5 Jaꞌ yet jun tiempoal tuꞌ, jaꞌ naj Resín sreyal Siria, cꞌal naj Pécah scꞌaal Remalías sreyal Israel, jix too yakꞌ jowal ebꞌ yin conobꞌ Jerusalén yin naj rey Ahaz. Jix oc joyan ebꞌ yinlaj conobꞌ Jerusalén tuꞌ, jaxa jix yunne ma eyqꞌuey yu ebꞌ. 6 Jacꞌalaꞌ yet jun tiempoal tuꞌ, jaꞌ naj sreyal ebꞌ Edomita jix akꞌon eyqꞌuey conobꞌ Elat yu yoc can yul skꞌabꞌ conobꞌ Edom, jix iꞌle el ebꞌ ánima caan tituꞌ yu ebꞌ a Judá tuꞌ. Queytuꞌ jix yun yapni can oc caan ebꞌ a Edom tituꞌ. Eyto cꞌal ecꞌ ebꞌ tituꞌ tinaniꞌ.

7 Jaꞌ yet tuꞌ jix ẍejontoj naj rey Ahaz jaywan ebꞌ yakꞌomal servil bꞌey naj Tiglat-piléser, jaꞌton naj sreyal Asiria, yet chi al-le tet yu naj jaxca tiꞌ: Chi waoc jin bꞌa yul ja kꞌabꞌ, yuxan titan yet chin jul ja colon el yul skꞌabꞌ naj sreyal Siria cꞌal tet naj sreyal Israel. Yutol chi yakꞌ jowal ebꞌ naj win an, ẍi toj naj tet.

8 Yu jun tuꞌ, yuxan jix yiꞌeltej chꞌen plata cꞌal chꞌen oro naj Ahaz ey bꞌey stemplo Jehová yetoj cꞌal chꞌen ey bꞌey sdespacho, jix yaontoj yin saꞌbꞌeal tet naj sreyal Asiria. 9 Jix sjije naj sreyal Asiria tuꞌ tzet chi yal naj. Queytuꞌ jix yun stit yetoj ebꞌ soldado yakꞌon jowal bꞌey Damasco, jix eyqꞌuey ebꞌ yu, jix iꞌletoj ebꞌ ánima caan tituꞌ yu bꞌey Quir, jix cam cꞌal pax naj rey Resín yu ebꞌ.

10 Jix lawi tuꞌ, jix too naj rey Ahaz bꞌey Damasco yet chi too chaꞌle naj Tiglat-piléser yu naj. Jaꞌ tituꞌ jix yil jun yet xaambꞌal, jix yaontoj jun yechel jaxca wal yili jun yet xaambꞌal tuꞌ tet naj yakꞌomal xaambꞌal chi yij Urías bꞌey Jerusalén. 11 Queytuꞌ jix yun swaꞌnen jun yet xaambꞌal naj yakꞌomal xaambꞌal chi yij Urías, jaxca wal yeoc yin jun yechel jix yatoj naj rey Ahaz bꞌey Damasco tuꞌ. Watxꞌ xa yeoc yet jix meltzotej naj rey bꞌey Damasco tuꞌ.

12 Jaꞌ yet jix jul naj rey bꞌey Jerusalén jix yilon jun yet xaambꞌal tuꞌ, jix sjitzon oc sbꞌa naj scꞌatan, catuꞌ jix yakꞌon tzꞌaꞌ xaambꞌal. 13 Jix yakꞌon cꞌal pax tzꞌaꞌ ixim tiriw yin ofrendail, jix secon ey vino yibꞌan jun yet xaambꞌal tuꞌ yin ofrendail, jix stiẍon cꞌal pax ey ẍiqꞌuil noꞌ xaambꞌal yet watxꞌcꞌulal yibꞌan xaambꞌal tuꞌ.

14 Jal pax jun yet xaambꞌal tol chꞌen bronce cꞌal eloj ey bꞌey sattaj stemplo Jehová tuꞌ xin, jix yiꞌel naj rey Ahaz bꞌey snan xol jun acꞌ yet xaambꞌal yetoj stemplo Jehová, jix yaon ey bꞌey yetcꞌulal snorteal jun yet acꞌ xaambꞌal tuꞌ. 15 Jix lawi tuꞌ, jix yalon naj rey Ahaz tet naj yakꞌomal xaambꞌal chi yij Urías jaxca tiꞌ: Jaꞌ tinaniꞌ, jaꞌ masanil noꞌ xaambꞌal chi akꞌle yet skꞌinibꞌalil yetoj cꞌal ixim tiriw chi akꞌle yet yeycꞌualil, yetoj cꞌal pax xaambꞌal chi tzꞌaꞌi, cꞌal ixim tiriw chi akꞌle yin ofrendail, yetoj cꞌal wet jain rey jin tiꞌ, yetoj cꞌal xaambꞌal chi tzꞌaꞌi cꞌal ixim tiriw cꞌal vino chi yakꞌ masanil ebꞌ conobꞌ. Jix yalon cꞌal pax oj tol chi txile ey ẍiqꞌuil noꞌ xaambꞌal chi tzꞌaꞌi cꞌal wanxa xaambꞌal yibꞌan jun yet xaambꞌal tuꞌ. Jal pax jun yet xaambꞌal tol chꞌen bronce cꞌal el xin, wet chi yun can oc jain rey jin tiꞌ yet watxꞌ chin kꞌan yet ey junoj tzetyetal chin kꞌanle tet Jehová.

16 Jix sjije naj Urías yakꞌomal xaambꞌal masanil jaxca jix yun yalon naj rey Ahaz tuꞌ. 17 Jix yalon naj rey Ahaz tuꞌ, tol chi iꞌle el smajil snanlaj yul smarcoal wan carreta tol chꞌen bronce cꞌal eloj bꞌey yul templo, jix iꞌle el chꞌen palangana eyoc yibꞌan. Jix yiꞌon cꞌal pax el chꞌen yechel icham wacax tol bronce cꞌal eloj, jun eyoc yalan jun miman pila, jaxa yibꞌan chꞌen chꞌen bꞌey sat txꞌotxꞌ jix yaey oj. 18 Jix yun jaxca tuꞌ, yet watxꞌ chi yun scancan naj sattaj naj sreyal Asiria, yuxan jix yiꞌel bꞌey stemplo Jehová, jun lugar tol yet ebꞌ rey waꞌnebꞌil a yu yet scꞌual xewilal, cꞌal spuertail bꞌey sattaj eltoj stiꞌ na tol yet ebꞌ rey yeocoj.

19 Jaꞌ jantaj to skꞌaneal naj rey Ahaz yetoj cꞌal masanil tzet jix yun naj, jatuꞌ tzꞌibꞌebꞌilcan ey bꞌey yul an juun bꞌey ey can ey skꞌaneal ebꞌ sreyal Judá. 20 Jaꞌ yet jix cam naj, jatuꞌ jix mujle yetoj ebꞌ yichmam bꞌey sconobꞌ David. Jix lawi tuꞌ jaxa jun scꞌaal chi yij Ezequías jix oc can sqꞌuexeloj yin reyal.