaꞌton yechel Baal, cꞌal yechel Astarté, jaxa cꞌal tet Jehová jix oc ebꞌ yin eyilal. 5 Jix yalon naj Samuel tet ebꞌ tol chi syambꞌa oc sbꞌa masanil ebꞌ conobꞌ Israel bꞌey Mizpá, jain xa oj jin txaloj tet Jehová je yu, ẍi naj tet ebꞌ.

6 Jix syambꞌan oc sbꞌa ebꞌ Israel bꞌey Mizpá tuꞌ; jaꞌ yet jun cꞌual tuꞌ jix yiꞌon atej jaꞌ jaꞌ ebꞌ yul jun kꞌobꞌ, catuꞌ jix secon ey ebꞌ sat txꞌotxꞌ sattaj Jehová, catuꞌ jix yijle nocha sbꞌa ebꞌ, yet chi xꞌoxon el masanil ebꞌ conobꞌ tol yel chi snaꞌ sbꞌa scꞌul ebꞌ yin spenail. (Jaꞌ bꞌey Mizpá tuꞌ jix naꞌle oc yin ebꞌ yet conobꞌ yu naj Samuel.) 7 Jaꞌ yet jix yabꞌen oc ebꞌ Filisteo tol yaman ecꞌ ebꞌ Israel bꞌey Mizpá tuꞌ, catuꞌ jix syambꞌan cꞌal pax oc sbꞌa ebꞌ, catuꞌ jix tit ebꞌ yin ebꞌ Israel tuꞌ. Jaxa yet jix yabꞌen ebꞌ Israel jaxca tuꞌ, caw jix xiwa ebꞌ. 8 Jix yalon ebꞌ tet naj Samuel jaxca tiꞌ: Cꞌam ojabꞌ cha bꞌej ja txali tet Jehová cu Diosal, kꞌan tet tol chi cu scolel tet ebꞌ Filisteo tiꞌ, ẍi ebꞌ conobꞌ tuꞌ.

9 Yin eymanil jix yun yiꞌontej jun noꞌ yuneꞌ meꞌ naj Samuel chi to txutxwi, jix yakꞌon tzꞌaꞌ jun xaambꞌal tuꞌ masanil sattaj Jehová, catuꞌ jix oc ian xali tet Dios tol chi colwa yin ebꞌ. Eyman jix takꞌwi Jehová tet naj. 10 Jaꞌ yet lalan yakꞌon xaambꞌal tuꞌ, yelcꞌulal xacꞌal chi jul ebꞌ Filisteo scawilal ebꞌ Israel yet chi yakꞌon jowal ebꞌ, jaxa Jehová jix akꞌon makꞌwa eytej cꞌu bꞌey satcan yin ipal sattaj ebꞌ Filisteo tuꞌ, queytuꞌ jix yun xiwa ebꞌ, catuꞌ jix ela ebꞌ tet ebꞌ Israel tuꞌ. 11 Eyman jix too ebꞌ Israel yintaj ebꞌ Filisteo tuꞌ bꞌey Mizpá. Jix too tzajan ebꞌ yin ebꞌ, jix eyqꞌuey ebꞌ Filisteo tuꞌ yu ebꞌ, jix makꞌle cam ebꞌ yu ebꞌ Israel, masantaꞌcꞌal jix apni oc ebꞌ bꞌey Bet-car. 12 Jix lawi tuꞌ, jix seyon naj Samuel jun chꞌen chꞌen, jix yaon can ey bꞌey snan xol Mizpá yetoj Sen, jix yakꞌon yij sbꞌi Eben-ézer,^a jix yaloni: Caw lalan cꞌal scolwa oc Jehová ketoj tinaniꞌ, ẍi naj.

13 Jaꞌ yet jun cꞌual tuꞌ jix eyqꞌuey ebꞌ Filisteo yu ebꞌ Israel; yu tuꞌ xin, cꞌamxa junelojxa jix octoj ebꞌ sat xꞌotxꞌ ebꞌ Israel yakꞌon jowal. Jaꞌ yet iquisto cꞌal ecꞌ naj Samuel tuꞌ, ey cꞌal oc Jehová yetoj naj yet chi xibꞌtele cꞌal ebꞌ Filisteo tuꞌ. 14 Jal jantaj xꞌotxꞌ ebꞌ Filisteo tuꞌ, jix yiꞌcan oc ebꞌ conobꞌ Israel junelxa, chi ẍaꞌtoj txꞌotxꞌ bꞌey Ecrón, masantaꞌcꞌal chi apni oc bꞌey Gat. Jal pax ebꞌ Amorreo xin, cꞌam cꞌal jowal snan xol ebꞌ yetoj ebꞌ Israel tuꞌ.

15 Jaꞌ yet iquisto ecꞌ naj Samuel tuꞌ, juez yeoc naj yibꞌan conobꞌ Israel. 16 Junjun abꞌil chi bꞌetecꞌ naj bꞌey Betel, bꞌey Guilgal, cꞌal bꞌey Mizpá, chi bꞌetecꞌ naj swaꞌne yeoc junoj kꞌane snan xol ebꞌ ánima bꞌey wan conobꞌ tuꞌ. 17 Chi lawi tuꞌ, chi meltzo pax toj naj bꞌey Ramá, bꞌey caan cꞌaltaꞌa; jaꞌ tituꞌ eyoc naj yin juezal yibꞌan conobꞌ Israel. Jix swaꞌne can a jun yet xaambꞌal sattaj Jehová tituꞌ.