Jal pax ebꞌ ánima ey bꞌey Judá xin, jix iꞌletoj ebꞌ bꞌey Babilonia, yu cꞌal spenail jix yun ebꞌ.

2 Jaꞌ ebꞌ Israel jix bꞌabꞌi meltzonajtej bꞌey xꞌotxꞌ, yetoj cꞌal bꞌey sconobꞌ, jaꞌton ebꞌ yakꞌomal xaambꞌal, ebꞌ Levita cꞌal ebꞌ chi akꞌwi servil bꞌey templo. 3 Jaꞌ bꞌey Jerusalén jix caey ecꞌ ebꞌ yicꞌaal Judá, naj Benjamín, naj Efraín cꞌal naj Manasés.

4-6 Jaꞌ xol ebꞌ yicꞌaal Judá tuꞌ, ey 690 ebꞌ winaj yin masanil. Jaꞌ xol ebꞌ yicꞌaal Fares, scꞌaal Judá, a conobꞌ Utai, jaꞌ naj yaaw yeoc xol ebꞌ. Jaꞌ jun tuꞌ scꞌaal Amihud, yetoj cꞌal pax wanxa yichmam yin xolilal, jaꞌton: Omrí, Imrí, Baní cꞌal Fares scꞌaal Judá. Jaꞌ xol ebꞌ yicꞌaal Selá, scꞌaal naj Judá, jaꞌ naj Azarías jaꞌ bꞌabꞌel yeoc xol ebꞌ, yaaw yeoc xol masanil ebꞌ yican to sbꞌa yetoj. Jaꞌ xol ebꞌ yicꞌaal naj Zérah, scꞌaal pax Judá, jaꞌ naj Jeuel eyoc yaawil xol ebꞌ yican.

7-9 Jaꞌton slistail ebꞌ eyoc yin yaawilal xol ebꞌ yicꞌaal Benjamín tiꞌ, jaꞌton: Salú, scꞌaal Mesulam, yitxiquin Hodavías, yicꞌaal Asenúa, Ibneías, scꞌaal Jeroham, Elá, yitxiquin Uzí, yicꞌaal Micrí, Mesulam, scꞌaal Sefatías, yitxiquin Reuel yicꞌaal Ibnías. Ey 956 ebꞌ winaj yin masanil, jatacꞌalaꞌ ye can stzꞌibꞌele yul an juun.

10-13 Jaꞌ ebꞌ yakꞌomal xaambꞌal caan bꞌey Jerusalén, yaaw yeoc xol ebꞌ yican, jaꞌton: Jedaías, Joiarib, Jaquín cꞌal Azarías, scꞌaal naj Hilquías. Jaꞌ ebꞌ yichmam naj Azarías tol bꞌinabꞌil ebꞌ, jaꞌton: Mesulam, Sadoc, Meraiot cꞌal Ahitub. Jaꞌ naj Azarías tiꞌ, yaaw yeoc bꞌey stemplo Dios. Jaꞌ xol ebꞌ yaaw yeoc tuꞌ, ey cꞌal pax oc naj Adaías scꞌaal Jeroham. Jaꞌ smam icham ebꞌ caw bꞌinabꞌil ebꞌ, jaꞌton Pashur, cꞌal Malquías. Jaꞌ naj Masai, scꞌaal Adiel, jaꞌ yichmam ebꞌ tol caw bꞌinabꞌil, jaꞌton: Jahzera, Mesulam, Mesilemit, cꞌal Imer. Ey 1,760 ebꞌ winaj xol ebꞌ tuꞌ, caw jelan smulna ebꞌ bꞌey stemplo Dios.

14 Jaꞌ ebꞌ yaaw yeoc xol ebꞌ Levita caan bꞌey Jerusalén, jaꞌton: Semaías scꞌaal Hasub, yitxiquin Azricam, yicꞌaal Hasabías cꞌal Merarí; 15 Bacbacar, Heres, Galal cꞌal Matanías, scꞌaal naj Micaías yitxiquin naj Zicrí, yicꞌaal Asaf. 16 Abdías, scꞌaal Semaías, yitxiquin Galal, yicꞌaal Jedutún. Jaꞌ naj Berequías, scꞌaal Asá yitxiquin Elcaná, jaꞌ tituꞌ jix caey ecꞌ bꞌey aldealaj yul yet ebꞌ Netofátitas.

