Jix Oc Naj Ezequías Yin Reyal
29
Jaꞌ naj Ezequías tuꞌ, ey 25 abꞌil skꞌinal yet jix oc naj yin reyal. Ey 29 abꞌil jix yakꞌ reyal bꞌey conobꞌ Jerusalén, Abí yoc sbꞌi xutx naj, scutzꞌin naj Zacarías. 2 Watxꞌ cꞌal jix yute sbꞌeybꞌal naj sattaj Jehová, jaxca cꞌal sbꞌeybꞌal naj rey David, jaꞌton smam icham.Jix El Yich Yoc Eyilal Bꞌey Stemplo Jehová Yu Naj Ezequías
3 Jaꞌ yet bꞌabꞌel xꞌaaw yet bꞌabꞌel abꞌil yoc naj Ezequías yin reyal, jix sjajon spuertail stemplo Jehová naj, catuꞌ jix scaꞌ waꞌnen octoj spuertail templo tuꞌ. 4 Jix syambꞌa oc masanil ebꞌ yakꞌomal xaambꞌal cꞌal ebꞌ Levita, bꞌey sattaj eltoj templo yetcꞌulal bꞌey chi aol cꞌu. 5 Jix yalon tet ebꞌ jaxca tiꞌ: Jex Levita, abꞌwej tzet oj walaꞌ: Sajbꞌanewej je bꞌa, catuꞌ che sajbꞌanen cꞌal pax el stemplo Jehová, jaꞌton cu Diosal yetoj ebꞌ cu mam icham. Iꞌwej eltej masanil tzetyetal tzꞌiltaj bꞌey yul snail scalubꞌal cu Diosal. 6 Yutol jaꞌ ebꞌ cu mam icham, caw pena jix yute sbꞌa ebꞌ tet Jehová cu Diosal. Caw pena jix yute sbꞌeybꞌal ebꞌ. Jix sbꞌejcan cu Diosal ebꞌ, jix yintajne can el snail scalubꞌal Jehová ebꞌ. 7 Jix smajche can spuertail templo ebꞌ, jix sbꞌuton pax tan skꞌakꞌal tzejtebꞌal ebꞌ. Ma xacꞌal yakꞌ tzꞌaꞌ incienso ebꞌ; cꞌamxa xaambꞌal jix yakꞌ tzꞌaꞌ ebꞌ bꞌey yul stemplo Jehová cu Diosal jaon Israel jon tiꞌ. 8 Yu jun tuꞌ, yuxan jix tit sjowal scꞌul Jehová kin, cꞌal yin Jerusalén, cusiltaj xacꞌal jix yun cu cancanoj, quixwiltaj xacꞌal jix utele yet jix kilon jun syaꞌilal tiꞌ. Jix cu bꞌuchle xacꞌal yu wanxa nación, jaxca wal chi yun kilon tinaniꞌ. 9 Yu jun tuꞌ, ecꞌal ebꞌ cu mam jix cam yin jowal, ecꞌal pax ebꞌ kistil, cꞌal ebꞌ kuninal jix iꞌletoj yin presowomal. 10 Yu jun tuꞌ, yuxan oj jin waꞌne jun wa kꞌane yetoj Jehová cu Diosal jaon Israel jon tiꞌ, yet watxꞌ cꞌamxa chi yaoc sjowal scꞌul kibꞌan. 11 Yu tuꞌ xin, jex wet conobꞌ, cꞌam ojabꞌ cꞌal chex isabꞌi a yet che waꞌnen a stemplo Jehová, tol jaꞌ Naj sicꞌnen jex eloj, yet chex oc yakꞌomaloj servil, cꞌal je yakꞌon tzꞌaꞌ incienso sattaj, ẍi naj rey Ezequías.
12 Jaꞌ ebꞌ Levita jix oc yin jun mulnail tuꞌ, jaꞌton sbꞌi ebꞌ tiꞌ: Jaꞌ xol ebꞌ yicꞌaal Quehat, jaꞌton: Máhat, scꞌaal Amasai, cꞌal Joel scꞌaal Azarías. Jaxa xol ebꞌ yicꞌaal Merarí, jaꞌton: Quis scꞌaal Abdí, cꞌal Azarías scꞌaal Jehalelel. Jaxa xol ebꞌ yicꞌaal Guersón, jaꞌton: Joah scꞌaal Zimá, cꞌal Edén scꞌaal Joah. 13 Jaxa xol ebꞌ yet Elisafán, a Simrí cꞌal Jehiel. Jaꞌ xol ebꞌ yet Asaf, jaꞌ Zacarías yetoj Matanías. 14 Jaxa xol ebꞌ yet Hemán, jaꞌton Jehiel yetoj Simí. Jaxa xol ebꞌ yet Jedutún, jaꞌton: Semaías yetoj Uziel. 15 Yin sbꞌabꞌelal jix syambꞌa oc masanil ebꞌ yican sbꞌa yetoj ebꞌ, catuꞌ jix sajbꞌanen sbꞌa masanil ebꞌ, jatacꞌalaꞌ yalon ley. Jix lawi tuꞌ, catuꞌ jix octoj ebꞌ yul templo, catuꞌ jix sajbꞌanen templo ebꞌ jatacꞌalaꞌ yalon ley, jaxca jix yun yalon naj rey, jaxca cꞌal yalon pax ẍejbꞌanil Jehová.
