Xa Ix Ana
2
Jix txali cꞌal pax ix Ana jaxca tiꞌ:¡Jaach Jehová jin Diosal, caw chi tzala jin cꞌul! Jaach jix ja wakꞌ wip. Chi skeꞌ walon tet ebꞌ chi jowi oc win, tol jaach jix jaach colwa wetoj.
2 Jaach Jehová jin Diosal, tol asanxane jaach ocoj. Cꞌam junojxa mactxequel laan swatxꞌil ja wetoj. Cꞌam junojxa chi skeꞌ scolwa jaxca jaach tiꞌ.
3 Yutol cꞌam junoj mactxequel chi skeꞌ yiꞌon a can sbꞌa, yutol jaꞌ Jehová yotaj masanil; jaꞌ Naj chi naꞌon oc kin junjun jon.
4 Jaꞌ Jehová chi iꞌon el yip ebꞌ chi smimanbꞌane sbꞌa, jaꞌ ebꞌ cꞌam yeloc apnoj eyxa yopiso ebꞌ tinaniꞌ.
5 Jaꞌ mactxequel caw ey sloꞌbꞌe yet yalantoj, jaxa tinaniꞌ chi sey mulna sbꞌa ebꞌ yu slowi. Jaꞌ ebꞌ chi yakꞌ wail yet yalantoj, jaxa tinaniꞌ cꞌamxa wail xol ebꞌ. Jaxa ix ix cꞌam cꞌaltaꞌ yuneꞌ, jaxa tinaniꞌ eyxa jujwan yuneꞌ ix chi yilaꞌ. Jaxa pax ix ecꞌal unin jix yilaꞌ, jaxa tinaniꞌ cꞌamxa yuneꞌ ix chi ali.
6 Jaꞌ Jehová chi iꞌon el cu kꞌinal, jacꞌal pax Naj chi akꞌoni. Jaꞌ Jehová chi cu aon eytoj bꞌey smujbꞌanil ebꞌ camnaj, jacꞌal pax Naj chi cu iꞌon pax atej.
7 Jaꞌ Jehová chi cu aon oc yin bꞌeomal, jaꞌ chi cu aon pax oc yin mebꞌail; chi cu bꞌejle ey yu, catuꞌ chi cu yiꞌon pax aoj.
8 Jaꞌ Jehová chi iꞌon a can ebꞌ mebꞌa bꞌey sat txꞌotxꞌ txꞌotxꞌ tiꞌ, jaꞌ chi sicꞌon a ebꞌ chi kꞌanon limosna tumin xol kꞌalem, catuꞌ chi ale ey chotan ebꞌ xol ebꞌ mimej yaaw, catuꞌ chi oc ebꞌ yin mimej opiso. Jaꞌ Jehová jix waꞌnen yichbꞌanil yul yibꞌankꞌinal tiꞌ, catuꞌ jix swaꞌnen ey bꞌatxan jun yul yibꞌankꞌinal tiꞌ sbꞌatxlubꞌal.
9 Jaꞌ Jehová chi teynen ebꞌ jijem yal cꞌal bꞌey chi ecꞌabꞌ ebꞌ; jaxa ebꞌ ánima pena chi yute sbꞌa, chi cancan ebꞌ xol kꞌejkꞌinal. Cꞌam mactxequel chi skeꞌ yu, yetoj yipalil yul yet.
10 Jaꞌ Jehová chi uchontoj ebꞌ chi jowi oc yin; catuꞌ chi eytej kopna letzꞌlom yibꞌan ebꞌ bꞌey satcan. Jaꞌ Jehová chi naꞌon oc yin jun yul yibꞌankꞌinal tiꞌ masanil. Jaꞌ Naj chi akꞌon yipalil naj rey tol sicꞌbꞌil el yu, catuꞌ chi iꞌle a can yu Jehová, ẍi ix Ana tuꞌ yet jix txali.
