—Akꞌ lista ja bꞌa, catuꞌ chach toi. Cha wiꞌontoj jun sneetal aceite tiꞌ, catuꞌ chach too bꞌey Ramot yul yet Galaad.

2 Jaꞌ yet oj jaach apnoj tituꞌ, catuꞌ cha seyon ecꞌ naj Jehú, scꞌaal Josafat yitxiquin Nimsí. Chach octoj bꞌey eyecꞌ naj tuꞌ, cha wiꞌon el xol ebꞌ eyecꞌ yetoj tituꞌ, cha wiꞌon octoj ja wetoj yul junojxa cuarto.

3 Catuꞌ cha wiꞌon a jun sneetal aceite tiꞌ, cha secon atoj aceite yibꞌan sjolom, catuꞌ cha walon tet jaxca tiꞌ: Queytuꞌ yalon Jehová jaxca tiꞌ: Jain chach jin sicꞌ can eloj, yet oj jaach oc yin reyal bꞌey Israel, ẍi Dios, ja chi. Chi lawi tuꞌ, cha jajon spuertail jun cuarto tuꞌ, catuꞌ chach eltej, cꞌam cꞌal chach oc can linan tituꞌ, ẍi naj Eliseo.

4 Jaꞌ jun achꞌe ẍejabꞌ Dios tuꞌ, jix too bꞌey Ramot yul yet Galaad.

5 Jaꞌ yet jix apni oc tituꞌ, yaman ecꞌ masanil ebꞌ scapitanil ebꞌ soldado jix yalon jaxca tiꞌ:

—Jaach jin capitán, ey wal jun tzetyetal chi woche chi wal ey jaach, ẍi naj achꞌe tuꞌ.

—¿Mac junoj jon bꞌey oj jaach kꞌanabꞌ tuꞌ? ẍi naj Jehú.

—Jaꞌton ey jaach, jaach capitán, ẍi tet naj Jehú tuꞌ.

6 Jix lawi tuꞌ jix a waan naj Jehú, jix octoj yul junxa na, catuꞌ jix ale atoj aceite olivo yin sjolom naj yu jun ẍejabꞌ Dios tuꞌ, jix yalon jaxca tiꞌ:

—Yutol jaꞌ Jehová cu Diosal jaon Israel jon tiꞌ jix alon jaxca tiꞌ: Jain chach jin sicꞌ can eloj, yet oj jaach oc can yin reyal bꞌey jin conobꞌ Israel tiꞌ.

7 Jaach oj ja makꞌ cam masanil ebꞌ yicꞌaal camom Ahab, naj bꞌey ey jaach oc yakꞌomaloj servil tiꞌ. Queytuꞌ oj yun jin pajtzen scamichal ebꞌ jin chejabꞌ, cꞌal ebꞌ chi alon el jin kꞌane, jaꞌton ebꞌ jix malecꞌ ẍiqꞌuil yu ix Jezabel.

8 Masanil ebꞌ yicꞌaal naj Ahab sowalil chi qꞌueyle el ebꞌ. Masanil ebꞌ winaj, caxcꞌal yakꞌomal servil ma yet sbꞌa yul yet, oj akꞌle qꞌueyel ebꞌ xol conobꞌ Israel, cꞌamxa junoj yicꞌaal naj chi cancan yin yiquisal.

9 Queytuꞌ oj wute ebꞌ yicꞌaal Ahab jaxca wal jix wute ebꞌ yicꞌaal Jeroboam scꞌaal Nabat, queytuꞌ jix wute cꞌal pax ebꞌ yicꞌaal Baasá scꞌaal Ahías.

10 Jal pax ix Jezabel xin, jaꞌ noꞌ txꞌiꞌ oj chiꞌontoj smimanil ix bꞌey yul yet Jezreel, cꞌamxa junoj mactxequel oj mujon ix, ẍi Jehová, ẍi jun ẍejabꞌ Dios tuꞌ.

Jix lawi yalon jun ẍejabꞌ Dios masanil wan tiꞌ, catuꞌ jix sjajon spuertail jun na tuꞌ, catuꞌ jix paxtoj yin ani.

11 Jaꞌ yet jix apni oc naj Jehú bꞌey yaman ecꞌ ebꞌ yet scapitanil tuꞌ, jix skꞌanlen ebꞌ tet jaxca tiꞌ:

—¿Tzet ẍi? ¿Tzet yuxan chi jul jun loco tiꞌ jaach yilaꞌ? ẍi ebꞌ.

