Jix Yal Spenail Ebꞌ Israel Naj Esdras Tet Dios
9
Jaꞌ yet 24 yoc jun yet sjuj xꞌaaw tuꞌ, jix syambꞌa oc sbꞌa masanil ebꞌ Israel, jix txali ebꞌ cꞌal yijle nocha sbꞌa ebꞌ, cꞌal yaon oc an eel pichile ebꞌ, cꞌal yaon atoj pojoj yibꞌan sjolom ebꞌ. 2 Jix spoꞌon el sbꞌa ebꞌ xol ebꞌ txꞌoj conobꞌal. Jix a linan ebꞌ yu yalon atej spenail ebꞌ, cꞌal yetoj spenail yichmam ebꞌ. 3 Jaꞌ yet eyecꞌ ebꞌ tituꞌ, oxebꞌ hora jix yiꞌtoj yet jix yawten a an yuunal sley Jehová xol ebꞌ, jaxa yin oxebꞌxa hora xin, jix yalatej spenail ebꞌ cꞌal yiꞌon ey sbꞌa ebꞌ conobꞌ tet Dios. 4 Ey jaywan ebꞌ Levita, jaꞌton: Josué, Binuy, Cadmiel, Sebanías, Binui, Serebías, Baní, cꞌal Quenaní, jix atoj ebꞌ yibꞌan jun teꞌ bꞌatxbꞌal naat eyaoj, catuꞌ jix a yaw ebꞌ yin ipal tet Jehová Dios. 5 Catuꞌ jix yalon ebꞌ Levita, jaꞌton naj Josué, cadmiel, Binuy, Hasabnías, Serebías, Hodías, Sebanías cꞌal Petahías jaxca tiꞌ: Aanwej waanoj, kalwej watxꞌ kꞌane tet Jehová cu Diosal. Cu bꞌitnewej sbꞌi cꞌal kalon watxꞌ kꞌane tet.6 Jix lawi tuꞌ, jix yalon ebꞌ jaxca tiꞌ: Jaach tiꞌ, asanne jaach Dios, cꞌam junojxa, jaach jix ja waꞌne satcan cꞌal masanil weycan, jaach jix ja waꞌne txꞌotxꞌ txꞌotxꞌ yetoj masanil tzetyetal ey sat txꞌotxꞌ, yetoj jaꞌ Mar, cꞌal masanil tzetyetal ey yul jaꞌ. Jaach cha wakꞌ yiquisal masanil tzetyetal, cꞌal ebꞌ ángel chi oc ebꞌ yin eyilal ey jaach.
7 Jaach Jehová, cu Diosal jaach toni, jaach jix ja sicꞌ can el naj Abraham. Jaach jix ja wiꞌeltej naj bꞌey conobꞌ Ur yul yet ebꞌ Caldeo, catuꞌ jix ja wakꞌon yij sbꞌi naj yin Abraham. 8 Jix ja wilaꞌ tol caw wal chi yaoc scꞌul naj ja win, yuxan jix ja wakꞌon can jun ja wa kꞌane yetoj naj. Tol oj ja wakꞌcan txꞌotxꞌ txꞌotxꞌ tet ebꞌ yicꞌaal, jaꞌton txꞌotxꞌ yet ebꞌ Cananeo, ebꞌ Hitita, ebꞌ Amorreo, ebꞌ Ferezeo, ebꞌ Jebuseo cꞌal ebꞌ Gergeseo. Yutol jix ja wakꞌ eloc bꞌey jix ja wal canoj, yutol chi yun cꞌal tzet cha walaꞌ. 9 Jaach tiꞌ, jix ja wilaꞌ tol caw wal jix yabꞌ syaꞌil ebꞌ cu mam icham bꞌey Egipto jon, jix ja wabꞌ yalon sbꞌa ebꞌ yet eyecꞌ ebꞌ bꞌey jaꞌ Cajin Mar. 10 Jix ja wun wan milagro tol qꞌueyubꞌtaj xacꞌal yili sattaj naj rey Faraón, cꞌal tet masanil ebꞌ ẍejabꞌ, cꞌal tet masanil ánima ey bꞌey yul sconobꞌ naj tuꞌ, yutol jix ja wilon tzet wal jix yun yetnele ebꞌ ket Israelal, yuxan caw miman chi yun sbꞌina ja bꞌi yu ebꞌ conobꞌ. 11 Jix ja poꞌon ey snan jaꞌ mar sattaj ebꞌ, jix ecꞌtoj ebꞌ bꞌey tajin txꞌotxꞌ. Jal ebꞌ tzajan oc yintaj ebꞌ, jix toocan ebꞌ yich jaꞌ jaxca wal chi yun stoo can bꞌalaloj junoj chꞌen chꞌen yich jaꞌ. 12 Jix ja wiꞌon bꞌey ebꞌ yetoj jun bꞌocꞌan asun yet cꞌualil, jal yet akꞌbꞌalil jix ja wijbꞌa ebꞌ yetoj jun miman kꞌakꞌ, jaꞌton jun tuꞌ jix tzejtanen sbꞌe ebꞌ bꞌey chi too ebꞌ.