17 Jal ebꞌ chi teynen puerta xin, jaꞌton: Salum, Acub, Talmón, Ahimán, yetoj wanxa yican ebꞌ. Jaꞌ naj Salum tuꞌ, jaꞌ eyoc yin yaawilal xol ebꞌ, 18 masantaꞌcꞌal tinaniꞌ, chi tocꞌal teynele jun smajil na yet ebꞌ rey yetcꞌulal bꞌey chi aol cꞌu yu ebꞌ Levita tuꞌ. Jaꞌ ebꞌ tuꞌ eyoc yibꞌan yu steynen smajil na xol ebꞌ yet Levitail.

19 Jaꞌ naj Salum scꞌaal Coré, yitxiquin Ebiasaf, yicꞌaal Coré yetoj cꞌal wanxa ebꞌ yican, jaꞌ ebꞌ tuꞌ chi teynen bꞌey stiꞌ spuertail scalubꞌal Jehová, jaxca jix yun steynele spuertail scalubꞌal Dios yu smam icham ebꞌ yet peyxa.

20 Jaꞌ yet yalantoj tuꞌ, jaꞌ naj Finees, scꞌaal Eleazar jaꞌ naj yaaw yeoc xol ebꞌ chi teynen scalubꞌal Jehová. Caw jix colwa cꞌal Jehová yetoj naj.

21 Jaꞌ naj Zacarías, scꞌaal Meselemías, jaꞌ chi teynen spuertail stiꞌ scalubꞌal Jehová bꞌey chi ẍaꞌle sbꞌa ebꞌ yetoj Dios.

22 Jaꞌ sbꞌisil ebꞌ chi teyne stiꞌ spuertail scalubꞌal Dios tuꞌ, ey 212 ebꞌ tzꞌibꞌebꞌilcan sbꞌi, jatacꞌalaꞌ yicꞌaal junjun ebꞌ. Jaꞌ naj rey David, cꞌal naj Samuel tol ẍejabꞌ Dios yeocoj. Jaꞌ ebꞌ jix aon oc ebꞌ yin yopiso tol caw miman yeloc apnoj. 23 Jaꞌ ebꞌ tuꞌ chi akꞌwi servil yin xolilal yetoj cꞌal scꞌaal junjun ebꞌ, yet chi steynen spuertail sna Dios, chi yal yeloc apnoj jaꞌton scalubꞌal. 24 Ey cꞌal oc steynemal spuertail bꞌey scanpaqꞌuil: Chi yal yeloc apnoj yetcꞌulal bꞌey chi aol cꞌu, yetcꞌulal bꞌey chi too cꞌu, bꞌey yetcꞌulal norte, cꞌal bꞌey yetcꞌulal sur. 25 Jaꞌ ebꞌ yet Levitail ebꞌ, caan bꞌey wanxa conobꞌ, chi jul ebꞌ colwa yu steynele templo tuꞌ, yin xolilal chi yute oc sbꞌa ebꞌ steyneni yin jujebꞌtaj cꞌual chi yun sjul ebꞌ. 26 Ey canwan ebꞌ Levita miman yeloc apnoj yopiso. Jaꞌ ebꞌ tuꞌ eyoc steynemaloj wan cuarto bꞌey cꞌuan a wan mitxꞌkꞌabꞌe yet templo yeocoj. 27 Jaꞌ yinlaj templo tuꞌ, chi ecꞌ akꞌbꞌal yu ebꞌ chi teyneni; jaꞌ ebꞌ inen a slaweal yet chi sjajon templo ebꞌ yet junjun skꞌinibꞌalil. 28 Ey ebꞌ Levita eyoc yibꞌan steynen wan mitxꞌkꞌabꞌe tol caw yaꞌilbꞌil chi yun skꞌanle yet chi oc eyilal tet Jehová, sowalil jaꞌ ebꞌ chi iꞌon eltej cꞌal yaon can octoj ebꞌ, jaꞌton ebꞌ eyoc yibꞌan yilontoj. 29 Jal wanxa ebꞌ xin, chi ilon wanxa mitxꞌkꞌabꞌe yet templo, yetoj cꞌal pax ixim jarina, yal uva, aceite olivo, incienso cꞌal perfume. 30 Ey ebꞌ yakꞌomal xaambꞌal tuꞌ eyoc yibꞌan yin swaꞌnen wan perfume tuꞌ. 31 Jaꞌ jun Levita chi yij Matatías, sbꞌabꞌel scꞌaal naj Salum yin yicꞌaal Coré, jaꞌ jun tuꞌ eyoc yibꞌan swaꞌnen ixim pan chi akꞌle yin ofrendail. 32 Jaꞌ wan yet Levitail ebꞌ, ebꞌ yicꞌaal Quehat, jaꞌ ebꞌ tuꞌ eyoc yibꞌan swaꞌnen ixim pan chi ey txolan sat meẍa yul templo yet junjun scꞌual xewilal. 33 Ey cꞌal pax ebꞌ yaaw yeoc xol yicꞌaal ebꞌ Levita chi bꞌitni. Jaꞌ tituꞌ caan ebꞌ bꞌey wan cuartolaj yet templo tuꞌ, cꞌam junojxa mulnail chi yil ebꞌ, yutol ey cꞌal oc ebꞌ yin yopiso tuꞌ yet chi ecꞌ cꞌu, cꞌal yet chi ecꞌ akꞌbꞌal.

