3 Caw jix xiwa naj Josafat tuꞌ; jix snaꞌon naj tol chi yaoc sbꞌa yul skꞌabꞌ Jehová, yuxan jix yalaꞌ tol chi yijle nocha sbꞌa masanil ebꞌ ánima yul yet Judá tuꞌ. 4 Jix tit ebꞌ ánima ey bꞌey junjun conobꞌ ey yul yet Judá, yu skꞌanon scolwal Jehová ebꞌ. 5 Yuxan jix a waan naj rey Josafat xol masanil ebꞌ ánima yaman ecꞌ bꞌey Jerusalén tuꞌ, bꞌey jun acꞌ yamakꞌil stemplo Jehová. 6 Jix a yaw naj jix yalon jaxca tiꞌ: Jaach Jehová cu Diosal jaach, yetoj ebꞌ kichmam jon, jaach tiꞌ, Dios jaach bꞌey satcan, yaaw jaach cꞌal pax yibꞌan masanil nacionlaj. Yul ja kꞌabꞌ eyoc ja wipal cꞌal ja jelanilal. Cꞌam junoj mactxequel chi skeꞌ jaach stenon oc tucanoj. 7 Jaach cu Diosal, jaach jix ja wiꞌel ebꞌ ánima caan sat txꞌotxꞌ txꞌotxꞌ tiꞌ cu sattaj jaon ja conobꞌ Israel jon tiꞌ. Jix ja wakꞌon txꞌotxꞌ txꞌotxꞌ tiꞌ ey jon, jaon yicꞌaal jon Abraham tiꞌ, jaꞌton naj ja watxꞌil ánima. 8 Jaꞌ yet jix caey ecꞌ ebꞌ kichmam titiꞌ jon, jix swaꞌnen a jun templo ebꞌ tiꞌ ey jaach, jix yalon ebꞌ jaxca tiꞌ: 9 Ta tol chi jul junoj syaꞌilal kibꞌan yu cu penail chi oc ja sattaj, jaxca jowal, syaꞌilal, ma wail, oj cu jul kal cu bꞌa ey jaach bꞌey ja templo tiꞌ, yutol jaꞌ titiꞌ ey jaach ecꞌoj. Oj cu kꞌan ja colwal snan xol cu yaꞌilal tuꞌ jon, oj ja wabꞌ cu txa, catuꞌ jon ja colon eloj, ẍi ebꞌ. 10 Jaꞌ tinaniꞌ, ilaꞌ eyecꞌ ebꞌ Amonita, ebꞌ Moabita, yetoj cꞌal ebꞌ caan bꞌey txꞌotxꞌ tzalquiltaj yul yet Seír, jaꞌton bꞌey txꞌotxꞌ xꞌotxꞌ ebꞌ ma yal ja cꞌul jix ecꞌtej ebꞌ cu mam icham jaon Israel jon tiꞌ, yet jix eltej ebꞌ bꞌey txꞌotxꞌ Egipto; tol txꞌoj bꞌeal bꞌey jix too ebꞌ, yuxan ma akꞌle can lawoj el ebꞌ yu ebꞌ. 11 Jaxa tinaniꞌ xin, jaꞌ spaj chi yoche ebꞌ chi yakꞌ ey jon, tol chi yoche ebꞌ chi yakꞌ jowal ketoj jon, yet chi cu yiꞌon el ebꞌ bꞌey sat txꞌotxꞌ txꞌotxꞌ jix ja wakꞌcan cu majuloj tiꞌ. 12 Yu tuꞌ xin, jaach cu Diosal, eloj yin ja cꞌul tol cha waoc syaꞌilal yibꞌan ebꞌ, yutol jaon tiꞌ jon, caw cꞌam kip yet chi skeꞌ cu tecꞌbꞌan cu bꞌa sattaj jun miman bꞌulan soldado tuꞌ, yet chi kakꞌon jowal yetoj ebꞌ jon. Cꞌamxa chi naꞌcha ku tzet chi kute cu bꞌa jon; yuxan jaꞌ ja win eyoc cu naꞌbꞌal jon, ẍi naj rey yet jix txali tet Jehová.

