3 Jaꞌ naj Azarías tuꞌ, caw watxꞌ sbꞌeybꞌal naj sattaj Jehová, jaxca cꞌal sbꞌeybꞌal smam chi yij Amasías. 4 Asan xin, ma yiꞌel wan pat waꞌnebꞌil a bꞌey sjolomlaj wonan bꞌey chi oc ebꞌ ánima yin eyilal, tol jix yakꞌ cꞌal xaambꞌal ebꞌ ánima tuꞌ, cꞌal yakꞌon tzꞌaꞌ incienso ebꞌ tituꞌ. 5 Yuxan jix ale oc jun yaꞌbꞌil chi yij lepra yin naj rey tuꞌ yu Jehová, masantaꞌcꞌal jix cam naj. Yu tuꞌ xin, ma xa caey ecꞌ naj rey bꞌey spalacio, txꞌoj bꞌey jix caey ecꞌoj, jaxa jun scꞌaal chi yij Jotam, jaxa eyoc yilomaloj spalacio naj rey cꞌal yakꞌon yaawilal yibꞌan jun nación tuꞌ.

6 Jaꞌ jantaj to skꞌaneal naj Azarías yetoj cꞌal masanil tzet jix yun naj, jatuꞌ tzꞌibꞌebꞌilcan ey bꞌey yul an juun bꞌey ey can ey skꞌaneal ebꞌ sreyal Judá. 7 Jaꞌ yet jix cam naj Azarías, jatuꞌ jix muji naj bꞌey sconobꞌ David, bꞌey mujan ebꞌ yichmam, yuxan jix oc xacꞌal jun scꞌaal chi yij Jotam sqꞌuexeloj yin reyal.

8 Jaꞌ yet 38 abꞌil xa yoc naj Azarías yin reyal bꞌey Judá, jaxa naj Zacarías scꞌaal Jeroboam, jaꞌ jix ẍaꞌel el yich yakꞌon reyal bꞌey Israel, wajebꞌ xꞌaaw jix yakꞌ reyal bꞌey conobꞌ Samaria. 9 Caw pena cꞌal jix yute sbꞌeybꞌal sattaj Jehová, jaxca spenail sbꞌeybꞌal ebꞌ yichmam; ma cꞌal snaꞌne yunen jaxca spenail Jeroboam scꞌaal Nabat, naj jix ijbꞌantoj ebꞌ yet Israelal yin spenail.

10 Jaxa naj Salum scꞌaal Jabés, caw jix jowi oc yin naj Zacarías tuꞌ. Jix yakꞌ jowal yetoj bꞌey Ibleam. Sattaj wal ebꞌ conobꞌ jix makꞌle cam naj Zacarías tuꞌ yu naj, yuxan jaxa naj jix oc can sqꞌuexeloj yin reyal.

11 Jaꞌ jantaj to skꞌaneal naj Zacarías yetoj cꞌal masanil tzet jix yun naj, jatuꞌ tzꞌibꞌebꞌilcan ey bꞌey yul an juun bꞌey ey can ey skꞌaneal ebꞌ sreyal Israel. 12 Queytuꞌ jix yun yeloc bꞌey jix yal can Jehová tet naj rey Jehú, yet jix yaloni tol jaꞌ ebꞌ yicꞌaal oj oc cꞌal ebꞌ yin reyal bꞌey Israel masantaꞌcꞌal yet scan tujan icꞌaale.

13 Jaꞌ naj Salum tuꞌ scꞌaal Jabés, jix ẍaꞌel yich yakꞌon reyal yet 39 abꞌil xa yoc naj Uzías yin reyal bꞌey Judá, asan xin jaꞌ jun tuꞌ, jun chꞌan xꞌaaw jix yakꞌ reyal bꞌey conobꞌ Samaria tuꞌ. 14 Jaxa naj Manahem scꞌaal Gadi, jix tit bꞌey conobꞌ Tirsá, jix apni oc naj bꞌey Samaria yakꞌon jowal yetoj naj Salum. Jaꞌ yet jix makꞌle cam naj Salum tuꞌ yu naj, jaxa naj jix oc can sqꞌuexeloj yin reyal.

