Jix Colcha Can El Judá Yul Skꞌabꞌ Naj Senaquerib
19
Jaꞌ yet jix yabꞌen oc naj rey Ezequías tzet jix al-le tuꞌ, jix stzilontoj spichil naj. Jix yaon oc an eel pichile yet cuscꞌulal, catuꞌ jix too naj txaloj bꞌey yul stemplo Jehová. 2 Catuꞌ jix chejletoj jun steynemal palacio chi yij Eliaquim yetoj naj Sebná, naj chi tzꞌibꞌen junoj kꞌane, yetoj cꞌal ebꞌ syaawil ebꞌ yakꞌomal xaambꞌal yu naj rey Ezequías. Jix yaon oc an eel pichile ebꞌ yet chi xꞌoxon el scuscꞌulal ebꞌ, jix too ebꞌ yilon jun ẍejabꞌ Dios chi yij Isaías scꞌaal Amós. 3 Jix bꞌet yalon ebꞌ tzet jix yalon naj tuꞌ: Jaꞌ tinaniꞌ ey jon oc yin syaꞌilal, yin cuscꞌulal cꞌal yin qꞌuixwilal. Jaxca junoj ix ix lalan swaꞌxi scꞌul yu unin, catuꞌ chi cancan yin tol cꞌamxa yip, queywal tuꞌ keoc tinaniꞌ jon. 4 Tol oj wal jix yabꞌ Jehová cu Diosal tzet jix yal jun yakꞌomal servil naj sreyal Asiria yet jix bꞌuchwa naj yin Naj cu Diosal tol iquis, catuꞌ chi ale oc syaꞌilal yibꞌan yu Naj, yu tzet jix yal tuꞌ. Txalan wal ku cu kꞌanaꞌ yu mac jon txequel tol iquis jon to ecꞌ tiꞌ, ẍi naj Ezequías, ẍi ebꞌ naj chejabꞌwom tuꞌ.5 Jaꞌ yet jix yabꞌen naj Isaías tzet jix yal ebꞌ yakꞌomal servil naj rey Ezequías tuꞌ. 6 Jix lawi tuꞌ, catuꞌ jix yalon naj Isaías tuꞌ tet ebꞌ chejabꞌwom tuꞌ jaxca tiꞌ: Jaꞌ Jehová chi alon jaxca tiꞌ: Manche jex xiw yu tzet jix yal jun yakꞌomal servil naj sreyal Asiria tuꞌ, caw pena tzet jix yal naj win an, jix yal naj tol cꞌam chi skeꞌ jin colwa yaloni. 7 Yu tuꞌ xin, jain chi walaꞌ tol oj waoc junoj xiwcꞌulal yin naj, yuxan jaꞌ yet oj yabꞌen junoj kꞌane tol oj meltzotoj naj bꞌey sconobꞌ, catuꞌ oj wakꞌon yunne tol oj tzokꞌle cam naj tituꞌ, ẍi Jehová, ẍi toj naj Isaías tuꞌ.
8 Jix yabꞌen oc naj syaawil ebꞌ soldado naj sreyal Asiria tol cꞌamxa naj rey eyecꞌ bꞌey conobꞌ Laquis. Yuxan jix meltzotej, jix ẍaꞌlen sbꞌa yetoj naj rey tuꞌ bꞌey conobꞌ Libná, tol lalan yakꞌon jowal naj tituꞌ. 9 Jaꞌ tituꞌ, jix yabꞌen oc naj sreyal Asiria tol jaꞌ naj rey Tirhaca lalan stit naj yetoj soldado bꞌey Etiopía yu jul yakꞌon jowal yetoj. Yu tuꞌ xin, jix yaontoj wan yakꞌomal servil naj sreyal Asiria scꞌatan naj rey Ezequías junelxa. 10 Jix yalontoj jaxca tiꞌ: Jaꞌ ja Diosal chi alon ey jaach tol man oj eyqꞌuey Jerusalén tuꞌ yul jin kꞌabꞌ, yuxan manche ja waoc yin ja cꞌul tzet chi yal ja Diosal tuꞌ. 11 Tejan jix ja wabꞌe tzet jix yun ketnentoj jaon sreyal Asiria jon tiꞌ wanxa conobꞌ, catuꞌ oj to wal jaach colcha el jaach tiꞌ ja waloni. 12 ¿Toj wal jix colcha el ebꞌ ánima yu sdiosal yul skꞌabꞌ ebꞌ wichmam an, ebꞌ a Gozán, cꞌal ebꞌ a Harán, Résef cꞌal ebꞌ ánima ey bꞌey Bet-edén cꞌal ebꞌ ey bꞌey yul yet Telasar? 13 ¿Bꞌeytuꞌ ey ebꞌ sreyal conobꞌlaj Hamat cha wilaꞌ, cꞌal Arpad, Sefarvaim, Hená cꞌal conobꞌ Ivá tinaniꞌ? ẍi toj naj sreyal Asiria tuꞌ.