13 Masanil ebꞌ Judá, linan ecꞌ ebꞌ sattaj Jehová, yetoj masanil yistil ebꞌ, cꞌal yuninal ebꞌ, yetoj cꞌal pax ebꞌ yaliẍ unin. 14 Jaꞌ yet linan ecꞌ masanil ebꞌ conobꞌ tuꞌ, jix oc Yespíritu Jehová yin jun Levita yicꞌaal Asaf, chi yij pax Jahaziel, scꞌaal Zacarías, yitxiquin Benaías. Jaꞌ naj Benaías tuꞌ, scꞌaal Jeiel, yitxiquin naj Matanías. 15 Jix yalon naj Jahaziel tuꞌ jaxca tiꞌ: Tzꞌin je chi je masanil, abꞌwej xin, jantaj jex caan jex bꞌey Judá, bꞌey Jerusalén, yetoj cꞌal pax jaach rey Josafat. Jaꞌ Jehová jix alon jaxca tiꞌ: Cꞌam ojabꞌ chex xiwi, cꞌam ojabꞌ che yakꞌ caabꞌcꞌulal yu jun miman bꞌulan soldado tuꞌ, yutol jaꞌ jun jowal tuꞌ, man je yetoj jaex tiꞌ, yutol jain ey wet. 16 Jaꞌ yet yecal chex eytoj je yakꞌon jowal yin ebꞌ. Oj atej ebꞌ bꞌey wonan yet Sis tiꞌ, jaxa jex jaex tiꞌ, oj je chaꞌle je bꞌa yetoj ebꞌ bꞌey stiꞌlaj jaꞌ jaꞌ chi ecꞌtoj bꞌey txꞌotxꞌ cusiltaj txꞌotxꞌ yul yet Jeruel. 17 Man jaex oj je yakꞌ jowal tuꞌ, asan tucꞌal oj jex oc tꞌananoj, cꞌam cꞌal tzet oj je yunne, tucꞌal oj je yilaꞌ tzet oj yun jex jin colon eloj, ẍi Jehová. Yuxan je masanil jex caan bꞌey Jerusalén cꞌal bꞌey Judá, cꞌam cꞌal chex xiwi, cꞌam cꞌal che yakꞌ caabꞌcꞌulal. Yet yecal chex too yin ebꞌ, yutol jaꞌ Jehová eyoc je yetoj, ẍi naj Jahaziel tuꞌ.

18 Yu tuꞌ xin, jix ey kaan naj Josafat, jix ey noan naj sat txꞌotxꞌ; jix ey cꞌal pax noan masanil ebꞌ ánima caan bꞌey Judá cꞌal bꞌey Jerusalén, yu yoc ebꞌ yin eyilal sattaj Jehová. 19 Jaxa ebꞌ Levita, ebꞌ yicꞌaal Quehat yetoj ebꞌ yicꞌaal Coré, jix a waan ebꞌ; caw ip jix yun yaon el yaw ebꞌ sbꞌitni tet Jehová, sDiosal Israel.

20 Jaxa yet jix kꞌinibꞌi a yet junxa cꞌual xin, jix a waan masanil ebꞌ, jix too ebꞌ bꞌey sbꞌeal txꞌotxꞌ cusiltaj txꞌotxꞌ yul yet Tecoa. Jaꞌ yet jix too ebꞌ tituꞌ, jix oc linan naj rey Josafat, jix yalon tet ebꞌ jaxca tiꞌ: Abꞌwej tzet oj walaꞌ, jex a Jerusalén cꞌal jex a Judá: Kawej oc Jehová cu Diosal yipoj cu cꞌul, cꞌam tzet oj cu ionoj, che yaon wal oc ebꞌ ẍejabꞌ Dios tiꞌ yipoj je cꞌul, yet watxꞌ cꞌal oj yun kelocoj, ẍi naj tet ebꞌ.

21 Jaꞌ yet jix kꞌanabꞌ naj yetoj ebꞌ conobꞌ tuꞌ, jix sicꞌon el wan ebꞌ chi bꞌitni. Jix yaon oc spichil ebꞌ chi skꞌan cꞌaltaꞌ yet chi bꞌitni ebꞌ; catuꞌ jix too ebꞌ sattaj ebꞌ soldado tuꞌ. Chi yalon watxꞌ kꞌane ebꞌ tet Jehová yin bꞌital jaxca tiꞌ: Kalwej yu diosalil tet Jehová, yutol ey cꞌal scamcꞌulal.

22 Jaꞌ yet jix ẍaꞌon el yich sbꞌitnen bꞌit ebꞌ yin tzalacꞌulal tuꞌ, jaꞌ Jehová jix aon oc jun uchlebꞌail xol ebꞌ Amonita, cꞌal xol ebꞌ Moabita, yetoj cꞌal xol ebꞌ jix tit bꞌey txꞌotxꞌ tzalquiltaj bꞌey Seír, yin yakꞌon jowal yin ebꞌ Judá, yuxan jix eyqꞌuey ebꞌ. 23 Yutol jaꞌ ebꞌ Amonita yetoj ebꞌ Moabita jix yakꞌ jowal ebꞌ yin ebꞌ jix tit bꞌey Seír, jix lawi el ebꞌ tuꞌ yu ebꞌ. Jix lawi tuꞌ, jaxa cꞌal oc ebꞌ jix yakꞌle lawoj el sbꞌa yin jowal. 24 Jaxa yet jix yilontoj ebꞌ soldado yet Judá bꞌey txequel kilontoj txꞌotxꞌ cusiltaj txꞌotxꞌ, jix yilontoj ebꞌ tol tuxa cꞌal latzꞌantoj wan scajat ebꞌ tuꞌ scami, cꞌamxa junoj jix colcha can eloj. 25 Yuxan jix too naj Josafat yetoj ebꞌ soldado jaꞌjun yetoj tuꞌ, jix yiꞌontej masanil tzetyetal jix can yu wan scajat ebꞌ tuꞌ. Jix ilcha an pichile yu ebꞌ, cꞌal wanxa tzetyetal tol caw ey stool. Yu jun tuꞌ, caw miman tzetyetal jix yiꞌtej ebꞌ, eyto cꞌal ma tzaji yiꞌontej ebꞌ. Jaꞌ jantaj tzetyetal jix yiꞌtej ebꞌ tuꞌ, oxebꞌ wal cꞌu jix yakꞌ ebꞌ syambꞌan aoj.

