Ocnaj Naj Rey Salomón Yin Eyilal Tet Comon Dios
11
Man asanne oj ix scutzꞌin naj sreyal Egipto jix oc yistiloj naj rey Salomón, yutol caw ey cꞌal scamcꞌulal naj yin wanxa ebꞌ ix txꞌoj conobꞌal, jaꞌton ebꞌ ix Moabita, ebꞌ ix Amonita, ebꞌ ix Edomita, ebꞌ ix Sidonio cꞌal ebꞌ ix Hitita. 2 Chi yal yeloc apnoj jaꞌton wan nación tuꞌ jix yal Jehová tol cꞌam chi sjunbꞌane ey sbꞌa ebꞌ Israel yetoj ebꞌ yu yiꞌlen sbꞌa ebꞌ, yutol oj ijbꞌaletoj ebꞌ yu ebꞌ ix bꞌey sdiosal; jal pax naj rey Salomón xin, jix yaoc snaꞌbꞌal naj yin ebꞌ ix yuxan jix ijbꞌale qꞌueytoj snaꞌbꞌal naj yu ebꞌ ix. 3 Ey 700 ebꞌ ix yistil naj, tol cutzꞌin rey ebꞌ ix, ey pax 300 ebꞌ ix scaabꞌ yistil yeocoj. Jaꞌ masanil ebꞌ ix ix iꞌbꞌil yu naj tuꞌ, jaꞌ ebꞌ ix jix etnen el snaꞌbꞌal naj. 4 Jaꞌ yet caw icham winaj naj Salomón tuꞌ, jix somcha xacꞌaltoj snaꞌbꞌal naj yu ebꞌ ix, jix ijbꞌaletoj naj yintaj wanxa comon dios, catuꞌ ma xacꞌal yaoc sbꞌa naj yul skꞌabꞌ Jehová Dios, jaxca jix yute sbꞌa camom smam, jaꞌton David. 5 Jix oc naj Salomón yin eyilal tet jun comon dios chi yij Astarté, sdiosal ebꞌ Sidonio, cꞌal tet jun comon dios chi yij Milcom, jun sdiosal ebꞌ Amonita. Jaꞌ wan tuꞌ caw yaabꞌetaj yul sat Jehová. 6 Yu cꞌal wan tuꞌ, yuxan caw pena jix yute sbꞌa naj sattaj Jehová, yutol ma sjije tzet jix yal Dios jaxca jix yun camom smam, jaꞌton David.7 Jaꞌ yetcꞌulal bꞌey chi aol cꞌu bꞌey Jerusalén, jaꞌ tituꞌ jix swaꞌne a jun stemplo sdiosal ebꞌ Moabita chi yij Quemós, naj Salomón, yetoj cꞌal jun templo yet Moloc sdiosal ebꞌ Amonita, jaꞌton wan tuꞌ yel xacꞌal yaabꞌetaj yul sat Jehová. 8 Quey cꞌal tuꞌ jix yun yetoj masanil ebꞌ ix ix txꞌoj conobꞌal iꞌbꞌil yu, yutol junjun cꞌal ebꞌ ix ix tuꞌ chi yakꞌ tzꞌaꞌ incienso cꞌal xaambꞌal ebꞌ tet sdiosal. 9 Yuxan caw jix tit sjowal Jehová sDiosal Israel yin naj Salomón, yutol man jijemoj jix yute sbꞌa naj, caxcꞌal mi tol cael jix xꞌox sbꞌa Dios tet naj. 10 Yet jix al-le tet naj yu Dios tol man comonoj chi oc yin eyilal tet wanojxa comon dios, caw ma cꞌaltaꞌ sjije naj Salomón tzet jix yal Jehová. 11 Yu cꞌal tuꞌ xin, jix yalon Jehová tet naj Salomón jaxca tiꞌ: Ilaꞌ tol jaxca tuꞌ cha bꞌeybꞌalne. Ma ja jije jin wa kꞌane cꞌal jin chejbꞌanil jix wal can ey jaach. Yuxan jaꞌ tinaniꞌ oj wiꞌecꞌ ja wopiso tiꞌ, catuꞌ oj wakꞌon tet junoj ebꞌ chach akꞌon servil. 