34 Jaꞌton wan jix bꞌina tiꞌ yaaw yeoc ebꞌ xol masanil yicꞌaal ebꞌ Levita, jatacꞌalaꞌ yeoc slistail ebꞌ yetoj yicꞌaal, jaꞌ ebꞌ tuꞌ, jaꞌ bꞌey Jerusalén caan ebꞌ.

35 Jaꞌ bꞌey conobꞌ Gabaón, jaꞌ tituꞌ jix caey ecꞌ naj Jehiel, jaꞌton yichmam ebꞌ a Gabaón tuꞌ, jaꞌ yistil chi yij Maacá. 36 Jaꞌ ebꞌ scꞌaal naj, Abdón sbꞌi naj bꞌabꞌel unin, catuꞌ chi tit naj Sur, Quis, Baal, Ner, Nadab, 37 Guedor, Ahió, Zacarías cꞌal Miclot. Jaꞌ naj Miclot tuꞌ, jaꞌton smam Simam. 38 Jaꞌ ebꞌ tuꞌ jix caey cꞌal pax ecꞌ ebꞌ yetoj ebꞌ yican bꞌey Jerusalén.

39 Jaꞌ naj Ner, jaꞌ ey scꞌaal naj Quis, jaꞌ naj Quis jaꞌ ey scꞌaal Saúl, jaꞌ ebꞌ scꞌaal naj Saúl, jaꞌton: Jonatán, Malquisúa, Abinadab cꞌal naj Es-baal. 40 Jaꞌ naj Jonatán, jaꞌton smam naj Merib-baal smam Micaías. 41 Jaꞌ ebꞌ scꞌaal naj Micaías, jaꞌton: Pitón, Mélec, Tarea cꞌal Ahaz. 42 Jaꞌ naj Ahaz, jaꞌton smam naj Jará, jaꞌ Jará jaꞌton smam naj Alémet, Azmávet cꞌal Zimrí. Jaꞌ xolilal ebꞌ yicꞌaal Zimrí, jaꞌton Mosá, 43 Biná, Refaías, Elasá, cꞌal Asel.

44 Ebꞌ scꞌaal Asel, ey wajwan ebꞌ, jaꞌton: Azricam, Bocrú, Ismael, Searías, Abdías cꞌal Hanán.