7 Ey jun soldado yin yicꞌaal Efraín chi yij Zicrí, jaꞌ jix makꞌon cam naj Maaseías, scꞌaal naj rey, yetoj Azricam ijbꞌawom yeoc bꞌey palacio, yetoj cꞌal naj Elcaná, scaabꞌ yaaw yeoc bꞌey spalacio naj rey. 8 Caxcꞌal mi tol yet conobꞌ sbꞌa yetoj ebꞌ Israel, jix iꞌletoj 200,000 ebꞌ ix ix, cꞌal ebꞌ unin yin presowomal yu ebꞌ bꞌey conobꞌ Samaria, yetoj cꞌal masanil tzetyetal. 9 Jaꞌ tituꞌ, ey jun ẍejabꞌ Dios chi yij Oded. Jaꞌ jun tuꞌ jix eltej sattaj ebꞌ soldado yet jix apni oc ebꞌ bꞌey Samaria tuꞌ. Jix yalon tet ebꞌ jaxca tiꞌ:

—Jaꞌ Jehová cu Diosal, jacꞌal ton sDiosal ebꞌ cu mam icham; yutol jix tit sjowal scꞌul yin ebꞌ a Judá, yuxan jix ale oc ebꞌ yul je kꞌabꞌ. Jaex tiꞌ, yetoj xacꞌal sjowal je cꞌul jix je makꞌon cam ebꞌ, cꞌamxa cꞌal je mimancꞌulal yin ebꞌ. Yuxan jaꞌ jun je penail tuꞌ, yotaj Dios tzet jix je yunne. 10 Jaxa tinaniꞌ, che naꞌ tol che yaoc ebꞌ a Judá yetoj ebꞌ a Jerusalén je yakꞌomaloj servil. Jaex tiꞌ, ¿tumi cꞌam cꞌal pax niꞌoj je penail sattaj Jehová che naꞌ?

11 Jaꞌ tinaniꞌ abꞌwej tzet oj walaꞌ: Akꞌwej meltzo masanil ebꞌ ket Israelal jix je yiꞌtej yin presowomal tiꞌ, yutol caw jix tit sjowal scꞌul Jehová je yin, ẍi naj Oded tet ebꞌ.

12 Queytuꞌ jix yun ya waan ebꞌ yaaw yeoc xol ebꞌ yicꞌaal Efraín, jaꞌton Azarías scꞌaal Johanán, Berequías scꞌaal Mesilemot, Ezequías scꞌaal Salum, cꞌal yetoj Amasá scꞌaal Hadlai, jaꞌton ebꞌ tuꞌ jix too sattaj ebꞌ jix jul yin jowal tuꞌ. 13 Jix yalon ebꞌ jaxca tiꞌ:

—Manche xa je yiꞌtej ebꞌ presowom tuꞌ titiꞌ, yu cꞌal jun tuꞌ, yuxan chi oc cu penail tet Jehová. Yutol jacꞌalaꞌ stit sjowal scꞌul Naj kin, jaex tiꞌ che yoche xacꞌal che sey tzet chi yun yoc cꞌal cu penail sattaj Dios, ẍi ebꞌ.

14 Yu tuꞌ xin, jix jajle el masanil ebꞌ majan oc yu ebꞌ soldado yul preso tuꞌ, sattaj ebꞌ yaaw cꞌal masanil ebꞌ ánima jix yakꞌon meltzo masanil tzetyetal jix bꞌet yiꞌtej ebꞌ bꞌey wan sconobꞌ ebꞌ presowom tuꞌ.

15 Jaꞌ ebꞌ canwan jix bꞌina sbꞌi titiꞌ, jaꞌ ebꞌ a cuenta yilon ebꞌ presowom tuꞌ. Jaꞌ xol masanil tzettaj yetal jix bꞌet yiꞌtej ebꞌ soldado yet jix mitxꞌletej ebꞌ tuꞌ, jatuꞌ jix iꞌle atej spichil ebꞌ, jix ale oc spichil ebꞌ tꞌiran eloj. Jix ale cꞌal pax oc xanabꞌ ebꞌ, jix akꞌle low ebꞌ, cꞌal yuqꞌuen jaꞌ ebꞌ. Jix antele ebꞌ yasinajtoj yetoj aceite olivo. Jix lawi tuꞌ, jaꞌ ebꞌ cꞌamxa chi skeꞌ sbꞌeyi, jix ale atoj ebꞌ yibꞌan noꞌ bꞌuru, jix bꞌet akꞌle can ebꞌ bꞌey conobꞌ Jericó, jun conobꞌ chi yij sbꞌi, yet teꞌ palma, bꞌey scawilal ebꞌ yet conobꞌ ebꞌ. Jix lawi tuꞌ, catuꞌ jix meltzotoj ebꞌ bꞌey conobꞌ Samaria.