—Jaex tiꞌ je yotaj naj, je yotaj xa tzetyetal chi yal cꞌaltaꞌ ebꞌ ẍejabꞌ Dios tuꞌ, ẍi naj Jehú tet ebꞌ.

12 —Cꞌamaj, man kotajoj, al ey jon tzet jix jul yalaꞌ, ẍi ebꞌ. Catuꞌ ix takꞌwi naj Jehú tet ebꞌ jaxca tiꞌ:

—Queywal tiꞌ jix yun yalon Jehová ey jin: Tol jain chach jin sicꞌ can el sreyaloj Israel tinaniꞌ, ẍi Jehová, ẍi naj ey jin, ẍi Jehú tet ebꞌ.

13 Junjun cꞌal ebꞌ jix yiꞌtej sjojan pichil, jix yaon ey ebꞌ yalan yajan naj Jehú bꞌey kꞌooch yatoj. Yin xacꞌal eymanil jix xuon noꞌ cacho ebꞌ, jix yalon ebꞌ yin ipeal jaxca tiꞌ: Jaꞌ naj Jehú, rey xa naj tinaniꞌ, ẍi xacꞌal ebꞌ.

14 Jaꞌ naj Jehú scꞌaal Josafat, yitxiquin Nimsí. Caw jix tit sjowal yu jantaj tzet jix snaꞌ yin naj rey Joram. Jaꞌ naj rey tuꞌ, jix bꞌet yetoj ebꞌ yet Israelal yet chi col-le el conobꞌ Ramot yul yet Galaad tet naj Hazael sreyal conobꞌ Siria.

15 Eyxa jayebꞌ cꞌu yapni oc bꞌey conobꞌ Jezreel yet chi yanten sbꞌa yet jix yasitoj yu ebꞌ soldado Sirio yet jix yakꞌon jowal yetoj naj rey Hazael. Jix yalon naj Jehú tet ebꞌ jaꞌjun yetoj jaxca tiꞌ: Ta tol caw wal yel che yoche tol chin oc je reyaloj, cꞌam junoj mactxequel chi eltoj yul conobꞌ tiꞌ yet watxꞌ cꞌam mactxequel chi too alon junoj kꞌane bꞌey conobꞌ Jezreel, ẍi naj Jehú.

16 Eyman jix atoj naj yul scarruaje yet jowal, catuꞌ jix too bꞌey conobꞌ Jezreel, bꞌey lalan yanten sbꞌa naj Joram. Ey cꞌal pax ecꞌ naj Ocozías sreyal Judá tituꞌ yu bꞌet yil-le naj yu.

17 Jaꞌ yet jix yilontoj naj eyoc steynemaloj stiꞌel conobꞌ Jezreel tuꞌ, tol lalan sjul naj Jehú yetoj jun bꞌulan ebꞌ winaj, jix yaon el yaw naj yin ipeal, jix yalon jaxca tiꞌ:

—Ey jun bꞌulan ebꞌ soldado chi juli, ẍi naj. Jix yalon naj Joram jaxca tiꞌ:

—Toj ojabꞌ junoj soldado yibꞌan che, yet chi too yiloni mactxequel ebꞌ chi jul tuꞌ, catuꞌ chi skꞌanleni ta man yin oj jowal chi jul ebꞌ, ẍi naj.

18 Yuxan jix too jun soldado yibꞌan che yu stoo yilon mactxequel wan chi jul tuꞌ, jix yalon tet jaxca tiꞌ:

—Jaꞌ naj rey chi ẍej jul jin kꞌanle ey jaach ta man yin oj jowal chex juli, ẍi naj. Jix yalon naj Jehú tet jaxca tiꞌ:

—Cꞌam cꞌal ja walon ja wet yin jun kꞌane tiꞌ jaach tiꞌ, asan tol chach oc tzajan wintaj an, ẍi naj.

Catuꞌ jix yalon jun steynemal conobꞌ tuꞌ, jix yalon jaxca tiꞌ:

—Jaꞌ naj jix too ilon ebꞌ tuꞌ jix apni oc naj xol ebꞌ, caw cꞌam pax chi meltzotej naj, ẍi naj.

