2 Yuxan jix sjije ix stoi jaxca jix yun yalon naj Eliseo. Queytuꞌ jix yun stoo ix bꞌey yul sconobꞌal ebꞌ Filisteo tuꞌ. Jaꞌ tituꞌ jix caey ecꞌ ix yin jujebꞌ abꞌil.

3 Jix lawi tuꞌ xin, jix el ix bꞌey yul sconobꞌal ebꞌ Filisteo tuꞌ junelxa, jix too ix sattaj naj sreyal Israel yu skꞌanoni tol chi akꞌle meltzo pax sna cꞌal xꞌotxꞌ ix junelxa tet.

4 Lalan skꞌanabꞌ naj rey tuꞌ yetoj naj Guehazí, naj yakꞌomal servil naj Eliseo, yutol jix yal naj rey tol chi al-le tet masanil tzettaj yetal tol qꞌueyubꞌtaj jix yun naj Eliseo tuꞌ.

5 Jaꞌ yet jun txolan tuꞌ, lalan wal yalon naj Guehazí tuꞌ skꞌaneal tzet jix yun spitzcꞌu a yuneꞌ jun ix ix yu naj Eliseo tuꞌ. Jaꞌ yet tuꞌ jix apni oc ix yalon yu xꞌotxꞌ cꞌal yu sna. Yuxan jix yalon naj Guehazí tuꞌ tet naj rey jaxca tiꞌ:

—Jaach rey, jaꞌton wal jun ix ix tiꞌ chi walaꞌ, jaꞌton jun yuneꞌ ix ix tiꞌ jix pitzcꞌu a yu naj Eliseo, ẍi naj.

6 Jix skꞌanlen naj rey tet ix ix tuꞌ, catuꞌ jix yalontej jun skꞌaneal ix tet naj; jix lawi tuꞌ jix ẍejon naj rey jun yakꞌomal servil tol caw yipcꞌule yeoc yu, yet chi too akꞌle masanil smajul tzetyetal ix tuꞌ, yetoj cꞌal masanil tzetyetal jix yakꞌ txꞌotxꞌ yet tax jix el ix bꞌey yul nación tuꞌ masantaꞌcꞌal tinaniꞌ.

7 Jix lawi tuꞌ xin, jix too naj Eliseo bꞌey conobꞌ Damasco. Jaꞌ yet jun tiempoal tuꞌ caw wal yaꞌey naj Ben-adad, sreyal conobꞌ Siria. Jix al-le tet naj tol tuxa chi apni oc naj ẍejabꞌ Dios.

8 Yuxan jix yalon naj rey tet jun yakꞌomal servil chi yij Hazael:

—Iꞌtoj junoj saꞌbꞌeal catuꞌ chi too ja wilon naj ẍejabꞌ Dios tuꞌ. Catuꞌ cha kꞌanon tet tol chi skꞌanle naj tet Jehová wu an, ta tol oj to waꞌxoj jin cꞌul, ẍi naj.

9 Yuxan jix too naj Hazael yilon naj Eliseo tuꞌ. Jix yiꞌontoj wan saꞌbꞌeal caw wal watxꞌ chi el bꞌey conobꞌ Damasco, ey 40 noꞌ camello ijnen oc wan saꞌbꞌeal tuꞌ. Jaꞌ yet jix apni oc sattaj naj, jix yalon jaxca tiꞌ:

—Jaꞌ naj ja wakꞌomal servil chi yij Ben-adad sreyal conobꞌ Siria, jaꞌ naj jix jin chejontej yet chi jul jin kꞌanlen ey jaach, oj tom waꞌxoj scꞌul naj ma cꞌamajxa, ẍi naj.

10 Catuꞌ jix takꞌwi naj Eliseo tet naj jaxca tiꞌ:

—Asiꞌ, cha walon tet naj tol oj to waꞌxoj scꞌul naj yu jun syaꞌilal tuꞌ, asan xin jix yal Jehová tol oj cam cꞌaltaꞌ naj, ẍi naj Eliseo.

11 Jix cam wal yoc tꞌanan naj Eliseo yin sat naj Hazael tuꞌ, pena xacꞌal jix yabꞌe. Jaxa jix yun xin, jix okꞌa naj ẍejabꞌ Dios tuꞌ.

12 Jix skꞌanle naj Hazael tet naj jaxca tiꞌ:

—¿Tzet yuxan chach okꞌ jaach ẍejabꞌ Dios? ẍi naj.

Jix takꞌwi naj Eliseo tet naj jaxca tiꞌ:

—Yutol wotaj tol oj ja wetne ebꞌ wet Israelal tiꞌ, oj ja waoc kꞌakꞌ yin sconobꞌ ebꞌ eyoc smuroal tuꞌ, catuꞌ oj ja makꞌon cam ebꞌ achꞌe yetoj chꞌen espada. Oj ja makꞌon cam ebꞌ yaliẍ unin catuꞌ oj ja kꞌupontoj scꞌul ebꞌ ix ix mimejalxa, ẍi naj.

13 Jix yalon naj Hazael tet naj jaxca tiꞌ:

—Jain tiꞌ caw cꞌam weloc apnoj niꞌoj, laan jin jaxca junoj noꞌ txꞌiꞌ. ¿Tzet wal oj yun wunen junoj tzetyetal jaxca cha wal tuꞌ? ẍi naj.

Jix takꞌwi pax naj Eliseo tet jaxca tiꞌ:

—Tuxa jix yal Jehová ey jin an, tol oj jaach oc yin reyal bꞌey conobꞌ Siria tiꞌ, ẍi naj.

