Jix yalon naj Joiadá tet ebꞌ jaxca tiꞌ: Ilwej ton abꞌi, ti ey jun scꞌaal naj camom rey Ocozías eyecꞌ ketoj tiꞌ. Jaꞌton jun tiꞌ sowalil oj oc yin reyal, jaxca jix yun yakꞌon can stiꞌ Jehová yin ebꞌ yicꞌaal David. 4 Yuxan jaex tiꞌ, ey jun sowalil che yun jaxca tiꞌ: Jaꞌ junoj yet yox tujan jaex yakꞌomal jex xaambꞌal tiꞌ, cꞌal jaex Levita jex tiꞌ, mactxequel jex ey jex oc yin je yopiso yet scꞌual xewilal, jaex oj je teyne bꞌey stiꞌ stemplo Jehová. 5 Jal junxa yet scaabꞌ tujan, jaꞌ chi teynen bꞌey stiꞌ spalacio ebꞌ rey, jaxa junxa yet yox tujan, jaꞌ chi teynen bꞌey spuertail bꞌey chi ẍaꞌel yich templo. Jaxa masanil ebꞌ conobꞌ xin, sowalil eyoctej ebꞌ sattaj templo tiꞌ. 6 Cꞌam cꞌal junoj mactxequel chi skeꞌ yoctej bꞌey yul templo tuꞌ, asanne ebꞌ yakꞌomal xaambꞌal, cꞌal ebꞌ Levita eyoc yin yopiso. Asan ebꞌ tuꞌ chi skeꞌ yoqui, yutol sicꞌbꞌil el ebꞌ yin yopiso; jal jantaj ebꞌ ánima xin, chi can ebꞌ sattaj eltoj templo tuꞌ, jatacꞌalaꞌ yalon ẍejbꞌanil Jehová. 7 Jaxa ebꞌ Levita oj oc joyan ebꞌ yin naj rey, ey ojabꞌ cꞌal oc mitxꞌkꞌabꞌ yet jowal yul skꞌabꞌ ebꞌ, yuxan ta ey mactxequel comon cꞌal chi octoj yul templo tuꞌ, tꞌinan cꞌal scami. Jal jex jaex tiꞌ xin, sowalil jaex jun yetoj naj rey, yal cꞌal bꞌeytuꞌ chi kaꞌ stooc naj, ẍi naj Joiadá tet ebꞌ.

8 Jaꞌ ebꞌ Levita, yetoj cꞌal masanil ebꞌ ánima a Judá, jix sjije ebꞌ yunen masanil tzetyetal jix yal naj yakꞌomal xaambꞌal, chi yij Joiadá. Junjun cꞌal ebꞌ syaawil ebꞌ soldado tuꞌ, ey cꞌal oc ebꞌ yalan ẍejbꞌanil naj, yetoj ebꞌ chi oc yin yopiso steynen yet scꞌual xewilal, cꞌal ebꞌ chi elcanoj, yutol ma chaꞌle el ebꞌ yu naj Joiadá, naj yakꞌomal xaambꞌal yet chi oc yorail yel ebꞌ. 9 Jix lawi tuꞌ, jix yakꞌon naj yakꞌomal xaambꞌal chꞌen lanza cꞌal chꞌen majbꞌal sat julbꞌal tet ebꞌ syaawil ebꞌ soldado, jaꞌton wan mitxꞌkꞌabꞌe yet naj rey David ey can bꞌey stemplo Dios. 10 Jix lawi tuꞌ, jix ale can oc masanil ebꞌ winaj yin xolilal yu naj, yetbꞌi cꞌal a smitxꞌkꞌabꞌ yet jowal junjun ebꞌ, yet chi teynele naj rey yu ebꞌ. Jix oc joyan ebꞌ yin scanpaqꞌuil bꞌey sattaj eltoj stemplo Dios tuꞌ, bꞌey ey jun yet xaambꞌal yetoj bꞌey jun spuertail templo tuꞌ. 11 Jix lawi tuꞌ, jaꞌ naj yakꞌomal xaambꞌal chi yij Joiadá yetoj ebꞌ scꞌaal, jaꞌ ebꞌ jix iꞌon eltej jun scꞌaal naj camom rey Ocozías tuꞌ. Jix yaon atoj corona ebꞌ yin sjolom, catuꞌ jix yakꞌon jun yuunal swa kꞌane Dios ebꞌ tet. Jix lawi tuꞌ, jix secon atoj aceite olivo ebꞌ yibꞌan sjolom, jix yalon el ebꞌ tol jix oc can naj yin reyal. Jix lawi tuꞌ xin, jix a yaw masanil ebꞌ ánima, jix yalon ebꞌ jaxca tiꞌ: Miman ojabꞌ yeloc apnoj naj rey, ẍi xacꞌal ebꞌ.

