Iꞌbꞌiltoj Teꞌ Scaẍail Swa Kꞌane Dios Bꞌey Yul templo
8
Jix lawi tuꞌ xin, catuꞌ jix syambꞌan oc masanil ebꞌ ánima naj rey Salomón bꞌey Jerusalén, masanil ebꞌ icham winaj yeoc yul conobꞌ Israel, ebꞌ syaawil yeoc xol junjun icꞌaaleal, jix yaloni tol chi too iꞌletej teꞌ Scaẍail Swa Kꞌane Jehová bꞌey conobꞌ David chi yij Sión, yet watxꞌ chi oc cantoj teꞌ yul stemplo Jehová. 2 Kꞌuxan wal eyoc jun kꞌin yet sjuj xꞌaaw, jaꞌton xꞌaaw chi yij Etanim; jaꞌ yet tuꞌ jix syambꞌa oc sbꞌa masanil ebꞌ icham winaj a Israel yetoj naj rey Salomón. 3 Jaꞌ yet jix yamcha oc ebꞌ tuꞌ, jaꞌ ebꞌ yakꞌomal xaambꞌal jix iꞌontoj teꞌ Scaẍail Swa Kꞌane Jehová, 4 cꞌal an kꞌap na bꞌey chi ẍaꞌle sbꞌa ebꞌ Dios, yetoj cꞌal masanil mitxꞌkꞌabꞌe eyoctoj yul. Jaꞌ ebꞌ yakꞌomal xaambꞌal cꞌal ebꞌ Levita jix iꞌontoj teꞌ. 5 Jaxa naj rey Salomón yetoj masanil ebꞌ Israel jix yamcha oc tuꞌ, jaꞌ ebꞌ jix bꞌabꞌi sattaj teꞌ caẍa tuꞌ, cꞌamxa chi bꞌischa jantaj noꞌ meꞌ cꞌal noꞌ wacax jix yakꞌ ebꞌ yin xaambꞌalil. 6 Jix lawi tuꞌ xin, jix iꞌletoj teꞌ Scaẍail Swa Kꞌane Jehová bꞌey yul templo yu ebꞌ yakꞌomal xaambꞌal masantaꞌcꞌal bꞌey jun lugar tol Asan Dios Ey Yet Xꞌojli, bꞌey snan xol wan querubín. 7 Jenantoj xicꞌ wan tuꞌ yibꞌan bꞌey jix ale octoj teꞌ caẍa tuꞌ. Jaꞌ xicꞌ wan querubín tuꞌ, jaꞌ eyoc yeneloj yibꞌan teꞌ. 8 Jaxa teꞌ regla eyoc sbꞌatxlubꞌoj, caw mimej steel teꞌ. Chi txeclo xaam teꞌ bꞌey yul bꞌabꞌel cuarto yetcꞌulal spuertail jun lugar Asan Dios Ey Yet, caxcꞌal man txequeloj kilon octoj bꞌey stiꞌ na tuꞌ. Jaꞌ tituꞌ jix cancan teꞌ caẍa tuꞌ masantaꞌcꞌal tinaniꞌ. 9 Cꞌam junojxa tzetyetal eeytoj yul teꞌ caẍa tuꞌ, asanne caabꞌ jenan chꞌen chꞌen jix yaeytoj naj Moisés yul teꞌ bꞌey Horeb, jaꞌton chꞌen bꞌey tzꞌibꞌebꞌilcan swa kꞌane Jehová bꞌey jix yakꞌ can stiꞌ yetoj ebꞌ conobꞌ Israel yet jix iꞌle eltej ebꞌ bꞌey txꞌotxꞌ Egipto.10 Jaꞌ yet jix eltej ebꞌ yakꞌomal xaambꞌal yul templo tuꞌ, caw jix noel yul yu jun asun. 11 Jaꞌ yu jun asun tuꞌ yuxan ma xa skeꞌ smulna ebꞌ bꞌey yul tuꞌ, yutol jix noel yu yipalil Jehová.