12 Asan xin, yu cꞌal jin camcꞌulal yin David, naj ja mam, yuxan man to oj wiꞌecꞌ yet iquis jaachto ecꞌ tiꞌ; asan xin, oj wiꞌecꞌ jun opiso tiꞌ tet ja cꞌaal. 13 Man oj wiꞌecꞌ jun opiso tiꞌ masanil, oj to wakꞌcan junojxa tujan tet, yutol ey cꞌal jin camcꞌulal yin naj jin chejabꞌ David, cꞌal yin conobꞌ Jerusalén tiꞌ, yutol jain caw jix jin sicꞌ eloj, ẍi Jehová. 14 Yu tuꞌ xin, jaꞌ Jehová jix aontej jun winaj pena snaꞌbꞌal yin naj Salomón tuꞌ, jaꞌton naj Hadad yicꞌaal ebꞌ sreyal ebꞌ Edomita. 15 Jaꞌ yet yalantoj yet jix eyqꞌuey conobꞌ Edom yu naj rey David, jix can naj Joab syaawil ebꞌ soldado yu smujon can eytoj ebꞌ jix cam xol jowal tuꞌ. Jaꞌ jix makꞌon cam masanil ebꞌ winaj a Edom. 16 Wajebꞌ xꞌaaw jix can tituꞌ yetoj masanil ebꞌ soldado Israel, masantaꞌcꞌal jix yakꞌ lawoj masanil ebꞌ winaj bꞌey conobꞌ Edom tuꞌ. 17 Jaꞌ naj Hadad tuꞌ caw yaliẍ unin to naj yet tuꞌ, yuxan jix ela naj, jix toocan naj yetoj wan ebꞌ yakꞌomal servil smam bꞌey conobꞌ Egipto. 18 Jix el ebꞌ bꞌey Madián xin, catuꞌ jix apni oc ebꞌ bꞌey Parán. Jaꞌ tituꞌ jix too ebꞌ yetoj wanxa ebꞌ winaj, catuꞌ jix apni oc ebꞌ bꞌey naj Faraón sreyal Egipto. Jaꞌ tituꞌ jix akꞌle sna ebꞌ, jix akꞌle sloꞌbꞌe ebꞌ, catuꞌ jix saꞌle xꞌotxꞌ ebꞌ yu naj rey tuꞌ.
19 Jaxa naj Hadad tuꞌ xin, caw wal watxꞌ jix eloc naj yul sat naj sreyal Egipto tuꞌ, yuxan jix yakꞌ naj jun smuꞌ yet chi oc yistiloj naj Hadad tuꞌ, jaꞌton ix sno ix reina chi yij Tahpenés. 20 Jaꞌ ix sno ix Tahpenés tuꞌ, jix ali jun yuneꞌ ix yetoj naj Hadad, jix yakꞌon yij sbꞌi Guenubat. Jaꞌ ix reina Tahpenés tuꞌ jix ilon chꞌibꞌ bꞌey sna naj sreyal Egipto, junne jix chꞌibꞌ yetoj ebꞌ yuninal naj rey tuꞌ. 21 Jaxa yet jix yabꞌoc naj Hadad bꞌey Egipto tuꞌ xin, tol jix cam naj rey David, catuꞌ tuxa jix cam cꞌal pax Joab, syaawil ebꞌ soldado, catuꞌ jix yalon Hadad tet naj rey Faraón jaxca tiꞌ:
—Chaꞌ jin meltzotoj bꞌey jin conobꞌ, ẍi naj.
22 Jix takꞌwi naj rey tet naj jaxca tiꞌ:
—¿Tzet yuxan tol cha woche chach meltzo bꞌey ja conobꞌ tuꞌ? ¿Tumi man tzꞌajanoj yeoc tzetyetal yul ja kꞌabꞌ wu an? ẍi naj.
