2 Jaꞌ bꞌey je conobꞌ tol caw watxꞌ yeoc smuroal tuꞌ, jatuꞌ eyecꞌ ebꞌ yicꞌaal naj je reyal, yetoj noꞌ che, cꞌal carruaje yet jowal, jaꞌton jun je conobꞌ tol caw wal watxꞌ yeoc smuroal, yetoj cꞌal jantaj mitxꞌkꞌabꞌe yet jowal. Yuxan, jaꞌ yet oj apnoj oc jun carta tiꞌ ey jex tuꞌ, 3 che sicꞌwej el junoj scꞌaal naj je yaawil je xol tuꞌ, junoj tol jelan snaꞌbꞌal tol smoo wal yoc je reyaloj yu sqꞌuexeloj smam tuꞌ, che colon cꞌal el tet jowal, yet watxꞌ chi bꞌey cꞌaltoj yopiso je yaawil tuꞌ, ẍi toj tet ebꞌ.

4 Jaꞌ yet jix yabꞌen ebꞌ tzet chi yal an carta tuꞌ, caw wal jix xiwa ebꞌ yu, jix yalon ebꞌ jaxca tiꞌ: Ilaꞌ tol ma skeꞌ stecꞌbꞌan sbꞌa cawan ebꞌ rey sattaj naj Jehú, jajxam jon jaon tiꞌ ¿tzet wal oj yun cu tecꞌbꞌan cu bꞌa sattaj? ẍi ebꞌ.

5 Jaxa naj chi ilon spalacio naj rey tuꞌ, yetoj naj gobernador yeoc bꞌey conobꞌ tuꞌ, yetoj cꞌal masanil ebꞌ icham winaj yeoc yul conobꞌ tuꞌ, yetoj cꞌal ebꞌ jix ilon chꞌibꞌ ebꞌ scꞌaal naj Ahab, jaꞌ ebꞌ tuꞌ jix alontoj tet Jehú jaxca tiꞌ: Jaon tiꞌ ey jon ecꞌ yul ja kꞌabꞌ. Jaꞌ masanil tzet oj ja walaꞌ oj cu jije, yutol man oj kaoc junojxa mactxequel yin reyal. Jaꞌ ojabꞌ cꞌal bꞌey chi ẍaꞌ ja cꞌul jaach tiꞌ chi yunne, ẍi toj ebꞌ.

6 Jix stzꞌibꞌen pax toj naj Jehú junxa an carta yet scaelal, jix yalon jaxca tiꞌ: Ta che yoche tol chex oc wetoj an, catuꞌ oj je jijen tzet chi walaꞌ, jaꞌ yet yecal che yiꞌtej sjolom ebꞌ scꞌaal naj je reyal tuꞌ, catuꞌ chi jul je yakꞌon bꞌey conobꞌ Jezreel tiꞌ, ẍi toj naj Jehú tet ebꞌ.

Jaꞌ ebꞌ 70 scꞌaal sreyal ebꞌ tuꞌ, junne ey ebꞌ yetoj ebꞌ mimej winaj jix ilon chꞌibꞌ ebꞌ bꞌey conobꞌ Samaria tuꞌ.

7 Jaꞌ yet jix ẍaꞌon an carta ebꞌ syaawil conobꞌ tuꞌ, catuꞌ jix smitxꞌon ey 70 ebꞌ scꞌaal naj rey Ahab yu ebꞌ, jix smakꞌon cam ebꞌ. Jix yaon eytoj wan jolome ebꞌ tuꞌ yul wan xuc, jix yaontej ebꞌ tet naj Jehú bꞌey conobꞌ Jezreel.

8 Jaxa yet jix apni oc jun yakꞌomal servil yu yalon tet naj Jehú, jix yalon jaxca tiꞌ:

—Tuxa jix iꞌletej sjolom ebꞌ scꞌaal naj rey Ahab, ẍi tet naj Jehú tuꞌ:

—Caabꞌ bꞌulan che yute ey bꞌey chi cu octoj stiꞌ spuertail conobꞌ tiꞌ. Jaꞌ tituꞌ chi cancanoj masantaꞌcꞌal yet yecal, ẍi naj Jehú.

