4 Jaꞌ yet jix ecꞌtoj jayebꞌ abꞌil xin, jix snaꞌon naj rey Joás tol chi scaꞌ waꞌne a stemplo Jehová. 5 Yuxan jix syambꞌa oc ebꞌ yakꞌomal xaambꞌal cꞌal ebꞌ Levita, jix yalon tet ebꞌ jaxca tiꞌ: Asiꞌwej bꞌey masanil conobꞌ ey yul yet Judá, yet chi too je yiꞌon a chꞌen tumin, chꞌen chi yambꞌale cꞌaltaꞌa yet junjun abꞌil xol masanil ebꞌ ket Israelal, yet chi nipele stemplo Dios. Yelcꞌulal che yakꞌ je yip yin jun mulnail tiꞌ, ẍi naj tet ebꞌ. Jaxa ebꞌ Levita tuꞌ xin, ma wal yakꞌ yip ebꞌ yin jun mulnail tuꞌ. 6 Yuxan jix awtele naj Joiadá naj sat yakꞌomal xaambꞌal yu naj rey Joás, jix yalon tet jaxca tiꞌ:

—¿Tzet yuxan cꞌam wal cha waoc yin ja cꞌul ja wiptzen ebꞌ Levita, yet chi too yiꞌontej chꞌen ofrenda ebꞌ bꞌey Judá cꞌal bꞌey Jerusalén, jaxca yalon can Moisés, naj ẍejabꞌ Dios, bꞌey jix yalcanoj tol masanil ebꞌ ket Israelal tiꞌ chi yambꞌan a chꞌen tumin yu swaꞌnele a jun Kꞌap Na yet Scaẍail Swa Kꞌane Jehová? ẍi naj rey.

7 Yutol sowalil chi caꞌ waꞌnele a templo tiꞌ, yutol caw pena sbꞌeybꞌal ix Atalía, yetoj masanil ebꞌ jix oc tzajan yintaj. Jaꞌ yet jix octoj ix yul templo tuꞌ, jix skꞌanon masanil wan mitxꞌkꞌabꞌe yet Jehová yeocoj, catuꞌ jix skꞌanon ix yet chi oc eyilal tet jun comon dios Baal. 8 Queytuꞌ jix yun yakꞌon waꞌnele jun teꞌ caẍa naj rey, tol chi ale can ey teꞌ sattaj eltoj stiꞌ stemplo Jehová. 9 Jix yalon el ebꞌ xol masanil yul yet Judá, cꞌal bꞌey masanil yul yet Jerusalén, tol chi iꞌletej chꞌen colwal jix yal can naj Moisés, naj ẍejabꞌ Dios bꞌey txꞌotxꞌ cusiltaj txꞌotxꞌ. 10 Masanil ebꞌ yaaw yeocoj cꞌal masanil ebꞌ conobꞌ, yetoj masanil scꞌul ebꞌ jix bꞌet yaon can eytoj scolwal ebꞌ bꞌey yul jun caẍa tuꞌ, masantaꞌcꞌal jix no teꞌ caẍa tuꞌ yu yofrenda ebꞌ. 11 Jaxa ebꞌ Levita jix iꞌontoj jun caẍa tuꞌ tet ebꞌ eyoc yilon yu naj rey yin junjun cꞌu. Jaꞌ yet jix yiloni tol caw mimanxa chꞌen tumin tuꞌ, jix apni oc jun stzꞌibꞌlom naj rey tuꞌ, yetoj jun sicꞌbꞌil el yu naj sat yakꞌomal xaambꞌal tol jaꞌ chi ilontoj. Jix lawi tuꞌ xin, jix secon eltej chꞌen tumin tuꞌ ebꞌ yul jun caẍa tuꞌ, catuꞌ jix bꞌet yakꞌon can teꞌ caẍa ebꞌ junelxa bꞌey ey cꞌaltaꞌ ey teꞌ. Queytuꞌ jix yun cꞌal ebꞌ junjun cꞌu, yuxan caw miman sbꞌisil chꞌen tumin tuꞌ jix yamchai. 12 Jaꞌ naj rey yetoj naj Joiadá tuꞌ, jix yakꞌ can chꞌen tumin tuꞌ tet ebꞌ eyoc yu yilon mulnail bꞌey templo tuꞌ, yet chi seyle mactxequel chi joswi chꞌen, cꞌal ebꞌ josom teꞌ, yetoj ebꞌ mulnawom yin chꞌen hierro, cꞌal yin chꞌen bronce, yet chi nipele stemplo Jehová. 13 Yuxan jaꞌ ebꞌ chi ijbꞌan mulnail tuꞌ, jaꞌ ebꞌ jix iptzen ebꞌ chi nipen templo tuꞌ. Jix swaꞌne ebꞌ jaxca cꞌal yalon yul yechel waꞌnebꞌil canoj, caw watxꞌ jix yun swaꞌxi can yu ebꞌ. 14 Jaꞌ yet jix lawi swaꞌxi yu ebꞌ tuꞌ, eyto chꞌen tumin jix cancanoj, jix yiꞌontoj ebꞌ tet naj rey, cꞌal tet naj yakꞌomal xaambꞌal chi yij Joiadá, catuꞌ jix yakꞌon waꞌnele smitxꞌkꞌabꞌeal yul stemplo Jehová yetoj chꞌen tumin tuꞌ ebꞌ, jaꞌton wan mitxꞌkꞌabꞌe ey yopiso yul templo cꞌal wan ey yopiso bꞌey jun yet xaambꞌal, jaxca chꞌen lutxbꞌal yetoj cꞌal wanxa mitxꞌkꞌabꞌe tol oro cꞌal plata cꞌal eloj.