19 Jaꞌ yet jun txolan tuꞌ, jix ẍejontoj junxa soldado naj rey yibꞌan che, jix apni oc scꞌatan ebꞌ tuꞌ, jix yalon jaxca tiꞌ:

—Jaꞌ naj rey jix jin chejontej jul jin kꞌanle ey jaach ta man yin oj jowal chex juli, ẍi naj. Jix yalon naj Jehú tet jaxca tiꞌ:

—Cꞌam cꞌal ja walon ja wet yin jun kꞌane tiꞌ jaach tiꞌ, asan tol chach oc tzajan wintaj an, ẍi naj.

20 Jix yalon naj eyoc steynemaloj conobꞌ tuꞌ junelxa jaxca tiꞌ:

—Jacꞌalaꞌ junxa naj tuꞌ jix apni oc naj scꞌatan ebꞌ tuꞌ, cꞌam cꞌal chi meltzo pax tej naj chi wilaꞌ. Jaxca wal tol jaꞌ naj Jehú, yitxiquin Nimsí chi jul yul carruaje chi wiltoj an, yutol caw yaxkꞌainaj xacꞌal stit naj jaxca cꞌaltaꞌ sbꞌeybꞌal, ẍi naj steynemal conobꞌ tuꞌ.

21 Yuxan jix yalon naj Joram jaxca tiꞌ: Awej oc noꞌ che yin jin carruaje yet jowal, ẍi naj tet ebꞌ. Yuxan jix waꞌnele oc noꞌ che yin scarruaje naj Joram sreyal Israel, yetoj cꞌal pax yet naj Ocozías sreyal Judá. Junjun ebꞌ jix atoj yul scarruaje yet jowal, jix too ebꞌ ẍaꞌon yapni Jehú. Jaꞌ bꞌey txꞌotxꞌ xꞌotxꞌ naj Nabot yul yet Jezreel jaꞌ tituꞌ jix ẍaꞌle sbꞌa ebꞌ.

22 Jaꞌ yet jix yilontoj naj Joram tol jaꞌ naj Jehú, jix yalon tet jaxca tiꞌ:

—¿Yin mi watxꞌcꞌulal chach jul jaach Jehú, ma yin jowal? ẍi naj Joram tet naj.

—¿Bꞌey wal oj titoc watxꞌcꞌulal cha naꞌ? Ilaꞌ tol jacꞌalaꞌ yoc ix ja txutx Jezabel yin eyilal tet comon dios cꞌal yin bꞌalwomal yetoj yin atxumal, ẍi naj Jehú tuꞌ.

23 Yuxan jix meltzo naj Joram, jix el jininoj naj, jix to wal awitoj tet Ocozías jix yalon jaxca tiꞌ:

—Jaach Ocozías, camich jun tiꞌ, ẍi naj.

24 Jal pax naj Jehú xin, jix yetcꞌulnetoj sjulbꞌal yin naj Joram, palan cꞌal stoo yin yichin jix ecꞌ el bꞌey spixan. Queytuꞌ jix yun yeyqꞌuey naj Joram tuꞌ, jix cam naj bꞌey yul scarruaje tuꞌ.

25 Jix lawi tuꞌ, jix yalon naj Jehú tet jun yakꞌomal servil chi yij Bidcar jaxca tiꞌ:

—Iꞌeltej naj yul scarruaje tuꞌ, catuꞌ chi too ja kꞌojon can eltoj bꞌey txꞌotxꞌ txꞌotxꞌ yet naj Nabot, yutol chi to jin naꞌtej yet ey jaach ecꞌ wetoj an, yet tzajan jon oc yintaj scarruaje naj Ahab jun smam naj tiꞌ, yet jix yalon can Jehová jun kꞌane yibꞌan jun tiꞌ. Yet jix yalon jaxca tiꞌ:

26 Jix wil smakꞌle cam naj Nabot yetoj cꞌal yuninal yet ewi. Queytuꞌ oj yun jin spajtzen ey jaach bꞌey jun txꞌotxꞌ tiꞌ, ẍi Jehová. Yu tuꞌ xin, mitxꞌ eyoj, catuꞌ cha kꞌojon cantoj bꞌey txꞌotxꞌ yet Nabot, yutol queytuꞌ jix yun yalon Jehová, ẍi naj Jehú.

27 Jaꞌ yet jix yilon oc naj Ocozías sreyal Judá jun tzet jix ui tuꞌ, jix el jininoj, jix toocan bꞌey sbꞌeal Bet-hagan, jaxa naj Jehú tuꞌ xin, jix too cꞌal tzajan yintaj, jix yalon jaxca tiꞌ:

—Makꞌwej pax cam naj tiꞌ, ẍi naj.