13 Jix lawi tuꞌ, catuꞌ jix jaach eyol sjolom wonan Sinaí, catuꞌ jix jaach kꞌanabꞌ eytej tet ebꞌ bꞌey satcan. Jix ja wakꞌon ja chejbꞌanil tet ebꞌ, cꞌal cuybꞌanile tol caw wal yel, yetoj cꞌal chejbꞌanile caw wal watxꞌ. 14 Jix ja cuyon ebꞌ, tol chi sjije scꞌual xewilal ebꞌ, yu yiꞌle a can ja bꞌi yu ebꞌ, jix ja wakꞌon ja chejbꞌanil cꞌal cuybꞌanile tet naj Moisés, jaxa naj jix alon tet ebꞌ. 15 Catuꞌ jix ja wakꞌon pax sloꞌbꞌe ebꞌ yet ey swail ebꞌ, catuꞌ jix ja wakꞌon pax eltej jaꞌ sat jun chꞌen chꞌen, yet chi yuqꞌuen ebꞌ. Jix lawi tuꞌ, jix ja walon tet ebꞌ tol chi too caan ebꞌ bꞌey txꞌotxꞌ txꞌotxꞌ bꞌey jix ja wakꞌ ja tiꞌ ja wakꞌon tet ebꞌ.
16 Jal ebꞌ naj cu mam icham tuꞌ jon xin, caw jix yiꞌa can sbꞌa ebꞌ, caw pit jix yute sbꞌa ebꞌ, catuꞌ ma sjije ja chejbꞌanil ebꞌ. 17 Ma yoche ebꞌ jix sjije cꞌal snaꞌontej ebꞌ jantaj tzet jix ja wunne yu swatxꞌiloj ebꞌ. Caw wal pit jix yute sbꞌa ebꞌ, yutol jaꞌ xol ebꞌ tuꞌ, tol jix yaoc jun syaawil ebꞌ yet jix ijbꞌale meltzo ebꞌ yin yakꞌomaloj servil ebꞌ a Egipto. Yu tuꞌ xin, jaach jin Diosal, ey ja mimancꞌulal, caw wal chi okꞌ ja cꞌul, caw wal ey ja mimancꞌulal cꞌal ja camcꞌulal. Caw ma yal ja cꞌul jix ja bꞌejcan ebꞌ. 18 Ilaꞌ tol tax jix swaꞌne jun chꞌen yechel wacax ebꞌ, catuꞌ jix yalon ebꞌ, tol abꞌ jaꞌ jun tuꞌ sdiosal ebꞌ jix iꞌon eltej ebꞌ bꞌey Egipto, caw pena xacꞌal jix yute sbꞌa ebꞌ. 19 Jal jaach jin Diosal, yetoj wal ja mimancꞌulal ma cꞌaltaꞌ ja bꞌejcan ebꞌ bꞌey cusiltaj txꞌotxꞌ. Jaꞌ jun miman bꞌocꞌan asun ma el sattaj ebꞌ yet cꞌualil yet jix ijbꞌale bꞌey ebꞌ yu, yetoj jun miman kꞌakꞌ ma el sattaj ebꞌ yet akꞌbꞌalil yet chi tzejtanele ebꞌ yu yet chi too ebꞌ yul sbꞌe. 20 Jix ja waontej ja Wespíritu yin ebꞌ, yet chi cuyle ebꞌ yu. Cꞌam bꞌey jix oc tucan ja waontej maná yet jix low ebꞌ, catuꞌ jix ja wakꞌon jaꞌ yucꞌ ebꞌ yet chi oc tucan stajin tiꞌal ebꞌ. 21 Jix ja wakꞌ cꞌal sloꞌbꞌe ebꞌ bꞌey cusiltaj txꞌotxꞌ yin cawinaj abꞌil. Cꞌam cꞌal niꞌoj tzetyetal tol ma ja wakꞌ tet ebꞌ, ma ichambꞌoj el spichil ebꞌ, cꞌam bꞌey jix mala yajan ebꞌ sbꞌeyi.
