Ebꞌ Ánima Caan Bꞌey Jerusalén
11
Jaꞌ ebꞌ yaaw bꞌey jun nación tuꞌ jix can caan ebꞌ bꞌey Jerusalén. Jal wanxa ebꞌ ánima caan ebꞌ bꞌey wanxa conobꞌlaj xin, jix skꞌanle ebꞌ tet Dios yet chi txꞌoxle yil ebꞌ, mactxequel xol ebꞌ chi caey bꞌey junjun laonebꞌ nail bꞌey Jerusalén, jaꞌton bꞌey jun conobꞌ tol yet Dios yeocoj. Jaꞌ ebꞌ bꞌey junjun laonebꞌ nail chi sicꞌle yu chi too caan ebꞌ bꞌey Jerusalén. Jal bꞌalonebꞌxa nail xin, chi can caan ebꞌ bꞌey wanxa conobꞌlaj. 2 Jix lawi tuꞌ xin, jix yalon watxꞌ kꞌane ebꞌ conobꞌ yin masanil ebꞌ jix bꞌejcha scꞌul, scan caan bꞌey conobꞌ Jerusalén. 3 Jaꞌ ebꞌ yakꞌomal xaambꞌal, cꞌal ebꞌ Levita chi akꞌwi servil bꞌey stemplo Dios yetoj ebꞌ yicꞌaal ebꞌ yakꞌomal servil naj rey Salomón, jaꞌ bꞌey smajul txꞌotxꞌ ebꞌ yet Judá, jix caey ecꞌ ebꞌ. Jaꞌ xol ebꞌ tuꞌ jix eltej jaywan ebꞌ yaaw yeoc xol ebꞌ, jix can caan ebꞌ bꞌey Jerusalén. 4 Jaꞌ xol ebꞌ yicꞌaal Judá, jaꞌ tituꞌ jix eltej cawan ebꞌ yaaw tiꞌ: Jun chi yij Ataías scꞌaal Uzías, yitxiquin naj Zacarías, jaꞌ yichmam ebꞌ, jaꞌton ebꞌ tiꞌ: Amarías, Sefatías, Mahalalel, yicꞌaal Fares ebꞌ tiꞌ. 5 Jaꞌ slistail ebꞌ yichmam Maaseías yin xolilal jaꞌton: Baruc, Colhozé, Hazaías, Adaías, Joiarib, Zacarías, yicꞌaal Siloní ebꞌ tiꞌ. 6 Jaꞌ masanil ebꞌ yicꞌaal Fares jix caey can bꞌey Jerusalén, ey 468 ebꞌ. Masanil ebꞌ tiꞌ soldado cꞌal el ebꞌ, caw wal jelan yakꞌon jowal ebꞌ.7 Jal pax xol ebꞌ yicꞌaal Benjamín, jaꞌton Salú eyoc yin yaawil. Jaꞌ slistail ebꞌ yichmam Salú yin xolilal, jaꞌton Mesulam, Joed, scꞌaal Pedaías, yitxiquin Colaías, Maaseías, Itiel, Isaías, 8 yetoj ebꞌ yican Gabai cꞌal Salai. Ey 928 ebꞌ yet Benjamín yin masanil. 9 Jaꞌ scomandante ebꞌ, jaꞌton naj Joel, scꞌaal naj Zicrí, jaꞌ Judá scꞌaal Senúa, jaꞌ jun tuꞌ scaabꞌ comandante yeoc bꞌey conobꞌ tuꞌ.
10 Jaꞌ ebꞌ yaaw yeoc xol ebꞌ yakꞌomal xaambꞌal, ebꞌ jix caey can bꞌey Jerusalén, ey cawan ebꞌ: Naj bꞌabꞌel chi yij Jedaías scꞌaal Joiarib yican Jaquín. 11 Naj scaabꞌ chi yij sbꞌi Seraías, scꞌaal Hilquías yitxiquin Mesulam; ebꞌ smam icham jaꞌton: Sadoc, Meraiot, cꞌal Ahitub. Jaꞌ Ahitub tuꞌ, jaꞌ naj chi teynen stemplo Dios yet peyxa. 12 Jaꞌ masanil yican ebꞌ Seraías chi mulna bꞌey stemplo Dios, ey 822 ebꞌ. Naj yet yox chi yij sbꞌi Adaías, scꞌaal Jeroham, yitxiquin Pelalías. Ebꞌ smam icham jaꞌton Amsí, Zacarías, Pashur, yetoj Malquías. 13 Jaꞌ sbꞌisil ebꞌ yaaw yeoc xol ebꞌ yican Adaías, ey 242 ebꞌ yin masanil; naj yet scan chi yij Amasai scꞌaal Azarel, yitxiquin Ahzai; ebꞌ smam icham jaꞌton Mesilemot, yetoj Imer. 14 Jaꞌ ebꞌ yican Amasai, ey 128 ebꞌ masanil. Jaꞌ naj Zabdíel scꞌaal Guedolim, jaꞌ naj yaaw yeoc xol ebꞌ.
