5 Jaꞌ naj Ezequías tuꞌ, jaꞌ yin Jehová sDiosal Israel jix yaoc snaꞌbꞌal sicꞌlebꞌil. Jaꞌ xol masanil ebꞌ sreyal Judá yet yalantoj cꞌal yicꞌaal ebꞌ cꞌam junoj laan snaꞌbꞌal jaxca naj Ezequías tuꞌ. 6 Caw wal jijem cꞌal jix yute sbꞌa naj tet Jehová. Cꞌam juneloj jix yiꞌcan el sbꞌa yintaj Dios, yutol caw jix sjije cꞌal masanil chejbꞌanile jix yal can Jehová tet naj Moisés. 7 Masanil cꞌal tzet jix yun naj Ezequías tuꞌ watxꞌ cꞌal jix elocoj yutol jix colwa cꞌal Jehová yetoj, jix yiꞌ cꞌal sbꞌa masanil tzetyetal jix yunne.

Jix yiꞌon el sbꞌa naj Ezequías yalan ẍejbꞌanil naj sreyal Asiria tuꞌ, ma xa yakꞌ stoolabꞌal tumin tet naj. 8 Jix yakꞌon eyqꞌuey ebꞌ Filisteo cꞌal yiꞌontej masanil tzetyetal ey bꞌey jun conobꞌ tuꞌ; jix tit tacꞌal bꞌey wan yaliẍ conobꞌ masantaꞌcꞌal bꞌey wan mimej conobꞌ eyoc smuroal yinlaj. Ey cꞌal pax oc conobꞌ Gaza stzꞌajiloj, yetoj cꞌal bꞌey chi apni oc smoonal jun conobꞌ tuꞌ.

9 Jaꞌ yet scan abꞌil xa yoc naj Ezequías yin reyal bꞌey Judá, yet jujebꞌxa abꞌil yoc naj Oseas scꞌaal Ela yin reyal bꞌey Israel, jaxa naj Salmanasar sreyal Asiria jix smajbꞌa oc sbꞌa yetoj soldado yin conobꞌ Samaria, yin yakꞌon jowal ebꞌ. 10 Yet yox abꞌil xa yapni oc joyan naj yin jun conobꞌ tuꞌ, catuꞌ jix eyqꞌuey yu. Jaꞌton yet swaj abꞌil xa yoc naj Ezequías yin reyal bꞌey conobꞌ Judá, catuꞌ bꞌalonebꞌxa abꞌil yoc naj Oseas yin reyal bꞌey Israel. 11 Catuꞌ jix iꞌletoj ebꞌ Israel bꞌey conobꞌ Asiria yu naj rey Salmanasar. Jix bꞌet yakꞌon can jaywan ebꞌ bꞌey conobꞌ Halah yul yet Habor bꞌey stiꞌ jaꞌ Gozán, cꞌal bꞌey sconobꞌlaj ebꞌ a Medos. 12 Queytuꞌ jix yun yeloc apnoj, yutol ma sjije ebꞌ Israel tzet jix yal Jehová, jaꞌton sDiosal ebꞌ. Caw pit jix yute sbꞌa ebꞌ tet swa kꞌane Dios jix waꞌne can yetoj smam icham ebꞌ, jix yintajne can el wan chejbꞌanile ebꞌ, jaꞌton wan albꞌilcan yu naj Moisés, naj ẍejabꞌ Dios.

13 Jaꞌ yet canlajonebꞌxa abꞌil yoc naj Ezequías yin reyal bꞌey Judá, catuꞌ jix oc naj Senaquerib sreyal conobꞌ Asiria yin yakꞌon jowal yetoj wan conobꞌ eyoc smuroal yul yet Judá, catuꞌ jix eyqꞌuey yu. 14 Yu tuꞌ xin, jaꞌ Ezequías jix yaontoj kꞌane tet naj sreyal Asiria bꞌey conobꞌ Laquis, jix yalontoj jaxca tiꞌ: Jix waoc jin penail ey jaach an, yuxan chi wal ey jaach, tol oj wal cha wiꞌel ebꞌ ja soldado eyoc yul jin conobꞌ tiꞌ, catuꞌ oj jin toolanen jin toolabꞌal eyoc wibꞌan ja wu, ẍi toj tet naj.

Yuxan jix yaoc naj sreyal Asiria jun 225 quintal chꞌen plata cꞌal 23 quintal chꞌen oro yin toolabꞌal yibꞌan Ezequías sreyal Judá, 15 catuꞌ jix yaontoj naj Ezequías chꞌen plata jix ilcha yu bꞌey yul stemplo Jehová, yetoj cꞌal Jantaj sbꞌeomal naj ey bꞌey yul spalacio. 16 Catuꞌ jix yiꞌon el naj rey Ezequías chꞌen oro eyoc yin templo, cꞌal chꞌen oro eyoc yin spuertail, cꞌal yin smarcoal, cꞌal yin sreglail, jaꞌton wan jix yaoc naj rey Ezequías yin templo tuꞌ. Masanil wan tuꞌ jix yatoj tet naj sreyal Asiria.

