2 Jaxa pax ix Joseba, scutzꞌin naj rey Joram, scaabꞌ yanabꞌ naj rey Ocozías tuꞌ, jaꞌ jix iꞌon can el Joás scꞌaal Ocozías xol wanxa scꞌaal lalan smakꞌle cam tuꞌ. Queytuꞌ jix yun yewbꞌan el tet ix Atalía tuꞌ. Jix ewbꞌale el naj yu ix bꞌey jun cuarto bꞌey chi wey ebꞌ ánima, yuxan ma makꞌle cam naj.

3 Jaꞌ tituꞌ jix ewbꞌale ecꞌ Joás yetoj ix yilomal chꞌibꞌ unin bꞌey stemplo Jehová yin wajebꞌ abꞌil. Yajbꞌan tuꞌ jaꞌ ix Atalía lalan yakꞌon yaawil ix bꞌey Judá.

4 Jaxa yet sjujebꞌ abꞌil, jaꞌ naj sat yakꞌomal xaambꞌal chi yij Joiadá, jix awtele ebꞌ naj scapitanil ebꞌ Quereteos yetoj cꞌal ebꞌ chi teynen spalacio naj rey. Jaꞌ jix aon octoj ebꞌ bꞌey yul stemplo Jehová. Jaꞌ tituꞌ jix yakꞌ can stiꞌ ebꞌ yu, yin yoc can ebꞌ yetoj yin tzetyetal naꞌbꞌil yu, jix txꞌoxle oc naj Joás, scꞌaal camom Ocozías yu naj. 5 Eyman jix yal tet ebꞌ jaxca tiꞌ: Queywal tuꞌ oj je yun jaxca tiꞌ: Jaex chex oc can yin je teynen yet scꞌual xewilal, junoj tujan jex oj je teyne spalacio ebꞌ rey. 6 Jal junxa tujan oj teynen bꞌey spuertail yet Sur. Jal junxa tujan, jatuꞌ oj steyne bꞌey yintaj snail bꞌey ey ebꞌ chi teynen ebꞌ rey. Queyton tuꞌ oj yun je teynen templo tiꞌ yet watxꞌ cꞌam che chaꞌ jul junoj mactxequel tol cꞌam yalon yet yin. 7 Jaxa jex chex elcan yet scꞌual xewilal tuꞌ, caabꞌ tujan che yute je bꞌa yet che teynen stemplo Jehová tiꞌ scꞌatan naj rey. 8 Tol oj jex oc joyan yinlaj bꞌey ey naj rey, junjun cꞌal iꞌbꞌil oc smitxꞌkꞌabꞌ yet jowal. Yal cꞌal mactxequel chi octoj je xol bꞌey txolan jex oc tuꞌ, tol tꞌinan cꞌal scami. Jacꞌalaꞌ jex jaex tiꞌ oj jex toj yetoj naj rey yal cꞌal bꞌeytuꞌ oj toj, ẍi naj Joiadá.

9 Jix sjije ebꞌ capitán yunen tzet jix yal naj yakꞌomal xaambꞌal chi yij Joiadá tuꞌ. Junjun cꞌal ebꞌ jix yaoc soldado, jaxca ebꞌ chi oc yin teynen yet scꞌual xewilal cꞌal ebꞌ chi elcanoj, catuꞌ jix oc ebꞌ sattaj naj yakꞌomal xaambꞌal chi yij Joiadá tuꞌ. 10 Yuxan jix akꞌle chꞌen lanza cꞌal chꞌen majbꞌal sat julbꞌal tet ebꞌ capitán tuꞌ yu naj, jaꞌton chꞌen yet naj rey David yet yalantoj. Jaꞌ wan chꞌen tuꞌ, jatuꞌ eyecꞌ chꞌen bꞌey stemplo Jehová. 11 Queytuꞌ jix yun yoc joyan ebꞌ soldado steynen sattaj templo yinlaj jun yet xaambꞌal tuꞌ cꞌal yinlaj naj rey, junjun cꞌal iꞌbꞌil oc smitxꞌkꞌabꞌ yet jowal. 12 Catuꞌ jix iꞌle eltej naj Joás scꞌaal naj rey yu naj Joiadá tuꞌ, jix yaon a scorona yin sjolom, jix yaontoj jun yuunal swa kꞌane Dios tet. Jix lawi tuꞌ, jix secon atoj aceite olivo yibꞌan sjolom naj, jix yalon el naj tol rey xa naj. Jix lawi tuꞌ xin, masanil ebꞌ jix stzakꞌoꞌtane skꞌabꞌ jix yalon ebꞌ jaxca tiꞌ: Viva naj cu reyal, ẍi xacꞌal ebꞌ.