9 Jaxa yet junxa cꞌual jix eltoj naj Jehú, jix oc linanoj, jix yalon tet masanil ebꞌ conobꞌ jaxca tiꞌ:

—Jaex tiꞌ cꞌam je penail. Jain jix jin makꞌ cam naj cu reyal yu wiꞌon el yin yopiso, asan xin, ¿mactxequel jix makꞌon cam masanil wan ebꞌ tiꞌ?

10 Jaꞌ tinaniꞌ chi cam wal je yotajne eloj, tol jaꞌ masanil tzet jix yal can el Jehová yin ebꞌ yicꞌaal naj Ahab, cꞌam junoj tol man oj yunne. Lalan wal yunen masanil tzetyetal jix chejle yal can el naj Elías yu Jehová, jun ẍejabꞌ, ẍi naj Jehú.

11 Jaꞌ bꞌey conobꞌ Jezreel tuꞌ, jix makꞌle xacꞌal cam wanxa ebꞌ yican naj rey Ahab yu naj Jehú, jaꞌton ebꞌ mimej winaj yeocoj, cꞌal ebꞌ yamigo, cꞌal ebꞌ eyoc yin yakꞌomal xaambꞌal yu. Cꞌamxa junoj jix can yin yiquisal.

12 Jix lawi tuꞌ, jix too naj Jehú bꞌey conobꞌ Samaria. Jaꞌ yet eyoc naj yul bꞌe, jix apni oc naj bꞌey jun txꞌotxꞌ txꞌotxꞌ bꞌey chi ecꞌ cꞌaltaꞌ ebꞌ ilom meꞌ.

13 Jaꞌ tituꞌ jix ẍaꞌle sbꞌa yetoj wan ebꞌ yican naj camom Ocozías sreyal Judá, jix skꞌanlen naj Jehú tet ebꞌ jaxca tiꞌ:

—¿Mac jex txequel jaex tiꞌ? ẍi naj tet ebꞌ. Jix takꞌwi ebꞌ tet jaxca tiꞌ:

—Jaon tiꞌ kican cu bꞌa yetoj naj Ocozías, tol chi jul kꞌakꞌ scawil scꞌul ebꞌ naj scꞌaal naj rey, yetoj cꞌal ebꞌ yuneꞌ ix reina Jezabel, ẍi ebꞌ naj.

14 Jix yalon naj Jehú tet ebꞌ jaꞌjun yetoj jaxca tiꞌ:

—Mitxꞌwej ey ebꞌ yin yiquisal, ẍi tet ebꞌ.

Jaxa ebꞌ jaꞌjun yetoj tuꞌ, jix mitxꞌon ey ebꞌ, jix smakꞌon cam ebꞌ bꞌey stiꞌ jaꞌ ucꞌbꞌal jaꞌ bꞌey chi ecꞌ cꞌaltaꞌ ebꞌ ilom meꞌ tuꞌ. Ey 42 ebꞌ yin masanil, cꞌamxa junoj ebꞌ jix cancan yin yiquisal.

15 Jaxa yet jix el naj Jehú tituꞌ, jix ẍaꞌlen sbꞌa yetoj naj Jonadab, scꞌaal Recab, tol lalan stit yil-le naj Jehú yu naj. Jix akꞌle scawil scꞌul yu Jehú tuꞌ, jix yalon jaxca tiꞌ:

—¿Watxꞌ mi ja naꞌbꞌal win an, jaxca jin naꞌbꞌal ja win? ẍi tet.

—Jaaꞌ, watxꞌ toni, ẍi naj Jonadab tet naj.

—Ta tol jaxca tuꞌ xin, iꞌtej ja kꞌabꞌ tuꞌ ey jin an, ẍi Jehú tuꞌ tet naj.

Catuꞌ jix yaontoj skꞌabꞌ Jonadab tuꞌ tet Jehú, catuꞌ jix iꞌle atoj yu naj Jehú bꞌey yul scarruaje tuꞌ.

16 Jix yalon naj Jehú tet jaxca tiꞌ:

—Toon wetoj an, oj ja wilaꞌ tzet utbꞌil chi yun wakꞌon wip yin tzet jix yal Jehová, ẍi tet.

Yuxan jix yiꞌtoj yetoj yul scarruaje tuꞌ.

