Jix Oc Naj Joacaz Yin Reyal Bꞌey Israel
13
Jaꞌ yet 23 abꞌil xa yoc naj Joás scꞌaal Ocozías yin reyal bꞌey Judá, jaꞌ yet tuꞌ jix ẍaꞌel yich naj Joacaz scꞌaal Jehú, yakꞌon reyal bꞌey conobꞌ Israel. Ey 17 abꞌil jix yakꞌ reyal naj bꞌey conobꞌ Samaria. 2 Asan xin, yel xacꞌal pena jix yute sbꞌeybꞌal sattaj Jehová. Ma cꞌal snaꞌne naj yunen spenail jaxca spenail jix yun naj Jeroboam scꞌaal Nabat, naj jix ijbꞌantoj ebꞌ yet Israelal yin spenail. 3 Yu cꞌal jun tuꞌ, yuxan jix tit sjowal scꞌul Jehová yin conobꞌ Israel, yutol caw miman tiempo jix oc ebꞌ yul skꞌabꞌ naj Hazael, sreyal conobꞌ Siria, cꞌal yul skꞌabꞌ naj Ben-adad, jaꞌton scꞌaal.4 Yu tuꞌ xin, jix txali naj Joacaz tet Jehová, catuꞌ jix abꞌle xa naj yu Dios, yutol jix yil Jehová tzet wal chi utele ebꞌ Israel yu naj sreyal Siria, 5 yuxan jix akꞌle jun mactxequel jix colwa yin ebꞌ yu Jehová. Queytuꞌ jix yun yel ebꞌ Israel yul skꞌabꞌ ebꞌ Sirio, jix can ebꞌ yin tzalacꞌulal bꞌey sconobꞌ jaxca taꞌ yeoc ebꞌ yet yalantoj. 6 Asan xin, ma cꞌaltaꞌ sbꞌejcan yunen spenail ebꞌ jaxca spenail jix yun naj Jeroboam yet jix ijbꞌaletoj ebꞌ yin spenail yu naj. Yutol ey cꞌal pax a jun yechel comon dios chi yij Aserá yu ebꞌ bꞌey conobꞌ Samaria.
7 Jaꞌ ebꞌ soldado naj Joacaz tuꞌ cꞌamxa txꞌial sbꞌisil ebꞌ, asanxane 50 soldado chi oc yibꞌan che, yetoj laonebꞌ carruaje yet jowal, yetoj 10,000 ebꞌ soldado chi bꞌeyi, yutol jaꞌ naj sreyal conobꞌ Siria jix akꞌon lawoj el ebꞌ.
8 Jaꞌ jantaj to wanojxa skꞌaneal naj rey Joacaz cꞌal jantaj to tzet jix yun naj, jatuꞌ tzꞌibꞌebꞌilcan ey bꞌey yul an juun bꞌey ey can ey skꞌaneal ebꞌ sreyal Israel. 9 Jaꞌ yet jix cami, jatuꞌ jix muji naj bꞌey conobꞌ Samaria. Jix lawi tuꞌ, jaxa jun scꞌaal chi yij Joás, jix oc can sqꞌuexeloj yin reyal.
Jix Oc Naj Joás Sreyaloj Conobꞌ Israel
10 Jaꞌ yet 37 abꞌil xa yoc naj Joás yin reyal bꞌey Judá, jaꞌ yet tuꞌ jix ẍaꞌel yich naj Joás scꞌaal Joacaz, yakꞌon reyal bꞌey Israel, ey 16 abꞌil jix yakꞌ reyal naj bꞌey conobꞌ Samaria. 11 Asan xin, caw pena cꞌal tzet jix yun sattaj Jehová, yutol pena cꞌal jix yute sbꞌa jaxca spenail jix yun naj Jeroboam, scꞌaal Nabat, naj jix ijbꞌantoj ebꞌ yet Israelal yin spenail.
12 Jaꞌ jantaj to wanojxa skꞌaneal naj rey Joás cꞌal jantaj to tzet jix yun naj, cꞌal tzet jix yun yakꞌon jowal yetoj naj Amasías sreyal Judá, jatuꞌ tzꞌibꞌebꞌilcan ey yul an juun bꞌey ey can ey skꞌaneal ebꞌ sreyal Israel. 13 Jaꞌ yet jix cam naj Joás, jatuꞌ jix mujle naj bꞌey Samaria yetoj cꞌal wanxa ebꞌ jix ecꞌle yin reyal bꞌey Israel. Jix lawi tuꞌ, jaxa jun scꞌaal chi yij Jeroboam jix oc can sqꞌuexeloj yin reyal.
Scamichal Naj Eliseo
14 Jaꞌ yul stiempoal naj Joás sreyal Israel, caw pena xacꞌal scꞌul naj Eliseo yu jun syaꞌilal jix iꞌonxa cꞌal camoj, yuxan jix bꞌetecꞌ naj Joás tuꞌ yilon naj, jix okꞌa yin naj, jix oc lakꞌan yin, jix yalon jaxca tiꞌ:
—¡Ay jaach waawil, ay jaach waawil! Ecꞌbꞌan jaach jaxca junoj soldado caw ey yip, ecꞌbꞌan jaach jaxca carruaje yet jowal queytuꞌ ja weoc xol cu conobꞌ Israel tiꞌ, ẍi tet naj.
