5 Jaꞌ yet jix yiꞌon wal yip naj Amasías tuꞌ yin yopiso, jix makꞌle cam ebꞌ eyoc yin yopiso yu naj, jaꞌton ebꞌ jix makꞌon cam smam. 6 Jaxa cꞌal scꞌaal ebꞌ ma makꞌle cam yu naj, yutol jix sjije tzet tzꞌibꞌebꞌilcan yul an slibroal sley Moisés, jaxca jix yun yalon can Jehová: Jaꞌ ebꞌ mame cꞌam chi skeꞌ yale oc camich yibꞌan ebꞌ yu spenail yuninal ebꞌ chi oqui, tam wal ebꞌ uninale chi skeꞌ yale oc camich yibꞌan ebꞌ yu spenail ebꞌ mame chi yaocoj, yutol junjun cꞌal oj cam yu spenail chi oqui, ẍi jun chejbꞌanile tuꞌ.

7 Jaꞌ naj Amasías tuꞌ jix smakꞌ cam laonebꞌ mil ebꞌ Edomita yin jowal jix oc bꞌey spananil sjobꞌeal bꞌey ey atzꞌam. Jix eyqꞌuey cꞌal pax conobꞌ Selá yu naj, jix sqꞌuexon sbꞌi, Jocteel xa jix yakꞌ yij sbꞌi, jaꞌton jun sbꞌi tuꞌ chi bꞌina tocꞌal yin tinaniꞌ.

8 Jix lawi tuꞌ, jix ẍejontoj jun yakꞌomal servil bꞌey naj Joás sreyal Israel, scꞌaal Joacaz, yitxiquin Jehú, jix yalontoj jaxca tiꞌ: Titan, cu mitxꞌle cu bꞌa yin jowal tiꞌ ja wetoj, ẍi toj naj.

9 Jaxa naj rey Joás jix spajtzetoj tet jaxca tiꞌ: Ey jun teꞌ sajin qꞌuix jix alon tet teꞌ kꞌuteꞌ ey bꞌey Líbano jaxca tiꞌ: Akꞌ ix ja cutzꞌin tet naj jin cꞌaal, yet chi oc ix yistiloj naj, ẍi teꞌ. Jaxa wal jix yun xin, ey jun noꞌ xol-laj teꞌal noꞌ jix ecꞌ yichlaj teꞌ tituꞌ, jaꞌ noꞌ jix tecꞌon ey an sajin qꞌuix tuꞌ. 10 Yu tuꞌ xin, tejan yu cꞌal tol jix ja wakꞌ eyqꞌuey ebꞌ Edomita, yuxan caw cha meyne ja bꞌa tinaniꞌ. Yun ojabꞌ xin, meyne cꞌal ja bꞌa. Asan xin watxꞌ cꞌal ja we bꞌey ja na tuꞌ. ¿Tzet yuxan cha waoc ja bꞌa yin jowal wetoj an? Tucꞌal oj tit ja wibꞌan cꞌal yibꞌan ebꞌ a Judá tuꞌ ja wetoj, ẍi toj naj.

11 Jaxa naj Amasías xin, ma ẍaꞌ yabꞌ jun kꞌane tuꞌ. Yuxan jix too naj Joás yu ẍaꞌlen sbꞌa yetoj Amasías yin jowal, bꞌey Bet-semes bꞌey yul yet Judá. 12 Jix eyqꞌuey ebꞌ soldado a Judá yu ebꞌ Israel tuꞌ, junjun xacꞌal ebꞌ jix paxtoj bꞌey sna. 13 Jix michꞌcha ey naj Amasías tuꞌ yu naj Joás, catuꞌ jix iꞌletoj naj preso bꞌey Bet-semes. Jix lawi tuꞌ, jix too naj Joás bꞌey Jerusalén. Jix yuchon ey 180 metro smuroal conobꞌ tuꞌ, jix too tacꞌal bꞌey spuertail yet Efraín masantaꞌcꞌal bꞌey spuertail xiquin jun muro tuꞌ. 14 Queytuꞌ jix yun yiꞌon cꞌal pax can oc masanil chꞌen oro, cꞌal chꞌen plata, yetoj cꞌal masanil tzetyetal ey bꞌey stemplo Jehová, yetoj cꞌal masanil tzetyetal ey bꞌey sdespacho naj rey Amasías tuꞌ. Ey pax wanxa ebꞌ ánima jix yiꞌtoj yetoj bꞌey Samaria yu yakꞌle pural naj Amasías tuꞌ.

