Jaꞌ Ebꞌ Filisteo Jix Iꞌon Cantoj Teꞌ Scaẍail Swa Kꞌane Dios
5
Jaꞌ yet jix yiꞌon ecꞌ teꞌ Scaẍail Swa Kꞌane Dios ebꞌ Filisteo bꞌey Eben-ézer, jaꞌ bꞌey jun conobꞌ chi yij Asdod jix apni oc teꞌ yu ebꞌ. 2 Ja yet jix apni oc teꞌ yu ebꞌ tituꞌ, jix yaoctoj ebꞌ yul stemplo jun comon dios chi yij Dagón, jaꞌ scꞌatan sdiosal ebꞌ tuꞌ jix yaey teꞌ caẍa tuꞌ ebꞌ. 3 Jaxa yet jix kꞌinibꞌi a yet junxa cꞌual, jix apni oc ebꞌ ánima caan yul conobꞌ Asdod, bꞌey yul stemplo jun comon dios chi yij Dagón tuꞌ, jix yilon ebꞌ tol pacꞌan ey jun sdiosal ebꞌ tuꞌ sat txꞌotxꞌ, bꞌey sattaj teꞌ Scaẍail Swa Kꞌane Jehová. Jix yiꞌon a ebꞌ, jix yaon atoj ebꞌ junelxa bꞌey ey cꞌaltaꞌ atoj tuꞌ. 4 Jaxa yet jix apni pax oc ebꞌ yet junxa cꞌual xin, pacꞌan xa pax ey jun sdiosal ebꞌ tuꞌ sat txꞌotxꞌ bꞌey sattaj teꞌ Scaẍail Swa Kꞌane Jehová tuꞌ, poꞌonajxatoj sjolom, tuxa cꞌal cꞌotan can eltoj skꞌabꞌ bꞌey stiꞌ smarcoal teꞌ puerta tuꞌ, jaxa cꞌal smimanil ma poꞌotoj. 5 Yuxan yet tax cꞌal tuꞌ, jaꞌ yet chi octoj ebꞌ yakꞌomal xaambꞌal tet jun comon dios chi yij Dagón tuꞌ, cꞌam chi skeꞌ stecꞌon ey yajan ebꞌ yibꞌan smarcoal spuertail jun sdiosal ebꞌ tuꞌ, jun ey bꞌey conobꞌ Asdod.6 Jix lawi tuꞌ xin, jaꞌ Jehová jix yaontej jun miman syaꞌilal yibꞌan ebꞌ a conobꞌ Asdod, yetoj cꞌal yibꞌan masanil ánima ey bꞌey yul conobꞌ tuꞌ cꞌal yinlaj ebꞌ. Jix pitzcꞌu a yaꞌbꞌil yin ebꞌ ánima tuꞌ, jix pitzcꞌu a malilal yin ebꞌ. 7 Jaꞌ yet jix yilon ebꞌ ánima a conobꞌ Asdod tuꞌ, tol lalan scam ebꞌ yu jun yaꞌbꞌil tuꞌ, jix yalon ebꞌ jaxca tiꞌ: Jaꞌ teꞌ Scaẍail Swa Kꞌane sDiosal ebꞌ Israel, man oj skeꞌ scan teꞌ ketoj, yutol caw miman jun syaꞌilal chi jul kibꞌan yu Jehová, catuꞌ jix etex pax cantoj cu diosal yu, ẍi ebꞌ.
8 Yu jun tuꞌ, jix yaontoj kꞌane ebꞌ tet ebꞌ syaawil yeoc xol ebꞌ Filisteo tuꞌ, tol chi syambꞌa oc sbꞌa ebꞌ, yet chi yalon ebꞌ tzet chi yunne. Jix yalon ebꞌ jaxca tiꞌ:
—¿Tzet chi kutewej teꞌ Scaẍail Swa Kꞌane sDiosal ebꞌ Israel tiꞌ xin? ẍi ebꞌ.
—Iꞌwejtoj teꞌ, chi too je yakꞌon can teꞌ bꞌey conobꞌ Gat, ẍi ebꞌ.
Queytuꞌ jix yun yiꞌontoj teꞌ caẍa tuꞌ ebꞌ. 9 Jaꞌ yet jix yiꞌontoj teꞌ tuꞌ ebꞌ, jix yaon pax tej jun miman xiwcꞌulal Jehová yibꞌan ebꞌ conobꞌ tuꞌ, catuꞌ jix pitzcꞌu a malilal yaꞌbꞌil yin ebꞌ icham ánima, cꞌal yin ebꞌ unin. 10 Jix lawi tuꞌ xin, jix yiꞌontoj teꞌ Scaẍail Swa Kꞌane Dios ebꞌ Filisteo bꞌey conobꞌ Ecrón. Jaꞌ yet jix apni oc teꞌ tituꞌ, jix a pax yaw ebꞌ ánima yu xiwcꞌulal, jix yalon ebꞌ jaxca tiꞌ: Caw jix jul can teꞌ Scaẍail Swa Kꞌane sDiosal ebꞌ Israel cu xol tiꞌ, yet chi cu qꞌueyle el cu masanil yu, ẍi ebꞌ.
11 Jix yaontoj ẍejabꞌ ebꞌ, yet chi too al-le tet ebꞌ yaaw yeoc xol ebꞌ Filisteo tuꞌ, jix yalon ebꞌ jaxca tiꞌ: Iꞌwej el teꞌ Scaẍail Swa Kꞌane sDiosal ebꞌ Israel tiꞌ cu xol jon, chi too je yakꞌon can teꞌ bꞌey ey cꞌaltaꞌ ecꞌ teꞌ, yet watxꞌ man oj cu cam cu masanil yu, ẍi ebꞌ ánima tuꞌ. Yutol caw yelcꞌulal chi jowbꞌi jun syaꞌilal tuꞌ yin ebꞌ yu Jehová, yuxan caw chi xiw ebꞌ sicꞌlebꞌil.
12 Caw naat chi apni yel yaw ebꞌ ánima tuꞌ, chi apni tacꞌal bꞌey satcan, yutol caw miman jun syaꞌilal eyoc yibꞌan ebꞌ tuꞌ, jaꞌ ebꞌ cꞌamto chi cami, caw chi malxacꞌal yinlaj smimanil ebꞌ yu jun yaꞌbꞌil tuꞌ.