11 Jix lawi tuꞌ, jix meltzotoj naj Elcaná bꞌey sna bꞌey conobꞌ Ramá, jal pax naj yaliẍ unin tuꞌ xin, jix can naj yakꞌon servil Jehová yetoj naj Elí, naj yakꞌomal xaambꞌal tet Jehová.
Spenail Ebꞌ Scꞌaal Naj Elí
12 Jaꞌ ebꞌ scꞌaal naj Elí tuꞌ, caw pena sbꞌeybꞌal ebꞌ naj, cꞌam yeloc apnoj Jehová yul sat ebꞌ naj. 13 Cꞌam pax yeloc apnoj sleyalil wan xaambꞌal tol yet ebꞌ yakꞌomal xaambꞌal yeocoj. Jaꞌ yet lalan yakꞌon xaambꞌal ebꞌ ánima, catuꞌ chi apni oc junoj yakꞌomal servil ebꞌ yakꞌomal xaambꞌal tuꞌ yetoj junoj chꞌen miman lutxbꞌal. 14 Jaꞌ yet ipanto sta noꞌ chiꞌbꞌe tuꞌ yul xi, ma yul sneetal tuꞌ catuꞌ chi sjejon eytoj jun chꞌen miman lutxbꞌal ebꞌ tuꞌ. Jaꞌ jantaj noꞌ chi atej yu ebꞌ naj tuꞌ, chi yiꞌontoj ebꞌ tet ebꞌ yakꞌomal xaambꞌal tuꞌ. Quey cꞌal tuꞌ chi utele masanil xaambꞌal ebꞌ conobꞌ tuꞌ yu ebꞌ bꞌey Siló. 15 Jacꞌalaꞌ queytuꞌ jix yute noꞌ xaambꞌal ebꞌ yet cꞌamto chi akꞌle tzꞌaꞌ ẍepuꞌal noꞌ, catuꞌ chi apni oc jun yakꞌomal servil ebꞌ yakꞌomal xaambꞌal tuꞌ. Chi yalon ebꞌ tet mactxequel chi akꞌon jun xaambꞌal tuꞌ jaxca tiꞌ: Akꞌ niꞌoj noꞌ chiꞌbꞌe tiꞌ ey jin an, tol oj jin bꞌol noꞌ yu naj yakꞌomal xaambꞌal, yutol man oj ẍaꞌ naj noꞌ tanajxa tuꞌ ey jaach, yutol jaꞌ noꞌ yaaxto tiꞌ chi yoche naj, ẍi jun yakꞌomal servil ebꞌ tuꞌ. 16 Ta chi takꞌwi ebꞌ ánima tuꞌ, chi yalon ebꞌ jaxca tiꞌ: Bꞌabꞌel oj tzꞌaꞌ ẍepuꞌal noꞌ bꞌey yet xaambꞌal, catuꞌ chi skeꞌ ja wiꞌontoj jantaj chi yoche ja cꞌul, ta ẍi ebꞌ, jaxa chi yun stakꞌwi jun yakꞌomal servil ebꞌ tuꞌ jaxca tiꞌ: Cꞌamaj, sowalil cha wakꞌ noꞌ ey jin tinaniꞌ an, ta cꞌamaj, oj jin tokꞌecꞌ noꞌ ey jaach an, ẍi jun yakꞌomal servil ebꞌ tuꞌ. 17 Yu tuꞌ xin, jaꞌ ebꞌ achꞌe tuꞌ, caw miman spenail ebꞌ jix yaoc yul sat Jehová, jaxca tol cꞌam yeloc apnoj wan ofrenda chi akꞌle tet Dios tuꞌ yul sat ebꞌ.
