Ebꞌ yakꞌomal xaambꞌal, jaꞌton ebꞌ tiꞌ: Seraías, Jeremías, Esdras, 2 Amarías, Maluc, Hatús, 3 Secanías, Rehúm, Meremot, 4 Idó, Guinetón, Abías, 5 Mijamín, Maadías, Bilgá, 6 Semaías, Joiarib, Jedaías, 7 Salú, Amoc, Hilquías cꞌal Jedaías, jaꞌton ebꞌ tiꞌ yaaw yeoc xol ebꞌ yet yakꞌomal xaambꞌal yul stiempoal naj Josué.

8 Jal pax ebꞌ Levita xin, jaꞌton ebꞌ tiꞌ: Josué, Binuy, Cadmiel, Serebías, Judá, cꞌal Matanías, yetoj wanxa ebꞌ jaꞌjun yetoj ebꞌ, jaꞌton ebꞌ tiꞌ chi bꞌitnen wan bꞌit yet chi al-le watxꞌ kꞌane tet Dios. 9 Jaꞌ naj Bacbuquías yetoj cꞌal Uní, yican sbꞌa ebꞌ, jaꞌ ebꞌ chi oc linan sattaj ebꞌ yet chi bꞌitni ebꞌ.

10 Jaꞌ slistail ebꞌ yicꞌaal naj Josué yin xolilal, jaꞌton: Joaquim, Eliasib, 11 Joiadá, Johanán, cꞌal Jadúa.

12-21 Jaꞌton slistail ebꞌ yakꞌomal xaambꞌal yaaw yeoc yin junjun tujan ebꞌ yet mulnawomal sbꞌa yet stiempoal naj sat yakꞌomal xaambꞌal chi yij Joaquim:

22 Jix tzꞌibꞌele slistail ebꞌ Levita yaaw yeoc yin junjun tujan icꞌaaleal, cꞌal ebꞌ yakꞌomal xaambꞌal yul stiempoal Eliasib, Joiadá, Johanán cꞌal Jadúa, sat yakꞌomal xaambꞌal yeoc ebꞌ tiꞌ. Jaꞌton jun lista tiꞌ jix lawi stzꞌibꞌele yul stiempoal naj rey Darío a Persa. 23 Jal pax slistail ebꞌ yaaw yeoc xol junjun tujan yicꞌaal ebꞌ Levita, eey sbꞌi ebꞌ tuꞌ yul an yuunal bꞌey ey can ey skꞌaneal tzet ecꞌnaj el yet stiempoal naj Johanán yitxiquin Eliasib. 24 Jaꞌ ebꞌ yaaw yeoc xol ebꞌ Levita chi bꞌitni, jaꞌton: Hasabías, Serebías, Jesúa scꞌaal Cadmiel. Jaꞌ ebꞌ jaꞌjun yetoj ebꞌ, jaccombꞌa yeoc ebꞌ yet chi bꞌitni ebꞌ cꞌal yalon yu diosal ebꞌ tet Jehová, yet eyoc ebꞌ yin yopiso jaxca jix yun yalon naj rey David, naj ẍejabꞌ Dios. 25 Jal ebꞌ chi teynen wan cuarto yet cꞌuanbꞌal bꞌey scawilal spuertail templo, jaꞌton: Matanías, Bacbuquías, Abdías, Mesulam, Talmón, cꞌal Acub. 26 Jaꞌ ebꞌ xax bꞌina tiꞌ eyecꞌ ebꞌ yul stiempoal naj rey Joaquim, scꞌaal Josué, yitxiquin Josadac. Jaꞌton yul stiempoal naj gobernador chi yij Nehemías, cꞌal naj yakꞌomal xaambꞌal, yetoj cꞌal pax naj cuywam chi yij Esdras.

