—¿Tzet wal chi kute teꞌ Scaẍail Swa Kꞌane Jehová tuꞌ che naꞌ? ¿Tzet wal chi yun kakꞌon meltzo teꞌ? ẍi ebꞌ.

3 Jix takꞌwi ebꞌ yakꞌomal xaambꞌal tuꞌ jaxca tiꞌ:

—Ta che yakꞌ meltzo teꞌ Scaẍail Swa Kꞌane sDiosal ebꞌ Israel tuꞌ, cꞌam ojabꞌ che yakꞌ meltzo teꞌ xꞌojli, tol sowalil ojabꞌ ey je saꞌbꞌeal che yatoj yu stooloj je penail, yet chi oc tucan sjowal scꞌul Dios je yibꞌan. Ta che yun jaxca tuꞌ, oj waꞌxoj je cꞌul, catuꞌ oj naꞌcha el je yu tzet yuxan eyoc jun syaꞌilal tiꞌ je yibꞌan yu Dios, ẍi ebꞌ.

4 —¿Tzet wal yetal chi skeꞌ kakꞌon jon xin, yet chi tan sjowal scꞌul Jehová tuꞌ kibꞌan? ẍi ebꞌ.

—Akꞌwej joebꞌoj chꞌen oro jaxca yili malilal yaꞌbꞌil, junjun cꞌal yet junjun ebꞌ yaaw yeoc je xol tuꞌ, yetoj joebꞌojxa chꞌen oro jaxca yili txꞌow, ilaꞌ tol yaꞌ jex ey yetoj ebꞌ yaaw yeoc je xol tuꞌ. 5 Yu tuꞌ xin, waꞌnewej yechel wan malilal yaꞌbꞌil tuꞌ yetoj cꞌal wan yechel txꞌow tuꞌ, yutol jix etextoj sat cu txꞌotxꞌ tiꞌ yu noꞌ, catuꞌ che yiꞌon a can sbꞌi sDiosal ebꞌ Israel, jaxta wal chi yakꞌ mimancꞌulal Dios je yin cꞌal yin cu diosal cꞌal yin cu txꞌotxꞌ tiꞌ, ẍi ebꞌ. 6 ¿Tzet yuxan tol caw mimej winaj chi kute cu bꞌa jaxca jix yute sbꞌa naj sreyal Egipto yetoj masanil ebꞌ ánima ey tituꞌ? Masantaꞌcꞌal jix oc mimej syaꞌilal yibꞌan ebꞌ, queyton tuꞌ jix yun sjajle el ebꞌ conobꞌ Israel yu ebꞌ. 7 Yuxan tinaniꞌ xin, waꞌnewej junoj carreta, catuꞌ che yiꞌontej cacꞌonoj noꞌ xutx wacax ey yuneꞌ, tol cꞌam tocꞌal juneloj chi oc steꞌal kꞌubꞌal txꞌotxꞌ yin yucꞌaꞌ noꞌ, junne che yute ey noꞌ, catuꞌ che kꞌalon oc teꞌ carreta tuꞌ yin yucꞌaꞌ noꞌ. Cꞌam ojabꞌ che chaꞌtoj noꞌ yuneꞌ yintaj noꞌ txutxe tuꞌ, che majche can octoj noꞌ yaliẍ tuꞌ yul colal. 8 Catuꞌ che yaon octoj teꞌ Scaẍail Swa Kꞌane Jehová yul carreta tuꞌ, che yaon eytoj chꞌen oro tuꞌ yul junoj caanteꞌ, catuꞌ che yaon atoj yul teꞌ carreta bꞌey yin scꞌul teꞌ caẍa tuꞌ, jaꞌton wan tuꞌ che yatoj yu stooloj je penail. Chi lawi tuꞌ xin, che jajon cantoj noꞌ wacax tuꞌ xꞌojli yetoj teꞌ carreta tuꞌ. 9 Che majon cꞌal je yilaꞌ, ta tol jaꞌ bꞌey sbꞌeal Bet-semes chi caꞌ stoo noꞌ, queyton tuꞌ oj yun kotajne eloj tol jaꞌ Jehová sDiosal ebꞌ Israel chi cu uten jaxca tuꞌ, chi yal tuꞌ. Ta txꞌoj bꞌeal bꞌey chi too noꞌ wacax tuꞌ xin, manaj Jehová chi aontej jun syaꞌilal tiꞌ kibꞌan, comon yaꞌ jolom mi cꞌal chi cu iꞌon, chi yal tuꞌ, ẍi ebꞌ naj yakꞌomal xaambꞌal tuꞌ.

