4 Jaꞌ yet cꞌamto chi yun jun tuꞌ, jix ale oc Eliasib, naj yakꞌomal xaambꞌal yin yilon cꞌuanbꞌal bꞌey stemplo Dios. Yutol jaꞌ naj Eliasib tuꞌ yican to sbꞌa yetoj naj Tobías, yuxan jix akꞌle jun miman cuarto tet naj yet chi skeꞌ yee ecꞌ naj tituꞌ, 5 jaꞌton jun miman cuarto bꞌey chi cꞌubꞌale chꞌen ofrenda yet yalantoj, cꞌal teꞌ incienso, yetoj mitxꞌkꞌabꞌe, cꞌal diezmo yin ixim tiriw, cꞌal acꞌ vino, cꞌal aceite olivo, jaꞌton wan tuꞌ albꞌilcanoj tol chi akꞌle tet ebꞌ Levita, tet ebꞌ chi bꞌitni cꞌal tet ebꞌ chi teynen puerta. Jaꞌ tituꞌ chi cꞌubꞌalei cꞌal pax wanxa tzetyetal chi akꞌle tet ebꞌ yakꞌomal xaambꞌal. 6 Jaꞌ yet jix yunen jun tiꞌ, man eyoj jin ecꞌ jain Nehemías jin tiꞌ bꞌey Jerusalén, yutol jaꞌ yet tuꞌ eyxa 32 abꞌil xa yoc naj Artajerjes yin reyal bꞌey Babilonia, jaꞌ yet tuꞌ jix jin meltzo pax toj bꞌey naj rey junelxa. Yet jix ecꞌ jayebꞌ cꞌual wu an, catuꞌ jix jin kꞌanon jin permiso tet naj rey, 7 catuꞌ jix jin meltzotej bꞌey Jerusalén tiꞌ. Jaꞌ yet tuꞌ jix wabꞌen ocoj, yu tzetyetal man watxꞌoj jix yun naj Eliasib, yutol jix yakꞌ jun miman cuarto naj tet naj Tobías bꞌey stemplo Dios. 8 Jaꞌ jun tuꞌ caw wal ma ẍaꞌ jin cꞌul, jix jin kꞌojcantoj eltoj masanil stzetyetal naj Tobías tuꞌ stiꞌ na. 9 Jix lawi tuꞌ, jix waloni tol chi sajbꞌanele el wan cuarto tuꞌ jaxca yalon ley, catuꞌ chi ale pax octoj mitxꞌkꞌabꞌe yet stemplo Dios yul junelxa, yetoj ofrenda cꞌal teꞌ incienso.

10 Jix wabꞌen cꞌal pax oj tol ma akꞌle sloꞌbꞌe ebꞌ Levita, tol jaꞌ ebꞌ Levita yetoj cꞌal ebꞌ chi bꞌitni, jaꞌton ebꞌ eyoc yibꞌan yoc yin eyilal tet Dios, tol abꞌ jix ela ebꞌ, junjun xacꞌal ebꞌ jix toocan bꞌey caan ebꞌ. 11 Jix lawi tuꞌ, jix walon tet ebꞌ yaaw yeocoj, yutol jix sbꞌejcan yilon stemplo Dios ebꞌ. Catuꞌ jix jin yambꞌa oc ebꞌ yakꞌomal xaambꞌal cꞌal ebꞌ Levita yin waon pax oc ebꞌ yin yopiso junelxa. 12 Masanil ebꞌ a Judá jix yiꞌtej sdiezmoal ixim tiriw ebꞌ, cꞌal vino yetoj aceite olivo bꞌey chi cꞌubꞌale aoj. 13 Jix lawi tuꞌ, jix waon oc naj yakꞌomal xaambꞌal chi yij Selemías yu steynen bꞌey chi cꞌubꞌale tuꞌ, yetoj cꞌal pax naj tzꞌibꞌlom chi yij Sadoc, yetoj cꞌal jun Levita chi yij Pedaías. Jix waon cꞌal pax oc naj Hanán yin scolwa yetoj ebꞌ, jaꞌton scꞌaal Zacur yitxiquin Matanías, yutol caw wal watxꞌ snaꞌbꞌal ebꞌ. Jaꞌton ebꞌ tuꞌ jix oc can yibꞌan spoꞌon ecꞌ loꞌbꞌe xol masanil ebꞌ yican. 14 Catuꞌ jix walon yin jin txa jaxca tiꞌ: Jaach jin Diosal, naꞌtej wan tzet chi wun tiꞌ. Man oj toj qꞌueycꞌulal masanil tzetyetal ja wu jantaj tzet jix wun bꞌey ja templo bꞌey chi oc eyilal ey jaach.