27 Jaꞌ yet jix al-le yu diosalil tet Dios yu swaꞌxubꞌal smuroal conobꞌ Jerusalén, jix awteletej ebꞌ Levita yal cꞌal bꞌeytuꞌ caan oc ebꞌ. Jix jul ebꞌ bꞌey Jerusalén yu ẍaꞌle skꞌinal smuroal conobꞌ tuꞌ, yet jix yalon watxꞌ kꞌane ebꞌ, cꞌal sbꞌitni ebꞌ yetoj chꞌen platillo, arpa, cꞌal yetoj wan mitxꞌkꞌabꞌe chi yij lira. 28 Yuxan jaꞌ ebꞌ Levita chi bꞌitni tuꞌ, jix tit ebꞌ bꞌey scawilal Jerusalén cꞌal bꞌey yaldeail txꞌotxꞌ Netofá, 29 cꞌal bꞌey Bet-guilgal, cꞌal bꞌey yul-laj yet Guibeá cꞌal bꞌey Azmávet, yutol jaꞌ ebꞌ chi bꞌitni tuꞌ jix swaꞌne ey sbꞌa ebꞌ yin aldeail bꞌey yinlaj conobꞌ Jerusalén. 30 Jix lawi tuꞌ, jix sajbꞌanen sbꞌa ebꞌ yakꞌomal xaambꞌal cꞌal ebꞌ Levita tet Dios. Jix lawi tuꞌ, jix sajbꞌanen cꞌal pax sbꞌa ebꞌ conobꞌ sattaj Dios, catuꞌ jix sajbꞌanen spuertail conobꞌ ebꞌ yetoj smuroal, sattaj Dios.

31 Jix lawi tuꞌ, jain Nehemías jin tiꞌ jix jin chejatoj ebꞌ yaaw yet Judá yibꞌan muro, catuꞌ jix jin sicꞌon oc caabꞌ tujan ebꞌ chi bꞌitni yu yalon yu diosalil ebꞌ tet Dios. Jaꞌ jun bꞌabꞌel tujan ebꞌ chi bꞌitni jix atoj ebꞌ yibꞌan muro bꞌey yetcꞌulal cu watxꞌ kꞌabꞌ, yetcꞌulal spuertail bꞌey chi bꞌet can kꞌalem. 32 Jaꞌ yintaj ebꞌ chi bꞌitni tuꞌ, jaꞌ tituꞌ tzajan oc naj Hosaías yetoj nanxa tujan ebꞌ yaaw yeoc bꞌey Judá, 33 yetoj naj Azarías, Esdras, Mesulam, 34 Judá, Benjamín, Semaías, cꞌal naj Jeremías. 35 Yetoj cꞌal pax ebꞌ yakꞌomal xaambꞌal jaꞌjun yetoj chꞌen trompeta, jaꞌton: Zacarías scꞌaal Jonatán; jaꞌ ebꞌ yican jaꞌjun yetoj, jaꞌton Semaías, Matanías, Micaías, Zacur, cꞌal Asaf. 36 Jaꞌcꞌal pax jun wanxa ebꞌ yican yetoj, jaꞌton ebꞌ chi tenon wan mitxꞌkꞌabꞌe yet chi bꞌitnele sbꞌi Dios, jaꞌton Semaías, Azarel, Milalai, Guilalai, Maai, Natanael, Judá cꞌal Hananí. Jaꞌton ebꞌ tuꞌ chi tenon wan mitxꞌkꞌabꞌe yet naj rey David, naj ẍejabꞌ Dios. Jaꞌ sattaj ebꞌ tuꞌ bꞌabꞌel stoo naj cuywam chi yij Esdras. 37 Jix ecꞌ atoj ebꞌ yibꞌan spuertail bꞌey snukꞌ jaꞌ, catuꞌ jix bꞌey cꞌaltoj ebꞌ sattaj yibꞌan muro tuꞌ. Jix atoj ebꞌ bꞌey jun kꞌooch bꞌe yetcꞌulal sconobꞌ David, cꞌal bꞌey scawilal yibꞌan sdespacho naj rey, masantaꞌcꞌal bꞌey spuertail bꞌey chi eltoj ebꞌ ánima iꞌo jaꞌ yetcꞌulal bꞌey chi aol cꞌu.

