Yet Jix Awtele Naj Samuel Yu Jehová
3
Jaꞌ naj achꞌe Samuel eyoc naj yin yakꞌon servil Jehová, yalan ẍejbꞌanil naj yakꞌomal xaambꞌal chi yij Elí. Jaꞌ yet jun tiempoal tuꞌ, man comonoj chi kꞌanabꞌ Jehová tet junoj mactxequel, man pax comonoj chi xꞌox sbꞌa Naj yin weyicheal. 2 Jaxa jix yun xin, jaꞌ yet jix cꞌoli yetextoj sat naj Elí, yet cꞌamxa wal chi skeꞌ yilwan naj. Jaꞌ yet jun akꞌbꞌal yet lalan swey naj bꞌey yul scuarto. 3 Jal pax naj Samuel xin, lalan swey naj bꞌey yul Kꞌap Na yet Jehová bꞌey scawilal teꞌ Scaẍail Swa Kꞌane Dios, catuꞌ ey cꞌal skꞌakꞌal wan tzejtebꞌal tuꞌ. 4 Jix awtele naj Samuel yu Jehová jix yalon jaxca tiꞌ:—¡Samuel! ẍi Naj.
—¡Ti ey jin! ẍi naj.
5 Catuꞌ jix too jininoj naj Samuel scꞌatan naj Elí, jix yalon naj jaxca tiꞌ:
—Ti ey jin, ¿tzet cha wal ey jin an? ẍi naj.
—Cꞌam jaach chach wawte, asiꞌ weyan, ẍi naj Elí.
—¡Samuel! ẍi.
Jix a pax waan naj Samuel tuꞌ, catuꞌ jix too scꞌatan naj Elí, jix yaloni:
—Ti ey jin, ¿tzet cha wal ey jin an? ẍi Samuel.
—Jaach cꞌaal, cꞌam jaach chach wawte. Asiꞌ weyan, ẍi naj Elí.
7 Yutol man to otajbꞌiloj Jehová yu naj Samuel yet tuꞌ, yutol cꞌam tocꞌal juneloj jix kꞌanabꞌ Dios tet naj. 8 Jacꞌalaꞌ jix awtele pax naj Samuel yu Jehová yin yoxelal, jix a pax waan naj junelxa, jix too scꞌatan naj Elí:
—Ti ey jin, ¿tzet cha wal ey jin an? ẍi naj.
Queyton wal tuꞌ jix yun snaꞌcha el yu naj Elí, tol jaꞌ Jehová chi awten naj achꞌe Samuel tuꞌ. 9 Yuxan jix yal naj Elí tet naj Samuel jaxca tiꞌ:
—Asiꞌ, weyan. Ta chach awtele yu Jehová junelxa, catuꞌ chach takꞌwi jaxca tiꞌ: Kꞌanabꞌan jaach jin Diosal, lalan wabꞌen tzet cha wal jain ja wakꞌomal servil tiꞌ, ja chi, ẍi naj Elí.
Jix lawi tuꞌ, jix too naj Samuel wey junelxa, 10 catuꞌ jix apni wal oc linan Jehová scꞌatan naj, jix awtele naj yu jaxca cꞌaltaꞌ jix yun yawtele naj yet sbꞌabꞌelal:
—¡Samuel! ẍi Naj.
—Jaach jin Diosal, kꞌanabꞌan ey jin, lalan wabꞌen tzet cha wal jain ja chejabꞌ jin tiꞌ, ẍi naj Samuel.
11 Jix yalon Jehová tet naj jaxca tiꞌ:
—Ey wal tzet oj wun xol ebꞌ conobꞌ Israel tiꞌ, jaꞌ ebꞌ oj abꞌen ocoj, oj tac xacꞌal can el scꞌul ebꞌ yet oj yabꞌen oc ebꞌ. 12 Jaꞌ yet jun cꞌual tuꞌ, oj yunen el masanil tzet jix wal can yibꞌan ebꞌ yuninal naj Elí. 13 Tuxa jix wal tet naj, tol oj waoc syaꞌilal yin ebꞌ scꞌaal naj, yu jantaj spenail chi yun ebꞌ. Yotaj xa naj tol pena jix el yunen ebꞌ scꞌaal naj tuꞌ, caw pena jix yal ebꞌ naj win an, yutol ma yakꞌ cuenta niꞌoj ebꞌ scꞌaal naj tuꞌ. 14 Yu jun tuꞌ jix wakꞌ jin tiꞌ, yin ebꞌ scꞌaal naj Elí tiꞌ, tol cꞌam junoj xaambꞌal oj akꞌon tan spenail yibꞌan ebꞌ, tam wal yu junojxa tujan ofrenda, ẍi Jehová.
15 Jix lawi tuꞌ xin, catuꞌ jix ey telan naj Samuel wey junelxa, masantaꞌcꞌal yet jix sajbꞌi yet junxa cꞌual. Jaꞌ yet jix aapnoj yorail, jix sjajon spuertail snail scalubꞌal Jehová naj. Caw chi xiw naj yalon wan tzet jix yabꞌ tuꞌ tet naj Elí. 16 Catuꞌ jix awtele naj Samuel yu naj Elí, jix yalon jaxca tiꞌ:
—Jaach Samuel, ey jun chin kꞌanle ey jaach an, ẍi naj.
—¿Ti ey jin an? ẍi naj Samuel.
17 Jix skꞌanlen naj Elí tet naj jaxca tiꞌ:
—¿Tzet jix yal Jehová ey jaach? Chin oc wal tean ja win, tol cha wal ey jin tzet jix yalaꞌ. Ta man oj ja wal masanil ey jin an, jaꞌ ojabꞌ Dios oj aon oc syaꞌilal ja wibꞌan, ẍi naj Elí tet naj.
18 Jix yalon naj Samuel masanil tzet jix al-le tet, pilan cꞌal jix yalel naj. Catuꞌ jix yalon naj Elí jaxca tiꞌ:
—Tol jaꞌcaw Jehová jix aloni, yun ojabꞌ jaxca chi yoche scꞌul Dios, ẍi naj Elí.
19 Jix chꞌibꞌ cꞌal a naj Samuel tuꞌ, caw jix colwa cꞌal Jehová yetoj naj, yu jun tuꞌ, jix eloc masanil jantaj cꞌal tzet jix yalaꞌ. 20 Yuxan masanil ebꞌ conobꞌ Israel, chi tit tacꞌal bꞌey conobꞌ Dan, masantaꞌcꞌal bꞌey conobꞌ Beerseba, jix yal ebꞌ tol yel jaꞌ naj Samuel, yakꞌomal servil ton Jehová. 21 Catuꞌ jix xꞌoxon cꞌal sbꞌa Jehová tet naj Samuel bꞌey Siló, jix kꞌanabꞌ yetoj. Catuꞌ jix yalon naj tet ebꞌ yet Israelal masanil wan tzet jix yal Jehová.