16 Jaꞌ yet jun tiempoal tuꞌ, jix yatoj ẍejabꞌ naj rey Ahaz bꞌey naj sreyal Asiria, yu skꞌanon scolwal naj, 17 yutol jaꞌ ebꞌ a Edom jix apni oc yakꞌ jowal ebꞌ yin Judá, catuꞌ ecꞌal ebꞌ jix iꞌletoj yin presowomal yu ebꞌ. 18 Quey cꞌal pax tuꞌ ebꞌ Filisteo, jix jul yelkꞌanetoj tzettaj yetal ebꞌ bꞌey wan conobꞌ ey bꞌey yichlaj spananil wonan, yetoj bꞌey Négueb yul yet Judá, jaꞌton: Bet-semes, Aialón, Guederot, Socó, Timná cꞌal Guimzó, yetoj cꞌal yaldeail junjun. Jix lawi tuꞌ jix caey ecꞌ ebꞌ Filisteo tituꞌ.

19 Jix iꞌle el ebꞌ a Judá yu Jehová, yutol jaꞌ naj Ahaz sreyal Judá, jaꞌ naj jix ijbꞌantoj ebꞌ ánima yin spenail; caw junelne pena jix yute sbꞌeybꞌal sattaj Jehová. 20 Jaꞌ yet jix jul naj Tiglat-piléser sreyal Asiria bꞌey Judá, ma colwa niꞌoj naj, jaꞌ jun jix yunne tol jaꞌ naj jix akꞌon xacꞌal eyqꞌueyoj. 21 Caxcꞌal mi jix syambꞌa eltej naj Ahaz jantaj tzetyetal caw ey stool bꞌey yul stemplo Jehová, cꞌal bꞌey spalacio naj rey, cꞌal bꞌey sna ebꞌ yaaw yeoc tituꞌ, yu yakꞌon tet naj sreyal Asiria, caw naꞌbꞌacꞌal jix yakꞌ wan saꞌbꞌeal tuꞌ, cꞌam cꞌal bꞌey jix colcha naj yu wan tuꞌ. 22 Caxcꞌal miman syaꞌilal jix jul yibꞌan naj rey Ahaz tuꞌ, tol jacꞌalaꞌ yaon oc spenail sattaj Jehová. 23 Jix yakꞌon tzꞌaꞌ xaambꞌal tet comon sdiosal ebꞌ a Damasco, yutol jix eyqꞌuey naj yu ebꞌ, jix yalon naj jaxca tiꞌ: Jaꞌ wan sdiosal ebꞌ Sirio tuꞌ chi colwa yin ebꞌ, yu jun tuꞌ, yuxan oj wakꞌ jin xaambꞌal tet ebꞌ, yet watxꞌ oj colwa ebꞌ wetoj an, ẍi naj Ahaz tuꞌ. Queytuꞌ jix yun scancan naj yalan yetoj masanil ebꞌ yet conobꞌ. 24 Jix lawi tuꞌ, jix syambꞌa oc wan mitxꞌkꞌabꞌe bꞌey stemplo Dios, catuꞌ jix smakꞌon poꞌo naj. Jix smajchen can templo tuꞌ, jaxa yul xiquinlaj scalleal conobꞌ Jerusalén jix swaꞌne a wan yet xaambꞌal. 25 Jix yakꞌon cꞌal pax waꞌxoj a wan yet xaambꞌal bꞌey wan wonanlaj bꞌey yul conobꞌ Judá. Jaꞌ tituꞌ jix yakꞌ tzꞌaꞌ incienso tet comon dios. Queytuꞌ jix yun xꞌemontej sjowal scꞌul Jehová, sDiosal smam icham.

26 Jaꞌ jantaj to masanil tzetyetal jix yun naj, yet yichbꞌanil cꞌal yet slawubꞌal, jatuꞌ tzꞌibꞌebꞌilcan ey yul an yuunal skꞌaneal yet ebꞌ sreyal Judá, cꞌal Israel. 27 Jaxa yet jix cam Ahaz tuꞌ, jaꞌ bꞌey conobꞌ Jerusalén jix mujle naj, asan man junne oj jix muji yetoj ebꞌ rey. Jaxa jun scꞌaal chi yij Ezequías, jaꞌ jix oc can sqꞌuexeloj yin reyal.