Jix takꞌwi naj Hadad jaxca tiꞌ:
—Cꞌam tzetyetal tol man tzꞌajanoj ey yul jin kꞌabꞌ ja wu, asan tol chin oc tean ja win, tol chin ja chaꞌ meltzotoj, ẍi naj Hadad.
23 Ey pax jun winaj chi yij Rezón, scꞌaal Eliadá, caw pena tzet chi snaꞌoc yin naj Salomón tuꞌ, yutol jaꞌ Dios jix aon oc yin snaꞌbꞌal naj. Jaꞌ naj Rezón tuꞌ elnaj a yul skꞌabꞌ sreyal chi yakꞌ servil, jaꞌton Hadad-ézer, sreyal conobꞌ Sobá. 24 Jaꞌ yet jix makꞌle cam ebꞌ soldado bꞌey conobꞌ Sobá, yu naj rey David tuꞌ, jix syambꞌa oc jun bꞌulan ebꞌ elkꞌom naj Rezón tuꞌ. Jaꞌ naj jix oc syaawiloj ebꞌ. Jix too caey ebꞌ bꞌey conobꞌ Damasco, jaꞌ tituꞌ jix ale oc naj Rezón yin reyal yu ebꞌ. 25 Caw wal chi el sjowal naj yin ebꞌ Israel yet iquisto ecꞌ naj rey Salomón, quey pax tuꞌ jix yute sbꞌa naj Hadad a conobꞌ Edom. Caw chi el sjowal naj Rezón tuꞌ yin ebꞌ Israel, jaꞌ naj eyoc yin reyal bꞌey conobꞌ Siria.
26 Quey pax tuꞌ naj Jeroboam, scꞌaal Nabat a conobꞌ Cereda, yet ebꞌ yicꞌaal Efraín, chi el cꞌal pax sjowal yin naj rey Salomón. Jaꞌ naj Jeroboam tuꞌ eyoc yin yopiso yetoj naj Salomón, camnajxa smam naj, Serúa sbꞌi xutx naj. 27 Queytuꞌ jix yun spacꞌoc naj Jeroboam yin naj rey Salomón tuꞌ. Jaꞌ yet tuꞌ jix akꞌle noel jun sjobꞌeal txꞌotxꞌ bꞌey chi waꞌxi smuroal conobꞌ David, 28 jaꞌ yet jix yilon oc naj rey Salomón jun achꞌe winaj tuꞌ tol caw cꞌasan chi yute sbꞌa naj Jeroboam tuꞌ, tol watxꞌ snaꞌbꞌal. Yu jun tuꞌ, yuxan jix ale oc naj syaawiloj ebꞌ mulnawom xol ebꞌ yicꞌaal naj José.
29 Jaꞌ yet junel, jix eltej naj Jeroboam bꞌey Jerusalén yet chi yakꞌon junoj ẍejbꞌanil, cꞌuxan cꞌal jix ẍaꞌle sbꞌa yetoj naj Ahías ẍejabꞌ Dios, a conobꞌ Siló. Eyoc jun an sjojan spichil naj Ahías caw wal acꞌto. Asan ebꞌ scawanil jix kꞌanabꞌ bꞌey yul jun bꞌe tuꞌ. 30 Catuꞌ jix yiꞌon el an jojan spichil naj Ahías eyoc tuꞌ, catuꞌ jix skocꞌ tzilnentoj, lacawebꞌ tujan jix yutetoj. 31 Jix yalon tet naj Jeroboam jaxca tiꞌ: Chaꞌ laonebꞌ tujan ja wet tiꞌ, yutol jaxca tiꞌ chi yun yalon Jehová cu Diosal ey jaach: Yutol oj wiꞌecꞌ yopiso naj Salomón, jaxa ey jaach oj wakꞌcan laonebꞌoj icꞌaaleal. 32 Junxane icꞌaaleal oj wakꞌcan tet ebꞌ yicꞌaal Salomón, yutol ey jin camcꞌulal yin naj jin chejabꞌ David, cꞌal yin jin conobꞌ Jerusalén, yutol jix jin sicꞌ el xol masanil conobꞌ Israel. 