16 Jix lawi tuꞌ xin, jix octoj ebꞌ yakꞌomal xaambꞌal yul templo, yu sajbꞌanen can ebꞌ. Pilan jix yiꞌeltej masanil tzettaj yetal man watxꞌoj ebꞌ, jatacꞌalaꞌ yalon ley, jix yiꞌon eltoj ebꞌ sattaj eltoj templo tuꞌ. Jaxa ebꞌ Levita jix iꞌontoj bꞌey sjobꞌeal jaꞌ Cedrón. 17 Jaꞌ yet sbꞌabꞌel cꞌual yet sbꞌabꞌel xꞌaaw jix ẍaꞌel yich sajbꞌanen sattaj eltoj templo ebꞌ, jaxa yet swaxajebꞌ cꞌual jix apni oc ebꞌ bꞌey stiꞌ templo. Waxajebꞌ cꞌual jix yakꞌ sajbꞌanen yul templo ebꞌ, ey wajlajonebꞌ cꞌual jix mulna ebꞌ yu sajbꞌanen can templo ebꞌ. 18 Jix lawi tuꞌ xin, jix apni oc ebꞌ bꞌey naj rey, jix yalon ebꞌ jaxca tiꞌ: Jix lawi cu sajbꞌanen stemplo Jehová yetoj jun yet xaambꞌal bꞌey chi tzꞌaꞌ xaambꞌal, yetoj cꞌal jantaj smitxꞌkꞌabꞌeal; yetoj cꞌal teꞌ meẍa yet ixim pan chi akꞌle sattaj Jehová, yetoj cꞌal smitxꞌkꞌabꞌeal; 19 yetoj cꞌal pax oj, jix cu sajbꞌane masanil wan mitxꞌkꞌabꞌe elnaj can yin yopiso yu naj rey Ahaz. Jaxa tinaniꞌ, watxꞌ xa yeoc bꞌey sattaj jun yet xaambꞌal sattaj Jehová, ẍi ebꞌ tet naj.
20 Yu tuꞌ xin, caw sebꞌ jix a waan naj rey Ezequías yet junxa cꞌu, jix syambꞌa oc masanil ebꞌ yaaw yeoc bꞌey yul conobꞌ tuꞌ, jix too ebꞌ bꞌey stemplo Jehová. 21 Jix yiꞌontoj jujcꞌon noꞌ achꞌe wacax ebꞌ, jujcꞌon noꞌ icham meꞌ, jujcꞌon noꞌ achꞌe meꞌ, cꞌal jujcꞌon noꞌ achꞌe chiw. Jaꞌ wan tuꞌ jix yakꞌ ebꞌ yin ofrendail yu yakꞌle tan spenail ebꞌ syaawil conobꞌ, cꞌal ebꞌ ey yul yet Judá, cꞌal yu sajbꞌanele templo. Jix yalon naj rey tet ebꞌ naj yakꞌomal xaambꞌal, jaꞌton ebꞌ yicꞌaal naj Aarón, tol chi yakꞌ tzꞌaꞌ xaambꞌal tuꞌ bꞌey yibꞌan jun yet xaambꞌal sattaj Jehová. 22 Jix smakꞌon cam noꞌ wacax ebꞌ yakꞌomal xaambꞌal tuꞌ, jix ẍaꞌon el ẍiqꞌuil noꞌ ebꞌ, jix xion ey ebꞌ yibꞌan yet xaambꞌal tuꞌ. Jacꞌalaꞌ, queytuꞌ jix yute cꞌal pax noꞌ icham meꞌ yetoj cꞌal noꞌ achꞌe meꞌ ebꞌ.
23 Jix lawi tuꞌ, jix yiꞌontoj noꞌ chiw ebꞌ yin ofrendail yu yakꞌle tan spenail bꞌey sattaj naj rey, cꞌal bꞌey sattaj ebꞌ conobꞌ, jix yaon oc skꞌabꞌ ebꞌ yibꞌan noꞌ noꞌ tuꞌ. 24 Jaxa ebꞌ yakꞌomal xaambꞌal tuꞌ jix makꞌon cam noꞌ, catuꞌ jix secon ey ẍiqꞌuil noꞌ ebꞌ yibꞌan jun yet xaambꞌal tuꞌ. Jaꞌ jun tuꞌ ofrenda yu yakꞌle tan spenail masanil ebꞌ Israel, jatacꞌalaꞌ tzet jix yun yalon naj rey tet ebꞌ.