14 Jix ẍaꞌ naj rey Ezequías jun an carta jix yatoj naj sreyal Asiria tuꞌ, jix yilon naj tzet chi yal an. Jix lawi tuꞌ, jix too naj bꞌey templo catuꞌ jix sjajon an carta naj sattaj Jehová. 15 Catuꞌ jix txali naj tet Dios jaxca tiꞌ: Jaach Jehová, jaach cu Diosal jaon Israel jon tiꞌ, ey jaach ecꞌ snan xol ebꞌ querubín, asanne jaach Dios jaach yibꞌan masanil nacionlaj bꞌey yul yibꞌankꞌinal tiꞌ, jaach jix ja waꞌne satcan cꞌal txꞌotxꞌ txꞌotxꞌ tiꞌ. 16 Jaach jin Diosal, ocan tꞌanan win, catuꞌ cha wabꞌen tzet chi walaꞌ; ocan wal tꞌanan win, catuꞌ cha wilon tzet jix yaltej naj Senaquerib ja win; caw yaꞌ yoc tzet jix yaltej naj ja win jaach Dios Iquis. 17 Caw yel, ecꞌalxa ebꞌ conobꞌ eyqꞌueynajxa yu ebꞌ sreyal Asiria tuꞌ. 18 Jix ton akꞌle tzꞌaꞌ sdiosal ebꞌ ánima yu ebꞌ. Yel toni, jaꞌ wan tuꞌ man ton dios oj ebꞌ, teꞌ ebꞌ, ma chꞌen tol waꞌnebꞌil yu ebꞌ ánima, yuxan jix skeꞌ yetnentoj ebꞌ. 19 Jaꞌ tinaniꞌ xin, jaach Jehová jin Diosal, colon el yul skꞌabꞌ jun rey tuꞌ, yet chi yotajne el masanil nacionlaj tol asanne jaach Dios jaach, ẍi naj rey Ezequías yet jix txali naj.
20 Jix lawi tuꞌ, catuꞌ jix yalontoj naj Isaías scꞌaal Amós tet naj rey Ezequías jaxca tiꞌ: Jaꞌ Jehová cu Diosal jaon Israel jon tiꞌ, jaꞌ jix alon jaxca tiꞌ: Jix wabꞌ ja txa yu tzet jix ja wal yin naj Senaquerib, sreyal Asiria, ẍi Dios, ẍi naj Isaías.
21 Yu tuꞌ xin, jix yalon Jehová yin naj sreyal Asiria jaxca tiꞌ:
Jaꞌ ebꞌ ix kꞌopo ix a conobꞌ Sión, cꞌam ja weloc apnoj yul sat ebꞌ ix, tucꞌal oj tzee ebꞌ ix ja win jaach Senaquerib. Jaꞌ ebꞌ a Jerusalén caw oj syum sjolom ebꞌ catuꞌ oj bꞌuchwatoj ebꞌ ja wintaj yet oj jaach el scꞌatan ebꞌ.
22 ¿Mactxequel jun jix ja bꞌuch tuꞌ cꞌal ja xibꞌteni? ¿Mactxequel bꞌey miman xacꞌal jix ja wute yul ja nukꞌ cꞌal ja wintajnen can eloj? Jain tiꞌ asanxane jin ocoj, tol sDiosal jin conobꞌ Israel.
23 Jaꞌ ebꞌ ja wakꞌomal servil jix jin bꞌuchoni. Jix ja walon pax jaxca tiꞌ: Caw jix jin atoj bꞌey txꞌotxꞌ tzalquiltaj txꞌotxꞌ yetoj ecꞌal jin carruaje yet jowal, bꞌey txꞌotxꞌ tzalquiltaj txꞌotxꞌ naat eya bꞌey yul yet Líbano. Jix jin tzokꞌon a teꞌ kꞌuteꞌ tol naat yea steel, cꞌal teꞌ qꞌuisis tol watxꞌ yili. Jix jin a tacꞌal apnoj bꞌey txꞌotxꞌ tzalquiltaj txꞌotxꞌ naat eyaoj, bꞌey caw pim xacꞌal teꞌ kꞌajteꞌlaj.
24 Jaꞌ bꞌey txꞌoj conobꞌal jix jin jot jaꞌ ucꞌbꞌal jaꞌ yetoj ebꞌ jin soldado, jix wuqꞌuen jaꞌ yetoj ebꞌ. Jix cu tecꞌcantoj jaꞌ jaꞌ bꞌey yul yet Egipto, jix tancan a jaꞌ ku, ja chi.