Jix michꞌcha yu ebꞌ bꞌey sjolom wonan chi yij Gur scawilal Ibleam. Jaꞌ tituꞌ jix smakꞌ yasoj ebꞌ bꞌey yul scarruaje tuꞌ, jaꞌ yet jun txolan tuꞌ, jix to skeꞌ yel jininoj scolon sbꞌa masantaꞌcꞌal bꞌey Meguido. Jaꞌ tituꞌ jix cami.

28 Jix lawi tuꞌ xin, jix iꞌletoj yu ebꞌ chi akꞌon servil bꞌey Jerusalén yul scarruaje. Jaꞌ tituꞌ jix mujle bꞌey mujan ebꞌ yichmam bꞌey sconobꞌ David.

29 Jusluqꞌuebꞌxa abꞌil yoc naj Joram scꞌaal Ahab yin reyal bꞌey Israel, catuꞌ jix ẍaꞌon el yich naj Ocozías yakꞌon reyal bꞌey conobꞌ Judá.

30 Jix lawi tuꞌ, jix too naj Jehú bꞌey conobꞌ Jezreel. Jaꞌ yet jix yabꞌen ix Jezabel tzet jix ui tituꞌ, jix sbꞌonon yinlaj sbꞌakꞌ sat ix, jix xion ey xil sjolom, catuꞌ jix eltoj tꞌanan ix yul jun swentanail na tuꞌ.

31 Jaꞌ yet jix apni oc naj Jehú bꞌey stiꞌ conobꞌ tuꞌ, jix yalon ix tet jaxca tiꞌ:

—Watxꞌ mi ja cꞌul, laan jaach jaxca naj Zimrí, jaach tiꞌ jix ja makꞌ cam ja reyal, ẍi ix tet naj.

32 Jix atoj tꞌanan naj Jehú bꞌey jun wentana tuꞌ, jix yalon atoj jaxca tiꞌ:

—¿Mactxequel eyoc wetoj? ẍi naj.

Ey cawan oxwan ebꞌ mulnawom yul sna ix jix eltej tꞌanan yiloni.

33 Jix yalon naj Jehú tet ebꞌ jaxca tiꞌ:

—Tenwej eytej jun ix tuꞌ tituꞌ, ẍi naj tet ebꞌ.

Jix stenon eytej ebꞌ, caw jix low tiẍlabꞌoj ẍiqꞌuil ix yinlaj na yet jix eytej tuꞌ, jaxa noꞌ ẍe naj Jehú jix tecꞌon ey smimanil ix sat txꞌotxꞌ.

34 Jix lawi tuꞌ, jix too naj Jehú lowoj cꞌal yuqꞌuen jaꞌ. Jaxa yet jix lawi slow naj, jix yalon jaxca tiꞌ:

—Ilwej tzet che yute smimanil jun ix penawom ix tiꞌ, yu cꞌal tol scutzꞌin rey ix, yuxan mujle ojabꞌi, ẍi naj tet ebꞌ.

35 Jaxa yet jix bꞌet smujon ebꞌ xin, jix yilon ebꞌ tol asanxane sbꞌajil sjolom yetoj yajan cꞌal skꞌabꞌ eyecꞌoj.

36 Jaxa yet jix meltzo ebꞌ naj, jix yalon ebꞌ tet naj Jehú tzet utbꞌil yoc smimanil ix tuꞌ, catuꞌ jix yalon naj Jehú tet ebꞌ jaxca tiꞌ:

—Tol yel yalnaj can Elías a conobꞌ Tisbé, naj ẍejabꞌ Dios, tol jaꞌ noꞌ txꞌiꞌ oj chiꞌontoj smimanil ix Jezabel bꞌey yul yet Jezreel, 37 tol sajleminaj xacꞌal oj yun cantoj smimanil ix yu noꞌ noꞌ, yal xacꞌal bꞌey oj cancan satlaj txꞌotxꞌ yul yet Jezreel, yuxan cꞌam mactxequel oj alon jaxca tiꞌ: Jaꞌton bꞌey mujan ix Jezabel tiꞌ, man ẍi oj ebꞌ, ẍi Jehová, ẍi Elías, ẍi naj Jehú.