12 Jaꞌ yet jix yabꞌen ix Atalía tol chi el yaw ebꞌ ánima tuꞌ, yet chi yakꞌon bꞌina jun rey tuꞌ ebꞌ, jix too ix bꞌey stemplo Jehová bꞌey yaman oc masanil ebꞌ ánima tuꞌ. 13 Jix yilon yin jun rey tuꞌ ix tol linan oc bꞌey jun miman oy bꞌey chi octoj ebꞌ ánima yul templo, jaxa yin scꞌul naj jatuꞌ linan oc ebꞌ yaaw, cꞌal ebꞌ chi xuon trompeta. Caw chi tzala masanil ebꞌ ánima. Ey ebꞌ chi xuon trompeta; ey ebꞌ chi bꞌitni yetoj mitxꞌkꞌabꞌe, jaꞌton ebꞌ chi ijbꞌan bꞌit, yet chi yalon watxꞌ kꞌane ebꞌ tet Dios. Yu tuꞌ xin, jix stzilontoj spichil ix Atalía tuꞌ, jix yaon el yaw ix:

—¡Jaex tiꞌ, ujtem jex el yaaw, ujtem jex el yaaw! ẍi xacꞌal ix.

14 Jaxa naj yakꞌomal xaambꞌal, chi yij Joiadá, jix alon tet ebꞌ syaawil chi ijbꞌan junjun ciento ebꞌ soldado, jix yalon jaxca tiꞌ:

—Iꞌwej eltoj ix snan je xol bꞌey txolan jex oc tuꞌ, ta ey mactxequel chi oc tzajan yintaj ix, che tzokꞌon camoj, ẍi naj.

Jix yalon naj yakꞌomal xaambꞌal tol cꞌam chi makꞌle cam ix bꞌey stemplo Jehová. 15 Yu jun tuꞌ, jix mitxꞌle ey ix yu ebꞌ. Jaꞌ yet jix eltoj ebꞌ bꞌey spuertail ẍe ebꞌ rey, jaꞌ tituꞌ jix makꞌle cam ix yu ebꞌ.

16 Jix lawi tuꞌ xin, catuꞌ jix swa al-lne naj yakꞌomal xaambꞌal, chi yij Joiadá yetoj ebꞌ conobꞌ yetoj cꞌal naj rey tuꞌ, tol jaꞌcaw sconobꞌ Jehová ojabꞌ ebꞌ sicꞌlebꞌil. 17 Jix lawi tuꞌ, jix too ebꞌ bꞌey stemplo jun comon dios Baal, jix bꞌet yuchon ey ebꞌ, jix smakꞌon poꞌo wan yet xaambꞌal ebꞌ, cꞌal smakꞌon poꞌo wan echele ebꞌ. Jaꞌ sattaj jun yet xaambꞌal tuꞌ, jix stzokꞌle cam jun chi yij Matán, jaꞌton jun chi akꞌon servil jun comon dios chi yij Baal. 18 Yin cꞌal eymanil, jix yaon oc naj Joiadá wan mulnail yul skꞌabꞌ ebꞌ yakꞌomal xaambꞌal bꞌey stemplo Jehová, jaꞌton ebꞌ Levita, yet watxꞌ chi sjije ebꞌ yunen mulnail akꞌbꞌil can oc yul skꞌabꞌ ebꞌ yu naj rey David. Sowalil chi yakꞌ tzꞌaꞌ xaambꞌal ebꞌ chi akꞌle tet Jehová jaxca yalon ley jix yal naj Moisés, yajbꞌan lalan stenon wan mitxꞌkꞌabꞌ ebꞌ, cꞌal sbꞌitni ebꞌ, jaxca yalon can naj rey David. 19 Jix yaon cꞌal pax oc steynemal bꞌey stiꞌ stemplo Jehová, yet watxꞌ man comonoj chi octoj ebꞌ ánima tol cꞌam chi sajbꞌane sbꞌa, jatacꞌalaꞌ yalon ley. 20 Jix lawi tuꞌ, jix yambꞌale oc masanil ebꞌ ánima tol bꞌinabꞌil yin yopiso yu naj Joiadá: Jaꞌton wan syaawil ebꞌ soldado, ebꞌ gobernador yeoc bꞌey junjun conobꞌ, yetoj cꞌal masanil ánima. Queytuꞌ jix yun yeltej ebꞌ yetoj jun sreyal tuꞌ yul templo, catuꞌ jix eytoj ebꞌ bꞌey spalacio naj rey tuꞌ. Jaꞌ bꞌey jun spuertail yibꞌan atoj tuꞌ, jatuꞌ jix octoj ebꞌ. Jix ey chotan naj rey tuꞌ yu ebꞌ bꞌey yul jun miman ẍila yet ebꞌ rey bꞌey palacio. 21 Masanil ebꞌ conobꞌ jix tzala ebꞌ sicꞌlebꞌil. Yutol jix tzokꞌle cam ix Atalía, yu jun tuꞌ, yuxan jix can jun conobꞌ tuꞌ yin tzalacꞌulal.