2 Jaꞌ yet jix yilon naj Ezequías tol tꞌinan xacꞌal chi yun sjul naj Senaquerib yakꞌon jowal yin conobꞌ Jerusalén tuꞌ, 3 catuꞌ jix swa al-lne yetoj ebꞌ yet yaawil cꞌal yetoj ebꞌ syaawil soldado, tol chi smujcan el jaꞌ snukꞌ jaꞌ ebꞌ bꞌey yinlaj conobꞌ tuꞌ. Jix ẍaꞌ scꞌul ebꞌ tzet jix swa al-lne tuꞌ. 4 Caw ecꞌal ebꞌ ánima jix syambꞌa oc sbꞌa yet jun cꞌual tuꞌ, jix smujon can el jaꞌ snukꞌ jaꞌ ebꞌ, yetoj cꞌal jaꞌ jaꞌ chi el sne scawilal conobꞌ tuꞌ, yet watxꞌ jaꞌ yet chi apni oc ebꞌ Sirio tuꞌ, cꞌamxa jaꞌ jaꞌ chi ilcha yu ebꞌ.

5 Jix yakꞌon wal yip naj rey Ezequías swaꞌnen a smuroal conobꞌ bꞌey uchbꞌil eyoj. Jix swaꞌne cꞌal pax a wan bꞌey chi steyne ebꞌ soldado bꞌey yibꞌanlaj muro cꞌal junxa yaliẍ smuroal bꞌey yinlaj tuꞌ. Jix yaoc yip smuroal bꞌey mujbꞌil el jun jobꞌe bꞌey sconobꞌ David. Caw miman chꞌen lanza cꞌal chꞌen majbꞌal sat julbꞌal jix swaꞌne naj. 6 Jix yaon oc yopiso wanxa ebꞌ winaj yet chi oc ebꞌ yin yaawil yin junjun conobꞌ, jix syambꞌa oc sbꞌa ebꞌ bꞌey stiꞌ spuertail conobꞌ, yet chi iptzele ebꞌ yu naj. Jix yalon naj tet ebꞌ jaxca tiꞌ: 7 Caw tecꞌan che yute je bꞌa, manche jex xiwi, tam wal che yakꞌ caabꞌcꞌulal je too sattaj naj sreyal Asiria tuꞌ, cꞌal tet jun miman bꞌulan ebꞌ soldado jaꞌjun yetoj naj tuꞌ, yutol ecꞌbꞌan kipal yintaj ebꞌ naj tuꞌ. 8 Jaꞌ ebꞌ soldado naj eyoc yipoj scꞌul; jal jon pax jaon tiꞌ, jaꞌ Jehová cu Diosal eyoc yipoj cu cꞌul, jaꞌ oj colwa ketoj yin jowal tiꞌ, ẍi naj tet ebꞌ. Jaꞌ yet jix yabꞌen ebꞌ ánima tzet jix yal naj rey Ezequías tuꞌ, caw jix yiꞌ yip snaꞌbꞌal ebꞌ.

9 Jaꞌ yet lalan yakꞌon jowal naj Senaquerib sreyal Asiria yin conobꞌ Laquis yetoj masanil ebꞌ soldado, jix ẍejontoj wan ebꞌ yakꞌomal servil bꞌey conobꞌ Jerusalén, yet chi too yalon ebꞌ tet naj Ezequías sreyal Judá, cꞌal tet masanil ebꞌ a Judá caan tituꞌ, jix yalon ebꞌ jaxca tiꞌ:

10 Jaꞌ naj Senaquerib, sreyal Asiria chi yaltej naj jaxca tiꞌ: ¿Tzet yuxan cꞌam tzet che naꞌ, yu mi tol watxꞌ xacꞌal je yeocoj, yuxan caan jex can ecꞌ bꞌey Jerusalén tuꞌ; ilaꞌ tol joybꞌil jex xa ey yu ebꞌ jin soldado? 11 Ta tol chi yal naj Ezequías ey jex, tol jaꞌ Jehová je Diosal, oj jex colon el yul jin kꞌabꞌ, ta ẍi naj ey jex, tucꞌal chex yetne naj; tol oj jex cam yu wail, cꞌal yu tajin tiꞌal. 12 ¿Tumi man jaꞌ oj naj Ezequías tuꞌ jix uchon ey wan yet eyilal waꞌnebꞌil a bꞌey wan wonanlaj, cꞌal jun yet xaambꞌal yet Dios tuꞌ? catuꞌ jix yalon naj tet masanil ebꞌ ánima bꞌey Judá, cꞌal bꞌey Jerusalén tol asan jun yet xaambꞌal bꞌey chi yakꞌ tzꞌaꞌ incienso ebꞌ. 13 ¿Tumi man je yotaj oj tzetyetal jix wun yetoj ebꞌ jin mam icham bꞌey wanxa conobꞌlaj? Tumi jix skeꞌ yu sdiosal wan conobꞌlaj tuꞌ scolon el ebꞌ yul jin kꞌabꞌ. 14 ¿Tumi ey junoj sdiosal wan nacionlaj jix qꞌueyle el yu ebꞌ jin mam icham tuꞌ, jix to skeꞌ scolon el sconobꞌ yul skꞌabꞌ ebꞌ, yuxan tzet yuxan che naꞌ tol jaꞌ je Diosal, oj jex colon eloj? 15 Yu tuꞌ xin, manche je yakꞌ je bꞌa etnele yu naj Ezequías tuꞌ. Manche je yaoc yin je cꞌul tzet chi yal naj, yutol cꞌam junoj sdiosal wan conobꞌ tuꞌ jix skeꞌ scolon el sconobꞌ tuꞌ yul jin kꞌabꞌ, tam wal yul skꞌabꞌ ebꞌ jin mam icham, jajxa tam wal jun je diosal tuꞌ, ¿tumi oj skeꞌ yu jex scolon el yul jin kꞌabꞌ? ẍi naj rey Senaquerib, ẍi ebꞌ naj chejabꞌwom tuꞌ.

16 Jaꞌton wan kꞌane tiꞌ, yetoj cꞌal wanxa jix yal ebꞌ yakꞌomal servil naj sreyal Asiria yin Jehová, cꞌal yin jun ẍejabꞌ, jaꞌton naj Ezequías. 17 Eyto cꞌal wanxa an juun jix stzꞌibꞌetej naj Senaquerib yu yalon bꞌuchwal kꞌane yin Jehová, sDiosal Israel. Jaꞌ yin an juun tuꞌ jix yal jaxca tiꞌ: Jaxca sdiosal wanxa nacionlaj, tumi jix skeꞌ yu scolon el sbꞌa ebꞌ yul jin kꞌabꞌ, quey cꞌal pax tuꞌ sDiosal naj Ezequías tuꞌ ¿tumi oj skeꞌ scolon el sconobꞌ tuꞌ yul jin kꞌabꞌ? ẍi toj naj yin an juun tuꞌ.

18 Jaꞌ ebꞌ yakꞌomal servil naj Senaquerib tuꞌ, caw ip jix yun yawitoj ebꞌ xol ebꞌ ánima bꞌey Jerusalén, jaꞌton ebꞌ linan atoj yibꞌan smuroal conobꞌ tuꞌ. Jaꞌ yin stiꞌ ebꞌ Hebreo jix yal wan kꞌane ebꞌ tuꞌ, yet chi xibꞌtele ebꞌ ánima yu ebꞌ, yet watxꞌ oj eyqꞌuey conobꞌ Jerusalén tuꞌ yu ebꞌ yaloni. 19 Jaꞌ snaꞌon ebꞌ tol laan sDiosal conobꞌ Jerusalén jaxca sdiosal wanxa nacionlaj tol ánima jix waꞌnen yetoj skꞌabꞌ.

20 Jaꞌ yu wan kꞌane tuꞌ jix al-le tuꞌ, yuxan jix txali naj rey Ezequías yetoj naj Isaías, ẍejabꞌ Dios, scꞌaal Amós, jix skꞌanon scolwal Jehová ebꞌ. 21 Yu jun tuꞌ xin, jaꞌ Jehová jix ẍejtej jun yángel yet jix jul akꞌle lawoj el masanil ebꞌ soldado caw jelan yin jowal, ebꞌ capitán, cꞌal ebꞌ yaaw yeoc bꞌey bꞌulan ey naj sreyal Asiria yetoj ebꞌ sconobꞌ. Yin xacꞌal qꞌuixwilal jix yun smeltzo cantoj jun rey tuꞌ bꞌey sconobꞌ. Jaxa yet jix octoj bꞌey yul stemplo sdiosal, jaꞌ tituꞌ jix makꞌle cam yu ebꞌ scꞌaal.