17 Jix lawi tuꞌ, jix yaontej naj sreyal Asiria oxwan ebꞌ sat yaaw yeoc xol ebꞌ soldado bꞌey naj rey Ezequías yetoj jun miman bꞌulan ebꞌ soldado. Jix tit ebꞌ bꞌey conobꞌ Laquis, jix too ebꞌ bꞌey Jerusalén. Jaꞌ tituꞌ jix swaꞌne ey bꞌulan sbꞌa ebꞌ bꞌey chi el sne jun stanqueal jaꞌ jaꞌ ey yibꞌan bꞌe bꞌey chi txꞌawi ebꞌ chemon kꞌap. 18 Eyman jix awtele naj rey Ezequías yu ebꞌ. Jix yaontoj oxwan ẍejabꞌ naj rey yet chi kꞌanabꞌ yetoj ebꞌ naj, jaꞌton ebꞌ tiꞌ: Naj Eliaquim scꞌaal Hilquías, naj chi teynen spalacio naj rey, cꞌal naj tzꞌibꞌlom chi yij Sebná, yetoj naj Joah, scꞌaal Asaf, sat tzꞌibꞌlom yeoc yu naj rey. 19 Jix yalon jun ebꞌ sat yaaw yeoc xol ebꞌ soldado yet Asiria tuꞌ tet jaxca tiꞌ:

—Alwej tet naj Ezequías tzet chi yal naj sreyal Asiria, jun rey tol bꞌinabꞌil sat txꞌotxꞌ txꞌotxꞌ tiꞌ: ¿Tzetyetal eyoc yipoj ja cꞌul? 20 ¿Tumi cha naꞌ tol yu cꞌal kꞌane catuꞌ chi skeꞌ yoc tucan yip ebꞌ soldado jelan yin jowal tuꞌ cha naꞌ? ¿Mac wal eyoc yipoj ja cꞌul, yuxan caw cha woche cha wakꞌ jowal wetoj an? 21 Jix wilaꞌ tol jaꞌ Egipto che yaoc yipoj je cꞌul. Watxꞌ toni, yutol jaꞌ Egipto tuꞌ laan jaxca junoj teꞌ aa tol poꞌonajxatoj. Jaꞌ yet chi cu oc mitxꞌan yin teꞌ chi too spoꞌoilal teꞌ yul cu kꞌabꞌ. Queytuꞌ yeoc naj sreyal Egipto tet mactxequel tol chi yaoc yipoj scꞌul. 22 Ta che yal ey jin jaxca tiꞌ: Jaon tiꞌ jon jaꞌ Jehová cu Diosal jon, jaꞌ chi kaoc yipoj cu cꞌul, ta je chi. Ilaꞌ tol xax qꞌueyle el wan yet txabꞌal bꞌey che yakꞌ eyilal tet je diosal bꞌey sjolomlaj wonan yu naj Ezequías, yetoj cꞌal wan yet xaambꞌal xax qꞌueyle eloj. Catuꞌ jix yaloni tol jaꞌ bꞌey jun yet xaambꞌal ey bꞌey Jerusalén, jatuꞌ chi oc masanil ebꞌ ánima ey bꞌey Judá cꞌal bꞌey Jerusalén yin eyilal. 23 Jaxa tinaniꞌ xin, watxꞌ tol che wa alne yetoj naj jin yaawil tuꞌ an, jaꞌton naj sreyal Asiria. Chi yal naj ey jaach jaxca tiꞌ: Chi wakꞌ caabꞌoj mil noꞌ che yet jowal, catuꞌ cha seyon ebꞌ soldado chi oc yibꞌan noꞌ. 24 ¿Tumi oj tzaji je yakꞌon jowal yetoj ebꞌ soldado eyoc yalan yopiso junoj yaaw tol yeynajil yopiso cu xol jaon Asiria jon tiꞌ? ¿Tumi che naꞌ tol oj akꞌle soldado cꞌal noꞌ che yu ebꞌ a Egipto ey jex? 25 Yetoj cꞌal pax junxa, ¿chim la je naꞌ tol man eyoj oc Jehová wetoj, catuꞌ chin jul wakꞌon jowal yet chex wakꞌ qꞌueyle eloj? Jaꞌ Jehová jix aloni tol oj wakꞌ jowal je yetoj, catuꞌ oj jex jin qꞌueyon can eloj, ẍi.

26 Catuꞌ jix takꞌwi naj Eliaquim cꞌal naj Sebná yetoj cꞌal naj Joah tet jun yakꞌomal servil naj rey tuꞌ:

—Chi wal ey jaach, tol oj wal yin stiꞌ ebꞌ Arameo chi yun ja walon ey jon, yutol chi naꞌcha el stiꞌ ebꞌ ku jon, ta yin Hebreo chach kꞌanabꞌi, oj yabꞌ masanil ebꞌ ánima eyatoj yibꞌan smuroal conobꞌ tiꞌ, ẍi ebꞌ.