Yalnaj Can Naj Rey Salomón Tol Yet Jehová Yeoc Jun Na Tuꞌ
12 Jix lawi tuꞌ, jix txali naj rey Salomón, jix yalon naj jaxca tiꞌ:
Jaach Jehová, jix ja walaꞌ tol xol kꞌejkꞌinal ey jaach,
13 yuxan jix jin waꞌne a jun templo bꞌey chach caey ecꞌoj. Jaꞌton titiꞌ oj jaach caey ecꞌoj, ẍi naj rey Salomón.
14 Jix lawi tuꞌ jix meltzotoj tꞌanan yibꞌan masanil ebꞌ conobꞌ Israel yaman oc tituꞌ, jix skꞌanon syaaxilal Dios yibꞌan ebꞌ. 15 Jix lawi tuꞌ jix yalon jaxca tiꞌ: Al-le ojabꞌ watxꞌ kꞌane yin Jehová cu Diosal jaon Israel jon tiꞌ, yutol jix yiꞌ sbꞌa tzet jix yal tet naj rey David, jaꞌton naj jin mam. 16 Jaꞌ jix alon can jaxca tiꞌ: Yet tax cꞌal jix wiꞌon eltej jin conobꞌ bꞌey txꞌotxꞌ Egipto, cꞌam tocꞌal bꞌey chin sicꞌ el junoj conobꞌ xol ebꞌ Israel bꞌey chi waꞌxi a junoj templo bꞌey chin caey ecꞌoj. Asanne naj David jix jin sicꞌ can eloj yet chi oc reyal xol jin conobꞌ Israel, ẍi Jehová. 17 Jaꞌ jin mam tuꞌ jix yoche tol jix swaꞌne a junoj templo yu yiꞌle a can sbꞌi Jehová cu Diosal. 18 Jaxa Jehová jix alon tet jaxca tiꞌ: Jaꞌ jun cha naꞌ tuꞌ caw wal watxꞌ, ta tol cha waꞌne a junoj jin templo ja waloni, 19 asan xin, man jaach oj ja waꞌne aoj, jato junoj naj ja cꞌaal oj waꞌnen aoj, ẍi Dios tet naj.
20 Yu tuꞌ xin, jaꞌ tinaniꞌ jix yiꞌ sbꞌa tzet jix yal can Jehová. Jaxca wal jix yun yalon canoj, queyton tuꞌ jix yun yelocoj. Jain jix jin oc can sqꞌuexeloj naj jin mam, jix jin oc syaawiloj cu conobꞌ tiꞌ, yuxan jix jin waꞌne a jun templo bꞌey chi oc eyilal tet Jehová cu Diosal. 21 Jaꞌ bꞌey yul templo tuꞌ, jix jin waꞌne can a jun lugar bꞌey chi ey bꞌatxan teꞌ Scaẍail Swa Kꞌane Jehová bꞌey jix yakꞌ can stiꞌ yetoj ebꞌ kichmam yet jix iꞌle eltej ebꞌ bꞌey txꞌotxꞌ Egipto, ẍi naj Salomón.
22 Jix lawi tuꞌ xin, catuꞌ jix oc linan naj rey Salomón sattaj jun yet xaambꞌal cꞌal sattaj masanil ebꞌ conobꞌ Israel, jix yiꞌon a skꞌabꞌ naj, 23 jix yalon jaxca tiꞌ: Jaach Jehová, jaach cu Diosal, ¿mactxequel to wal junojxa Dios jaxca jaach tiꞌ, bꞌey satcan cꞌal bꞌey sat txꞌotxꞌ tiꞌ, tol chi cꞌal yun jun bꞌey jix ja wakꞌcan ja tiꞌ yet cha txꞌoxon ja watxꞌcꞌulal tet mactxequel chi jijen masanil tzet cha walaꞌ? 24 Tuxa jix yiꞌ sbꞌa tzet jix ja wal can tet naj jin mam, jaꞌton naj ja chejabꞌ chi yij David. Man tucꞌal oj jix ja wal canoj, yutol jaꞌ yet jun cꞌu tiꞌ chi eloc tzet jix ja wal can tuꞌ. 25 Yu tuꞌ xin, jaach Jehová jin Diosal, yun ojabꞌ jantaj tzet jix ja wal can tet naj ja wakꞌomal servil chi yij David, tol ey ojabꞌ cꞌal ebꞌ yicꞌaal oj oc cꞌal bꞌey yul spalacio, asan ta tol jijem chi yute sbꞌa ebꞌ ey jaach, yutol caw jijem cꞌal jix yute sbꞌa jin mam tuꞌ ey jaach. 26 Jaꞌ tinaniꞌ xin, jaach Jehová cu Diosal, yiꞌ ojabꞌ sbꞌa tzetyetal albꞌilcan ja wu tet naj ja chejabꞌ David tuꞌ.