15 Jaꞌ jantaj to skꞌaneal naj Salum yetoj cꞌal tzet jix yun smeltzo oc yin naj Zacarías, jatuꞌ tzꞌibꞌebꞌilcan ey bꞌey yul an juun bꞌey ey can ey skꞌaneal ebꞌ sreyal Israel.

16 Jaꞌ yet jun tiempoal tuꞌ jix el naj Manahem yetoj ebꞌ soldado bꞌey conobꞌ Tirsá, catuꞌ jix oc yakꞌon jowal yin conobꞌ Tífsah. Jix makꞌle cam masanil ebꞌ ánima ey yul jun conobꞌ tuꞌ yu naj, yutol ma chaꞌle oc naj yin reyal yu ebꞌ conobꞌ tuꞌ. Yu cꞌal jun tuꞌ, yuxan jix yelkꞌanetoj masanil tzetyetal ebꞌ soldado jantaj tzetyetal ey yul conobꞌ tuꞌ. Catuꞌ jix tejle can cam ebꞌ ix ix mimejalxa yu naj.

17 Jaꞌ yet 39 abꞌil xa yoc naj Azarías yin reyal bꞌey Judá, jaxa naj Manahem scꞌaal Gadi, jaxa jix ẍaꞌel yich yakꞌon reyal bꞌey Israel. Laonebꞌ abꞌil jix yakꞌ reyal bꞌey Samaria. 18 Asan xin, caw pena cꞌal jix yute sbꞌeybꞌal sattaj Jehová, yutol ma cꞌal sbꞌejcan yunen spenail jaxca jix yute sbꞌeybꞌal naj Jeroboam scꞌaal Nabat, naj jix ijbꞌantoj ebꞌ yet Israelal yin spenail. 19 Jaxa naj Pul sreyal Asiria, jix yakꞌ jowal yin conobꞌ Israel, yuxan jix yakꞌ jun 750 quintal chꞌen plata naj Manahem tet naj chi yij Pul, yu yoc yetoj yet watxꞌ chi bꞌey cꞌaltoj yin yopiso tuꞌ. 20 Yuxan jix yaoc jun toolabꞌal naj Manahem yibꞌan masanil ebꞌ bꞌeom bꞌey Israel yin tol chi yakꞌ 50 siclo chꞌen plata junjun ebꞌ, yet watxꞌ chi skeꞌ yakꞌle junjun toolabꞌal tuꞌ tet naj sreyal Asiria. Queytuꞌ jix yun meltzotoj jun sreyal Asiria tuꞌ bꞌey sconobꞌ, ma xacꞌal eyecꞌ naj yul conobꞌ Israel tuꞌ.

21 Jaꞌ jantaj to skꞌaneal naj Manahem yetoj cꞌal masanil tzet jix yunne, jatuꞌ tzꞌibꞌebꞌilcan ey bꞌey yul an juun bꞌey ey can ey skꞌaneal ebꞌ sreyal Israel. 22 Jix lawi tuꞌ xin, jix cam naj, jaxa jun scꞌaal chi yij Pecahías jix oc can sqꞌuexeloj yin reyal.

23 Jaꞌ yet 50 abꞌil xa yoc naj Azarías yin reyal bꞌey Judá, jaꞌ yet tuꞌ jix ẍaꞌon el yich naj Pecahías scꞌaal Manahem yakꞌon reyal bꞌey Israel. Caabꞌ abꞌil jix yakꞌ reyal bꞌey Samaria. 24 Caw pena cꞌal jix yute sbꞌeybꞌal sattaj Jehová, yutol jix sbꞌeybꞌalne spenail jaxca sbꞌeybꞌal naj Jeroboam, scꞌaal Nabat, naj jix ijbꞌantoj ebꞌ yet Israelal yin spenail.

25 Yutol jaꞌ naj chi yij Pécah scꞌaal Remalías, capitán yeoc naj xol ebꞌ soldado, jaꞌ jix meltzo oc yin naj, jix yaon oc sbꞌa jun 50 ebꞌ winaj a Galaad yetoj naj. Queytuꞌ jix yun smakꞌle cam naj Pecahías yu ebꞌ, yetoj naj Argob cꞌal naj Arié bꞌey scuartel bꞌey sdespacho bꞌey Samaria. Jaꞌ yet jix lawi tuꞌ, jacꞌal oc naj Pécah tuꞌ jix oc can yin reyal sqꞌuexeloj naj Pecahías tuꞌ.