13 Jaꞌ yet jix yabꞌen ix Atalía yel yaw ebꞌ soldado cꞌal ebꞌ ánima tuꞌ, jix too ix bꞌey stemplo Jehová, bꞌey eyecꞌ ebꞌ masanil. 14 Jaxa jix yiloni, tol eyecꞌ jun rey tituꞌ, linan oc bꞌey scꞌatan jun yoyal templo jaxca cꞌaltaꞌ sbꞌeybꞌal ebꞌ. Jaꞌ bꞌey yin scꞌul naj, jatuꞌ eyecꞌ ebꞌ yaaw cꞌal ebꞌ chi tenon wan mitxꞌkꞌabꞌe yet bꞌit. Caw chi tzala masanil ebꞌ ánima, lalan pax xuꞌle trompeta. Yuxan jix stziltoj spichil ix Atalía tuꞌ, jix yaon el yaw ix jaxca tiꞌ: ¡Ujtem jex el rey jaex tiꞌ! ¡Ujtem jex el rey! ẍi xacꞌal ix.

15 Jaxa naj yakꞌomal xaambꞌal chi yij Joiadá, jix alon tet ebꞌ capitán yeoc yin ebꞌ soldado jaxca tiꞌ:

—Iꞌwej eltej ix je xol bꞌey txolan jex oc tuꞌ. Jaꞌ mactxequel chi oc tzajan yintaj ix tuꞌ, tejle ojabꞌ camoj, ẍi naj Joiadá.

Yutol tuxa jix yal naj yakꞌomal xaambꞌal tol cꞌam chi skeꞌ smakꞌle cam ix bꞌey stemplo Jehová. 16 Queytuꞌ jix yun yiꞌle eltoj ix xol ebꞌ tuꞌ, jix iꞌletoj ix bꞌey chi apni oc sbꞌe ebꞌ eyoc yibꞌan che chi apni bꞌey spalacio ebꞌ rey. Jaꞌ tituꞌ jix makꞌle cam ix yu ebꞌ.

17 Jix lawi tuꞌ xin, jix yalon naj yakꞌomal xaambꞌal chi yij Joiadá tol chi swaꞌne junoj swa kꞌane naj rey yetoj cꞌal ebꞌ conobꞌ, tol chi yaoc sbꞌa ebꞌ sconobꞌoj Jehová. Jix yalon cꞌal pax oj tol ey ojabꞌ junoj swa kꞌane naj rey yetoj ebꞌ conobꞌ tuꞌ. 18 Jix lawi tuꞌ xin, jix too ebꞌ bꞌey stemplo Baal, jix yuchon ey ebꞌ, jix smakꞌon poꞌo wan yet xaambꞌal cꞌal wan echele ebꞌ. Jaxa naj Matán, naj sat yakꞌomal xaambꞌal yeoc tet Baal tuꞌ, jix makꞌle cam naj yu ebꞌ sattaj wan yet xaambꞌal tuꞌ. Jix yaon oc steynemal templo naj yakꞌomal xaambꞌal tuꞌ. 19 Eyman jix eltoj ebꞌ capitán, ebꞌ Quereteos, cꞌal ebꞌ chi teynen naj rey tuꞌ, yetoj cꞌal masanil ebꞌ ánima. Junne jix yun yel ebꞌ bꞌey stemplo Jehová yetoj naj rey masantaꞌcꞌal jix apni oc ebꞌ bꞌey spalacio naj. Jaꞌ tituꞌ jix ecꞌ octoj ebꞌ bꞌey spuertail bꞌey eyecꞌ ebꞌ chi teyneni, catuꞌ jix ey chotan naj rey Joás bꞌey yul spalacio. 20 Masanil ebꞌ ánima jix tzala aoj, yutol jix tzokꞌle cam ix Atalía bꞌey spalacio ebꞌ rey. Queytuꞌ jix yun scancan jun conobꞌ tuꞌ yin tzalacꞌulal.

21 Jujebꞌ abꞌil skꞌinal naj rey Joás yet jix ẍaꞌon el yich yakꞌon reyal bꞌey Judá.