22 Queytuꞌ jix yun scolwa Jehová yetoj naj Ezequías, yetoj cꞌal masanil ebꞌ ánima caan bꞌey Jerusalén, jix col-le el ebꞌ yul skꞌabꞌ naj Senaquerib sreyal Asiria, cꞌal yul skꞌabꞌ wanxa nacionlaj; tzalacꞌulal xacꞌal jix yun yeecꞌ yetoj wan conobꞌlaj caan bꞌey scawilal tuꞌ. 23 Yu jun tuꞌ xin, ecꞌal mactxequel jix yiꞌtej yofrenda bꞌey Jerusalén yu yakꞌon ebꞌ tet Jehová, catuꞌ jix yakꞌon saꞌbꞌeal ebꞌ caw ey stool tet naj Ezequías, sreyal Judá. Jaꞌ yet tuꞌ, caw jix bꞌinale naj sattaj wanxa nación.

24 Jaꞌ yet jun tiempoal tuꞌ jix yaꞌbꞌi ey naj rey Ezequías, ian jix cam naj; yuxan jix txali naj tet Jehová. Jix txꞌoxle jun yechel tet naj tol qꞌueyubꞌtaj yili, tol oj waꞌxoj scꞌul junelxa. 25 Caxcꞌal ecꞌal swatxꞌil tzet jix yakꞌ Dios tet naj Ezequías tuꞌ, ma pax yal yu diosalil tet Jehová, jaꞌ jun jix yunne tol jix smeyne sbꞌa. Yu jun tuꞌ, yuxan jix tit sjowal scꞌul Jehová yin, yetoj yin Judá cꞌal yin conobꞌ Jerusalén.

26 Yu jun tuꞌ, yuxan jix yiꞌey sbꞌa Ezequías tet Dios yetoj cꞌal ebꞌ caan bꞌey Jerusalén. Yu jun tuꞌ, yuxan ma tocꞌal yatej sjowal scꞌul Jehová yibꞌan ebꞌ yajbꞌan iquisto cꞌal ecꞌ naj Ezequías.

27 Jaꞌ naj Ezequías caw bꞌeom naj sicꞌlebꞌil, caw bꞌinabꞌil naj. Caw miman chꞌen plata cꞌal chꞌen oro jix syambꞌa ocoj, yetoj cꞌal chꞌen chꞌen caw ey stool, yetoj perfume, yetoj majbꞌal sat julbꞌal, yetoj masanil tzetyetal tol ey stool. 28 Jix swaꞌne a snail bꞌey chi cꞌubꞌale oc ixim tiriw, yetoj yal uva cꞌal yetoj aceite olivo. Jix swaꞌne cꞌal pax a scolalil yet noꞌ wacax, noꞌ meꞌ, cꞌal noꞌ chiw. 29 Jix yakꞌon cꞌal pax waꞌnele a wan yaldeail, yutol ecꞌal swacax, ecꞌal pax smeꞌ, caw miman sbꞌeomal naj jix akꞌle tet yu Dios.

30 Jaꞌton naj Ezequías tiꞌ jix chejon majchele el jaꞌ snukꞌ jaꞌ bꞌey yibꞌan atoj conobꞌ, jaꞌton bꞌey yet Guihón, jaxa bꞌey yalan txꞌotxꞌ jix caꞌ yecꞌ eltoj jaꞌ, jaꞌton yetcꞌulal bꞌey chi too cꞌu bꞌey conobꞌ David, jatuꞌ jix apni oc jaꞌ. Watxꞌ cꞌal jix yun yeloc Ezequías yin masanil tzet jix yunne.

31 Jaxa ebꞌ yaaw bꞌey Babilonia jix ẍejtej wan yakꞌomal servil ebꞌ, yet jix jul skꞌanle ebꞌ tzet yeoc jun txꞌoxbꞌanile tol qꞌueyubꞌtaj xacꞌal jix yun bꞌey Judá. Jix bꞌejlecan naj Ezequías yu Dios, yu yakꞌle porobꞌal cꞌal yilon Jehová tzet utbꞌil cꞌal yeoc snaꞌbꞌal naj.

32 Jaꞌ jantaj to skꞌaneal naj Ezequías yu tzettaj yetal jix yunne, cꞌal sjijemal tet Dios, jatuꞌ tzꞌibꞌebꞌilcan yul an juun bꞌey tzꞌibꞌebꞌil jantaj tzet jix yil naj Isaías, scꞌaal Amós, cꞌal yul an yuunal skꞌaneal ebꞌ sreyal Judá cꞌal Israel. 33 Jaꞌ yet jix cam naj Ezequías, jatuꞌ jix mujle naj bꞌey jun tzalan bꞌey ey smujbꞌanil ebꞌ yicꞌaal David. Masanil ebꞌ Judá, cꞌal ebꞌ caan bꞌey Jerusalén jix mujon naj, caw watxꞌ jix yun smujon ebꞌ, jaxa jun scꞌaal chi yij Manasés, jaꞌ jix oc can sqꞌuexeloj yin reyal.