26 Jaꞌ jantaj to skꞌaneal naj Pecahías yetoj cꞌal masanil tzet jix yun naj, jatuꞌ tzꞌibꞌebꞌilcan ey yul an juun bꞌey ey can ey skꞌaneal ebꞌ sreyal Israel.

27 Jaꞌ yet 52 abꞌil xa yoc naj Azarías yin reyal bꞌey Judá, jaꞌ yet tuꞌ jix ẍaꞌel yich naj Pécah scꞌaal Remalías yakꞌon reyal bꞌey Israel. Ey 20 abꞌil jix yakꞌ reyal bꞌey Samaria. 28 Caw pena cꞌal tzet jix el sbꞌeybꞌalne sattaj Jehová, yutol jix sbꞌeybꞌalne cꞌal spenail jaxca jix yute sbꞌeybꞌal naj Jeroboam scꞌaal Nabat, naj jix ijbꞌantoj ebꞌ yet Israelal yin spenail.

29 Jaꞌ yul stiempoal yet eyoc naj Pécah yin reyal bꞌey Israel, jaꞌ yet tuꞌ jix apni oc naj Tiglat-piléser sreyal Asiria, catuꞌ jix eyqꞌuey wan conobꞌ tuꞌ yu naj, jaꞌton: Iión, Abel-bet-maacá, Janóah, Quedes, Hasor, Galaad, Galilea yetoj cꞌal masanil yul yet Neftalí. Jaꞌ masanil ebꞌ caan tituꞌ jix iꞌletoj ebꞌ yu bꞌey Asiria. 30 Jix lawi tuꞌ xin, jaxa pax naj Oseas scꞌaal Ela jix meltzo oc yin naj Pécah scꞌaal Remalías tuꞌ, jix makꞌle cam naj yu. Queytuꞌ jix yun yoc can yin reyal sqꞌuexeloj, jaꞌton yet 20 abꞌil xa yoc naj Jotam scꞌaal Uzías, yin reyal bꞌey Judá.

31 Jaꞌ jantaj to skꞌaneal naj Pécah yetoj cꞌal masanil tzet jix yun naj, jatuꞌ tzꞌibꞌebꞌilcan ey bꞌey yul an juun bꞌey ey can ey skꞌaneal ebꞌ sreyal Israel.

32 Jaꞌ yet caabꞌxa abꞌil yoc naj Pécah scꞌaal Remalías yin reyal, jaꞌ yet tuꞌ jix ẍaꞌel yich naj Jotam scꞌaal Uzías yakꞌon reyal bꞌey Judá. 33 Ey 25 abꞌil skꞌinal naj yet jix oc naj yin reyal, 16 abꞌil jix yakꞌ reyal bꞌey Jerusalén, jaꞌ xutx chi yij Jerusá, scutzꞌin naj Sadoc ix.

34 Jaꞌ masanil tzetyetal jix sbꞌeybꞌalne naj Jotam caw watxꞌ sattaj Jehová, jaxca wal sbꞌeybꞌal naj Uzías, jaꞌton smam. 35 Jix swaꞌne oc spuertail stemplo Jehová, jun naat yeaoj, asan xin, ma yiꞌel wan pat eya bꞌey sjolomlaj wonan, bꞌey chi yakꞌ cꞌal xaambꞌal ebꞌ ánima cꞌal yakꞌon tzꞌaꞌ incienso ebꞌ tituꞌ.

36 Jaꞌ jantaj to skꞌaneal naj Jotam yetoj cꞌal masanil tzet jix yun naj, jatuꞌ tzꞌibꞌebꞌilcan ey bꞌey yul an juun bꞌey ey can ey skꞌaneal ebꞌ sreyal Judá.

37 Jaꞌ yet jun tiempoal tuꞌ, jaꞌ Jehová jix aontej naj Resín sreyal Siria yetoj cꞌal naj Pécah scꞌaal Remalías, yet chi yakꞌon jowal ebꞌ yin Judá. 38 Jaꞌ yet jix cam naj Jotam, jatuꞌ jix mujle naj bꞌey sconobꞌ David, jaꞌton yichmam. Jix lawi tuꞌ, jaxa jun scꞌaal chi yij Ahaz jix oc can sqꞌuexeloj yin reyal.