Jix Oc Naj Ocozías Yin Reyal
22
Masanil ebꞌ caan bꞌey Jerusalén tuꞌ, jix ale oc naj Ocozías yin reyal yu ebꞌ, jaꞌton naj slawubꞌ xacꞌal scꞌaal naj Joram, jaꞌ naj jix oc can yin reyal sqꞌuexeloj smam. Jix oc naj yin reyal, yutol jaꞌ ebꞌ Árabe jix yakꞌ jowal ebꞌ yin Judá, jix makꞌle cam wanxa ebꞌ scꞌaal Joram yu ebꞌ, jaꞌton sreyal Judá. 2 Ey 22 abꞌil skꞌinal naj Ocozías yet jix ẍaꞌon el yich yakꞌon reyal; junne abꞌil jix yakꞌ reyal bꞌey Jerusalén; jaꞌ xutx chi yij sbꞌi Atalía, yitxiquin naj Omrí ix. 3-4 Jaꞌ naj rey Ocozías tuꞌ, jix sbꞌeybꞌalne jaxca sbꞌeybꞌal naj Ahab yetoj cꞌal ebꞌ yicꞌaal. Jaꞌ xutx jix cuyon yin pena bꞌeybꞌale, yutol yican to sbꞌa ix yetoj naj Ahab tuꞌ, yuxan caw pena tzet jix el sbꞌeybꞌalne sattaj Jehová. Jaꞌton ebꞌ yican tuꞌ, jix ijbꞌantoj yin spenail yet jix camtoj smam, queytuꞌ jix yun yetex el snaꞌbꞌal.5 Yu cꞌal tol jix sjije masanil wan pena naꞌbꞌale tuꞌ, yuxan junxane jix yute snaꞌbꞌal naj Ocozías yetoj naj Joram, scꞌaal Ahab, sreyal Israel. Yu jun tuꞌ, jix yakꞌon jowal ebꞌ yin conobꞌ Ramot, yul yet Galaad cꞌal yin Hazael, sreyal Siria. Jaꞌ naj Joram tuꞌ, jix yasi naj yin jowal yu ebꞌ Sirio. 6 Yuxan jix meltzotej naj bꞌey Jezreel yet jix jul yanten sbꞌa. Caw yaꞌey naj Joram tuꞌ, yuxan jix too naj rey Ocozías yilon ecꞌ bꞌey conobꞌ Jezreel tuꞌ.
Scamichal Naj Ocozías
7 Naꞌbꞌil xacꞌaltaꞌ yu Dios, tol jaꞌ yet oj apnoj oc naj Ocozías tuꞌ yilon naj Joram, jaꞌ yet tuꞌ oj cam xacꞌal naj. Lalanto wal yapni ocoj, catuꞌ jix eltej naj Joram yet chi ẍaꞌlen sbꞌa yetoj naj Jehú, scꞌaal Nimsí. Jaꞌ Jehová, jix sicꞌon el naj Jehú, yet chi yakꞌon xacꞌal qꞌueyel masanil ebꞌ yicꞌaal Ahab, yetoj cꞌal masanil ebꞌ yican. 8 Jaꞌ yet lalan smakꞌle cam ebꞌ yicꞌaal Ahab yu naj Jehú, catuꞌ jix ilchatej ebꞌ yaaw yeoc bꞌey Judá cꞌal ebꞌ yican Ocozías, jaꞌton ebꞌ jaꞌjun yetoj yet jix too yilon Joram, catuꞌ jix makꞌle cam ebꞌ yu. 9 Jix yaloni tol chi seyle cꞌal pax ecꞌ naj Ocozías, yutol jix yewbꞌa el sbꞌa naj bꞌey conobꞌ Samaria, jix mitxꞌle naj yu ebꞌ, catuꞌ jix yiꞌontoj ebꞌ tet naj Jehú. Jaꞌ tituꞌ jix makꞌle camoj, jix mujle yu ebꞌ yutol jix yal ebꞌ tol yicꞌaal Josafat naj, jaꞌton naj jix akꞌon servil Jehová yin masanil scꞌul. Jix lawi tuꞌ, cꞌamxa junoj xol ebꞌ yican naj Ocozías jix tecꞌbꞌa sbꞌa yoc yin reyal.
Jix Oc Ix Atalía Sreinailoj Conobꞌ Judá
10 Jaꞌ yet jix yabꞌen ix Atalía tol jix cam jun yuneꞌ chi yij Ocozías, jix yakꞌon qꞌueyle el masanil ebꞌ yicꞌaal naj sreyal Judá tuꞌ. 11 Jaxa ix Joseba, scutzꞌin naj rey Joram, jaꞌ jix iꞌon el naj Joás snan xol wanxa ebꞌ scꞌaal Ocozías, jaꞌton ebꞌ lalan smakꞌle cam tuꞌ, jaꞌ yin ix Atalía jix ewbꞌale el naj. Jaꞌ tituꞌ jix bꞌet ewbꞌale el naj yetoj jun ix jix ilon chꞌibꞌ naj bꞌey jun cuarto, bꞌey chi wey ánima bꞌey templo. Queytuꞌ jix yunne, yuxan ma cam naj. Jaꞌ ix Joseba scutzꞌin naj rey Joram tuꞌ, yanabꞌ naj Ocozías ix, yistil naj yakꞌomal xaambꞌal chi yij Joiadá. 12 Queytuꞌ jix yun scolcha el naj Joás yul skꞌabꞌ camich, jaꞌ bꞌey stemplo Jehová jix ewbꞌale el naj, wajebꞌ abꞌil jix il-le chꞌibꞌ naj yu jun ix ix tuꞌ. Jal ix Atalía tuꞌ xin, eyoc ix yin reinail yul jun nación tuꞌ.