15 Jix yalon naj Eliseo jaxca tiꞌ:
—Iꞌtej junoj ja julbꞌal yetoj jayebꞌoj sflechail, ẍi naj. Catuꞌ jix yiꞌontej naj rey tuꞌ. 16 Jix yalon naj Eliseo jaxca tiꞌ:
—Waꞌne oc ja julbꞌal yet oj ja waontoj junoj ja julbꞌal tuꞌ, ẍi naj.
Yajbꞌan chi yun naj rey jaxca tuꞌ, catuꞌ jix yaon oc skꞌabꞌ naj Eliseo yibꞌan skꞌabꞌ naj rey tuꞌ. 17 Jix yalon naj Eliseo jaxca tiꞌ:
—Jaj wentana yetcꞌulaltoj bꞌey chi aol cꞌu bꞌey conobꞌ Siria, ẍi naj.
Jix sjajon jun wentana tuꞌ naj rey, jix yalon naj Eliseo jaxca tiꞌ:
—Julwaantoj tinaniꞌ xin, ẍi naj.
Jix julwatoj naj rey tuꞌ, jix a yaw naj Eliseo jaxca tiꞌ:
—Jaꞌ julbꞌal chi txꞌoxon el scolwal Dios yin sconobꞌ, jaꞌ julbꞌal chi txꞌoxon yipal yutol oj ja wakꞌ eyqꞌuey ebꞌ Sirio bꞌey Afec, catuꞌ oj ja wakꞌon lawoj el masanil ebꞌ, ẍi naj.
18 Jix lawi tuꞌ, catuꞌ jix yalon pax naj Eliseo tet naj rey jaxca tiꞌ:
—Iꞌa ja julbꞌal tuꞌ, ẍi naj.
Jaꞌ yet jix yiꞌon a sjulbꞌal naj tuꞌ, jix yalon pax naj Eliseo jaxca tiꞌ:
—Jaꞌ tinaniꞌ makꞌey yibꞌan sat txꞌotxꞌ txꞌotxꞌ tiꞌ, ẍi naj.
Oxel jix smakꞌey sjulbꞌal naj rey tuꞌ sat txꞌotxꞌ, catuꞌ jix oc tucanoj. 19 Caw jix tit sjowal naj Eliseo, jix yalon jaxca tiꞌ:
—Ta jix ja makꞌey joeloj ma wajeloj bꞌey sat txꞌotxꞌ tiꞌ, queytuꞌ oj yun ja wakꞌon lawoj masanil ebꞌ a Sirio. Jaxa tinaniꞌ, asan chꞌan oxel oj eyqꞌuey ebꞌ ja wu, ẍi naj.
20 Jaꞌ yet jix cam naj Eliseo tuꞌ, jix mujle naj. Junjun cꞌal abꞌil chi jul ebꞌ Moabita elkꞌan bꞌey yul yet ebꞌ Israel. 21 Jaꞌ yet junel, ey jun camom jix too wan ebꞌ Israel smujcanoj. Jaꞌ yet lalan wal yapni oc ebꞌ bꞌey oj mujle jun camom tuꞌ, catuꞌ jix yilon ebꞌ sjul wan ebꞌ elkꞌom a Moab, tuxa cꞌal jix skꞌojcan octoj jun camom tuꞌ ebꞌ bꞌey mujan naj Eliseo, catuꞌ jix too ebꞌ. Jaꞌ yet jix apni oc jun camom tuꞌ yin sbꞌajil naj Eliseo, jix pitzcꞌu aoj, jix a linanoj.
22 Caw wal jix etex ebꞌ Israel yu naj Hazael sreyal Siria, yajbꞌan yet iquisto ecꞌ naj rey Joacaz. 23 Jaxa Jehová xin, caw jix okꞌ scꞌul yin ebꞌ, yu cꞌal swa kꞌane jix yakꞌ can yetoj Abraham, Isaac cꞌal yetoj Jacob, yuxan jix colwa yin ebꞌ. Ma ẍaꞌ scꞌul Jehová tol chi akꞌle xacꞌal lawoj ey ebꞌ, yuxan ey cꞌal ecꞌ ebꞌ masantaꞌcꞌal tinaniꞌ.
24 Jaꞌ yet jix cam naj Hazael sreyal Siria, jaxa jun scꞌaal chi yij Ben-adad jix oc can sqꞌuexeloj yin reyal. 25 Yu tuꞌ xin, jaꞌ naj Joás scꞌaal Joacaz jix colon el wan conobꞌlaj jix yiꞌecꞌ naj rey Ben-adad tet naj rey Joacaz yet jix yakꞌon jowal. Oxel wal jix eyqꞌuey naj Ben-adad tuꞌ yu naj, queytuꞌ jix yun scolon pax el wan conobꞌ tuꞌ.