Jaꞌ An Bꞌabꞌel Libro
SAMUEL
Jix Akꞌle Jun Yuneꞌ Ix Ana Yu Jehová
1
Jaꞌ bꞌey conobꞌ Ramataim, bꞌey txꞌotxꞌ tzalquiltaj txꞌotxꞌ yul yet ebꞌ yicꞌaal Efraín, jaꞌ tituꞌ caan jun winaj chi yij sbꞌi Elcaná, scꞌaal naj Jeroham, yitxiquin naj Elihú, jaꞌ smam icham jaꞌton naj chi yij Tohu, scꞌaal Suf, caan naj xol ebꞌ yicꞌaal Efraín. 2 Jaꞌ naj Elcaná tuꞌ cawan yistil naj, jun ix chi yij Ana, junxa ix chi yij Peniná. Jaꞌ ix Peniná tuꞌ, ey yuneꞌ ix, jal pax ix Ana tuꞌ xin, cꞌam junoj yuneꞌ ix. 3 Junjun cꞌal abꞌil chi bꞌetecꞌ naj Elcaná bꞌey conobꞌ Siló yet chi yakꞌon xaambꞌal tet Jehová, Naj Yaaw Yibꞌan Masanil tzetyetal. Jaꞌ tituꞌ ey cawan ebꞌ yakꞌomal xaambꞌal tet Dios, jaꞌton naj Ofní, yetoj naj chi yij Finees, scꞌaal naj Elí ebꞌ, naj yakꞌomal xaambꞌal.4 Jaꞌ yet chi jul scꞌual yet chi yakꞌon xaambꞌal naj Elcaná tuꞌ, chi yakꞌon niꞌoj noꞌ xaambꞌal tuꞌ naj tet ix Peniná, cꞌal tet ebꞌ scꞌaal yetoj cꞌal tet ebꞌ scutzꞌin. 5 Jal pax tet ix Ana tuꞌ xin, caw ey scamcꞌulal naj yin ix, yuxan yel xacꞌal watxꞌ noꞌ chiꞌbꞌe chi akꞌle tet ix, caxcꞌal yel cꞌam yuneꞌ ix jix akꞌle yu Jehová. 6 Yu tuꞌ xin, caw wal pena tzet chi yal ix Peniná tuꞌ yin ix Ana tuꞌ, caw chi txꞌemle cus scꞌul ix yu cꞌam yuneꞌ ix chi akꞌle yu Jehová.
7 Jaꞌ yet chi bꞌetecꞌ naj Elcaná tuꞌ yetoj ebꞌ ix yistil junjun abꞌil bꞌey stemplo Jehová, caw chi txꞌemletej ẍichoncꞌulal ix Ana yu ix Peniná tuꞌ; yu jun tuꞌ, caw chi okꞌ ix Ana tuꞌ, cꞌamxa chi low ix. 8 Yuxan jix skꞌanle naj Elcaná tet ix Ana jaxca tiꞌ: Txo Ana, ¿tzet yuxan chach okꞌi, catuꞌ cꞌam chach low yu cuscꞌulal? ¿Tumi man watxꞌoj weoc ja wetoj yintaj laonwan ja wuneꞌ? ẍi naj tet ix.
9 Jaꞌ yet junel yet eyecꞌ ebꞌ bꞌey Siló tuꞌ, jaꞌ yet jix lawi slow ix, jix a jucna ix Ana tuꞌ, jix too ix bꞌey scalubꞌal Jehová. Chotan ey naj yakꞌomal xaambꞌal chi yij Elí, bꞌey spuertail scalubꞌal Jehová tuꞌ. 10 Caw cꞌamxa chi oc tucan ix Ana tuꞌ yokꞌi, caw eyoc ix yin cuscꞌulal, catuꞌ jix txali ix tet Jehová. 11 Jix yakꞌon stiꞌ ix tet Jehová jaxca tiꞌ: Jaach Mamin Jehová, tol Yaaw jaach yibꞌan masanil tzetyetal, ta chin ja naꞌtej jain ja chejabꞌ jin tiꞌ yin jun jin cuscꞌulal tiꞌ, tol oj wal chi el yin ja cꞌul cha wakꞌ junoj wuneꞌ winaj unin. Jaꞌ jun wuneꞌ tuꞌ, ja wet chi yun can oc naj, yet watxꞌ chach yakꞌ servil yin junelne. Man oj tzujle el xil sjolom naj, yet chi txeclo eloj tol ja wet yeocoj, ẍi ix yin xa.
12 Caw sat jix txali ix Ana tuꞌ tet Dios, jal naj Elí tuꞌ xin, tucꞌal tꞌanan oc naj yet chi bꞌilwi stiꞌ ix. 13 Jaꞌ ix Ana tuꞌ, yin cꞌal spixan cꞌal snaꞌbꞌal jix txali tet Jehová, cꞌam mactxequel chi abꞌen tzet chi yalaꞌ, asan tucꞌal chi bꞌilwi stiꞌ ix. Jaꞌ snaꞌon naj Elí tol uqꞌuem an ix. 14 Jix yalon naj tet ix jaxca tiꞌ:
—¿Bꞌakꞌin oj ja bꞌej ja wuqꞌuen teꞌ an tiꞌ? Kꞌojbꞌilxa ja wuqꞌuen teꞌ an tuꞌ, ẍi naj tet ix.