14 Jix lawi tuꞌ, jix yalon can toj sbꞌa naj Hazael tet naj Eliseo, jaxa stoo bꞌey sattaj syaawil tuꞌ. Jix skꞌanlen el naj rey tuꞌ tet jaxca tiꞌ:

—¿Tzet ẍi naj Eliseo tuꞌ ey jaach? ẍi tet.

Jix takꞌwi Hazael, jix yalon jaxca tiꞌ:

—Jix yal naj ey jin tol abꞌ oj waꞌxoj ja cꞌul, oj el jun syaꞌilal tiꞌ.

15 Jaxa yet junxa cꞌual xin, jix yakꞌ chꞌacbꞌoj jun an pim kꞌap naj Hazael tuꞌ, jix bꞌet yaontoj yibꞌan sat naj rey, jaxca tuꞌ jix yun scam xacꞌal naj. Jix lawi tuꞌ jaxa naj Hazael jix oc can yin reyal sqꞌuexeloj.

16 Joebꞌxa abꞌil yoc naj Joram scꞌaal Ahab yin reyal bꞌey conobꞌ Israel, catuꞌ jix ẍaꞌon el yich naj Joram scꞌaal Josafat yakꞌon reyal bꞌey Judá.

17 Eyxa 32 abꞌil skꞌinal naj yet jix ẍaꞌon el yich yakꞌon reyal tuꞌ, waxajebꞌ abꞌil jix yakꞌ reyal bꞌey Jerusalén.

18 Jacꞌaltaꞌ sbꞌeybꞌal ebꞌ sreyal Israel jix sbꞌeybꞌalne naj, cꞌal sbꞌeybꞌal ebꞌ yicꞌaal Ahab, yutol jix oc jun ix scutzꞌin naj Ahab yistiloj naj. Yu tuꞌ xin, caw wal pena cꞌal sbꞌeybꞌal naj sattaj Jehová.

19 Asan xin, ma yal scꞌul Jehová jix yakꞌ lawoj el conobꞌ Judá, yutol caw ey smimancꞌulal yin yu naj rey David jaꞌton jun ẍejabꞌ, bꞌey jix yakꞌ can stiꞌ Jehová yibꞌan tol iquis cꞌal ecꞌ yicꞌaal.

20 Jaꞌ yul stiempoal naj Joram yet jix yakꞌon reyal, jaꞌ conobꞌ Edom jix yiꞌel sbꞌa yalan ẍejbꞌanil conobꞌ Judá, jix yaon oc sreyal yul yet.

21 Yuxan jix too naj Joram yetoj masanil scarruaje yu yakꞌon jowal yetoj ebꞌ Edomita bꞌey Saír, jix joymo ebꞌ Edomita yin ebꞌ. Jaxa yet akꞌbꞌalil jix a waan naj Joram yetoj ebꞌ capitán yeoc yin carruaje yet jowal tuꞌ. Jix yakꞌon jowal yetoj ebꞌ Edomita tuꞌ, queytuꞌ jix yun scolon el sbꞌa yul skꞌabꞌ ebꞌ, jaxa ebꞌ soldado Israel xin, jix meltzo cantej ebꞌ bꞌey sna.

22 Jaxa ebꞌ a conobꞌ Edom xin, jix el cꞌaltaꞌ ebꞌ xol ebꞌ tuꞌ, junne xa chi yil sbꞌa ebꞌ yul yet masantaꞌcꞌal tinaniꞌ. Jaꞌcꞌal pax yet jun tiempoal tuꞌ jix yiꞌon el sbꞌa conobꞌ Libná.

23 Jaꞌ jantaj to skꞌaneal naj Joram cꞌal tzet jix yunne, jatuꞌ tzꞌibꞌebꞌilcan bꞌey yul an juun bꞌey ey can ey skꞌaneal ebꞌ sreyal Judá.

24 Jaxa yet jix camtoj naj Joram xin, jatuꞌ jix mujle naj bꞌey mujan ebꞌ yichmam, jaꞌton bꞌey sconobꞌ David. Jix lawi tuꞌ xin, jaxa jun scꞌaal chi yij Ocozías jix oc can yin reyal sqꞌuexeloj.

25 Lacawebꞌxa abꞌil yoc naj Joram scꞌaal Ahab yin reyal bꞌey Israel, catuꞌ jix oc naj Ocozías yin reyal bꞌey Judá.

26 Ey 22 abꞌil skꞌinal naj yet jix ẍaꞌon el yich yakꞌon reyal, jun abꞌil jix yakꞌ reyal naj bꞌey Jerusalén. Jaꞌ xutx chi yij Atalía. Jaꞌ ix tuꞌ yitxiquin naj Omrí sreyal Israel.

27 Jaꞌ naj Ocozías tuꞌ, jaxca cꞌaltaꞌ sbꞌeybꞌal naj Ahab queytuꞌ sbꞌeybꞌal, yutol niꞌe yeoc yintaj naj Ahab, yuxan caw wal pena tzet jix yun naj sattaj Jehová.

28 Jaꞌ naj Ocozías tuꞌ, junne jix yute snaꞌbꞌal yetoj naj Joram scꞌaal Ahab, yet jix yakꞌon jowal ebꞌ bꞌey Ramot bꞌey Galaad yin naj Hazael, sreyal conobꞌ Siria, jix yasi naj Joram tuꞌ yu ebꞌ Sirio tuꞌ.

29 Yuxan jix meltzotej naj Joram bꞌey Ramot. Jix apni can oc bꞌey Jezreel yu yanten sbꞌa yu bꞌey jix yasitoj yu ebꞌ Sirio tuꞌ. Yutol jix yaꞌbꞌi ey naj Joram tuꞌ xin, yuxan jix too naj Ocozías bꞌey Jezreel.