26 Jaxa yet scan cꞌual xin, jix syambꞌa oc sbꞌa ebꞌ bꞌey jun jobꞌe. Jaꞌ tituꞌ jix yal watxꞌ kꞌane ebꞌ tet Jehová. Yu jun tuꞌ, yuxan jix yakꞌ yij sbꞌi jun txꞌotxꞌ tuꞌ ebꞌ, Sjobꞌeal yet Beracá, (Beracá chi yal yeloc apnoj alo watxꞌ kꞌane). Jacꞌalaꞌ cꞌal sbꞌi jun txꞌotxꞌ tuꞌ tinaniꞌ. 27 Jix lawi tuꞌ xin, yin xacꞌal tzalacꞌulal jix yun sbꞌabꞌi naj Josafat yet jix meltzotej yetoj ebꞌ a Judá cꞌal ebꞌ a Jerusalén, yutol jaꞌ Jehová jix akꞌon tzalacꞌulal tet ebꞌ yu jix eyqꞌuey wan scajat ebꞌ tuꞌ yu. 28 Jaꞌ yet jix apni oc ebꞌ bꞌey Jerusalén, jix too ebꞌ bꞌey stemplo Jehová, lalan stenon teꞌ salterio ebꞌ, cꞌal teꞌ cítara yetoj cꞌal trompeta.

29 Jaꞌ yet jix abꞌle skꞌaneal yu wan conobꞌlaj, tol jaꞌ Jehová jix akꞌon jowal yin wan scajat ebꞌ Israel tuꞌ, caw jix xiw wanxa nación yu ebꞌ. 30 Yu jun tuꞌ, caw tzalacꞌulal jix yun yakꞌon reyal naj Josafat, yutol jix yakꞌ yaxilal Dios yibꞌan, yetoj wanxa nacionlaj ey bꞌey scawilal tuꞌ.

31 Ey 35 abꞌil skꞌinal naj Josafat yet jix ẍaꞌon el yich yakꞌon reyal bꞌey Judá, 25 abꞌil jix yakꞌ reyal bꞌey Jerusalén. Jaꞌ xutx chi yij Azubá, scutzꞌin naj Silhí.

32 Jaꞌ naj Josafat tuꞌ, watxꞌ cꞌal jix yute sbꞌa jaxca jix yute sbꞌa smam, jaꞌton naj Asá. Jaꞌ masanil tzetyetal jix yunne, watxꞌ cꞌal sattaj Jehová. 33 Asan xin, ma yiꞌel wan bꞌey chi oc ebꞌ ánima yin eyilal tet comon dios bꞌey txꞌotxꞌ wonanlaj, yutol eyto ebꞌ conobꞌ man to eyoj oc snaꞌbꞌal yin sDiosal naj yetoj smam icham.

34 Jaꞌ wanojxa skꞌaneal yet tax cꞌal jix el yich, masantaꞌcꞌal slawubꞌal, jatuꞌ tzꞌibꞌebꞌilcan ey yul an juun yet naj Jehú, scꞌaal Hananí, junne yeoc yetoj an yuunal skꞌaneal ebꞌ sreyal Israel.

35 Jaxa yet jix bꞌey cꞌaltoj tiempo xin, jaꞌ naj Josafat jix swa al-le jun swa kꞌane yetoj naj Ocozías, sreyal Israel. Jaꞌ jun rey tuꞌ, caw pena snaꞌbꞌal. 36 Jix swa waꞌne wan barco ebꞌ scawanil, jaxca wan chi too bꞌey conobꞌ Tarsis. Jaꞌ tituꞌ jix swaꞌne a ebꞌ bꞌey conobꞌ Esión-guéber. 37 Yu tuꞌ xin, jaꞌ naj Eliézer a Maresá, scꞌaal Dodavahu, jaꞌ jix alon el jun kꞌane tiꞌ yin naj Josafat jaxca tiꞌ: Jaꞌ Jehová oj uchontoj masanil tzetyetal jix ja waꞌne tiꞌ, yu cꞌal tol junne jix ja wute ja mulnail yetoj naj Ocozías, ẍi. Jaꞌ yet tuꞌ, jix smakꞌon poꞌo wan teꞌ barco jix swaꞌne ebꞌ tuꞌ, yuxan ma xa skeꞌ stoo teꞌ bꞌey conobꞌ Tarsis.