3 Jix lawi tuꞌ, jix too yakꞌon jowal yin conobꞌ Hamat yul yet Sobá, jix yiꞌon ocoj. 4 Jix scaꞌ waꞌnen cꞌal pax a conobꞌ Tadmor, bꞌey cusiltaj txꞌotxꞌ, cꞌal masanil wan conobꞌlaj bꞌey ey wan cꞌuanbꞌal yet masanil tzet chi loꞌlei, jaꞌton wan tuꞌ jix swaꞌne a bꞌey yul yet Hamat. 5 Jacꞌalaꞌ, queytuꞌ jix yun scaꞌ waꞌnen cꞌal pax a conobꞌ Bet-horón bꞌey yibꞌan atoj tuꞌ, cꞌal Bet-horón bꞌey yalan eytej, jaꞌton wan conobꞌ eyoc smuroal yinlaj; ey cꞌal pax oc spuertail, cꞌal chꞌen chꞌen eyoc yul oj spuertail. 6 Jix scaꞌ waꞌnen cꞌal pax a conobꞌ Baalat, cꞌal wanxa conobꞌ bꞌey chi cꞌubꞌale oc loꞌbꞌe. Jix swaꞌne cꞌal pax wan cuartel yet carruaje yet jowal, yetoj cꞌal bꞌey chi yambꞌale oc noꞌ che yet jowal, cꞌal jantaj tzetyetal jix yoche scꞌul jix swaꞌne bꞌey Jerusalén, bꞌey Líbano, cꞌal bꞌey masanil txꞌotxꞌ bꞌey chi lawi apni yakꞌon yaawilal. 7-8 Jaxa masanil ebꞌ yicꞌaal ebꞌ ánima tol ma qꞌueyle el yu ebꞌ Israel, jaꞌton ebꞌ Hitita, ebꞌ Amorreo, ebꞌ Heveo, ebꞌ Ferezeo, cꞌal ebꞌ Jebuseo, jaꞌton ebꞌ caan xol ebꞌ Israel, jix akꞌle pural ebꞌ yoc yin mulnail yu naj Salomón; quey cꞌal tuꞌ yeoc ebꞌ tinaniꞌ.

9 Jal ebꞌ Israel xin, cꞌam cꞌal junoj ebꞌ jix akꞌle pural yoc yin yakꞌomaloj servil yu naj, yutol asan yin soldadoal, yin yaawil, yin capitanil, cꞌal yin comandanteal yin wan chi lekꞌon carruaje yet jowal. 10 Ey cꞌal pax 250 ebꞌ eyoc yin sat yaawil xol ebꞌ chi mulna yetoj naj rey Salomón.

11 Jix iꞌle el ix cutzꞌin naj sreyal Egipto yu naj rey Salomón bꞌey yul sconobꞌ David, catuꞌ jix ale cantoj ix bꞌey jun acꞌ palacio jix swaꞌne naj rey Salomón tuꞌ, yutol jix snaꞌ naj tol jaꞌ ix yistil tuꞌ, man smoo oj chi eecꞌ ix bꞌey ey spalacio naj David, sreyal conobꞌ Israel, yutol jaꞌ wan lugar bꞌey jix eecꞌ cꞌal teꞌ Scaẍail Swa Kꞌane Jehová, jun tol yet Dios ye can ocoj.

12 Jix yakꞌon tzꞌaꞌ xaambꞌal naj rey Salomón tet Jehová yibꞌan jun yet xaambꞌal jix swaꞌne a bꞌey sattaj templo tuꞌ. 13 Jix snaꞌtej naj Salomón yunen yet wan scꞌual albꞌilcan yu sley naj Moisés, jaꞌton wan scꞌual yet chi akꞌle xaambꞌal, jatacꞌalaꞌ yalon can ley jix yal can naj Moisés, chi yal yeloc apnoj, jaꞌton yet scꞌual xewilal, yet wan kꞌin chi oc yet chi ali xꞌaaw, cꞌal yetoj oxebꞌ mimej kꞌin chi oc yul junjun abꞌil: Jaꞌton kꞌin yet ixim pan cꞌam yich, cꞌal kꞌin yet sat awo, cꞌal kꞌin yet wan pat waꞌnebꞌil a yetoj skꞌabꞌlaj teꞌ.

14 Jix oc cꞌal pax mulnail yin xolilal, jaxca yeoc yu smam, yet chi yil yopiso ebꞌ yakꞌomal xaambꞌal, cꞌal yetoj ebꞌ Levita, jaꞌton ebꞌ eyoc yin sbꞌitni tet Jehová, cꞌal scolwa yetoj ebꞌ yakꞌomal xaambꞌal yin junjun cꞌu, yetoj cꞌal pax yin tzet chi yun yoc ebꞌ chi teynen puerta, bꞌey junjun puerta jaxca yeoc yu naj rey David, ẍejabꞌ Dios. 15 Yuxan cꞌam cꞌal bꞌey jix sqꞌuextoj jaxca tzet jix yun smulna ebꞌ yakꞌomal xaambꞌal, ebꞌ Levita, yetoj cꞌal ebꞌ tesorero, jaxca jix yun yaon can oc naj David yin xolilal. 16 Jaꞌ masanil mulnail tol naꞌbꞌil yu naj rey Salomón, jix waꞌxi masanil yet tax cꞌal jix ey yich stemplo Jehová, masantaꞌcꞌal yet jix lawi. Tzꞌajan cꞌal jix yun swaꞌxi masanil.

17 Jix lawi tuꞌ xin, jix too naj Salomón bꞌey Esión-guéber, cꞌal bꞌey Elat, bꞌey stiꞌlaj jaꞌ mar, yul yet txꞌotxꞌ Edom. 18 Jix yaontej wan teꞌ barco naj rey Hiram yetoj ebꞌ chi mulna cꞌaltaꞌ yin teꞌ barco tuꞌ. Jaꞌ wan winaj tuꞌ, caw yotaj ebꞌ chi ecꞌ yibꞌan jaꞌ mar. Jix bꞌet ebꞌ yetoj ebꞌ yakꞌomal servil naj rey Salomón bꞌey txꞌotxꞌ Ofir. Ey mi junoj 320 quintal chꞌen oro jix yiꞌtej ebꞌ tet naj rey Salomón tuꞌ.