33 Yutol tuxa jix jin bꞌejlecan yu naj Salomón, jix oc eyilal tet comon dios chi yij Astarté, ix sdiosal ebꞌ Sidonio, cꞌal tet Quemós sdiosal ebꞌ Moabita; cꞌal tet Milcom sdiosal ebꞌ Amonita. Caw wal cꞌamxa swatxꞌil chi yute sbꞌa naj jin sattaj, cꞌamxa chi sjije jin ley cꞌal jin chejbꞌanil jaxca jix yun smam, jaꞌton jin chejabꞌ David. 34 Asan xin, man to oj wiꞌecꞌ jun opiso tiꞌ tet Salomón yet iquisto ecꞌoj; oj to bꞌey cꞌaltoj yin reyal, yu cꞌal jin camcꞌulal yin naj rey David, naj jin chejabꞌ sicꞌbꞌil el wu, yutol jix sjije jin chejbꞌanil cꞌal jin ley. 35 Yu cꞌal jun tuꞌ, yuxan oj wiꞌecꞌ laonebꞌ tujan icꞌaaleal tet scꞌaal naj Salomón, catuꞌ oj wakꞌon ey jaach; 36 junxane icꞌaaleal oj wakꞌcan tet scꞌaal Salomón tuꞌ, yet watxꞌ eyto cꞌal mactxequel oj naꞌontej naj jin chejabꞌ David bꞌey conobꞌ Jerusalén tiꞌ, jaꞌton jun conobꞌ jix jin sicꞌ can el bꞌey chi oc eyilal ey jin an. 37 Oj jaach waoc yin ja wopiso jaxca wal chi yoche ja cꞌul, yet chach oc sreyaloj conobꞌ Israel tiꞌ. 38 Yu tuꞌ xin, ta oj ja jije ja wunen masanil tzet chi walaꞌ, catuꞌ jichan cꞌal oj ja wute ja bꞌa jin sattaj. Ta oj ja jije cꞌal jin ley cꞌal jin chejbꞌanil, jaxca jix yun naj jin chejabꞌ David, ta jaxca tuꞌ man cꞌal oj jaach jin bꞌejcanoj, oj wakꞌ cꞌal ja wopiso, jaxca wal jix yun wakꞌon yopiso naj jin chejabꞌ David, oj waoc conobꞌ Israel tiꞌ yul ja kꞌabꞌ. 39 Oj waoc syaꞌilal yibꞌan ebꞌ yicꞌaal David junoj tiempoal yu cꞌal ma sjije jin chejbꞌanil naj rey Salomón, oj lawoj tuꞌ catuꞌ oj wiꞌon pax el syaꞌilal yibꞌan, ẍi Jehová, ẍi naj Ahías.
40 Jaꞌ yet jix yabꞌen naj Salomón tzet jix yal Jehová, yuxan jix yal naj tol chi makꞌle cam naj Jeroboam, yu jun tuꞌ, yuxan jix ela naj, jix toocan bꞌey conobꞌ Egipto bꞌey eyoc naj Sisac yin reyal. Masantaꞌcꞌal jix camtoj naj Salomón, catuꞌ jix meltzo naj bꞌey Israel.
Scamichal Naj Salomón
41 Jaꞌ wanxa skꞌaneal tzet jix yun naj Salomón cꞌal sjelanil, jatuꞌ tzꞌibꞌebꞌilcan yul an libro yet skꞌaneal Salomón. 42 Cawinaj abꞌil jix oc naj yin reyal bꞌey Jerusalén yetoj cꞌal yibꞌan masanil conobꞌ Israel. 43 Jaꞌ yet jix camtoj naj, jatuꞌ jix muji bꞌey sconobꞌ camom smam, jaꞌton David. Jix lawi tuꞌ, jaxa junxa scꞌaal chi yij Roboam, jaꞌ jix oc can sqꞌuexeloj yin reyal.