9 Jaꞌ yet jix lawi swaꞌxi a joyan templo yu naj Salomón tuꞌ, jix oc teꞌ patzabꞌ cꞌal teꞌ mimej chemteꞌ tol kꞌuteꞌ cꞌal el yibꞌan. 10 Catuꞌ jix swaꞌnen a wanxa scuartoal bꞌey yinlaj templo tuꞌ; caabꞌ metro yetoj 25 centímetro jix a junjun piso, jix oc spatzabꞌil jix apni oc yin templo, jaꞌ teꞌ kꞌuteꞌ jix oc yin masanil. 11 Jix lawi tuꞌ xin, jix yalon Jehová tet naj rey Salomón jaxca tiꞌ: 12 Jaꞌ jun templo jix ja wakꞌ waꞌxoj tiꞌ, chi wal ey jaach an, ta tol tzajan jaach cꞌal yintaj jin ley cꞌal yin jin chejbꞌanil, catuꞌ cha jijen cꞌal masanil, oj yun cꞌal masanil tzet albꞌilcan wu tet naj ja mam, jaꞌton David. 13 Jain oj jin ey cꞌal ecꞌ yin tobꞌalkꞌinal yetoj jin conobꞌ Israel tiꞌ, cꞌam cꞌal bꞌey oj jin bꞌejcanoj, ẍi Jehová.

14 Jaꞌ yet jix lawi swaꞌxi can a templo yu naj rey Salomón tuꞌ, 15 caw watxꞌ jix yun yoc ẍemteꞌal bꞌey satlaj scanpaqꞌuil yul, kꞌuteꞌ cꞌal el teꞌ jix oc yin. Jix to tacꞌal yich masantaꞌcꞌal jix aapnoj yalan spatzabꞌil, jix ey cꞌal pax chemteꞌ yul, tol kꞌuꞌta cꞌal eloj. 16 Jaꞌ bꞌey yich octoj yul templo tuꞌ, jix yaoc smajil snan yul tuꞌ, ey bꞌalonebꞌ metro yeoc scanpaqꞌuil, jaꞌ teꞌ kꞌuteꞌ jix oc yin, jix ẍaꞌel bꞌey yich masantaꞌcꞌal jix aapnoj bꞌey yalan teꞌ patzabꞌ. Jaꞌ jun cuarto tuꞌ jaꞌton jun lugar tol Asan Dios Ey Yet Xꞌojli.* 17 Jaxa junxa tujan yul templo sattaj eltej jun cuarto tuꞌ, ey 18 metro jix yun spaqꞌuil. 18 Kꞌuteꞌ cꞌal el teꞌ jix oc yul templo tuꞌ; jix oc cꞌal pax yelawil yin sat teꞌ chemteꞌ tuꞌ, jaxca yili sat teꞌ teꞌ cꞌal xumac teꞌ jix oc yin; cꞌam cꞌal junoj chꞌen chꞌen jix ale oc yin.

19 Caw watxꞌ jix yun swaꞌxi jun lugar tol Asan Dios Ey Yet Xꞌojli bꞌey jix octoj teꞌ Scaẍail Swa Kꞌane Jehová. 20 Ey bꞌalonebꞌ metro jix yun spaqꞌuil, bꞌalonebꞌ metro jix yun cꞌal pax yul xiquin, bꞌalonebꞌ metro jix yunna steel, tol oro cꞌal el jix oc satlaj spacꞌul yul. Catuꞌ jix yakꞌon waꞌxoj jun yet xaambꞌal tol kꞌuteꞌ cꞌal eloj, jix oc cꞌal pax oro yinlaj. 21 Jix ale oc chꞌen oro satlaj teꞌ chemteꞌ jix octoj yul junxa cuarto tuꞌ, catuꞌ jix ale oc chꞌen cadena tol oro cꞌal eloj, jaꞌton yin jun spuertail jun lugar tol Asan Dios Ey Yet Xꞌojli. 22 Chi yal yeloc apnoj, tol jaꞌ masanil yul templo tuꞌ oro xacꞌal el masanil, quey cꞌal pax tuꞌ jix yun jun yet xaambꞌal ey bꞌey stiꞌ spuertail jun lugar tol Asan Dios Ey Yet Xꞌojli tuꞌ, ey cꞌal pax oc chꞌen oro yin.