38 Jaꞌ junxa yet scaabꞌ tujan ebꞌ chi bꞌitni, jaꞌ tituꞌ jix toocan ebꞌ bꞌey yetcꞌulal sqꞌuexan kꞌabꞌ. Tzajan jin jain Nehemías jin tiꞌ yintaj ebꞌ, bꞌey yibꞌan muro yetoj nanxa tujan ebꞌ ánima, jix cu too tacꞌal bꞌey jun torre chi yij Hornos, jix cu ecꞌtoj bꞌey muro caw wal miman sat, 39 jix ecꞌtoj ebꞌ bꞌey spuertail Efraín, cꞌal bꞌey spuertail Jesaná, jaꞌton bꞌey spuertail bꞌey chi iꞌle octoj noꞌ pescado, bꞌey jun torre chi yij Hananel, cꞌal bꞌey jun torre chi yij Hamea, masantaꞌcꞌal bꞌey spuertail bꞌey chi octoj noꞌ meꞌ. Jix oc tucan bꞌey spuertail bꞌey eey ebꞌ chi teynen tituꞌ. 40 Jix lawi tuꞌ xin, catuꞌ jix apni oc caabꞌ tujan ebꞌ chi bꞌitni tuꞌ bꞌey stemplo Dios. Jix jin apni cꞌal pax oc yetoj nanxa ebꞌ yaaw jaꞌjun wetoj an.

41 Jal ebꞌ yakꞌomal xaambꞌal chi xuon chꞌen trompeta xin, jaꞌton: Eliacim, Maaseías, Miniamín, Micaías, Elioenai, Zacarías, Hananías, 42 Maaseías, Semaías, Eleazar, Uzí. Johanán, Malquías, Elam, cꞌal Éser. Jaꞌ jun tujan ebꞌ chi bꞌitni tuꞌ caw wal ip jix yun sbꞌitni ebꞌ, jix ijbꞌale ebꞌ yu naj Izrahías.

43 Jaꞌ yet jun cꞌual tuꞌ caw wal miman xaambꞌal jix akꞌlei. Caw jix tzala ebꞌ ánima sicꞌlebꞌil, yutol jaꞌ Dios jix akꞌon jun miman tzalacꞌulal tet ebꞌ, yetoj cꞌal tet ebꞌ ix ix cꞌal tet ebꞌ unin. Jaꞌ jun tzalacꞌulal jix oc bꞌey Jerusalén tuꞌ, jix abꞌle yu ebꞌ ánima naat yeel yin ebꞌ.

44 Jaꞌ yet jun tiempoal tuꞌ, ey wan ebꞌ jix ale oc yin steynemaloj cꞌuanbꞌal bꞌey chi yambꞌale ofrenda, jaꞌton bꞌabꞌel sat awo, yetoj cꞌal diezmo, jatacꞌalaꞌ jantaj chi tit bꞌey junjun tujan txꞌotxꞌ yul yet junjun conobꞌ. Jaꞌ wan tuꞌ yet ebꞌ yakꞌomal xaambꞌal cꞌal ebꞌ Levita, yutol jaꞌ ebꞌ conobꞌ caw wal chi tzala ebꞌ yetoj ebꞌ; yutol jaꞌ ebꞌ chi mulna bꞌey snail skꞌane Dios. 45 Catuꞌ jix sajbꞌane sbꞌa ebꞌ yakꞌomal servil Dios, cꞌal ebꞌ akꞌom xaambꞌal. Catuꞌ jix sajbꞌane sbꞌa ebꞌ chi bꞌitni yetoj ebꞌ chi teynen puerta, jaꞌ ebꞌ tuꞌ jix sjije ebꞌ yilon yopiso jaxca jix yun yalon can naj rey David yetoj scꞌaal chi yij Salomón. 46 Yutol jaꞌ yet stiempoal naj rey David cꞌal Asaf, ey cꞌal pax syaawilal ebꞌ chi bꞌitni tuꞌ, jaꞌton ebꞌ chi bꞌitnen watxꞌ kꞌane cꞌal yet chi al-le yu diosalil tet Dios.

47 Yu tuꞌ xin, jaꞌ yet stiempoal naj Zorobabel yetoj cꞌal Nehemías, masanil ebꞌ conobꞌ chi akꞌon sloꞌbꞌe ebꞌ chi bꞌitni, cꞌal ebꞌ chi teynen puerta yetoj ebꞌ Levita, yutol ey yalon yet ebꞌ ẍaꞌon yet. Jaxa ebꞌ Levita chi akꞌon yet ebꞌ yicꞌaal Aarón.