27 Asan xin, ¿yel mi wal xin jaach jin Diosal, tol oj jaach caey ecꞌ bꞌey sat txꞌotxꞌ txꞌotxꞌ tiꞌ? Ilaꞌ tol cꞌam chi yabꞌ satcan bꞌey chach caey ecꞌoj, jajxam wal chꞌan jun na jix jin waꞌne a ey jaach tiꞌ. 28 Caxcꞌal mi jaxca tuꞌ yeoc jaach jin Diosal, abꞌ tzet chin kꞌan ey jaach tinaniꞌ, abꞌ jin cuscꞌulal catuꞌ cha wabꞌen cꞌal pax jin txa lalan walon ey jaach tiꞌ. 29 El ojabꞌ yin ja cꞌul, tol manche ja wiꞌel ja sat yet cꞌualil cꞌal yet akꞌbꞌalil yin jun templo tiꞌ, jun jix ja walaꞌ tol jaꞌ yul oj oc eyilal ey jaach. Abꞌ tzet chi wal yin jin txa jain ja chejabꞌ jin tiꞌ. 30 Abꞌ tzet chin kꞌan ey jaach, cꞌal tzet chi skꞌan ebꞌ ja conobꞌ Israel yet chi txali ebꞌ ey jaach bꞌey yul ja templo tiꞌ, jata cꞌal bꞌey satcan ey jaach ecꞌoj, cha wabꞌen eytej catuꞌ cha wakꞌon lawoj cu penail jon.
31 Ta ey junoj ánima chi oc spenail tet junojxa yet animail, catuꞌ chi al-le tet tol chi jul yakꞌ can stiꞌ bꞌey jun yet xaambꞌal yul ja templo tiꞌ, 32 jaꞌ bꞌey satcan tuꞌ cha wabꞌ eytej, catuꞌ cha naꞌon oc yin mac ey spenail. Jatacꞌalaꞌ tzet utbꞌil yeocoj, jaxca ojabꞌ tuꞌ chi yun ja naꞌon oc yin jun mactxequel ey spenail tuꞌ, catuꞌ cha wakꞌon cuenta, jal pax mactxequel cꞌam spenail xin, cha wakꞌon pax ja yaxilal yibꞌan.
33 Jaꞌ yet chi oc cu penail ey jaach jaon ja conobꞌ jon tiꞌ, catuꞌ chi cu eyqꞌuey yu ebꞌ cu cajat jon, ta chi snaꞌ sbꞌa cu cꞌul jon, chi kiꞌon ey cu bꞌa ey jaach, catuꞌ chi jul cu kꞌanon ey jaach yin txail bꞌey yul jun templo tiꞌ, 34 jata cꞌal bꞌey satcan tuꞌ cha wabꞌ tzet chi cu kꞌan ey jaach, catuꞌ cha wakꞌon lawoj cu penail jon, jaxa jon ja wakꞌon meltzotoj bꞌey yul cu txꞌotxꞌ akꞌbꞌil can ja wu tet ebꞌ kichmam.
35 Jaꞌ yet cꞌamxa chi yakꞌ nabꞌ yu cꞌal cu penail chi oc ja sattaj, ta eyman chi cu txali ey jaach bꞌey yul jun templo tiꞌ, catuꞌ chi kiꞌon a can ja bꞌi, ta chi cus cu cꞌul yu cu penail chi kaoc ja sattaj jon, 36 jata cꞌal bꞌey satcan tuꞌ cha wabꞌ eytej tzet chi kal jaon ja chejabꞌ jon tiꞌ, cꞌal jaon ja conobꞌ jon tiꞌ, cha wakꞌon mimancꞌulal yibꞌan cu penail jon, catuꞌ cha txꞌoxon junoj watxꞌ bꞌeybꞌale ey jon. Chi lawi tuꞌ xin, cha waon eytej nabꞌ yibꞌan txꞌotxꞌ txꞌotxꞌ jix ja wakꞌ tet ebꞌ ja conobꞌ tiꞌ.