22 Jix ja wakꞌon wan conobꞌlaj cꞌal nacionlaj tet ebꞌ. Jix ja poꞌon ecꞌ xꞌotxꞌ ebꞌ, jix ẍaꞌon smajul txꞌotxꞌ ebꞌ bꞌey Hesbón, jaꞌton bꞌey jun nación bꞌey eyoc naj Sihón yin reyal, cꞌal bꞌey Basán, jaꞌton cꞌal pax bꞌey eyoc naj Og yin reyal. 23 Jix ja wakꞌon cꞌal pax chꞌibꞌ sbꞌisil yuninal ebꞌ jaxca xacꞌal bꞌisil weycan bꞌey satcan, jix ja wiꞌontoj ebꞌ yet chi caey ecꞌ ebꞌ bꞌey txꞌotxꞌ takꞌebꞌil can ja wu tet ebꞌ kichmam jon. 24 Jix apni oc ebꞌ smajon txꞌotxꞌ Canaán ebꞌ. Jaach jix ja wakꞌ eyqꞌuey ebꞌ ánima caan bꞌey jun txꞌotxꞌ tuꞌ, cꞌal ebꞌ rey yetoj cꞌal masanil ebꞌ ánima, jix ja waoc ebꞌ yul skꞌabꞌ ebꞌ, catuꞌ jix swaꞌne wal ebꞌ jaxca tzet chi yoche scꞌul. 25 Jix yiꞌon cꞌal pax oc wan conobꞌlaj ebꞌ tol caw wal watxꞌ scawxi, cꞌal txꞌotxꞌ txꞌotxꞌ caw wal watxꞌ chi yun yawoal, cꞌal na tol caw nonaj yu tzetyetal watxꞌ. Jix yiꞌon cꞌal pax oc ebꞌ jaꞌ ucꞌbꞌal jaꞌ, an uva, teꞌ olivo, cꞌal wanxa teꞌ awbꞌeal teꞌ chi yakꞌ sat. Jix low ebꞌ masantaꞌcꞌal jix no scꞌul ebꞌ, jix bꞌakꞌechbꞌi el ebꞌ, jix yakꞌ wal tzalabꞌoj scꞌul ebꞌ yu ja watxꞌcꞌulal.
26 Caw man jijemoj jix yute pax sbꞌa ebꞌ ey jaach, jix meltzo oc ebꞌ ja win catuꞌ jix yintajne el ja chejbꞌanil ebꞌ. Catuꞌ jix makꞌle cam ebꞌ ja chejabꞌ yu ebꞌ, cꞌam chi yoche ebꞌ tol chi al-le el ja chejbꞌanil. Yel xacꞌal miman spenail ebꞌ jix oc ey jaach. 27 Yu jun tuꞌ xin, yuxan jix ja waoc ebꞌ yul skꞌabꞌ wan scajat ebꞌ, jaꞌton ebꞌ tuꞌ jix etnen ebꞌ. Jaꞌ yet eyoc ebꞌ yin somcꞌulal cꞌal yin taccꞌulal, jix skꞌan ja colwal ebꞌ, jal jaach pax xin, yu ja miman watxꞌcꞌulal jix ja wabꞌ bꞌey satcan yu tzetyetal jix yal ebꞌ. Jix ja waon oc ebꞌ winaj jix colon el ebꞌ yul skꞌabꞌ ebꞌ chi etnen ebꞌ tuꞌ.
