11
Jaꞌ yet jix apni oc naj Roboam bꞌey Jerusalén, jix syambꞌa oc 180,000 soldado sicꞌbꞌil el xol ebꞌ yicꞌaal Judá, cꞌal xol ebꞌ yicꞌaal Benjamín, yet chi too yakꞌon jowal ebꞌ yin junxa tujan ebꞌ yicꞌaal Israel, yet chi oc pax ebꞌ yalan ẍejbꞌanil ebꞌ junelxa. 2 Jaxa Jehová jix alon tet jun ẍejabꞌ chi yij Semaías jaxca tiꞌ: 3 Al tet naj Roboam, naj scꞌaal Salomón sreyal Judá, yetoj tet masanil ebꞌ Israel caan bꞌey Judá, cꞌal tet ebꞌ yet Benjamín, 4 tol cꞌam ojabꞌ chi yakꞌ jowal ebꞌ yetoj ebꞌ yet conobꞌ. Meltzo ojabꞌ ebꞌ bꞌey sna masanil, yutol jain jix wakꞌ eloc jun tiꞌ, ẍi Jehová.Jaꞌ yet jix yabꞌen ebꞌ tzet jix yal Jehová, queytuꞌ jix yun smeltzo ebꞌ, ma xa too yakꞌ jowal ebꞌ yin naj Jeroboam.
Jix Bꞌinale Naj Roboam Yin Yopiso
5 Jix eyecꞌ naj Roboam bꞌey Jerusalén, catuꞌ jix swaꞌne a smuroal wan conobꞌlaj ey yul yet Judá, cꞌal yul yet Benjamín. 6 Jaꞌton: Belén, Etam, Tecoa, 7 Bet-sur, Socó, Adulam, 8 Gat, Maresá, Zif, 9 Adoraim, Laquis, Azecá, 10 Sora, Aialón cꞌal Hebrón. 11 Caw watxꞌ jix yun swaꞌne can oc smuroal wan conobꞌ tuꞌ, jix sicꞌle can oc syaawil ebꞌ soldado chi teynen bꞌey junjun conobꞌ tuꞌ. Miman ixim tiriw, aceite olivo, cꞌal yal uva jix syambꞌa can oc bꞌey junjun conobꞌ tuꞌ. 12 Jix yakꞌon cꞌal pax can chꞌen julbꞌal, cꞌal chꞌen lanza bꞌey junjun conobꞌ, yet chi scolon sbꞌa ebꞌ tet jowal. Queytuꞌ jix yun yoc can yopiso naj Roboam bꞌey yul yet Judá cꞌal yul yet Benjamín.
13 Jaꞌ ebꞌ yakꞌomal xaambꞌal cꞌal ebꞌ Levita jix tit bꞌey yul-laj yet Israel, yet junxane chi yute sbꞌa ebꞌ yetoj naj Roboam. 14 Jaꞌ ebꞌ Levita tuꞌ, jix sbꞌejcan masanil stzetyetal ebꞌ cꞌal xꞌotxꞌ ebꞌ bꞌey chi low sjobꞌbꞌeal noꞌ ebꞌ, catuꞌ jix jul ebꞌ bꞌey Jerusalén cꞌal bꞌey wanxa conobꞌ yul yet Judá, yutol jaꞌ naj Jeroboam, yetoj cꞌal ebꞌ scꞌaal, jix ujten el ebꞌ yin yopiso yu yakꞌon servil Jehová ebꞌ. 15 Yutol jaꞌ naj Jeroboam tuꞌ, comon xacꞌal jix yaoc ebꞌ yakꞌomal xaambꞌal yu yakꞌle servil wan comon dios yu naj, cꞌal yoc ebꞌ yin eyilal tet wan wonan naat eyaoj, cꞌal tet ebꞌ demonio cꞌal tet yechel wacax jix swaꞌne a naj. 16 Jal pax junxa tujan ebꞌ yicꞌaal Israel tol caw eyoc snaꞌbꞌal yoc yin eyilal tet Jehová sDiosal xin, jix sbꞌeybꞌalne cꞌal sbꞌeybꞌal ebꞌ yakꞌomal xaambꞌal ebꞌ, cꞌal ebꞌ Levita, jix apni oc caan ebꞌ bꞌey Jerusalén, yet watxꞌ chi skeꞌ yakꞌon xaambꞌal ebꞌ tet Jehová, jaꞌton sDiosal smam icham ebꞌ. 17 Queytuꞌ jix yun yiꞌon yip yopiso naj Roboam, scꞌaal Salomón yul yet Judá yin oxebꞌ abꞌil, yutol asanne oxebꞌ abꞌil watxꞌ jix yute sbꞌeybꞌal naj jaxca jix yute sbꞌeybꞌal David yetoj Salomón.
18 Jaꞌ naj Roboam tuꞌ, jix nupi naj yetoj ix Mahalat, scutzꞌin Jerimot, scꞌaal David, jaꞌ xutx ix jaꞌton ix Abihail scutzꞌin Eliab, yitxiquin naj Jesé. 19 Ebꞌ yuninal naj Roboam yetoj ix Mahalat, jaꞌton Jehús, Semarías cꞌal Záham. 20 Jix lawi tuꞌ, jix nupi pax naj Roboam yetoj ix Maacá scutzꞌin Absalón. Jaꞌ ebꞌ scꞌaal naj yetoj ix, jaꞌton Abiam, Atai, Zizá cꞌal Selomit. 21 Jaꞌ naj Roboam tuꞌ, ey 18 yistil yetoj 60 ebꞌ ix yet scaabꞌ yistil naj. Ey 28 scꞌaal yetoj 60 scutzꞌin. Asanne wal yin ix Maacá tuꞌ yel xacꞌal ey scamcꞌulal naj yintaj cꞌal wanxa ebꞌ ix.
22 Jix yoche scꞌul naj Roboam tuꞌ tol jaꞌ naj Abiam, yuneꞌ ix Maacá, jaꞌ jix oc can sqꞌuexeloj yin reyal, yuxan jaꞌ naj jix ale can oc yin yaawilal xol wanxa ebꞌ scꞌaal tuꞌ. 23 Caw jelan jix yute snaꞌbꞌal naj Roboam tuꞌ, yuxan jix spoꞌoecꞌ scꞌaal bꞌey wan conobꞌlaj eyoc smuroal yul yet Judá, cꞌal yul yet Benjamín. Caw miman loꞌbꞌe jix yakꞌ tet ebꞌ, ecꞌal pax ebꞌ jix seyle oc yistil yu naj.