Jix Oc Naj Joram Yin Reyal
21
Jix cam naj Josafat; jatuꞌ jix muji naj bꞌey sconobꞌ David, jaꞌton smam icham. Jix lawi tuꞌ, jaxa jun scꞌaal chi yij Joram jix oc can sqꞌuexeloj yin reyal. 2 Jaꞌ ebꞌ yuẍtaj naj Joram, scꞌaal Josafat, jaꞌton ebꞌ tiꞌ: Azarías, Jehiel, Zacarías, Azarías, Micael, cꞌal Sefatías. Masanil ebꞌ tuꞌ, scꞌaal Josafat ebꞌ, sreyal Judá. 3 Caw miman chꞌen oro cꞌal chꞌen plata jix saꞌle can tet ebꞌ yu smam, yetoj cꞌal wanxa tzetyetal tol caw ey stool. Jix akꞌle cꞌal pax can wan conobꞌ caw watxꞌ yeoc smuroal tet ebꞌ bꞌey yul yet Judá. Jaxa yopiso yin reyal xin, jaꞌ jun scꞌaal chi yij Joram jix oc can sqꞌuexeloj, yutol bꞌabꞌel cꞌaale yeoc naj. 4 Jaxa wal yet jix yiꞌon yip naj Joram tuꞌ yin yopiso, jix stejon cam masanil ebꞌ yuẍtaj tuꞌ, yetoj cꞌal wanxa ebꞌ yaaw yeoc bꞌey conobꞌ Judá. 5 Ey 32 abꞌil skꞌinal yet jix oc naj yin reyal, waxajebꞌ abꞌil jix yakꞌ reyal bꞌey Jerusalén. 6 Jacꞌaltaꞌ sbꞌeybꞌal ebꞌ sreyal Israel yicꞌaal Ahab jix sbꞌeybꞌalne, yutol jaꞌ ix scutzꞌin naj Ahab tuꞌ eyoc yistiloj. Yu jun tuꞌ, caw pena jix yute sbꞌeybꞌal sattaj Jehová. 7 Asan tol yakꞌnaj can stiꞌ Jehová tet naj rey David, tol jaꞌ ebꞌ yicꞌaal ey cꞌal yopiso ebꞌ yin reyal yin junelne, yuxan ma yal scꞌul Jehová tol jix qꞌueyle el ebꞌ yicꞌaal naj David tuꞌ.8 Jaꞌ yul stiempoal yet eyoc naj Joram yin reyal, jaꞌ ebꞌ a Edom jix yiꞌel sbꞌa ebꞌ yalan ẍejbꞌanil Judá, jix yaoc sreyal ebꞌ yul yet. 9 Queytuꞌ jix yun stoo naj Joram yetoj ebꞌ scapitán, yetoj cꞌal carruaje yin yakꞌon jowal yet chi can ebꞌ Edomita tuꞌ yul skꞌabꞌ ebꞌ. Jaxa ebꞌ Edomita jix oc joyan ebꞌ yin ebꞌ. Jaxa yet akꞌbꞌalil jix a waan naj Joram tuꞌ, jix yalon naj tet ebꞌ syaawil ebꞌ soldado tol chi yakꞌ lista sbꞌa ebꞌ yetoj carruaje yet jowal, yet chi too yakꞌon jowal yin ebꞌ Edomita, jix txax jun bꞌe bꞌey jix eltoj ebꞌ. 10 Jaꞌ ebꞌ a Edom tuꞌ, jix skeꞌ yu ebꞌ yiꞌon el sbꞌa yalan ẍejbꞌanil ebꞌ a Judá masantaꞌcꞌal tinaniꞌ. Jaꞌton yet jun tiempoal tuꞌ, jix yiꞌon cꞌal pax el sbꞌa conobꞌ Libná, yutol jix yiꞌel sbꞌa naj Joram tuꞌ yalan ẍejbꞌanil Jehová, jaꞌton sDiosal yetoj smam icham. 11 Jix swaꞌne a wan yet xaambꞌal bꞌey chi oc eyilal tet comon dios bꞌey wan tzalquiltaj txꞌotxꞌ yul yet Judá. Yu cꞌal jun tuꞌ, yuxan masanil ebꞌ caan bꞌey Jerusalén, jix oc spenail ebꞌ tet Jehová. Queytuꞌ jix yun yetex el sbꞌeybꞌal ebꞌ a Judá tuꞌ yu naj Joram.