15 —Cꞌamaj, ẍi ix tet naj Elí, man uqꞌuem oj jin an, cꞌam cꞌal tzet jix wucꞌ eytoj, yutol ey jin oc yin cuscꞌulal, jaꞌ jun jin cuscꞌulal tiꞌ lalan walon tet Jehová. 16 Cꞌam ojabꞌ cha naꞌ tol pena tzet chi el wunen an, yutol lalan cꞌal jin txali tet Dios yu jun jin cuscꞌulal tiꞌ, ẍi ix.
17 —Paxan yin tzalacꞌulal xin, yakꞌ ojabꞌ Jehová sDiosal Israel jantaj tzetyetal jix ja kꞌan tuꞌ, ẍi naj Elí tet ix.
18 —Yuwal dios ey jaach, ẍi ix Ana tet naj; catuꞌ jix meltzo ix bꞌey jix tita.
Jix lawi cꞌal tuꞌ, jix too ix Ana tuꞌ lowoj. Yet tax cꞌal tuꞌ cꞌamxa cꞌal bꞌey jix okꞌ ix yu cuscꞌulal junelojxa. 19 Jaxa yet jix kꞌinibꞌi a yet junxa cꞌual jix oc ebꞌ yin eyilal tet Jehová; jix lawi tuꞌ, jix meltzotoj ebꞌ bꞌey sna bꞌey conobꞌ Ramá. Catuꞌ jix wey naj Elcaná yetoj ix Ana tuꞌ, jix naꞌletej xa ix tuꞌ yu Jehová. 20 Jaꞌ yet tuꞌ jix oc can unin yin ix. Jaxa yet jix jul scꞌual yali yuneꞌ ix, jix ali jun swinaj unin ix. Samuel jix yakꞌ yij sbꞌi, yutol jix skꞌan ix tet Jehová.a
21 Jaꞌ yet jix jul scꞌual stoo naj Elcaná yetoj ebꞌ yuninal bꞌey conobꞌ Siló, yet chi too yakꞌon xaambꞌal jaxca cꞌal chi yun junjun abꞌil, yet chi sjijen el bꞌey yakꞌnaj can stiꞌ tet Jehová. 22 Jal pax ix Ana xin, ma too ix yetoj ebꞌ, yuxan jix yal ix tet yichamil jaxca tiꞌ:
—Cꞌamto chin too tinaniꞌ je yetoj, jato yet chi el naj unin tiꞌ yin wim, catuꞌ chin too an. Jain wal caw chi too wakꞌcan naj unin tiꞌ, yet chi wakꞌon xacꞌal can naj yin junelne tet Jehová, ẍi ix.
23 Jix takꞌwi naj Elcaná tet ix jaxca tiꞌ:
—Jaꞌ jun tzet cha naꞌ tuꞌ, jaꞌ ojabꞌ cha wunne; watxꞌ ojabꞌ ja we can yetoj naj unin tiꞌ. Jaꞌ ojabꞌ to yet chi el naj unin tiꞌ yin yim, catuꞌ chach toi, yet cha jijen el bꞌey jix ja wakꞌcan ja tiꞌ tet Jehová, ẍi naj tet ix.
Queytuꞌ jix yun scan ix yetoj naj unin tuꞌ, masantaꞌcꞌal yet jix el naj yin yim. 24 Jaꞌ yet jix el naj unin tuꞌ yin yim xin, catuꞌ jix iꞌletoj naj yu smam xutx bꞌey scalubꞌal Jehová bꞌey Siló, caw yaliẍ to naj unin tuꞌ. Catuꞌ jix yiꞌontoj oxcꞌon noꞌ achꞌe wacax ebꞌ, jix yiꞌon cꞌal pax toj wajebꞌ echbꞌal ixim tiriw ebꞌ, yetoj jun tzꞌuum neet jaxca txꞌuye yili, nonaj yu yal uva. 25 Jix lawi tuꞌ, jix smakꞌon cam jun noꞌ wacax ebꞌ yin xaambꞌalil, jix yakꞌon can naj yaliẍ unin tuꞌ ebꞌ yul skꞌabꞌ naj Elí, naj yakꞌomal xaambꞌal. 26 Jix yalon ix Ana tuꞌ tet naj Elí jaxca tiꞌ:
—Akꞌ mimancꞌulal win an, jain ton tiꞌ jix jin julecꞌ ja cꞌatan yet junel, yet jix jin txali tet Jehová. 27 Yu naj unin tiꞌ yuxan jix jin txali, jaꞌ Jehová jix el yin scꞌul yakꞌon tzet jix jin kꞌanaꞌ. 28 Yu tuꞌ xin, chi el yin jin cꞌul, chi jul wakꞌon can naj tet Jehová. Jatacꞌalaꞌ jantaj skꞌinal naj bꞌey yul yibꞌankꞌinal tiꞌ, yet Jehová chi yun can oc naj, ẍi ix tet naj Elí.
Yu tuꞌ xin, jix ey noan naj Elí sat txꞌotxꞌ yin yoc eyilal tet Jehová.