4 Yu tuꞌ xin, jix yaontoj wan yakꞌomal servil ebꞌ bꞌey Siló, yet chi too yiꞌontej teꞌ Scaẍail Swa Kꞌane Jehová ebꞌ, Naj ey yipalil yibꞌan masanil tzetyetal, yutol jaꞌ tituꞌ chi xꞌox sbꞌa stzejejial yibꞌan ebꞌ querubín. Tzajan oc naj Hofní, yetoj naj Finees scꞌaal naj Elí yintaj teꞌ Scaẍail Swa Kꞌane Jehová tuꞌ. 5 Jaꞌ yet jix apni oc teꞌ caẍa tuꞌ bꞌey bꞌulan ey ebꞌ tuꞌ, caw jix a yaw masanil ebꞌ yu tzalacꞌulal, jix bꞌilwi a txꞌotxꞌ txꞌotxꞌ yu yel yaw ebꞌ.

6 Jaꞌ yet jix yabꞌen ebꞌ Filisteo yel yaw ebꞌ Israel yu tzalacꞌulal, jix yalon ebꞌ jaxca tiꞌ: ¿Tzet yu, yuxan caw wal chi oc aw bꞌey bꞌulan ey ebꞌ Hebreo tuꞌ? ẍi ebꞌ.

Jaxa jix yabꞌen ebꞌ tol jaꞌ teꞌ Scaẍail Swa Kꞌane Jehová jix apni oc teꞌ bꞌey bꞌulan ey ebꞌ tuꞌ. 7 Caw jix xiwa ebꞌ, jix yalon ebꞌ tet junjun jaxca tiꞌ: Jix apni oc sDiosal ebꞌ bꞌey bꞌulan ey ebꞌ tuꞌ. ¿Tzet oj kunwej tinaniꞌ? ¡Caw okꞌbꞌal jon cꞌule! Cꞌamto juneloj queytuꞌ chi kun jaxca tiꞌ. 8 ¡Caw okꞌbꞌal jon cꞌule! ¿mactxequel oj cu colon el tet jun Dios caw wal ey smey tuꞌ? Jaꞌ jix qꞌueyon can el ebꞌ a Egipto bꞌey txꞌotxꞌ cusiltaj txꞌotxꞌ yetoj masanil tujan syaꞌilal. 9 Jaꞌ tinaniꞌ xin, cu tecꞌbꞌawej cu bꞌa, yetoj wal masanil kip oj kakꞌonwej jowal yetoj ebꞌ, yet watxꞌ cꞌam chi cu oc yakꞌomaloj servil ebꞌ Hebreo tiꞌ, jaxca jix yun yoc ebꞌ cu chejabꞌoj, ẍi ebꞌ. 10 Jix lawi tuꞌ, jix oc lemna ebꞌ Filisteo yakꞌon jowal yetoj ebꞌ Israel. Jaxa jix yunne jix eyqꞌuey ebꞌ Israel tuꞌ yu ebꞌ, jix el ebꞌ, jix paxtoj ebꞌ bꞌey bꞌulan ecꞌ ebꞌ tuꞌ. Caw miman ebꞌ jix cami; ey mi junoj 30,000 ebꞌ soldado Israel tuꞌ jix cami. 11 Queyton tuꞌ jix yun yiꞌontoj teꞌ Scaẍail Swa Kꞌane Dios ebꞌ Filisteo tuꞌ, jix makꞌle can cam naj Hofní cꞌal naj Finees yu ebꞌ, jaꞌton ebꞌ scꞌaal naj Elí. 12 Ey jun soldado xol ebꞌ yicꞌaal Benjamín jix colcha can el xol jowal tuꞌ, catuꞌ jix too yin ani bꞌey conobꞌ Siló yet jun cꞌual tuꞌ. Jix stzilontoj spichil, jix yaon atoj txꞌotxꞌ xol xil sjolom yu xꞌoxon el cuscꞌulal. 13 Jaꞌ yet jix apni ocoj, chotan ey naj Elí yibꞌan jun chem bꞌey chi apni oc sbꞌeal conobꞌ tuꞌ, yu yechbꞌanen naj tzet oj elocoj, yutol eyoc naj yin bꞌiscꞌulal yu teꞌ Scaẍail Swa Kꞌane Dios. Jaꞌ yet jix apni oc jun soldado bꞌey Siló tuꞌ, catuꞌ jix yalon naj tet ebꞌ conobꞌ yu tzet jix eloc jun jowal tuꞌ, jix cꞌoli yaon el yaw masanil ebꞌ ánima tuꞌ. 14-15 Jaꞌ naj Elí eyxa 98 abꞌil skꞌinal, yuxan cꞌamxa wal chi skeꞌ yilwan naj. Jaꞌ yet jix yabꞌen naj yel yaw ebꞌ ánima tuꞌ, jix yaloni:

—¿Tzet yeoc ebꞌ ánima chi wejlabꞌi tuꞌ? ẍi naj. Caw eyoc jun soldado tuꞌ yin ani yet jix apni ocoj, catuꞌ jix yalon tet naj Elí jaxca tiꞌ:

16 —Jin peto xol jowal tuꞌ, yin xa elilal jix yun jin tita, ẍi jun soldado tuꞌ tet naj. Jix skꞌanlen naj Elí tet naj:

—¿Tzet wal jix yun yeloc jun jowal tuꞌ xin? ẍi naj.

17 Jix takꞌwi naj jaxca tiꞌ:

—Tol jix cu el tet ebꞌ Filisteo, caw miman ánima jix cam xol jowal tuꞌ. Jix cam can ebꞌ naj ja cꞌaal, naj Hofní yetoj naj Finees, catuꞌ jix yiꞌon pax cantoj teꞌ Scaẍail Swa Kꞌane Dios ebꞌ Filisteo tuꞌ, ẍi naj.

18 Jaꞌ yet jix yabꞌen naj Elí tzet jix yal jun soldado tuꞌ, cꞌal yu tzet jix utele teꞌ Scaẍail Swa Kꞌane Dios tuꞌ, catuꞌ jix eltoj pacꞌna naj yintaj chem bꞌey stiꞌ spuertail conobꞌ tuꞌ, catuꞌ jix ecꞌ txꞌumna snukꞌ naj, jix cam xacꞌal naj, yutol caw al smimanil naj, catuꞌ icham winajxa pax naj. Ey 40 abꞌil jix yakꞌ yaawil naj yibꞌan conobꞌ Israel. 19 Jaxa ix alibꞌe, yistil naj Finees, tuxa chi waꞌxi scꞌul ix yu unin, yuxan jaꞌ yet jix yabꞌen oc ix, tol jix iꞌletoj teꞌ Scaẍail Swa Kꞌane Dios, jix cam pax naj yalibꞌ ix, cꞌal naj yichamil ix, jaꞌ yet jun txolan tuꞌ, jix tit syaꞌil scꞌul ix, jix ali xacꞌal jun yuneꞌ ix tuꞌ. 20 Jaꞌ yet jix yilon ebꞌ ix chi ilon swaꞌxi scꞌul ix tuꞌ, tol tuxa chi cam ix, jix yalon ebꞌ tet ix jaxca tiꞌ: Cꞌam ojabꞌ chach xiwi, tuxa jix ali jun ja winaj unin, ẍi ebꞌ ix. Cꞌamxa chi skeꞌ stakꞌwi ix, jaxca tol camnajxa ix chi yabꞌe. 21 Jaꞌ jun yuneꞌ jix ali tuꞌ Icabod,^a jix yakꞌ yij sbꞌi ix, jix yalon ix jaxca tiꞌ: Jaꞌ tinaniꞌ jix iꞌle ecꞌ smimanbꞌilal conobꞌ Israel, ẍi ix. Yutol jix iꞌletoj teꞌ Scaẍail Swa Kꞌane Dios, jix cam pax naj walibꞌ, yetoj cꞌal naj wichamil an, ẍi ix, 22 jix yal ix jaxca tuꞌ: Cꞌamxa smimanbꞌilal Israel, yutol jix iꞌle cantoj teꞌ Scaẍail Swa Kꞌane Jehová, ẍi ix.