9 Ebꞌ Levita jix yakꞌ cꞌal pax sbꞌi, jaꞌton ebꞌ tiꞌ: Josué scꞌaal Azanías, Binuy yicꞌaal Henadad cꞌal Cadmiel; 10 yetoj ebꞌ yet Levitail, jaꞌton: Sebanías, Hodías, Quelitá, Pelaías, Hanán, 11 Micaías, Rehob, Hasabías, 12 Zacur, Serebías, Sebanías, 13 Hodías, Baní cꞌal Beninu.

14 Ebꞌ eyoc syaawiloj conobꞌ tuꞌ, jaꞌton ebꞌ tiꞌ: Parós, Pahat-moab, Elam, Zatú, Baní, 15 Binuy, Azgad, Bebai, 16 Adonías, Bigvai, Adín, 17 Ater, Ezequías, Azur, 18 Hodías, Hasum, Besai, 19 Harif, Anatot, Nebai, 20 Magpías, Mesulam, Hezir 21 Mesezabel, Sadoc, Jadúa, 22 Pelatías, Hanán, Anaías, 23 Oseas, Hananías, Hasub, 24 Halohés, Pilhá, Sobec, 25 Rehúm, Hasabná, Maaseías, 26 Ahías, Hanán, Anán, 27 Maluc, Harim cꞌal Baaná.

28 Jaꞌ wanxa ebꞌ conobꞌ, jaꞌton ebꞌ yakꞌomal xaambꞌal, ebꞌ Levita, ebꞌ chi teynen puerta, ebꞌ chi bꞌitni, ebꞌ chi akꞌwi servil bꞌey templo, yetoj cꞌal masanil ebꞌ ánima jix spoꞌoel sbꞌa xol wanxa txꞌoj conobꞌal eyecꞌ tituꞌ, yet chi sjijen ẍejbꞌanil Dios ebꞌ, jix yakꞌ stiꞌ ebꞌ yetoj yistil, yetoj scꞌaal, cꞌal yetoj scutzꞌin ebꞌ, jaꞌton ebꞌ tol eyxa snaꞌbꞌal. 29 Jix syambꞌa oc sbꞌa ebꞌ yetoj yican cꞌal yetoj ebꞌ yaaw, jix yakꞌon stiꞌ ebꞌ yunen jaxca yalon ẍejbꞌanil Dios albꞌilcan tet naj Moisés. Jix yalon ebꞌ tol oj sjije ebꞌ cꞌal swaꞌnen ebꞌ jaxca chi yal ẍejbꞌanil Dios. 30 Yu tuꞌ xin, jix yalon ebꞌ, manxa oj kakꞌ nupoj ebꞌ ix cu cutzꞌin yetoj ebꞌ txꞌoj conobꞌal, man pax oj nupoj ebꞌ naj cu cꞌaal yetoj scutzꞌin ebꞌ. 31 Ta chi jul ebꞌ txꞌoj conobꞌal xon masanil tujan sat awo yet scꞌual xewilal, cꞌam chi cu manwej tet ebꞌ, yet scꞌual xewilal cꞌal yet wanxa scꞌual kꞌin. Yuxan jaꞌ yet sjuj abꞌil oj cancan txꞌotxꞌ txꞌotxꞌ xewoj, catuꞌ oj joꞌon tan sjec ebꞌ ket conobꞌ.

32 Yetoj cꞌal pax oj, oj cu takꞌe oc kibꞌan tol oj kakꞌ canebꞌoj gramo,^a chꞌen plata junjun jon yin junjun abꞌil yet chi kꞌanbꞌalnele chꞌen bꞌey stemplo cu Diosal. 33 Jaꞌ chꞌen oj manon ixim pan chi akꞌle sattaj Dios, cꞌal ofrenda yet junjun cꞌu, yin ixim tiriw, yetoj xaambꞌal chi akꞌle tzꞌaꞌ junjun cꞌu, yetoj xaambꞌal yet scꞌual xewilal, cꞌal yetoj yet chi ali xꞌaaw, cꞌal yetoj wanxa kꞌin chi ecꞌ cꞌaltaꞌ junjun abꞌil. Yetoj cꞌal wanxa ofrenda chi akꞌlei, yetoj cꞌal pax xaambꞌal chi akꞌle yu stooloj cu penail jaon Israel jon tiꞌ, cꞌal yu koc yin eyilal bꞌey stemplo cu Diosal.