15 Jaꞌ yaaw yeoc xol ebꞌ Levita, jaꞌton: Semaías, Sabetai, Jozabad, Matanías, Bacbuquías cꞌal Abdá. Jaꞌ slistail ebꞌ yichmam Semaías yin xolilal jaꞌton Hasub, Azricam, Hasabías, Binuy. 16 Jaꞌ naj Sabtai cꞌal naj Jozabad eyoc ebꞌ yilomaloj mulnail yinlaj templo. 17 Jaxa naj Matanías scꞌaal Micaías, yitxiquin Zabdí, yicꞌaal Asaf eyoc yin ijbꞌawomal xol ebꞌ Levita chi bꞌitnen watxꞌ kꞌane cꞌal alo yu diosal yet chi oc txa. Jaꞌ naj Bacbuquías, colwawom yeoc bꞌey Matanías. Jaꞌ naj Abdá scꞌaal Samúa, yitxiquin Galal yicꞌaal Jedutún. 18 Jaꞌ masanil ebꞌ Levita jix can bꞌey Jerusalén bꞌey sconobꞌ Dios, ey 284 ebꞌ yin masanil.
19 Jaꞌ ebꞌ chi teynen puerta: Jaꞌton Acub, Talmón cꞌal ebꞌ yican. Jaꞌ ebꞌ chi teynen bꞌey puerta tuꞌ, ey 172 ebꞌ yin masanil.
20 Jal wanxa ebꞌ ket Israelal yetoj cꞌal jaywanojxa ebꞌ yakꞌomal xaambꞌal yetoj wanxa ebꞌ Levita, jix caey can ecꞌ ebꞌ bꞌey wanxa conobꞌlaj yul yet Judá, junjun cꞌal ebꞌ bꞌey smajul txꞌotxꞌ. 21 Jaꞌ ebꞌ chi mulna bꞌey templo, jaꞌ bꞌey Ófel jix caey ecꞌ ebꞌ yul yet Jerusalén. Jaꞌ Sihá cꞌal Guispá jix ijbꞌan ebꞌ yin mulnail tuꞌ.
22 Jaꞌ mac yaaw yeoc xol ebꞌ Levita bꞌey Jerusalén, jaꞌton naj Uzí. Jaꞌ slistail ebꞌ yichmam naj Uzí yin xolilal, jaꞌton ebꞌ tiꞌ: Baní, Hasabías, Matanías, Micaías, jaꞌton ebꞌ yicꞌaal Asaf. Jaꞌ xol ebꞌ yicꞌaal Asaf tuꞌ, jaꞌton ebꞌ chi ijbꞌan bꞌit bꞌey stemplo Dios. 23 Jaꞌ naj rey David jix alon canoj tzet chi yun yoc junjun tujan ebꞌ chi bꞌitni yin xolilal.
24 Jaꞌ mactxequel chi aon oc stiꞌ ebꞌ conobꞌ yin yal cꞌal tzet kꞌaneal sattaj naj rey, jaꞌton naj Petahías, scꞌaal Mesezabel, yicꞌaal naj Zérah scꞌaal Judá.
Bꞌey Jix Caey Wanxa Ebꞌ Conobꞌ
25 Jaꞌ wanxa ebꞌ yicꞌaal Judá jix caey ebꞌ bꞌey Quiriat-arbá, Dibón, Jecabseel, 26 Josué, Moladá, Bet-pélet, 27 Hasar-sual, Beerseba, 28 Siclag, Meconá, 29 En-rimón, Sora, Jarmut, 30 Zanóah, Adulam, Laquis cꞌal Azecá, yetoj cꞌal yaldeail cꞌal bꞌey chi oc mulnail. Jix caey cꞌal ecꞌ ebꞌ bꞌey Beerseba masantaꞌcꞌal bꞌey sjobꞌeal txꞌotxꞌ Hinom. 31 Jaꞌ ebꞌ yicꞌaal naj Benjamín jix caey ecꞌ ebꞌ bꞌey Guebá, Micmás, Aías, Betel yetoj cꞌal yaldeail. 32 Yetoj cꞌal pax bꞌey Anatot, Nob, Ananías, 33 Hasor, Ramá, Guitaim, 34 Hadid, Seboím, Nebalat, 35 Lod, Onó cꞌal bꞌey sjobꞌeal bꞌey ey ebꞌ waꞌnem chꞌen. 36 Ey cꞌal pax ebꞌ Levita jix ẍaꞌ smajul txꞌotxꞌ yul yet Judá cꞌal yul yet Benjamín.