15 Jaꞌ yet jun tiempoal tuꞌ, jix wilaꞌ tol ey ebꞌ yul yet Judá tiꞌ, chi tecꞌwi el yal uva yet scꞌual xewilal, catuꞌ chi ecꞌ ebꞌ iꞌo tiriw, chi ecꞌ cꞌal pax noꞌ bꞌuru iꞌo vino, cꞌal iꞌotej uva yetoj yuxbꞌanil, yetoj higo, yetoj cꞌal wanxa ijatz, yutol jaꞌ yet scꞌual xewilal jix yiꞌontej ebꞌ wan tuꞌ bꞌey Jerusalén. Yu jun tuꞌ xin, yuxan jix wakꞌ sowalil tet ebꞌ, cꞌam chi skeꞌ xonon ebꞌ yet scꞌual xewilal. 16 Yetoj cꞌal pax wanxa ebꞌ a Tiro caan bꞌey Jerusalén, jix yiꞌ cꞌal pax tej noꞌ pescado ebꞌ xonoꞌ, yetoj cꞌal wanxa tzetyetal chi txonlei; jaꞌ yet scꞌual xewilal jix xon ebꞌ wan tuꞌ tet ebꞌ wet Israelal bꞌey Jerusalén. 17 Yu jun tuꞌ, jix jin tenchane ebꞌ yaaw yeoc xol ebꞌ Judá tuꞌ, jix walon tet ebꞌ jaxca tiꞌ:

—Txꞌojxa wal spenail che yunwej yet scꞌual xewilal tiꞌ, comon cꞌu xacꞌal che yute. 18 Jaꞌton wan tiꞌ jix yun ebꞌ cu mam icham, yu jun tuꞌ, yuxan jix aletej masanil wan syaꞌtajilal tiꞌ kibꞌan yu Dios, cꞌal yibꞌan jun conobꞌ tiꞌ. ¿Tumi chi yoche je cꞌul che txꞌem cꞌaltej sjowal scꞌul Dios kibꞌan jaon Israel jon tiꞌ, yuxan comon cꞌu xacꞌal che yute scꞌual xewilal tiꞌ? jin chi tet ebꞌ.

19 Yu jun tuꞌ xin, yuxan jix walaꞌ tol chi majchele spuertail conobꞌ Jerusalén yet yeycꞌualil yet tuxa chi oc scꞌual xewilal. Ma cꞌal jajleoj masantaꞌcꞌal jix ecꞌ el jun cꞌual tuꞌ. Jix waon cꞌal pax oc ebꞌ jin chejabꞌ steynen bꞌey stiꞌ puerta tuꞌ, yet watxꞌ cꞌam junoj yijatz ebꞌ chi txonwi tuꞌ, chi octej. 20 Jaꞌ ebꞌ txonwom tuꞌ, jix can ebꞌ junel cael yet akꞌbꞌalil yet scꞌual xewilal bꞌey yinlaj conobꞌ Jerusalén tuꞌ. 21 Jix lawi tuꞌ, cael oxel jix jin teele jin bꞌa yetoj ebꞌ, catuꞌ jix jin tenchanen ebꞌ, yutol chi ecꞌ akꞌbꞌal yu ebꞌ bꞌey yinlaj muro tuꞌ. Jix walon tet ebꞌ jaxca tiꞌ: Ta tol oj je yun cꞌal jaxca tuꞌ, oj jex waoc yul preso, jin chi tet ebꞌ. Queytuꞌ jix yun sbꞌejon ebꞌ sjul yet scꞌual xewilal tuꞌ. 22 Jix lawi tuꞌ, jix walon tet ebꞌ Levita tol chi sajbꞌane sbꞌa ebꞌ, catuꞌ chi too ebꞌ steynen bꞌey puerta tuꞌ, yet watxꞌ cꞌam chi etnele el jun scꞌual xewilal tuꞌ, yuxan jix wal yin jin txa jaxca tiꞌ: Jaach jin Diosal, naꞌ jintej yin wan tzetyetal jix wun tiꞌ, okꞌ ojabꞌ ja cꞌul win yu ja watxꞌcꞌulal, jin chi.