37 Jaꞌ yet chi jul wail bꞌey yul cu nación tiꞌ, ma junoj syaꞌilal, ma chi tajtoj tzettaj yetal yu waresma, ma chi jul noꞌ kochiꞌ noꞌ, ma junojxa tujan noꞌ chi akꞌon lawoj el kawo tiꞌ jon, ma chi low tzꞌabꞌ yin kawo, ma chi jul ebꞌ cu cajat kin jon, ma junojxa tzetyetal chi cu ujten sajlemtoj; 38 jaꞌ yet tuꞌ, chi koche tol cha wabꞌ tzet lalan cu kꞌanon yin txail ey jaach jaon ja conobꞌ jon tiꞌ. Ma yal cꞌal mactxequel jon tol chi naꞌcha el ku tol yu cu penail yuxan lalan kabꞌen syaꞌil jon, yuxan oj cu moobꞌatej cu kꞌabꞌ bꞌey yetcꞌulal jun ja templo tiꞌ. 39 Abꞌ wal eytej cu txa bꞌey satcan tuꞌ xin, yutol jaꞌ tituꞌ ey jaach ecꞌoj, akꞌ mimancꞌulal yibꞌan cu penail jon, catuꞌ chon ja colon eloj, cꞌal ja naꞌon oc kin jatacꞌalaꞌ tzet yili cu naꞌbꞌal junjun jon, catuꞌ oj ja wakꞌon spaj ey jon tol smoo cu chaꞌoni. 40 Ta jaxca tuꞌ, oj yal sbꞌa masanil ebꞌ ja conobꞌ tiꞌ ey jaach, catuꞌ oj sjijen ja chejbꞌanil ebꞌ yajbꞌan iquis jon bꞌey txꞌotxꞌ txꞌotxꞌ jix ja wakꞌcan tet ebꞌ kichmam tiꞌ jon.
41-42 Jaꞌ yet ey junoj naj txꞌoj conobꞌal tol naat ey sconobꞌ, catuꞌ oj yabꞌen ocoj tol ey ton ja wipal cꞌal ja mimanbꞌilal, cꞌal mimej watxꞌcꞌulal cha wakꞌ ey jon ja conobꞌ jon tiꞌ, catuꞌ chi jul yin eyilal ja sattaj bꞌey yul jun templo tiꞌ, 43 abꞌ tzet chi yal ebꞌ ey jaach. Yutol jaꞌ bꞌey satcan tuꞌ ey jaach ecꞌoj, catuꞌ oj ja wakꞌon tzet chi skꞌan ebꞌ tuꞌ, yet watxꞌ oj jaach yotajne el masanil nacionlaj ey bꞌey yul yibꞌankꞌinal tiꞌ, catuꞌ oj sjijen cꞌal ebꞌ ey jaach jaxca chi kun jaon ja conobꞌ Israel jon tiꞌ, catuꞌ oj naꞌcha el yu ebꞌ tol smoo chi oc ebꞌ yin eyilal ey jaach bꞌey yul jun templo jix jin waꞌne a ey jaach tiꞌ.
44 Jaꞌ yet oj cu eltoj jaon ja conobꞌ jon tiꞌ, yet oj kakꞌon jowal yetoj ebꞌ cu cajat jon, yal cꞌal bꞌey oj jon ja chejtoj, ta chi cu txali bꞌey yetcꞌulal jun ja conobꞌ sicꞌbꞌil el ja wu tiꞌ, cꞌal bꞌey yetcꞌulal jun ja templo jix jin waꞌne can a tiꞌ, 45 jaꞌ bꞌey satcan tuꞌ oj ja wabꞌ eytej cu txa tuꞌ jon, catuꞌ oj ja pajtzen jantaj tzet chi cu kꞌan ey jaach.