23 Jix yakꞌ cꞌal pax waꞌxoj naj rey Salomón caabꞌ yechel ángel chi yij querubín. Jaꞌ teꞌ olivo jix yaoc yin, jix oc can bꞌey jun lugar tol Asan Dios Ey Yet Xꞌojli. Ecꞌbꞌan nan sjoꞌ metro jix yun steel junjun, 24 caabꞌ metro yetoj 25 centímetro jix yun steel junjun xicꞌ, yuxan nan sjoꞌ metro chi majcha a yu scaabꞌil xicꞌ junjun querubín tuꞌ. 25 Laan cꞌal steel xicꞌ ebꞌ scaabꞌil catuꞌ laan cꞌal yili ebꞌ. 26 Nan sjoꞌ metro eya steel scaabꞌil. 27 Jix ale octoj wan querubín bꞌey yul jun lugar tol Asan Dios Ey Yet Xꞌojli tuꞌ, yutol jenan el xicꞌ ebꞌ, yuxan jaꞌ junjun xicꞌ jun chi apni oc yin sat spacꞌul tuꞌ, jal xicꞌ junxa chi apni cꞌal pax oc bꞌey junxa spacꞌul tuꞌ, jaꞌ junjun xicꞌ wan tuꞌ chi ẍaꞌle sbꞌa bꞌey snan jun lugar tuꞌ. 28 Catuꞌ jix ale cꞌal pax oc oro yin wan querubín tuꞌ. 29 Bꞌey masanil satlaj spacꞌul bꞌey yul caabꞌ cuarto ey yul templo tuꞌ, jix oc cꞌal pax yelawil yin wan querubín tuꞌ, jix oc yechel teꞌ palma, cꞌal yechel xumac teꞌ yelawiloj. 30 Jix ale cꞌal pax ey chꞌen oro bꞌey yibꞌan teꞌ chemteꞌ eey yul caabꞌ cuarto tuꞌ. 31 Jaꞌ teꞌ olivo eyoc yin spuertail bꞌey chi octoj ebꞌ cꞌal bꞌey sjolom spuertail cꞌal smarcoal, cꞌal bꞌey chi ẍaꞌle sbꞌa teꞌ tuꞌ. 32 Jaꞌ teꞌ spuertail tuꞌ, jaꞌ teꞌ olivo jix ale oc yin teꞌ scaabꞌil, catuꞌ jix oc cꞌal yechel wan querubín yelawiloj, jix oc yechel teꞌ palma, cꞌal yechel xumac teꞌ, catuꞌ jix ale oc oro yinlaj. 33 Jaꞌ teꞌ olivo jix oc yin smarcoal spuertail templo bꞌey chi octoj ebꞌ tuꞌ. Jaꞌ teꞌ jix ale cꞌal oc yin scanebꞌal xiquinlaj spuertail tuꞌ. 34 Yutol caabꞌ jenan jix yun teꞌ puerta tuꞌ, junjun jenan teꞌ chi skeꞌ spajle snan. 35 Jix ale cꞌal pax oc yechel querubín yelawiloj teꞌ puerta tuꞌ, yetoj yechel teꞌ palma, cꞌal yechel xumac teꞌ. Jix lawi tuꞌ, jix ale cꞌal pax oc chꞌen oro yin. 36 Catuꞌ jix swaꞌnen pax smuroal bꞌey yinlaj sattaj eltoj stiꞌ na tuꞌ, jix oc oxebꞌ txol chꞌen chꞌen josbꞌil yin, jal junxa txol xin, jaꞌ teꞌ kꞌuteꞌ jix oc yin, queytuꞌ jix yun swaꞌxi aoj.

37 Canebꞌxa abꞌil yoc naj Salomón yin reyal, yet eyoc jun xꞌaaw chi yij Ziv, catuꞌ jix el yich yale eytoj cimientoal yich stemplo Jehová. 38 Yin xa jusluqꞌuebꞌ abꞌil yoc naj Salomón yin reyal, yet xꞌaaw chi yij Bul, jaꞌton yet swaxajebꞌ xꞌaaw yul abꞌil tuꞌ, catuꞌ jix yiꞌon sbꞌa jun templo tuꞌ jaxca jix yun swaꞌnele yechel, queytuꞌ jix yun swaꞌnelei. Jujebꞌ abꞌil jix oc mulnail yin yu naj rey Salomón.