25 Jacꞌalaꞌ, jix ale cꞌal pax oc ebꞌ Levita yu naj rey Ezequías bꞌey stemplo Jehová, yetoj wan mitxꞌkꞌabꞌe yet chi oc bꞌit: Jaꞌton chꞌen platillo, salterio, cꞌal teꞌ cítara, jatacꞌalaꞌ jix yun yalon can naj rey David yetoj naj Gad, naj chi akꞌon junoj naꞌbꞌale tet naj rey David yetoj cꞌal naj Natán, naj ẍejabꞌ Dios. Jaꞌ wan chejbꞌanile tuꞌ, jaꞌ Jehová jix chejon yalon can ebꞌ ẍejabꞌ. 26 Yuxan linan oc ebꞌ Levita yetoj wan mitxꞌkꞌabꞌe yet bꞌit waꞌnebꞌil can yu naj rey David, jaxa ebꞌ yakꞌomal xaambꞌal linan cꞌal pax oc ebꞌ yetoj strompeta.
27 Jix lawi tuꞌ xin, jix yalon naj rey Ezequías tol chi akꞌle tzꞌaꞌ xaambꞌal yibꞌan jun yet xaambꞌal tuꞌ. Jaꞌ yet jix ẍaꞌon el yich yakꞌon tzꞌaꞌ noꞌ xaambꞌal tuꞌ ebꞌ, catuꞌ jix ẍaꞌon pax el yich sbꞌitni ebꞌ chi bꞌitni, yu yiꞌon a can sbꞌi Jehová ebꞌ, cꞌal xuon strompeta ebꞌ, catuꞌ jix tenle cꞌal pax wanxa mitxꞌkꞌabꞌe yet bꞌit waꞌnebꞌil can yu naj rey David. 28 Jaxa masanil ebꞌ ánima, kaan ey ebꞌ yin eyilal, yajbꞌan lalan sbꞌitni ebꞌ chi ijbꞌan bꞌit, catuꞌ chi xuon cꞌal pax strompeta ebꞌ yakꞌomal xaambꞌal tuꞌ. Jato yet jix lawi tzꞌaꞌ masanil wan xaambꞌal tuꞌ, catuꞌ chi oc tucan yoc bꞌit, 29 catuꞌ jix ey kaan naj rey yetoj masanil ebꞌ jaꞌjun yetoj yin eyilal tet Jehová. 30 Jix lawi tuꞌ, jix yalon naj rey Ezequías, yetoj cꞌal ebꞌ yaaw yeoc xol ebꞌ Levita tol chi sbꞌitne wan bꞌit ebꞌ tet Jehová, jaꞌton wan bꞌit yet naj rey David, yetoj cꞌal yet Asaf naj ẍejabꞌ Dios. Caw jix yal watxꞌ kꞌane ebꞌ yin tzalacꞌulal, catuꞌ jix ey pax kaan ebꞌ yalon sbꞌa tet Jehová.
31 Jix lawi tuꞌ xin, jix yalon naj rey Ezequías tet ebꞌ conobꞌ jaxca tiꞌ: Jaꞌ tinaniꞌ, tuxa jix je sajbꞌane je bꞌa sattaj Jehová. Titanwej, iꞌwejtej je xaambꞌal cꞌal je yofrenda bꞌey stemplo Dios, yu je yalon yu diosal tet, ẍi naj tet ebꞌ. Yuxan jix yiꞌtej xaambꞌal masanil ebꞌ conobꞌ cꞌal yofrenda yu yalon yu diosalil ebꞌ; jaꞌ mactxequel jix el wal yin scꞌul yakꞌon saꞌbꞌeal tet Dios, jix yakꞌ xaambꞌal tol chi akꞌle tzꞌaꞌoj. 32 Jaꞌ noꞌ noꞌ jix yiꞌtej ebꞌ conobꞌ yin xaambꞌal tuꞌ, ey 70 noꞌ icham wacax, 100 noꞌ icham meꞌ, cꞌal 200 noꞌ achꞌe meꞌ jix yiꞌtej ebꞌ. Jix akꞌle tzꞌaꞌ noꞌ yin xaambꞌalil sattaj Jehová. 33 Jaꞌ masanil noꞌ noꞌ jix yakꞌ ebꞌ yin xaambꞌal tuꞌ, ey 600 noꞌ wacax, yetoj 3,000 noꞌ meꞌ cꞌal noꞌ chiw.
34 Yutol cꞌam txꞌial ebꞌ yakꞌomal xaambꞌal tuꞌ, caw cꞌam chi tzaji ebꞌ yin yiꞌon el stzꞌuumal noꞌ xaambꞌal chi tzꞌaꞌ tuꞌ. Yuxan jix colwa wan yet Levitail ebꞌ yetoj. Queytuꞌ jix yun slawi jun mulnail tuꞌ yu ebꞌ Levita, masantaꞌcꞌal jix sajbꞌane sbꞌa wanxa ebꞌ yakꞌomal xaambꞌal, yutol jix yal ebꞌ Levita tol bꞌejan scꞌul ebꞌ sajbꞌane sbꞌa yintaj ebꞌ yakꞌomal xaambꞌal tuꞌ. 35 Eyto cꞌal junxa miman bꞌulan noꞌ xaambꞌal jix akꞌlei, yetoj cꞌal ẍepuꞌal noꞌ xaambꞌal yet watxꞌcꞌulal, yetoj cꞌal yal uva jix akꞌle yin ofrendail yetoj noꞌ xaambꞌal chi tzꞌaꞌi.