12 Jaꞌ yet tuꞌ, jix ẍaꞌ jun carta naj Joram jix yatej Elías, naj ẍejabꞌ Dios, bꞌey chi yal jaxca tiꞌ: Jaꞌ Jehová sDiosal ja mam icham David, jaꞌ chi alon ey jaach: Man lalan oj ja bꞌeybꞌalnen sbꞌeybꞌal naj rey Josafat, ja mam, tam wal sbꞌeybꞌal naj rey Asá, naj ja mam icham, 13 asanne cꞌal sbꞌeybꞌal wan sreyal Israel cha bꞌeybꞌalne. Ja wu, yuxan masanil ebꞌ a Judá, cꞌal ebꞌ a Jerusalén chi oc spenail ebꞌ tet Jehová jaxca sbꞌeybꞌal ebꞌ yicꞌaal Ahab. Yetoj cꞌal pax oj, tol jix ja makꞌ cam ebꞌ naj ja wuẍtaj, jaꞌ ebꞌ tuꞌ watxꞌ sbꞌeybꞌal ebꞌ ja wintaj. 14 Yu jun tuꞌ, yuxan jaꞌ Jehová oj yakꞌ eyqꞌuey jun syaꞌilal yibꞌan ja conobꞌ tiꞌ, yibꞌan ebꞌ ja wuninal, yibꞌan ebꞌ ix ja wistil, cꞌal yibꞌan masanil tzetyetal ey, ey jaach. 15 Catuꞌ caw ecꞌal tujan syaꞌilal oj jul ja wibꞌan jaach tiꞌ. Oj oc jun yaꞌcꞌul ja win, tol junjun cꞌal cꞌu oj yakꞌ sjowal ja win, masantaꞌcꞌal oj eltej xꞌanil yul ja cꞌul yu jun yaꞌcꞌul tuꞌ, ẍi Jehová, ẍi an carta tuꞌ.
16 Yu tuꞌ xin, jaꞌ Jehová jix akꞌon yun ebꞌ Filisteo, cꞌal ebꞌ Árabe caan scawilal Cus, jix tit yakꞌ jowal ebꞌ yin naj rey Joram tuꞌ. 17 Jix yakꞌ jowal ebꞌ yin Judá. Jix eyqꞌuey yu ebꞌ, jix yiꞌontoj masanil bꞌeomal ey bꞌey spalacio naj rey ebꞌ, jix iꞌletoj masanil yuninal cꞌal ebꞌ ix yistil naj. Asanxane wal jun slawubꞌ scꞌaal naj jix cancan yu ebꞌ, jaꞌton naj Joacaz. 18 Jaꞌ yet jix lawi ecꞌ masanil wan tuꞌ, jix yaon oc Jehová jun syaꞌilal yin scꞌul naj, tol cꞌamxa chi anchai. 19 Jaꞌ yet jix bꞌey cꞌaltoj niꞌojxa xin; yet jix lawi caabꞌ abꞌil smichꞌcha naj yu jun yaꞌbꞌil tuꞌ, jix eltej xꞌanil yul scꞌul naj yu jun yaꞌcꞌul tuꞌ. Queytuꞌ jix yun scam naj, xol wal mimej syaꞌilal jix yun scam naj. Jaꞌ yet jix cam tuꞌ, cꞌam junoj miman kꞌakꞌ jix yaoc ebꞌ ánima, yutol cꞌam niꞌoj yeloc apnoj yul sat ebꞌ, jal pax yet jix camtoj smam icham naj xin, jix yaoc mimej kꞌakꞌ ebꞌ, yet chi xꞌoxon el ebꞌ tol miman yeloc apnoj jun mac jix cam tuꞌ. 20 Ey 32 abꞌil skꞌinal yet jix ẍaꞌon el yich yakꞌon reyal. Waxajebꞌ abꞌil jix yakꞌ reyal bꞌey Jerusalén. Cꞌamxa cꞌal junoj mactxequel jix naꞌontej yet jix cam naj. Jaꞌ bꞌey sconobꞌ David jix mujlei, man pax jaꞌ oj bꞌey chi mujle ebꞌ rey jix mujlei.