25 ¿Tumi man ja wotaj oj tol jain Dios jin? Wu yuxan chi yun masanil wan tuꞌ. Albꞌilcan wu yet peyxa yuxan chi yun jaxca tuꞌ. Jaꞌ tinaniꞌ xin, lalan ton yunen el tzet albꞌilcan wu. Yuxan chi skeꞌ ja qꞌueyon el ebꞌ conobꞌ caw ey yip, catuꞌ chi ey can bꞌulna smuroal ebꞌ ja wu, cha sajlemnen cantoj mimej conobꞌ.
26 Cꞌamxa yip ebꞌ ánima bꞌey yul sconobꞌ, chi xiw ebꞌ, chi qꞌuixwi ebꞌ. Jaxca xacꞌal eltzabꞌ txꞌotxꞌ, ma jaxca xacꞌal an cꞌultaj satlaj acꞌal bꞌey chi low noꞌ che, jaxca xacꞌal an cꞌultaj chi chꞌibꞌa yibꞌanlaj na catuꞌ chi tajtoj an yet cꞌamto chi kꞌinibꞌi, queytuꞌ yeoc ebꞌ ánima.
27 Wotaj tzet utbꞌil yeocoj, wotaj tzetyetal cꞌal cha wunne, catuꞌ wotaj tol caw chi tit ja jowal win an.
28 Tuxa jix wilocoj tol eytej ja jowal win, tuxa cꞌal cha mimanbꞌane ja bꞌa. Yuxan oj waoc jun chꞌen slocxomal yin ja txaam cꞌal yetoj jun chꞌen freno yin ja tiꞌ, catuꞌ jaach wakꞌon meltzo yul ja bꞌe bꞌey jix jaach tita, ẍi Jehová.
29 Jix yalon cꞌal pax naj Isaías tet naj rey Ezequías jaxca tiꞌ:
Jaꞌ jun tiꞌ txꞌoxbꞌanile yeoc yu tzettaj yetal tol to oj juloj: Oj je loꞌ ixim tiriw tucꞌal chi yakꞌ chꞌibꞌ sbꞌa yet jun abꞌil tiꞌ, yetoj junxa abꞌil chi eyoloj, tol man jaex oj, oj je yawaꞌ. Jaxa yet yox abꞌil xin, jaex xa oj je yaw je tiriw, catuꞌ oj je yambꞌan aoj, oj je yawon je yuva, catuꞌ che loꞌon sat.
30 Jaꞌ ebꞌ ánima caan to can ecꞌ bꞌey Judá, laan oj yun can ebꞌ jaxca teꞌ teꞌ tol watxꞌ chi yun stoo xeꞌ yul txꞌotxꞌ, catuꞌ chi yakꞌon sat.
31 Jaxa jaywanojxa ánima oj scol can el sbꞌa bꞌey Jerusalén, jaꞌton bꞌey tzalan Sión. Jaꞌ jun tiꞌ oj yun Jehová, Naj Yaaw yin Masanil yu scamcꞌulal je yin.
32 Chi yalon pax Jehová yin naj sreyal Asiria jaxca tiꞌ: Man oj octoj naj yul conobꞌ Jerusalén, cꞌam cꞌal junoj julbꞌal oj ale oc yin, man oj yakꞌ jowal yin jun conobꞌ tiꞌ, man cꞌal oj swaꞌne a swalubꞌ naj bꞌey yinlaj smuroal conobꞌ tiꞌ.
33 Jaꞌ jun bꞌe bꞌey jix tita, jacꞌal tiꞌ oj meltzotoj. Caw man oj skeꞌ yoctoj naj bꞌey yul conobꞌ tiꞌ.
34 Jain Jehová jin chi walaꞌ tol oj jin colel jun conobꞌ tiꞌ, yu jin camcꞌulal cꞌal yu tzet walnaj can tet naj jin chejabꞌ David, ẍi Jehová, ẍi naj Isaías.
35 Jaꞌ yet jun akꞌbꞌal tuꞌ, catuꞌ jix bꞌetecꞌ jun yángel Jehová smakꞌon cam jun 185,000 ebꞌ soldado a Sirio bꞌey bꞌulan ey ebꞌ tuꞌ; camnajxa ebꞌ catuꞌ jix sajbꞌi el yet junxa cꞌual. 36 Queytuꞌ jix yun yiꞌon el skꞌap na naj Senaquerib tituꞌ, catuꞌ jix toocan naj bꞌey conobꞌ Nínive. 37 Jaꞌ yet jun cꞌual jix oc naj yin eyilal bꞌey yul stemplo sdiosal chi yij Nisroc, jaꞌ tituꞌ jix makꞌle cam naj yu ebꞌ scꞌaal, jaꞌton Adramélec cꞌal Sarézer. Jix lawi tuꞌ, jix toocan ebꞌ scꞌaal naj tuꞌ bꞌey yul yet Ararat, jaxa jun scꞌaal chi yij Esarhadón jix oc can sqꞌuexeloj yin reyal.