4-5 Jaꞌ yet jun cꞌual jix yal naj rey Joás tet ebꞌ yakꞌomal xaambꞌal jaxca tiꞌ:

—Yambꞌawej ey chꞌen tumin cꞌal chꞌen ofrenda chi iꞌletej bꞌey stemplo Jehová, jaxca chꞌen tol sowalil chi yakꞌ junjun ánima, cꞌal jantaj chꞌen ofrenda tucꞌal chi el yin scꞌul ebꞌ yakꞌoni. Junjun jex cꞌal oj je yakꞌ chꞌen tumin oj je chaꞌ yu scaꞌ waꞌnele a templo tiꞌ, ẍi naj rey Joás tet ebꞌ.

6 Jaxa yet jix tzꞌajna 23 abꞌil yoc naj Joás yin reyal, cꞌam tocꞌal chi scaꞌ waꞌne niꞌoj templo ebꞌ yakꞌomal xaambꞌal tuꞌ, 7 yuxan jix awtele naj yakꞌomal xaambꞌal chi yij Joaida, yetoj cꞌal wanxa ebꞌ yakꞌomal xaambꞌal yu naj rey Joás, jix yalon tet ebꞌ jaxca tiꞌ:

—¿Tzet yuxan cꞌam tocꞌal chi caꞌ waꞌnele a templo tiꞌ niꞌoj? Jaxa tinaniꞌ yet oj bꞌey cꞌaltoj tiꞌ, cꞌamxa chi can chꞌen tumin yul je kꞌabꞌ, chꞌen che chaꞌ tet ebꞌ ánima. Jaꞌ jantaj chꞌen che chaꞌ sowalil che yakꞌ chꞌen yu scaꞌ waꞌnele a templo, ẍi naj tet ebꞌ.

8 Jix ẍaꞌ scꞌul ebꞌ yakꞌomal xaambꞌal tuꞌ tol manxa jaꞌ oj ebꞌ chi chaꞌon chꞌen tumin tuꞌ tet ebꞌ ánima, catuꞌ cꞌamxa cꞌal pax yalon yet ebꞌ yin scaꞌ waꞌnen a stemplo Jehová ebꞌ. 9 Yuxan jix yiꞌtej jun caẍa naj Joaida naj yakꞌomal xaambꞌal tuꞌ, jix sjolon naj yibꞌan smajil, jix yaon octoj yetcꞌulal bꞌey swatxꞌ kꞌabꞌ yet chi octoj ebꞌ yul templo bꞌey jun yet xaambꞌal tuꞌ. Jaꞌ tituꞌ jix ya cꞌal pax eytoj chꞌen tumin chi ẍaꞌ ebꞌ yakꞌomal xaambꞌal tet ebꞌ ánima chi apni oc bꞌey templo. 10 Jaꞌ yet jix yilon ebꞌ tol mimanxa chꞌen tumin ey yul teꞌ caẍa tuꞌ, jaꞌ yet tuꞌ jix apni jun sat stzꞌibꞌlom naj rey yetoj naj sat yakꞌomal xaambꞌal, catuꞌ jix bꞌison chꞌen tumin tuꞌ ebꞌ, chꞌen yamanxa bꞌey yul stemplo Jehová. Jix lawi tuꞌ jix yaon eytoj ebꞌ yul txꞌuye. 11 Jaꞌ yet jix lawi bꞌischa chꞌen tumin tuꞌ yu ebꞌ, jix yakꞌon chꞌen ebꞌ tet wan ebꞌ eyoc yilomaloj mulnail bꞌey templo tuꞌ, yet chi toolanele ebꞌ naj josom teꞌ, cꞌal ebꞌ chi ilontoj mulnail, 12 ebꞌ albañil, cꞌal ebꞌ josom chꞌen. Catuꞌ jix manle cꞌal pax teꞌ teꞌ cꞌal chꞌen makꞌbꞌil poꞌo yet chi oc yin scaꞌ waꞌnele a templo. Jix oc cꞌal chꞌen tumin tuꞌ yin wanojxa gasto chi oc yin jun mulnail tuꞌ. 13 Jaꞌ chꞌen tumin jix iꞌletoj bꞌey templo tuꞌ ma kꞌanle chꞌen yin swaꞌnele chꞌen vaso, chꞌen plato, chꞌen iꞌbꞌal el staanil mecha, chꞌen mimej secꞌ cꞌal chꞌen trompeta, tam wal yin wanojxa mitxꞌkꞌabꞌe tol oro cꞌal plata. 14 Yutol jaꞌ masanil wan tuꞌ jix akꞌle tet jun mactxequel eyoc yibꞌan yilontoj mulnail yet chi caꞌ waꞌnele a stemplo Jehová. 15 Ma cꞌal kꞌanle cuenta tet mactxequel mitxꞌnen a jun tumin tuꞌ, tam wal yiꞌle cuenta yin tzet jix yun stoolanele ebꞌ mulnawom, yutol caw wal watxꞌ snaꞌbꞌal wan ebꞌ jix cꞌubꞌan a tumin tuꞌ. 16 Jaxa pax chꞌen tumin jix apni oc yu stoolanele spenail cꞌal yu yakꞌle tan mule, ma iꞌletoj chꞌen bꞌey templo, yutol jaꞌ chꞌen tuꞌ yet ebꞌ yakꞌomal xaambꞌal yeoc chꞌen.

17 Jaꞌ yet jun tiempoal tuꞌ, jaꞌ naj Hazael sreyal conobꞌ Siria, jix too yakꞌ jowal yin conobꞌ Gat, jix eyqꞌuey jun conobꞌ tuꞌ yu naj, jix lawi tuꞌ, jix too pax yakꞌ jowal yin conobꞌ Jerusalén. 18 Jal pax naj Joás sreyal Judá xin, jix syambꞌa a masanil tzetyetal tol jix yakꞌ ebꞌ yichmam naj bꞌey stemplo Jehová, jaꞌton naj rey Josafat, naj rey Joram, cꞌal naj rey Ocozías. Jix syambꞌan cꞌal pax a wan tol jix yakꞌ bꞌey templo yetoj cꞌal masanil chꞌen oro eyxa ecꞌ tituꞌ cꞌal masanil chꞌen ey bꞌey spalacio. Jaꞌ masanil wan tuꞌ jix yatoj tet naj Hazael yet watxꞌ cꞌamxa chi jul yakꞌ jowal yin conobꞌ Jerusalén.

19 Jaꞌ wanojxa skꞌaneal naj Joás cꞌal masanil tzet jix yun naj, jatuꞌ tzꞌibꞌebꞌilcan bꞌey yul an juun bꞌey ey can ey skꞌaneal ebꞌ sreyal Judá. 20 Ey jun cꞌual jix syambꞌan oc sbꞌa ebꞌ eyoc yin yaawil yetoj naj Joás tuꞌ, jix swa alne ebꞌ yin naj tzet oj utele naj yu ebꞌ. Jix makꞌle cam naj yu ebꞌ bꞌey jun na bꞌey mujbꞌil el jun jobꞌe bꞌey stiꞌ bꞌe chi eytej bꞌey conobꞌ Silá. 21 Jaꞌ ebꞌ jix makꞌon cam naj tuꞌ, jaꞌton naj Josacar scꞌaal Simat, cꞌal Jozabad scꞌaal Somer. Jaꞌ yet jix cam naj yu ebꞌ, jatuꞌ jix mujle naj bꞌey sconobꞌal rey David. Jix lawi tuꞌ, jaxa jun scꞌaal chi yij Amasías jix oc can sqꞌuexeloj yin reyal.