27 Catuꞌ jix yalon jun yakꞌomal servil naj a Sirio tuꞌ jaxca tiꞌ:

—Man asanne oj ey jaach yetoj je reyal bꞌey jix jin chejletej yu naj waawil yet chi jul walon wan kꞌane tiꞌ, yutol jaꞌ tet masanil ebꞌ ánima eyatoj yibꞌan smuroal conobꞌ tuꞌ chi walaꞌ, yutol oj yabꞌ syaꞌil jun miman wail ebꞌ je yetoj, tol oj je loꞌ je tzaꞌ cꞌal je yuqꞌuen je txul ta chi oc jowal.

28 Yuxan jix a waan jun yakꞌomal servil naj rey tuꞌ, caw wal ip jix yun yalon yin Hebreo jaxca tiꞌ:

—Abꞌwej je masanil, wan tzet chi yal naj rey tol bꞌinabꞌil, naj tol miman yeloc apnoj, jaꞌton naj sreyal Asiria: 29 Manche je yakꞌ je bꞌa yetne naj Ezequías tuꞌ; tumi oj skeꞌ jex scolon el naj yul jin kꞌabꞌ, ẍi naj. 30 Jaꞌ naj Ezequías chi yoche naj tol che yaoc je naꞌbꞌal yin Jehová. Chi yalon naj ey jex jaxca tiꞌ: Caw yel chi cu col-le yu Jehová cu Diosal. Jaꞌ yu Naj yuxan cꞌam chi eyqꞌuey cu conobꞌ yul skꞌabꞌ naj sreyal Asiria, ta ẍi, 31 manche je cha je yabꞌ tzet chi yal naj. Jaꞌ naj sreyal Asiria chi chejon jul kal ey jex asan tol che yaoc je bꞌa yul skꞌabꞌ yin watxꞌcꞌulal, yet watxꞌ oj je loꞌ tzettaj yetal awbꞌil je yu, jaxca je yuva cꞌal teꞌ higo cꞌal je yuqꞌuen jaꞌ je yucꞌbꞌal jaꞌ jotbꞌil je yu. 32 Chi lawi tuꞌ xin, catuꞌ oj jex yiꞌontoj bꞌey yul jun conobꞌ laan jaxca je yet, bꞌey ey uva, ey ixim tiriw, catuꞌ oj je waꞌnen je pan cꞌal je vino, jaꞌton jun txꞌotxꞌ bꞌey ey aceite, bꞌey ey teꞌ olivo cꞌal noꞌ yal awcabꞌ, catuꞌ watxꞌ oj yun yecꞌ je yu, man oj jex cam yu wail. Yuxan cꞌam ojabꞌ che yaoc yin je cꞌul tzet chi yal Ezequías tuꞌ, tucꞌal chex yetne naj yin tzet chi yal tuꞌ: Jaꞌ Jehová chi cu coloni, ẍi naj. 33 Tumi wal jix colcha el wanxa nacionlaj yul skꞌabꞌ naj sreyal Asiria yu sdiosal ebꞌ tuꞌ. 34 ¿Bꞌeytuꞌ jix skeꞌ scolwa oc sdiosal conobꞌ Amat cꞌal conobꞌ Arpad? ¿Bꞌeytuꞌ jix skeꞌ scolwa sdiosal conobꞌ Sefarvaim cꞌal Hená cꞌal ebꞌ a Ivá? ¿Tumi wal jix colcha Samaria yul cu kꞌabꞌ jaon Sirio jon tiꞌ? 35 ¿Bꞌey wal eyoc junoj wan sdiosal wan conobꞌ tuꞌ jix skeꞌ scolon can el wan conobꞌ yul skꞌabꞌ naj sreyal Asiria? ¿Tzet yuxan che naꞌ tol jaꞌ Jehová oj skeꞌ scolon el Jerusalén? ẍi jun yakꞌomal servil naj rey tuꞌ.

36 Tzꞌin ẍi xacꞌal masanil ebꞌ ánima. Cꞌamxa mactxequel jix takꞌwi niꞌoj, yutol jaꞌ naj rey Ezequías jix aloni tol cꞌam mactxequel chi takꞌwi tet ebꞌ. 37 Queytuꞌ jix yun stoo naj Eliaquim scꞌaal Hilquías, naj eyoc yilomal palacio naj rey tuꞌ, cꞌal naj tzꞌibꞌlom chi yij Sebná, cꞌal naj sat stzꞌibꞌlom chi yij Joah, jix yalon ebꞌ tet naj tzet jix al-le tuꞌ. Jix stzilontoj spichil ebꞌ yutol caw wal jix tac scꞌul ebꞌ yu tzet jix yal naj yakꞌomal servil naj sreyal Asiria tuꞌ.