Jaꞌ An Yet Scaabꞌ Libro
CRÓNICAS
Jix Skꞌan Sjelanil Naj Salomón Tet Dios
1
Jaꞌ Salomón, scꞌaal naj David, jix yiꞌ yip yopiso, yutol jaꞌ Jehová sDiosal eyoc yetoj; yel xacꞌal jix bꞌinale naj yin yopiso. 2 Yu tuꞌ xin, jix syambꞌa oc masanil ebꞌ eyoc yin yopiso bꞌey Israel: Jaꞌton ebꞌ yaaw yeoc xol ebꞌ soldado, ebꞌ Juez, yetoj cꞌal ebꞌ yaaw yeoc xol junjun bꞌulan ebꞌ Israel, jaꞌton ebꞌ miman yeloc apnoj yin yopiso bꞌey conobꞌ Israel. 3 Jix lawi tuꞌ, jix too ebꞌ bꞌey tzalan Gabaón yetoj naj, yutol jaꞌ tituꞌ eya jun Kꞌap Na bꞌey chi ẍaꞌle sbꞌa ebꞌ yetoj Dios, jaꞌton jun jix swaꞌne can a naj Moisés, naj ẍejabꞌ Dios bꞌey txꞌotxꞌ cusiltaj txꞌotxꞌ. 4 Jaꞌ naj rey David, yiꞌnaj xa toj teꞌ Scaẍail Swa Kꞌane Jehová bꞌey Quiriat-jearim, jix yaon octoj yul jun kꞌap na waꞌnebꞌil a yu bꞌey Jerusalén. 5 Jal pax jun yet xaambꞌal tol bronce cꞌal eloj, jun jix swaꞌne naj Besalel, scꞌaal Urí, yitxiquin Hur, jatuꞌ ey bꞌey Gabaón, bꞌey sattaj scalubꞌal Jehová. Jix too naj rey Salomón yetoj masanil ebꞌ conobꞌ tituꞌ, yet chi too skꞌanle yabꞌ tet Dios. 6 Jix aapnoj naj Salomón bꞌey eyecꞌ jun yet xaambꞌal tol bronce cꞌal eloj, jun eyecꞌ sattaj Jehová, jaꞌton bꞌey sattaj jun Kꞌap Na bꞌey chi ẍaꞌle sbꞌa ebꞌ yetoj Jehová. Jix yakꞌon tzꞌaꞌ mil xaambꞌal yibꞌan jun yet xaambꞌal tuꞌ.7 Jaꞌ yet jun akꞌbꞌal tuꞌ, jix xꞌox sbꞌa Jehová tet Salomón, jix yalon tet jaxca tiꞌ: Kꞌan tzetyetal chi yoche ja cꞌul ey jin an, catuꞌ oj wakꞌon ey jaach, ẍi Dios tet naj.
8 Jix takꞌwi naj Salomón tet Dios, jaxca tiꞌ: Jaach tiꞌ yel xacꞌal ey ja camcꞌulal yin naj David, naj jin mam. Jain xa jix jin ja waoc yin reyal sqꞌuexeloj. 9 Jaꞌ tinaniꞌ xin, jaach Jehová jin Diosal, yun ojabꞌ tzetyetal bꞌey jix ja wakꞌcan ja tiꞌ tet jin mam tuꞌ, yajbꞌan tol jix jin ja waoc yin reyal xol jun miman conobꞌ tol laan sbꞌisil jaxca spojojal txꞌotxꞌ txꞌotxꞌ. 10 Yu jun tuꞌ, yuxan chi woche, tol cha wakꞌ jin jelanil cꞌal jin naꞌbꞌal, yet chi skeꞌ wijbꞌan jun conobꞌ tiꞌ. ¿Tumi ey junoj mactxequel chi skeꞌ yakꞌon yaawil yibꞌan ja miman conobꞌ tiꞌ yul yet? ẍi Salomón.
11 Jix takꞌwi Dios tet naj Salomón, jix yalon jaxca tiꞌ: Yutol jaꞌ jun tiꞌ jix yoche ja cꞌul, catuꞌ manaj ja bꞌeomal, tam wal ja bꞌinabꞌil, tam wal scamichal ebꞌ ja cajat jix ja kꞌanaꞌ, catuꞌ ma ja kꞌan pax naatiloj ja kꞌinal. Yutol jaꞌ ja jelanil cꞌal ja naꞌbꞌal jix ja kꞌanaꞌ, yet oj skeꞌ ja wakꞌon yaawil yibꞌan jin conobꞌ bꞌey jix jaach waoc yin reyal. 12 Yu tuꞌ xin, oj wakꞌ ja jelanil, cꞌal ja naꞌbꞌal, catuꞌ oj wakꞌon cꞌal pax ja bꞌeomal, cꞌal ja bꞌinalei. Cꞌam junojxa rey laan jaxca jaach tiꞌ yet yalantoj, tam wal eyto junojxa jaxca jaach tiꞌ, yet oj bꞌey cꞌaltoj, ẍi Jehová.
13 Jix lawi tuꞌ, jix meltzotej naj Salomón bꞌey ey scalubꞌal Jehová bꞌey tzalan bꞌey Gabaón, jix apni oc bꞌey Jerusalén, jaxa yoc xacꞌal naj yin reyal bꞌey conobꞌ Israel tuꞌ.
Wan Sbꞌeomal Naj Rey Salomón Jix Syambꞌa Ocoj
14 Caw ecꞌal carruaje yet jowal jix syambꞌa oc naj Salomón yetoj cꞌal noꞌ che. Ey 1,400 carruaje yetoj 12,000 noꞌ che. Ey carruaje cꞌal noꞌ che yet jowal yetoj ebꞌ soldado chi kꞌanbꞌalnele yet chi teynele naj rey bꞌey Jerusalén, yetoj cꞌal bꞌey wanxa conobꞌ. 15 Cꞌamxa chi alcha jantaj chꞌen plata cꞌal chꞌen oro, cꞌal teꞌ kꞌuteꞌ jix syambꞌa oc naj rey bꞌey Jerusalén, jaxca xacꞌal comon chꞌen, ma comon teꞌ yeocoj. 16 Jaꞌ noꞌ ẍe naj rey Salomón tuꞌ, jatuꞌ jix manletej noꞌ bꞌey Egipto, cꞌal bꞌey Cilicia; jaꞌ ebꞌ xonwom naj rey jix manontej tituꞌ. 17 Jaꞌ stool junjun carruaje titnaj bꞌey Egipto, 600 siclo plata stool junjun, jaxa stool junoj noꞌ che, ey 150 siclo plata stool junjun. Jaꞌ masanil ebꞌ sreyal ebꞌ Hitita cꞌal ebꞌ Sirio jix manon el tet ebꞌ xonwom naj Salomón.