Jaꞌ yet iquisto ecꞌ naj yakꞌomal xaambꞌal chi yij Joiadá tuꞌ, chi akꞌle cꞌal xaambꞌal bꞌey stemplo Jehová. 15 Jaxa naj Joiadá tuꞌ xin, caw icham winajxa naj. Yin xacꞌal icham winajil jix yun scami. Ey 130 abꞌil skꞌinal naj yet jix cami. 16 Jatuꞌ jix mujle naj bꞌey mujan ebꞌ rey bꞌey sconobꞌ David, yutol watxꞌ cꞌal tzet jix yun yu swatxꞌiloj ebꞌ yet conobꞌ, yu yiꞌon a can sbꞌi Dios, cꞌal bꞌey templo.

17 Jaꞌ yet jix camtoj naj Joiadá tuꞌ xin, jix apni oc ebꞌ yaaw yeoc bꞌey Judá, jix apni oc ebꞌ yet chi xꞌoxon el sjijemal ebꞌ tet naj rey tuꞌ, yu smontele naj yu ebꞌ, jaxa jix yun xin, jix ẍaꞌ yabꞌ naj tzet chi yal ebꞌ. 18 Queytuꞌ jix yun sbꞌejoncan stemplo Jehová ebꞌ, jaꞌton sDiosal smam icham ebꞌ. Jaxa tet yechel jun comon dios chi yij Aserá jaxa tuꞌ jix oc ebꞌ yin eyilal, cꞌal tet wanxa comon dios. Yu cꞌal jun spenail jix yun ebꞌ tuꞌ, yuxan jix stit sjowal scꞌul Jehová yin Judá, cꞌal yin Jerusalén. 19 Jaxa wal jix yun xin, jaꞌ Jehová jix yatej jun ẍejabꞌ yu yal-le tet ebꞌ, yet chi yaoc sbꞌa ebꞌ yul skꞌabꞌ junelxa. Jaxa ebꞌ xin, ma xacꞌal ẍaꞌ yabꞌ ebꞌ tzet jix yal ebꞌ ẍejabꞌ Dios tuꞌ.