17 Jaꞌ yet jix octoj naj bꞌey yul conobꞌ Samaria, jix smakꞌ cam masanil ebꞌ yicꞌaal naj Ahab naj Jehú, jaꞌton ebꞌ jix can yin yiquisal. Pilan jix qꞌueyle ebꞌ yu masanil, jatacꞌalaꞌ jix yun yalon Jehová tet naj Elías.

18 Jix lawi tuꞌ xin, jix yambꞌale oc masanil ebꞌ conobꞌ yu naj Jehú, jix yalon jaxca tiꞌ:

—Jaꞌ naj rey Ahab txenne jix yun yoc naj yin eyilal tet jun comon dios Baal, jal jin jain tiꞌ yel xacꞌal oj ecꞌbꞌantoj yun woc yin eyilal tet.

19 Yu tuꞌ xin, awtele ojabꞌ masanil ebꞌ chi akꞌon servil dios Baal, yetoj masanil ebꞌ chi oc yin eyilal tet. Pilan ojabꞌ chi jul ebꞌ masanil, yutol oj jin waꞌne jun miman xaambꞌal yu wiꞌon a can sbꞌi dios Baal. Jaꞌ mactxequel tol cꞌam chi juli, sowalil chi ale oc yul skꞌabꞌ camich, ẍi naj.

Jaꞌ naj Jehú tuꞌ, tucꞌal jix yal jun tiꞌ, yutol oj yakꞌ qꞌueyle el masanil ebꞌ chi oc yin eyilal tet dios Baal tuꞌ.

20 Yuxan jix yalon naj tol chi al-le tet masanil conobꞌ, tol ey jun miman kꞌin oj ocoj yu yiꞌle a can sbꞌi dios Baal; jaxca ton tuꞌ jix yunne.

21 Jix lawi tuꞌ, jix yaontoj ẍejabꞌ naj Jehú yet chi al-le tet masanil ebꞌ ánima ey yul yet Israel, tol sowalil chi apni oc masanil ebꞌ ánima yin eyilal bꞌey stemplo dios Baal. Cꞌamxa junoj mactxequel jix cani, jix apnoj oc ebꞌ. Yuxan caw miman ánima jix apni ocoj, caw wal teqꞌueqꞌui xacꞌal jix yun sno jun stemplo comon dios Baal tuꞌ.

22 Jix yalon naj Jehú tet ebꞌ chi cꞌubꞌan pichile jaxca tiꞌ: Tol chi iꞌle eltej an spichil caw watxꞌ yili tet ebꞌ chi oc cꞌaltaꞌ eyilal tet dios Baal, yuxan jix iꞌle eltej an pichile tuꞌ yu naj chi cꞌubꞌan an pichile tuꞌ.

23 Jix lawi tuꞌ, jix octoj naj Jehú yetoj naj Jonadab bꞌey yul templo yet comon dios Baal tuꞌ, jix yalon naj Jehú tet ebꞌ chi oc yin eyilal tet Baal jaxca tiꞌ:

—Chi cam je yiloni tol cꞌam mi mactxequel chi oc eyilal tet Jehová eyecꞌ je xol tiꞌ, tol asan mactxequel chi oc eyilal tet Baal, ẍi naj tet ebꞌ.

24 Yuxan jix octoj ebꞌ jix oc yin eyilal tet dios Baal bꞌey yul templo tuꞌ, jix yakꞌon tzꞌaꞌ xaambꞌal ebꞌ, yetoj cꞌal wanxa xaambꞌal. Yajbꞌan chi yakꞌ xaambꞌal ebꞌ tuꞌ, jaxa naj Jehú jix yaon oc jun 80 ebꞌ soldado stiꞌ templo tuꞌ, jix yalon tet ebꞌ tol cꞌam junoj mactxequel chi jajle el yu ebꞌ:

—Ta tol ey junoj mactxequel chi jajon el junoj ebꞌ tuꞌ, jaxa chi cam can sqꞌuexeloj, ẍi naj.

25 Jaꞌ yet jix lawi yakꞌon tzꞌaꞌ xaambꞌal ebꞌ tuꞌ, jix yalon naj Jehú tet ebꞌ chi ilon tuꞌ, yetoj cꞌal tet ebꞌ capitán, tol cꞌamxa junoj chi jajle can eloj.

