Jix Tenchanele Naj Josafat Yu Ẍejabꞌ Dios
19
Jaꞌ naj Josafat sreyal Judá, jix meltzotej naj yin tzalacꞌulal bꞌey spalacio bꞌey conobꞌ Jerusalén. 2 Jaxa jun ẍejabꞌ Dios chi yij Jehú, jaꞌton scꞌaal Hananí, jix eltej yu jul ẍaꞌon yapnoj Josafat, jix yalon tet jaxca tiꞌ: ¿Tzet yuxan jix jaach colwa yetoj jun winaj pena snaꞌbꞌal tuꞌ? ¿Tzet yuxan jix ja camcꞌulne xacꞌal ja bꞌa yetoj jun chi jowi oc yin Jehová? Yu cꞌal jun tuꞌ, yuxan jix tit sjowal Dios ja wibꞌan tinaniꞌ. 3 Asan xin, eyto wal junxa tzetyetal chi oc ja watxꞌiloj sattaj Dios tinaniꞌ, yutol jix ja wakꞌ lawoj el jun yechel comon dios chi yij Aserá ey yul ja nación tiꞌ, yu cꞌal tol jix ja waoc ja naꞌbꞌal yin ja wakꞌon servil Dios, ẍi Jehú tet naj.Ey Wan Ebꞌ Juez Jix Ale Oc Yopiso Yu Naj Josafat
4 Jaꞌ bꞌey conobꞌ Jerusalén jix caey ecꞌ naj Josafat, asan xin ey jun sbꞌeybꞌal, tol chi bꞌet yil cꞌal ecꞌ wanxa conobꞌ, chi too tacꞌal bꞌey Beerseba, masantaꞌcꞌal bꞌey txꞌotxꞌ tzalquiltaj yul yet Efraín, yet watxꞌ chi montele meltzo ebꞌ ánima yin Dios yu naj, yet chi yaon oc sbꞌa ebꞌ yul skꞌabꞌ Jehová, jaꞌton sDiosal yetoj smam icham. 5 Queytuꞌ jix yun yale can oc ebꞌ juez yu bꞌey masanil wan conobꞌ eyoc smuroal yul yet Judá. 6 Jix yalon tet ebꞌ juez jaxca tiꞌ: Chi cam je yilon tzetyetal oj je yunne, yutol manaj tzet chi yoche ebꞌ ánima oj je yunne, tol jaꞌ ojabꞌ tzet chi yoche Jehová che yunne. Oj oc cꞌal Jehová je yetoj yin tzet oj je yunne. 7 Yu tuꞌ xin, miman ojabꞌ yeloc apnoj Jehová yul je sat, chi cam je yilon tzet oj je yunne, yutol jaꞌ Jehová cu Diosal man oj techa yu ta tol ey tzetyetal man watxꞌoj che yunne, yetoj cꞌal pax oj, ta tol ey sqꞌuexanil ebꞌ ánima yul je sat, cꞌam ojabꞌ bꞌey oj je chaꞌ chꞌen tumin yin ewantajil tet ebꞌ, ẍi naj tet ebꞌ.
8 Jix ale cꞌal pax oc wan ebꞌ yaaw yeoc xol conobꞌ yu naj Josafat, yetoj wan ebꞌ Levita, cꞌal ebꞌ yakꞌomal xaambꞌal caan bꞌey Jerusalén, jix ale oc ebꞌ yin juezal yin yakꞌon cuybꞌanile jatacꞌalaꞌ yalon sley Jehová, cꞌal yin swaꞌnen yeoc jowal ebꞌ yin wanxa tzetyetal xol ebꞌ caan bꞌey Jerusalén tuꞌ. 9 Jix cam yalon can wan chejbꞌanile tuꞌ tet ebꞌ jaxca tiꞌ: Jaex tiꞌ, oj je yil je yopiso tiꞌ, ey ojabꞌ yeloc apnoj Jehová yul je sat, jijem ojabꞌ jex cꞌal tet, watxꞌ cꞌal che yute je bꞌa. 10 Yal cꞌal tzet yeoc junoj jowal oj jul je sattaj yu ebꞌ je yet conobꞌ tiꞌ, ma bꞌey wanojxa conobꞌlaj, yu je waꞌnen yeoc junoj kꞌane, jaxca yu makꞌo cam ánima, ma yu wanojxa tzetyetal chi el yunen ebꞌ ánima, ta tol man jaxca oj yalon ley ma chejbꞌanile, chi cam wal je yalon tet ebꞌ tol cꞌam ojabꞌ chi oc spenail ebꞌ tet Jehová, yet watxꞌ cꞌam chi tit sjowal scꞌul Naj je yibꞌan jaex tiꞌ, cꞌal yibꞌan ebꞌ. Watxꞌ cꞌal che yute je bꞌa xin, yet watxꞌ cꞌam chi tit je yibꞌan. 11 Jaꞌ naj Amarías sat yakꞌomal xaambꞌal yeoc naj, asanne naj chi skeꞌ yaloni tzet chi yun swaꞌxi oc yin xolilal yin yet Jehová, jaxa naj Zebadías scꞌaal Ismael, yaaw pax yeoc xol ebꞌ yicꞌaal Judá, cꞌal yaon oc yin xolilal masanil smulnail naj rey. Ey cꞌal pax oc ebꞌ Levita yin yopiso je yetoj. Tecꞌbꞌawej je bꞌa xin, akꞌwej je yip je mulna yin je yopiso. Jaꞌ mactxequel watxꞌ cꞌal tzet oj yun smulnai, jaꞌ Jehová oj oc cꞌal yetoj, ẍi naj tet ebꞌ.