20 Yu tuꞌ xin, jix oc Yespíritu Dios yin naj Zacarías, scꞌaal naj camom Joiadá. Jix atoj linan naj bꞌey naat eyaoj, jix yalon naj tet masanil ebꞌ conobꞌ jaxca tiꞌ: Jaꞌ Jehová chi alon jaxca tiꞌ: ¿Tzet yuxan cꞌam che jije jin chejbꞌanil? ¿Tzet yuxan che loctej syaꞌilal je yibꞌan? Yutol jaex tiꞌ jix jin je bꞌejcanoj, yu cꞌal jun tuꞌ, yuxan oj jex jin bꞌej cꞌal pax canoj, ẍi Dios, ẍi naj Zacarías tuꞌ tet ebꞌ conobꞌ.

21 Jun laan xacꞌal jix yute snaꞌbꞌal masanil ebꞌ conobꞌ tuꞌ, jix tit sjowal ebꞌ yin naj, yuxan jix kꞌojchꞌennele cam naj yu ebꞌ bꞌey sattaj eltoj stemplo Jehová, jaxca jix yun yal-le tet ebꞌ yu naj rey. 22 Cꞌam yeloc apnoj yul sat naj rey Joás jantaj swatxꞌcꞌulal naj Joiadá jix yakꞌ tet naj. Jaꞌ jun jix yunne, tol jix makꞌle cam naj Zacarías, scꞌaal Joás yu. Jaꞌ yet tuxa chi cam naj Zacarías tuꞌ yu ebꞌ, jix a yaw jix yalon jaxca tiꞌ: Yil ojabꞌ Jehová jun tiꞌ, jaꞌ ojabꞌ oj akꞌon sowalil, ẍi naj.

23 Jaꞌ yet jix el yabꞌilal scam naj Zacarías tuꞌ, jix tit ebꞌ soldado Sirio yakꞌon jowal yin naj Joás, jix apni taꞌcꞌal oc ebꞌ bꞌey Judá, cꞌal bꞌey Jerusalén. Jix makꞌle cam masanil ebꞌ yaaw yeoc bꞌey jun nación tuꞌ yu ebꞌ. Jix yiꞌon eltej masanil tzetyetal ey stool ebꞌ, jix yaontoj ebꞌ tet naj sreyal conobꞌ Damasco. 24 Jaywanne ebꞌ soldado Sirio jix apni ocoj, jaxa Jehová jix aon oc jun miman bꞌulan soldado yet Judá yul skꞌabꞌ ebꞌ, yutol jix bꞌejlecan ebꞌ yu Naj, jaꞌton sDiosal ebꞌ, jacꞌal ton jaꞌ sDiosal yichmam ebꞌ. Queywal tuꞌ jix yun yabꞌen syaꞌil naj Joás yu spenail tzet jix yunne.

25 Jaꞌ yet jix el ebꞌ Sirio tituꞌ, txenxane ma cam can naj Joás tuꞌ yu ebꞌ; jaxa ebꞌ eyoc yin yaawilal yetoj naj, jaꞌ ebꞌ jix cam makꞌon xacꞌal cam bꞌey sat xꞌat, yu cꞌal scamichal scꞌaal naj yakꞌomal xaambꞌal chi yij Joiadá. Jix lawi tuꞌ, jix mujle naj bꞌey sconobꞌ David; manaj bꞌey chi mujle ebꞌ rey jix mujle naj. 26 Jaꞌ ebꞌ jix makꞌon xacꞌal cam tuꞌ, jaꞌton: Zabad yuneꞌ ix Simat, a Amón, cꞌal Jozaba yuneꞌ ix Simrit, a Moab.

27 Jaꞌ jantaj to skꞌaneal naj Joás, cꞌal ebꞌ scꞌaal, cꞌal skꞌaneal jix yal can ebꞌ ẍejabꞌ Dios yin naj, cꞌal yu snipele stemplo Jehová, jatuꞌ tzꞌibꞌebꞌilcan masanil bꞌey yul an juun yet skꞌaneal ebꞌ rey. Jaxa jun scꞌaal chi yij Amasías jix oc can yin reyal sqꞌuexeloj.