—Ocanwej, makꞌwej cam ebꞌ. Cꞌamxa junoj che jajeloj, ẍi naj tet ebꞌ. Yuxan masanil ebꞌ jix makꞌle cam yetoj chꞌen espada yu ebꞌ soldado naj Jehú tuꞌ. Jix lawi tuꞌ jix iꞌle eltej ebꞌ camom tuꞌ stiꞌ templo yu ebꞌ. Catuꞌ jix octoj ebꞌ bꞌey eyoctoj jun comon dios Baal yul templo tuꞌ.

26 Jix yiꞌon eltej masanil wan echele ebꞌ, jix yakꞌon tzꞌaꞌ ebꞌ.

27 Jix smakꞌon poꞌo jun yet xaambꞌal eey sattaj jun dios Baal tuꞌ ebꞌ. Jix yuchon lawoj templo ebꞌ tuꞌ masanil, jaxca xacꞌal txulbꞌal jix yun cantoj, masantaꞌcꞌal tinaniꞌ.

28 Queytuꞌ jix yun naj Jehú, yet chi yakꞌon lawoj jun eyilal chi oc tet Baal xol conobꞌ Israel.

29 Asanne naj, ma yakꞌ qꞌueyel jun eyilal jaxca jun bꞌeybꞌale bꞌey jix oc tzꞌajan naj Jeroboam scꞌaal Nabat, naj jix ijbꞌan ebꞌ Israel yin spenail, jaꞌton eyilal chi oc tet wan yechel wacax tol oro cꞌal eloj bꞌey Betel cꞌal bꞌey Dan.

30 Jix yalon Jehová tet naj Jehú jaxca tiꞌ: Yutol watxꞌ cꞌal jix ja wute jaꞌ bꞌeybꞌal jin sattaj, yu jix ja jije ja wakꞌon qꞌueyel ebꞌ yicꞌaal Ahab jaxca jix yun walon ey jaach, yuxan jaxa ebꞌ ja wicꞌaal oj oc cꞌal yin reyal masantaꞌcꞌal yin yet scan tujan icꞌaaleal, ẍi Jehová tet naj.

31 Caxcꞌal mi jaxca tuꞌ, ma cꞌaltaꞌ yaoc naj Jehú yin scꞌul yin sjijen yunen ẍejbꞌanil Jehová sDiosal Israel, yutol ma spoꞌoel sbꞌa yin spenail jaxca pena sbꞌeybꞌal naj Jeroboam, yutol jix ijbꞌaletoj ebꞌ conobꞌ Israel yin spenail yu naj.

32 Jaꞌ yet jun tiempoal tuꞌ, jix oc cꞌal ian yiꞌle ecꞌ xꞌotxꞌ ebꞌ Israel yu Jehová. Jaꞌ naj Hazael sreyal conobꞌ Siria jix iꞌon ecꞌ txꞌotxꞌ bꞌey skꞌaxepal ecꞌtoj jaꞌ Jordán yetcꞌulal bꞌey chi aol cꞌu.

33 Jaꞌ txꞌotxꞌ jix yiꞌecꞌ ebꞌ tuꞌ eyoc txꞌotxꞌ yet Galaad cꞌal Basán yetoj. Jaꞌton tituꞌ jix caey ecꞌ ebꞌ yicꞌaal Gad, Rubén cꞌal nan tujan ebꞌ yet Manasés yet yalantoj. Jix tit tacꞌal smoonal txꞌotxꞌ masantaꞌcꞌal jix apni oc bꞌey conobꞌ Aroer bꞌey stiꞌlaj jaꞌ jaꞌ chi yij Arnón.

34 Jaꞌ jantaj to skꞌaneal naj Jehú, yetoj cꞌal tzet jix yunne, jatuꞌ tzꞌibꞌebꞌilcan ey bꞌey yul an juun bꞌey ey can ey skꞌaneal ebꞌ sreyal Israel.

35 Jaꞌ yet jix cam naj Jehú, jaꞌ bꞌey conobꞌ Samaria jix mujle naj, jaxa jun scꞌaal chi yij Joacaz, jaꞌ jix oc can sqꞌuexeloj yin reyal.

36 Ey 25 abꞌil jix yakꞌ reyal naj Jehú xol conobꞌ Israel cꞌal bꞌey conobꞌ Samaria.