46 Ta jaon ja conobꞌ jon tiꞌ, chi oc cu penail ja sattaj, caw yel cu masanil chi oc penail jon, yuxan jaꞌ yet oj oc cu penail jaon ja conobꞌ jon tiꞌ, oj tit sjowal ja cꞌul kin jon, jaxa jon ja waon oc yul skꞌabꞌ ebꞌ cu cajat tuꞌ, catuꞌ oj jon iꞌletoj yin presowomal bꞌey junojxa conobꞌ caw naat ma cawil, 47 ta jaꞌ yet ey jon xa ecꞌ bꞌey junojxa conobꞌ tuꞌ, catuꞌ chi snaꞌon sbꞌa cu cꞌul, chi cu kꞌanon mimancꞌulal ey jaach yutol chi naꞌcha el ku tol jix oc cu penail ey jaach, 48 ta yetoj wal masanil cu cꞌul cꞌal cu naꞌbꞌal, chi snaꞌon sbꞌa cu cꞌul yet ey jon ecꞌ bꞌey junoj nación bꞌey chon iꞌletoj yin presowomal tuꞌ, catuꞌ chi cu txalitej yetcꞌulal bꞌey txꞌotxꞌ txꞌotxꞌ jix ja wakꞌcan tet ebꞌ kichmam tiꞌ jon, jaꞌton jun conobꞌ sicꞌbꞌil el ja wu bꞌey jix jin waꞌne a jun templo tiꞌ, 49 tol ojabꞌ wal cha wabꞌ eytej cu txa bꞌey satcan tuꞌ, catuꞌ cha waꞌnen yeoc ey jon. 50 Cha wakꞌon mimancꞌulal yibꞌan cu penail cꞌal cu pital jaon ja conobꞌ jon tiꞌ. Cha qꞌuexon snaꞌbꞌal ebꞌ chi cu iꞌontoj yin presowomal, yet watxꞌ chi okꞌ scꞌul ebꞌ kin jon, catuꞌ chi cu jajle el yu ebꞌ jon. 51 Yutol caw jaꞌ conobꞌ keoc sicꞌlebꞌil jon. Jaach jix jon wiꞌeltej bꞌey txꞌotxꞌ Egipto bꞌey ey jon oc yin syaꞌtajil yet yalantoj.
52 Yu tuꞌ xin, jaach jin Diosal, abꞌ jin txa jain ja chejabꞌ jin tiꞌ, cꞌal ebꞌ wet conobꞌ Israel tiꞌ chi txali ebꞌ ey jaach, yutol jaꞌ conobꞌ yeoc ebꞌ. Jaach Jehová, abꞌ cu txa yet chi cu awi ey jaach. 53 Yutol jaach jix jon ja poꞌocan el xol wanxa conobꞌlaj bꞌey sat txꞌotxꞌ txꞌotxꞌ tiꞌ, yet chi cu oc can ja conobꞌoj jaxca jix yun ja chejon yal naj ja chejabꞌ Moisés, yet jix ja wiꞌon eltej ebꞌ kichmam bꞌey yul yet Egipto, ẍi naj Salomón yin xa.
54 Kaan ey naj Salomón sattaj jun yet xaambꞌal tuꞌ, eya skꞌabꞌ naj bꞌey satcan yet lalan xali tuꞌ. 55 Jix lawi tuꞌ xin, jix a waanoj catuꞌ jix yalon watxꞌ kꞌane yibꞌan conobꞌ Israel, jix yalon yin ipeal jaxca tiꞌ: 56 Al-le ojabꞌ watxꞌ kꞌane yin Jehová, yutol jix yakꞌ swatxꞌcꞌulal ey jon, jaxca jix yun yalon canoj. Yutol jix yun masanil tzetyetal watxꞌ jix yal can tet ẍejabꞌ Moisés.
