Masanil ebꞌ conobꞌ tuꞌ caw wal jix yaon oc xiquin ebꞌ yin tzet chi yal an yuunal ley tuꞌ. 4 Waꞌnebꞌil a jun teꞌ miman bꞌatxlubꞌ teꞌ bꞌey linan atoj naj Esdras. Ey cꞌal pax atoj naj Matatías, naj Sema, naj Anías, naj Urías, naj Hilquías cꞌal naj Maaseías, bꞌey swatxꞌ kꞌabꞌ naj. Jal pax bꞌey sqꞌuexan kꞌabꞌ naj, jaꞌ tituꞌ ey pax atoj naj Pedaías, naj Misael, naj Malquías, naj Hasum, naj Hasbadana, naj Zacarías yetoj naj Mesulam. 5 Sattaj masanil ebꞌ conobꞌ jix sjajon an juun naj Esdras tuꞌ, yutol naat bꞌey eya naj. Jaꞌ yet jix sjajon an juun naj tuꞌ, catuꞌ jix a linan masanil ebꞌ ánima. 6 Jix yalon watxꞌ kꞌane naj Esdras tet Jehová, jaꞌton jun Dios tol chi skeꞌ yu masanil. Masanil ebꞌ ánima jix yiꞌa skꞌabꞌ ebꞌ, jix yalon ebꞌ jaxca tiꞌ: Yun ojabꞌi, yun ojabꞌi, ẍi ebꞌ. Eyman jix ey noan ebꞌ sat txꞌotxꞌ yu yoc ebꞌ yin eyilal tet Jehová.

7 Jaꞌ ebꞌ naj Levita: Jaꞌton naj Josué, Baní, Serebías, Jamín, Acub, Sabtai, Hodías, Maaseías, Quelitá, Azarías, Jozabad, Hanán cꞌal yetoj Pelaías, jaꞌton ebꞌ tiꞌ jix kocꞌ alnen el tet ebꞌ conobꞌ tzet chi yal an ley tuꞌ, catuꞌ ey cꞌal ecꞌ ebꞌ conobꞌ bꞌey linan oc tuꞌ. 8 Jix yawten an yuunal sley Dios ebꞌ yin ipeal, catuꞌ jix skocꞌ alnen el ebꞌ,^a yet watxꞌ chi naꞌcha el yu ebꞌ ánima tzet chi yal an ley tuꞌ. 9 Masanil ebꞌ ánima jix michꞌcha scꞌul ebꞌ yokꞌi yet jix lawi yabꞌen ẍejbꞌanil Dios ebꞌ. Jaꞌ naj Nehemías tol gobernador yeoc bꞌey tituꞌ, yetoj naj cuywam naj yakꞌomal xaambꞌal chi yij Esdras, cꞌal yetoj ebꞌ Levita chi cuyon ebꞌ conobꞌ, jix yalon ebꞌ tol cꞌam ojabꞌ chi oc ebꞌ yin cuscꞌulal, cꞌam ojabꞌ chi okꞌ ebꞌ, yutol jaꞌ jun cꞌual tuꞌ yet Jehová cu Diosal yeocoj. 10 Yetoj cꞌal pax junxa, jix yalon naj Esdras tet ebꞌ jaxca tiꞌ: Asiꞌwej, catuꞌ chex lowi, ucꞌwej yal uva yin tzalacꞌulal, catuꞌ che yawten ebꞌ ánima cꞌam sloꞌbꞌe yet chi low ebꞌ je yetoj, yutol jaꞌ jun cꞌu tiꞌ yet Naj cu Diosal yeocoj. Cꞌam ojabꞌ cꞌal chex cusi, yutol jaꞌ tzalacꞌulal chi yakꞌ Jehová, jaꞌton wal eyoc cu teynemaloj.

11 Jal pax ebꞌ Levita jix akꞌle smimanil scꞌul ebꞌ conobꞌ yu ebꞌ: Cꞌam ojabꞌ chex okꞌi yutol yet Jehová yeoc jun cꞌu tiꞌ, cꞌam ojabꞌ mac chi cusi, ẍi ebꞌ. 12 Catuꞌ jix too masanil ebꞌ conobꞌ lowoj cꞌal yuqꞌuen jaꞌ ebꞌ, jix yawtelen sbꞌa ebꞌ lowoj. Catuꞌ jix oc wal jun miman kꞌin yu ebꞌ, yutol caw wal jix naꞌcha el yu ebꞌ tzet jix akꞌle scuy ebꞌ.

13 Jaꞌ yet junxa cꞌual jix syambꞌa sbꞌa ebꞌ yaaw yeoc xol junjun tujan ebꞌ yican to sbꞌa xol conobꞌ, ebꞌ yakꞌomal xaambꞌal cꞌal ebꞌ Levita, yetoj naj Esdras, yu scuyon ebꞌ tzet wal chi yal yeloc apnoj an ley tuꞌ. 14 Catuꞌ jix yilontej ebꞌ bꞌey albꞌilcan yu Dios tet naj Moisés tol chi kaey ecꞌ ebꞌ Israel bꞌey yul-laj pat waꞌnebꞌil a yetoj skꞌabꞌ teꞌ yet kꞌin yet sjuj xꞌaaw. 15 Jaxca tuꞌ jix yun yal-le el xol conobꞌ cꞌal bꞌey Jerusalén, tol chi too ebꞌ ánima bꞌey xol-laj teꞌ yiꞌontej skꞌabꞌlaj teꞌ olivo ebꞌ, teꞌ arrayán, yetoj teꞌ palma, ma junojxa tujan teꞌ tol ey skꞌabꞌ yet watxꞌ chi swaꞌne a spat na ebꞌ, jaxca yalon yul an yuunal ley. 16 Catuꞌ jix too ebꞌ ánima seyon skꞌabꞌlaj teꞌ, jaxa yet jix jul ebꞌ xin, jix swaꞌnen a spat na ebꞌ bꞌey yibꞌanlaj sna, ma bꞌey sattaj eltoj stiꞌ sna, cꞌal bꞌey sattaj eltoj stiꞌ snail stemplo Dios, cꞌal bꞌey stiꞌ spuertail bꞌey chi eltoj ebꞌ ánima iꞌo jaꞌ, cꞌal bꞌey spuertail Efraín. 17 Masanil ebꞌ ánima titnaj bꞌey Babilonia jix swaꞌne a spat na ebꞌ, catuꞌ jix octoj ebꞌ yul. Yet tax cꞌal stiempoal naj Josué scꞌaal Nun, cꞌam tocꞌal bꞌey jix yun juneloj jaxca jun tuꞌ, yu jun tuꞌ xin, caw wal jix tzala a ebꞌ ánima sicꞌlebꞌil. 18 Catuꞌ jix yawten a an juun naj Esdras tuꞌ junjun cꞌal cꞌu masantaꞌcꞌal chi tzꞌajna jujebꞌ cꞌual jun kꞌin tuꞌ. Jaxa yet swaxajebꞌ cꞌual xin, jix syambꞌan oc sbꞌa ebꞌ yin yoc ebꞌ yin eyilal tet Jehová jaxca yalon ley tuꞌ.