18 Jal pax naj yaliẍ Samuel xin, eyoc spichil naj jaxca yet ebꞌ naj yakꞌomal xaambꞌal tuꞌ, yutol eyxa oc naj yin smulnail sattaj Jehová. 19 Junjun cꞌal abꞌil chi swaꞌne jun an jojan pichile ix Ana, catuꞌ chi yiꞌontoj ix tet naj yaliẍ Samuel yet chi bꞌet ix yetoj yichamil yu yakꞌon xaambꞌal ebꞌ tet Jehová. 20 Jaꞌ naj Elí jix alon watxꞌ kꞌane yibꞌan naj Elcaná, cꞌal yibꞌan ix Ana, jix yalon naj jaxca tiꞌ: Yakꞌ ojabꞌ cꞌal Jehová ja wuninal yetoj ix ja wistil tiꞌ, yet chi oc sqꞌuexeloj naj unin tol jix skꞌan ix yin xa, yutol jix yakꞌ ix tet Jehová, ẍi naj. Jix lawi tuꞌ, jix meltzo ebꞌ bꞌey sna. 21 Jaꞌ Jehová lalan cꞌal yakꞌon syaaxilal yibꞌan ix Ana; oxwanto ebꞌ swinaj unin jix ali, yetoj cawan ix unin. Jal pax naj Samuel xin, watxꞌ cꞌal chi yun ẍꞌibꞌa naj bꞌey scalubꞌal Jehová.
22 Jaꞌ naj Elí, caw icham winajxa naj yet tuꞌ; jix yabꞌ cꞌal oc naj yu tzet chi utele ebꞌ conobꞌ Israel yu ebꞌ scꞌaal naj; tol tax chi bꞌet ebꞌ naj wey yetoj ebꞌ ix ix chi teynen stiꞌ kꞌap na bꞌey chi ẍaꞌle sbꞌa ebꞌ yetoj Jehová. 23 Yu jun tuꞌ xin, jix yalon naj Elí tet ebꞌ scꞌaal tuꞌ jaxca tiꞌ: Masanil ebꞌ ánima chi alon oc yin jin sat yu spenail chi el je yuneni. ¿Tzet yu, yuxan jaxca tuꞌ che yunne? 24 Caw man watxꞌoj jaxca tuꞌ jex cꞌaal, caw wal pena tzet chi yal ebꞌ sconobꞌ Jehová yin tzet che yun tuꞌ. 25 Ta ey junoj mactxequel ey tzet chi yute junoj yet animail, chi to skeꞌ scolwa Dios yetoj jun mactxequel chi oc spenail tuꞌ; jaxa pax junoj mactxequel chi yaoc spenail tet Jehová, jaꞌ jun tuꞌ cꞌamxa mactxequel chi coloni, ẍi naj Elí tet ebꞌ scꞌaal tuꞌ. Jal ebꞌ naj cꞌaale tuꞌ, cꞌam cꞌal niꞌoj yeloc apnoj tzet jix yal naj mame tuꞌ tet ebꞌ naj, yutol jaꞌ Jehová naꞌbꞌil xacꞌaltaꞌ yu, tol oj qꞌueyle el ebꞌ naj.
26 Jal pax naj yaliẍ Samuel xin, yelcꞌulal chi chꞌibꞌ naj, caw wal jix ẍaꞌ scꞌul Jehová tzet chi yun naj. Yetoj cꞌal pax ebꞌ conobꞌ, caw chi tzala ebꞌ yetoj naj.