23 Jacꞌalaꞌ yet jun tiempoal tuꞌ, jix wilon cꞌal pax oj tol ey ebꞌ wet Israelal jix nupi yetoj ebꞌ ix a Asdod, ebꞌ ix a Amón, cꞌal ebꞌ ix a Moab. 24 Eyxa nanoj sbꞌisil yuninal ebꞌ chi xa alon stiꞌ ebꞌ a conobꞌ Asdod cꞌal yin stiꞌ wanxa nación. Jal pax stiꞌ ebꞌ ket Israelal tiꞌ, cꞌam pax chi skeꞌ yalon ebꞌ. 25 Jaꞌ yu jun tuꞌ, jix jin teele jin bꞌa yetoj ebꞌ, cꞌal jin kꞌanontej syaꞌtajilal yibꞌan ebꞌ. Ey ebꞌ jix jin makꞌa, ey ebꞌ jix jin tokꞌel xil sjolom, jix walon tet ebꞌ tol chi yakꞌ can stiꞌ ebꞌ tet Dios tol cꞌamxa chi nupi scꞌaal ebꞌ cꞌal scutzꞌin ebꞌ yetoj ebꞌ txꞌoj conobꞌal tuꞌ, tam wal yoc ebꞌ ix txꞌoj conobꞌal tuꞌ yistiloj ebꞌ. Jix walon cꞌal pax oj: 26 Queyton wal tiꞌ jix yun yoc spenail naj Salomón sreyal Israel tiꞌ, caxcꞌal mi cꞌam junojxa rey laan yetoj naj bꞌey wanxa nación, tol ey wal scamcꞌulal Dios yin, jix ale oc cu reyaloj jaon Israel jon tiꞌ, tucꞌaltaꞌ jix ijbꞌaletoj naj yin spenail yu ebꞌ ix ix txꞌoj conobꞌal. 27 Yu tuꞌ xin, ¿tumi oj ẍaꞌ cu cꞌul tol oj je yaoc je penail yel xacꞌal pena sattaj cu Diosal, yin je yiꞌlen je bꞌa yetoj ebꞌ ix ix txꞌoj conobꞌal? jin chi tet ebꞌ.

28 Jaxca taꞌ jix wute naj scꞌaal Joiadá, yitxiquin naj Eliasib, naj sat yakꞌomal xaambꞌal, niꞌe yeoc naj bꞌey naj Sambalat, jaꞌton naj Horonita. Jaꞌ jun niꞌe tuꞌ jix wujte el jin sattaj, 29 yuxan jix wal yin jin txa jaxca tiꞌ: ¡Jaach jin Diosal, iltej wan ebꞌ jix etnentoj jun opiso yin yakꞌomal oc xaambꞌal tiꞌ, yetoj cꞌal bꞌey jix ja wakꞌcan ja tiꞌ tet ebꞌ, cꞌal ebꞌ Levita! jin chi yin jin txa.

30 Queytuꞌ jix yun jin waꞌnen el tzetyetal jix etextoj yu ebꞌ txꞌoj conobꞌal, catuꞌ jix waon oc ebꞌ yakꞌomal xaambꞌal cꞌal ebꞌ Levita yin yopiso yin xolilal. 31 Jix walon tzet cꞌual chi iꞌletej teꞌ siꞌ; jix waloni tol sowalil chi yiꞌtej bꞌabꞌel sat yawo ebꞌ, yuxan jix wal yin jin txa jaxca tiꞌ: ¡Jaach jin Diosal, naꞌ jintej, okꞌ ojabꞌ ja cꞌul win an! jin chi tet cu Mam Dios.