10 Queytuꞌ jix yute ebꞌ Filisteo jaxca tuꞌ, catuꞌ jix bꞌet yiꞌontej cacꞌon noꞌ txutxe wacax ey yuneꞌ ebꞌ, catuꞌ jix smajchen can octoj noꞌ yuneꞌ wacax ebꞌ tuꞌ yul colal, catuꞌ jix skꞌalon oc teꞌ carreta ebꞌ tuꞌ yin yucꞌaꞌ noꞌ txutxe tuꞌ. 11 Jix yaon atoj teꞌ Scaẍail Swa Kꞌane Jehová ebꞌ bꞌey yul teꞌ carreta tuꞌ, yetoj jun caanteꞌ bꞌey eeytoj chꞌen oro jaxca yechel txꞌow, cꞌal yechel jun yaꞌbꞌil tuꞌ. 12 Jaxa yet jix joyletoj noꞌ wacax tuꞌ, tꞌinan cꞌal stoo noꞌ yetcꞌulal sbꞌeal Bet-semes. Chi el yaw noꞌ, cꞌam cꞌal chi el noꞌ stiꞌlaj bꞌe. Naat tacꞌal tzajan oc ebꞌ naj Filisteo yintaj noꞌ, yet chi yilon ebꞌ masantaꞌcꞌal jix apni oc ebꞌ bꞌey yul smoonal Bet-semes. 13 Ey wan ebꞌ naj a Bet-semes eyecꞌ kꞌupo tiriw, bꞌey spananil sjobꞌeal ecꞌtej conobꞌ tuꞌ. Jaꞌ yet jix too tꞌanan ebꞌ, jix yilon ebꞌ tol jaꞌ teꞌ Scaẍail Swa Kꞌane Jehová lalan yapni ocoj. Caw jix tzala a ebꞌ sicꞌlebꞌil 14-15 Jaꞌ bꞌey jun acꞌal bꞌey xꞌotxꞌ naj chi yij Josué, yul yet Bet-semes, jaꞌ tituꞌ jix apni oc linan noꞌ wacax tuꞌ yetoj teꞌ carreta tuꞌ. Ey jun miman chꞌen tituꞌ, jaꞌ ebꞌ yicꞌaal Leví jix iꞌon eytej teꞌ Scaẍail Swa Kꞌane Jehová, cꞌal teꞌ caanteꞌ bꞌey eeytoj chꞌen oro tuꞌ; jix yaon atoj ebꞌ yibꞌan chꞌen miman chꞌen tuꞌ. Jaxa ebꞌ naj a Bet-semes tuꞌ jix stzokꞌontoj teꞌ carreta tuꞌ yin siꞌal, catuꞌ jix yakꞌon tzꞌaꞌ noꞌ wacax tuꞌ ebꞌ yin xaambꞌal sattaj Jehová. Jaꞌ yet jun cꞌual tuꞌ jix yakꞌ xaambꞌal ebꞌ a Bet-semes tet Jehová, yetoj cꞌal wanxa ofrenda tol chi akꞌle tzꞌaꞌoj. 16 Jaꞌ ebꞌ jowan syaawil ebꞌ Filisteo jix smaj cꞌal yil jun tuꞌ ebꞌ, jix lawi tuꞌ, catuꞌ jix meltzo ebꞌ bꞌey conobꞌ Ecrón yet jun cꞌual tuꞌ.

17 Ey joebꞌ chꞌen oro yechel malilal yaꞌbꞌil tuꞌ, jix yatoj ebꞌ Filisteo yet chi oc stooloj spenail ebꞌ sattaj Jehová, jun yet junjun conobꞌ, jaꞌton: Asdod, Gaza, Ascalón, Gat cꞌal Ecrón. 18 Jal pax wan yechel txꞌow tuꞌ xin, laan sbꞌisil jaxca sbꞌisil sconobꞌal ebꞌ jowan syaawil ebꞌ Filisteo, jaꞌton wan conobꞌlaj tol eyoc smuroal yinlaj, yetoj cꞌal yaldeail. Jaꞌ chꞌen miman chꞌen bꞌey sat xꞌotxꞌ naj Josué, bꞌey jix ale atoj teꞌ Scaẍail Swa Kꞌane Jehová bꞌey Bet-semes, txequel tocꞌal yili chꞌen tinaniꞌ.

19 Jaꞌ yet eyecꞌ teꞌ Scaẍail Swa Kꞌane Jehová bꞌey Bet-semes tuꞌ, ey 70 ebꞌ winaj jix cami, yutol jix sey yil ebꞌ wan tzetyetal eeytoj yul teꞌ caẍa tuꞌ; caw jix okꞌ masanil ebꞌ ánima, yutol jix oc camich snan xol ebꞌ yu Jehová. 20 Yu jun tuꞌ xin, yuxan jix yal ebꞌ ánima ey tituꞌ: ¿Mac wal chi skeꞌ stecꞌbꞌan sbꞌa sattaj Jehová, yutol ey smey Naj? ¿Bꞌey wal tuꞌ chi kaoctoj teꞌ Scaẍail Swa Kꞌane Dios tiꞌ xin, catuꞌ chi elcan cu cꞌatan? ẍi ebꞌ. 21 Jaꞌ yet tuꞌ, jix yaontoj ẍejabꞌ ebꞌ bꞌey Quiriat-jearim, jix yalon ebꞌ jaxca tiꞌ: Jix yakꞌ meltzo teꞌ Scaẍail Swa Kꞌane Jehová ebꞌ Filisteo, titanwej yet chi jul je yiꞌontoj teꞌ, ẍi ebꞌ.