34 Yetoj cꞌal pax oj, caw jix cu naꞌoc kin sicꞌlebꞌil yin junjun tujan icꞌaaleal jon, cꞌal jaon yakꞌomal jon xaambꞌal, ma Levita jon, ma comon ánima jon, yet watxꞌ chi kilaꞌ tzet tiempoal yul junjun abꞌil oj kakꞌ teꞌ siꞌ bꞌey stemplo cu Diosal, yet chi tzꞌaꞌ teꞌ bꞌey yet xaambꞌal sattaj Jehová cu Diosal jaxca ye can ey stzꞌibꞌele yul an ley. 35 Yetoj cꞌal pax oj jix kakꞌ cu tiꞌ tol oj kiꞌtoj cu bꞌabꞌel sat awo chi el bꞌey cu txꞌotxꞌ cꞌal bꞌabꞌel sat teꞌ cu awbꞌeal teꞌ yet junjun abꞌil bꞌey stemplo cu Diosal. 36 Catuꞌ oj kiꞌon cꞌal pax toj ebꞌ cu bꞌabꞌel unin cꞌal noꞌ bꞌabꞌel yuneꞌ cu wacax, yetoj cꞌal noꞌ meꞌ, bꞌey stemplo cu Diosal sattaj ebꞌ yakꞌomal xaambꞌal chi akꞌwi servil bꞌey templo, jaxca ye stzꞌibꞌelecan yul an ley. 37 Jacꞌalaꞌ oj kiꞌ cꞌal pax toj cu cꞌuanbꞌal yet cu colwal tet ebꞌ yakꞌomal xaambꞌal, jaꞌton ixim cu bꞌabꞌel jarina cꞌal bꞌabꞌel sat teꞌ cu awbꞌeal teꞌ, yetoj cꞌal pax cu bꞌabꞌel yal uva cꞌal cu bꞌabꞌel aceite olivo. Catuꞌ oj kiꞌontoj sdiezmoal sat cu awo tet ebꞌ Levita, yutol jaꞌ ebꞌ chi chaꞌon sdiezmoal tzet chi kiꞌ yin cu mulnail bꞌey cu txꞌotxꞌ bꞌey junjun conobꞌ.

38 Jaꞌ yet oj toj ẍaꞌon diezmo ebꞌ Levita tuꞌ, sowalil chi too junoj ebꞌ yakꞌomal xaambꞌal ebꞌ yicꞌaal Aarón yetoj ebꞌ. Jaꞌ ebꞌ Levita tuꞌ chi iꞌontoj bꞌey cꞌuanbꞌal bꞌey stemplo cu Diosal, jaꞌ sdiezmoal wan diezmo chi ẍaꞌ ebꞌ tuꞌ, chi yiꞌ pax el sdiezmoal ebꞌ. 39 Yutol jaon Israel jon tiꞌ, yetoj cꞌal ebꞌ Levita oj kiꞌtoj cu tiriw, yetoj yal uva, cꞌal aceite olivo, bꞌey cꞌuan wan mitxꞌkꞌabꞌe tol yet Dios yeocoj, bꞌey eyecꞌ ebꞌ yakꞌomal xaambꞌal yin yopiso, ebꞌ chi teynen puerta, cꞌal ebꞌ chi bꞌitni. Catuꞌ chi kalon can yetoj cu tiꞌ tol man oj cu bꞌejcan stemplo cu Diosal.