28 Jaxca tuꞌ xin, jaꞌ yet eyoc ebꞌ yin tzalacꞌulal junelxa, catuꞌ jix meltzo pax ebꞌ yunen spenail ja sattaj. Yu jun tuꞌ xin, yuxan jix ja wakꞌon pax eyqꞌuey ebꞌ yul skꞌabꞌ ebꞌ scajat, jaꞌton ebꞌ tuꞌ jix aon oc ebꞌ yin syaꞌtajil. Jix lawi tuꞌ jix skꞌanon pax ja colwal ebꞌ. Yutol caw ey ja miman camcꞌulal, jix ja wabꞌ bꞌey satcan yu tzet jix yal ebꞌ, caw ecꞌal el jix ja coleloj. 29 Jix ja waoc yin snaꞌbꞌal ebꞌ tol chi sjije ja chejbꞌanil ebꞌ. Caw ma ẍaꞌ yabꞌ niꞌoj ja chejbꞌanil ebꞌ, ma sjije ebꞌ tzet chi yal ja chejbꞌanil, jun chi akꞌon skꞌinal ebꞌ ta tol chi sjije ebꞌ tzet chi yalaꞌ. Jaꞌ tzet jix yun ebꞌ, tol caw pena cꞌal jix yute sbꞌa ebꞌ, caw pit jix yute sbꞌa ebꞌ, ma cꞌaltaꞌ ẍaꞌ ebꞌ yabꞌe. 30 Caw wal ecꞌal abꞌil jix ja wakꞌ techa ebꞌ, jix ja wakꞌon cꞌal yotajne el ebꞌ yu ja Wespíritu cꞌal yu ebꞌ ja chejabꞌ, ma cꞌaltaꞌ sjije ebꞌ. Yuxan yu jun tuꞌ, jix ja waon cantoj ebꞌ yul skꞌabꞌ wanxa nacionlaj. 31 Yu tuꞌ xin, yu ja miman watxꞌcꞌulal ma ja qꞌueycan el ebꞌ, catuꞌ ma ja bꞌejcan ebꞌ masanil, yutol Dios jaach, caw wal chi okꞌ ja cꞌul, yetoj ja watxꞌcꞌulal.
32 Yu tuꞌ xin, jaach cu Diosal, tol miman ja weloc apnoj, ey ja wipalil, caw wal ey ja mey, tol cꞌam cꞌal chi too qꞌueycꞌulal bꞌey jix ja wakꞌcan ja tiꞌ. Cꞌam bꞌey chi oc tucan ja camcꞌulal, catuꞌ cha wiloni yet jix oc syaꞌtajilal ebꞌ cu reyal jon, cꞌal ebꞌ cu yaawil jon, ebꞌ yakꞌomal oc cu xaambꞌal jon, ebꞌ ja chejabꞌ, cꞌal ebꞌ cu mam icham jon, cꞌal yetoj masanil ebꞌ ket conobꞌ jon. Yet tax cꞌal jix cu eyqꞌuey yul skꞌabꞌ ebꞌ sreyal Asiria, masantaꞌcꞌal tinaniꞌ. 33 Jaꞌ syaꞌtajilal cha wakꞌ kibꞌan jon smooal toni, yutol caw wal watxꞌ jaach, jal jon jaon tiꞌ jon cꞌam niꞌoj tzetyetal watxꞌ chi cu waꞌne jon. 34 Jaꞌ ebꞌ cu reyal jon, cꞌal ebꞌ cu yaawil jon, cꞌal ebꞌ yakꞌomal cu xaambꞌal jon, yetoj cꞌal ebꞌ cu mam icham jon, ma cꞌal ẍaꞌ ebꞌ yabꞌe, ma pax sjije ja chejbꞌanil ebꞌ jaxca cꞌal jix yun yal-le tet ebꞌ. 35 Jaxa wal jix yunne, caw wal watxꞌ sat txꞌotxꞌ txꞌotxꞌ bꞌey jix caey ecꞌ ebꞌ, yutol ey syaxil sat txꞌotxꞌ, asan xin, ma jaach yakꞌ servil ebꞌ, ma cꞌal sbꞌej yunen spenail ebꞌ.
36 Ilaꞌ wal kili tinaniꞌ jon, tuxa jix cu meltzo oc yin yakꞌomaloj servil bꞌey txꞌotxꞌ txꞌotxꞌ jix ja wakꞌ tet ebꞌ cu mam icham jon, yet chi low ebꞌ naj sat txꞌotxꞌ. 37 Jaꞌ sat awo tol watxꞌ chi yakꞌa yet ebꞌ rey yeocoj, jaꞌton ebꞌ jix ja wa can oc kibꞌan yu cu pital ey jaach jon. Chi yun ebꞌ tzet chi yoche scꞌul kin jon, cꞌal yin noꞌ cu jobꞌbꞌeal noꞌ jon, yu tuꞌ xin, yuxan caw wal chi kabꞌ syaꞌil yu ebꞌ jon.
38 Yu wal jun tuꞌ xin, yuxan jaon tiꞌ chi kakꞌ can cu tiꞌ ey jaach, tol chi tzꞌibꞌelecanoj tol yel oj cu jije jon, yuxan jaꞌ an juun tuꞌ chi oc can selloal cꞌal sbꞌi ebꞌ cu yaawil yin an, cꞌal ebꞌ Levita yetoj cꞌal ebꞌ yakꞌomal oc cu xaambꞌal jon, ẍi ebꞌ yin xa.