27 Jaꞌ yet jun tiempoal tuꞌ, jix apni oc jun ẍejabꞌ Dios scꞌatan naj Elí, jix yaloni: Jaxca tiꞌ yalon Jehová: Yet eyoc ebꞌ ja wichmam yin yakꞌomaloj servil bꞌey naj sreyal Egipto, caw wal watxꞌ jix yun jin txꞌoxon jin bꞌa tet ebꞌ an. 28 Jaꞌ xol masanil yicꞌaal ebꞌ Israel tuꞌ, jatuꞌ jix jex jin sicꞌ can el jaex tiꞌ yu je yoc yin yakꞌomaloj xaambꞌal, yet che yakꞌon tzꞌaꞌ noꞌ xaambꞌal yibꞌan yet xaambꞌal, cꞌal je yakꞌon tzꞌaꞌ teꞌ incienso sukꞌukꞌi yoc sabꞌ, catuꞌ che yaon oc je pichil che kꞌan yin je yopiso tuꞌ, yet chex apni oc jin sattaj. Catuꞌ jix walon tet ebꞌ je yichmam, tol ey yalon yet ebꞌ yin noꞌ xaambꞌal chi akꞌle tzꞌaꞌ yet chin iꞌle a can jin bꞌi yu ebꞌ je yet Israelal. 29 ¿Tzet yu, yuxan tol cꞌam yeloc apnoj wan xaambꞌal tuꞌ yul ja sat cꞌal wan ofrenda chin chej yakꞌ ebꞌ je yet conobꞌ bꞌey jin calubꞌal? ¿Tzet yu, yuxan xaan xacꞌal cha wil ebꞌ naj ja cꞌaal tuꞌ jin sattaj, catuꞌ bꞌejan xacꞌal ja cꞌul ja wakꞌon bꞌakꞌechbꞌoj ebꞌ naj yu swatxꞌilal xaambꞌal chi yakꞌ ebꞌ jin conobꞌ tiꞌ? 30 Caxcꞌal jain Jehová sDiosal jin Israel jix walaꞌ, tol jaach yetoj ebꞌ ja wicꞌaal chach mulna bꞌey jin calubꞌal, jaxa tinaniꞌ xin, jain chi walaꞌ, tol manxa jaxca oj tuꞌ oj yunne, yutol jaꞌ mactxequel ey weloc apnoj yul sat; jaꞌ ebꞌ tuꞌ ey yeloc apnoj ebꞌ yul jin sat, jal mactxequel cꞌam weloc apnoj yul sat xin, cꞌam cꞌal pax yeloc apnoj ebꞌ yul jin sat. Jain Jehová jin chi wal jun tiꞌ. 31 Lalan wal sjul scꞌual yet oj jin qꞌueyon el ebꞌ ja cꞌaal, cꞌal scꞌaal ebꞌ ja wican, cꞌamxa cꞌal junoj ebꞌ ja wicꞌaal oj ichambꞌoj. 32 Caw wal oj cus ja cꞌul ja wilon yu tzet oj eloc ja wopiso, yajbꞌan oj wun tzetyetal watxꞌ tet ebꞌ ja wet Israelal tiꞌ. Cꞌamxa bꞌakꞌin oj oc junoj ja wicꞌaal yin icham winajil. 33 Eyto wal jun cawanojxa oj to can yin ja wicꞌaal yu yilon jun yet xaambꞌal tiꞌ, tuxa cꞌal oj cus scꞌul ebꞌ yin tzet oj yilaꞌ, jaxa masanil wanxa ebꞌ ja wicꞌaal xin, caw achꞌe winaj tocꞌal ebꞌ, catuꞌ oj cam ebꞌ. 34 Junne cꞌual oj yun scam ebꞌ naj ja cꞌaal tuꞌ scawanil, jaꞌton naj Hofní cꞌal naj Finees. Queyton wal tuꞌ oj yun ja wiloni tol oj yun tzet chi walaꞌ. 35 Oj waoc junxa yakꞌomal xaambꞌal tol chi ẍaꞌ jin cꞌul, catuꞌ tol chi sjije tzet chi walaꞌ, caw naatil oj waoc yopiso ebꞌ yicꞌaal, cꞌal waon oc yopiso yetoj jun rey tol jain oj jin sicꞌ can eloj. 36 Yu jun tuꞌ xin, masanil mactxequel tol oj to iquisbꞌoj can ecꞌ xol ebꞌ ja wicꞌaal tuꞌ, oj jul ebꞌ jin sattaj cꞌal yey kaan ebꞌ sattaj jun yakꞌomal xaambꞌal tuꞌ, yet chi jul skꞌanon junoj stumin ebꞌ, ma junoj span ebꞌ, catuꞌ chi skꞌanon niꞌoj yopiso yin yakꞌomaloj xaambꞌal, asan yu yecꞌ niꞌoj tiempo yu ebꞌ, ẍi Jehová, ẍi jun ẍejabꞌ Dios tet naj Elí tuꞌ.