57 Ey ojabꞌ cꞌal ecꞌ Jehová cu Diosal cu xol jaxca jix yun yeecꞌ yetoj ebꞌ kichmam, catuꞌ man cꞌal oj cu bꞌejlecan cu txꞌojli yu. 58 Yakꞌ ojabꞌ cꞌal Jehová cu naꞌbꞌal yet oj kunen tzet chi yoche scꞌul, catuꞌ oj cu jijen sley cꞌal ẍejbꞌanil, wan jix yal can tet ebꞌ kichmam. 59 Jaꞌ masanil wan jix jin kꞌan tet Jehová cu Diosal tiꞌ, naꞌan cꞌal yu Naj yet cꞌualil cꞌal yet akꞌbꞌalil, yu jin scolon el jain ẍejabꞌ tiꞌ, yetoj cꞌal jaon sconobꞌ jon tiꞌ, cꞌal yu tzet chi cu kꞌanbꞌalne junjun cꞌu, 60 yet watxꞌ chi yotajne el masanil nación ey yul yibꞌankꞌinal tiꞌ tol cꞌam junojxa Dios, yutol asanne Jehová cu Diosal. 61 Yu tuꞌ xin, je masanil jaex conobꞌ Israel jex tiꞌ, asanne ojabꞌ Jehová che yaoc yin je cꞌul catuꞌ che jijen sley cꞌal ẍejbꞌanil, jaxca che yun tinaniꞌ, ẍi naj rey Salomón tet ebꞌ conobꞌ.
62 Jix lawi tuꞌ xin, catuꞌ jix yakꞌon xaambꞌal naj rey Salomón yetoj masanil ebꞌ conobꞌ Israel tet Jehová. 63 Ey 22,000 noꞌ wacax, ey 120,000 noꞌ meꞌ jix yakꞌ yin xaambꞌalil tet Jehová, yu xꞌoxon eloj tol ey watxꞌcꞌulal snan xol ebꞌ yetoj Dios. Queytuꞌ jix yun yoc can jun templo tuꞌ yin yopiso yu naj rey Salomón cꞌal yu masanil ebꞌ conobꞌ. 64 Jaꞌton yet jun cꞌual tuꞌ jix poꞌole el jun joyan nan sat bꞌey sattaj eltoj templo bꞌey chi akꞌle tzꞌaꞌ xaambꞌal yu naj rey. Jaꞌ tituꞌ jix yakꞌ xaambꞌal ebꞌ chi akꞌle tzꞌaꞌoj cꞌal ofrenda yin sat awo, cꞌal ẍepuꞌal noꞌ xaambꞌal yet watxꞌcꞌulal yetoj Jehová, yutol caw ma yabꞌ jun yet xaambꞌal tol bronce cꞌal eloj, jun eey sattaj stemplo Jehová, yutol caw ecꞌal noꞌ xaambꞌal jix yakꞌ ebꞌ.
65 Jaꞌ yet jun tiempoal tuꞌ, jujebꞌ cꞌu jix oc jun kꞌin yu naj rey Salomón yetoj masanil ebꞌ conobꞌ Israel sattaj Jehová. Caw wal ecꞌal ánima jix yamcha ocoj, jix tit tacꞌal ebꞌ bꞌey smoonal yet Hamat, masantaꞌcꞌal chi apni oc bꞌey jaꞌ jaꞌ eyoc smoonal yetoj txꞌotxꞌ Egipto. Jaꞌ yet jix lawi jujebꞌ cꞌual jun kꞌin tuꞌ, catuꞌ jix snaꞌon ebꞌ, tol chi el yich jujebꞌojxa cꞌual kꞌin, yuxan canlajonebꞌ cꞌu jix yaoc jun kꞌin ebꞌ tuꞌ. 66 Jaxa yet jix lawi jun kꞌin tuꞌ, catuꞌ jix stakꞌele can sbꞌa naj rey Salomón yetoj ebꞌ ánima, jaxa ebꞌ ánima tuꞌ jix yal watxꞌ kꞌane ebꞌ yin Salomón, catuꞌ jix paxtoj ebꞌ bꞌey sna yin tzalacꞌulal yu masanil tzetyetal watxꞌ jix yun Jehová yetoj David, jaꞌton jun ẍejabꞌ, cꞌal yetoj ebꞌ sconobꞌ Israel.