15 Jaꞌ wanojxa skꞌaneal naj rey Joás cꞌal tzet jix yun naj, cꞌal jantaj jowal jix yun yetoj naj Amasías sreyal Judá, jatuꞌ tzꞌibꞌebꞌilcan ey bꞌey yul an juun bꞌey ey can ey skꞌaneal, ebꞌ sreyal Israel. 16 Jaꞌ yet jix cam naj Joás tuꞌ jaꞌ bꞌey conobꞌ Samaria jix mujle naj bꞌey mujan wanxa ebꞌ sreyal Israel. Jix lawi tuꞌ, jaxa jun scꞌaal chi yij Jeroboam, jix oc can sqꞌuexeloj yin reyal.

17 Jal pax naj Amasías scꞌaal Joás, sreyal Judá, 15 abꞌil to jix cancan yet jix camtoj naj Joás scꞌaal Joacaz sreyal Israel. 18 Jaꞌ wanojxa skꞌaneal naj Amasías, jatuꞌ tzꞌibꞌebꞌilcan ey yul an juun bꞌey ey can skꞌaneal ebꞌ sreyal Judá. 19 Ey wan ebꞌ winaj jix oc cꞌal scajatoj naj Amasías tuꞌ bꞌey Jerusalén. Yu jun tuꞌ, yuxan jix ela naj, jix toocan naj bꞌey conobꞌ Laquis, caxcꞌal mi jix el naj tituꞌ, jix too cꞌal tzajan ebꞌ pena snaꞌbꞌal tuꞌ yintaj naj, masantaꞌcꞌal jix michꞌcha naj yu ebꞌ bꞌey jun conobꞌ tuꞌ. Jaꞌ tituꞌ jix makꞌle cam naj yu ebꞌ. 20 Jix lawi tuꞌ, jix yiꞌontoj ebꞌ yibꞌan che, jix mujle naj bꞌey Jerusalén, bꞌey mujan ebꞌ yichmam bꞌey sconobꞌ David. 21 Jix lawi tuꞌ xin, ey jun scꞌaal chi yij Azarías jix ale can oc sqꞌuexeloj yin reyal yu masanil ebꞌ a conobꞌ Judá. Jaꞌ yet tuꞌ, ey 16 abꞌil skꞌinal naj Azarías tuꞌ. 22 Jaꞌ yet eyxa oc naj yin reyal sqꞌuexeloj smam tuꞌ, jix yiꞌon ecꞌ conobꞌ Elat junelxa, jix scaꞌ waꞌne aoj.

23 Jaꞌ yet jolajonebꞌxa abꞌil yoc naj Amasías scꞌaal Joás yin reyal bꞌey Judá, jaxa pax naj scaabꞌ Jeroboam scꞌaal Joás, jix ẍaꞌel yich yakꞌon reyal bꞌey Israel, ey 41 abꞌil jix yakꞌ reyal bꞌey Samaria. 24 Jaꞌ naj tuꞌ caw pena cꞌal sbꞌeybꞌal sattaj Jehová. Pilan cꞌal jix sbꞌeybꞌalne jaxca spenail sbꞌeybꞌal naj Jeroboam scꞌaal Nabat, yutol jaꞌ naj tuꞌ jix ijbꞌantoj ebꞌ yet Israelal yin spenail.

25 Jix yiꞌon cꞌal ecꞌ naj scaabꞌ Jeroboam tuꞌ bꞌey chi ecꞌtoj smoonal conobꞌ Israel, jix too tacꞌal bꞌey chi oc apnoj bꞌey Hamat masantaꞌcꞌal bꞌey jaꞌ mar yet Arabá, jaxca wal jix yun yalon can el naj Jonás ẍejabꞌ Dios, jaꞌton Jonás tuꞌ scꞌaal Amitai a conobꞌ Gat-héfer.

26 Yutol jix yil Jehová jantaj wal yeoc jun syaꞌtajil yibꞌan ebꞌ Israel, yutol cꞌam junoj mactxequel chi colwa yetoj ebꞌ, 27 yuxan jix colwa Jehová yin naj Jeroboam scꞌaal Joás, yet jix col-le el ebꞌ conobꞌ tuꞌ yu, yutol cꞌam tzet eyecꞌ yin snaꞌbꞌal Dios sqꞌueyon el sconobꞌ tuꞌ yin junelne.

28 Jaꞌ jantaj to skꞌaneal naj Jeroboam, cꞌal masanil tzetyetal jix yun naj, cꞌal jantaj jowal jix yun yet jix yiꞌon pax ecꞌ wan conobꞌ tuꞌ junelxa, wan tol yet Judá yeoc yet peyxa, jaꞌton Damasco cꞌal Hamat, jaꞌ masanil wan tuꞌ, jatuꞌ tzꞌibꞌebꞌilcan bꞌey yul an juun bꞌey ey can ey skꞌaneal ebꞌ sreyal Israel. 29 Jaꞌ yet jix cam naj Jeroboam, jatuꞌ jix muji naj bꞌey mujan ebꞌ sreyal Israel, jaxa jun scꞌaal chi yij Zacarías jix oc can yin sqꞌuexeloj yin reyal.