Ey Wan Ebꞌ Chejabꞌwom Jix Tit Bꞌey Babilonia
39
Jaꞌ yet jun tiempoal tuꞌ, jaꞌ naj Merodac-baladán, scꞌaal Baladán, eyoc naj yin reyal bꞌey Babilonia, jix yabꞌ naj yal-lei tol abꞌ jix yaꞌbꞌi ey naj Ezequías; catuꞌ tol abꞌ jix waꞌxi pax scꞌul naj, yuxan jix yatej wan yakꞌomal servil yet chi jul yakꞌon junoj carta yetoj saꞌbꞌeal ebꞌ tet naj. 2 Caw chabꞌil sjul ebꞌ chejabꞌwom tuꞌ yu naj Ezequías. Jix lawi tuꞌ, jix xꞌoxon masanil sbꞌeomal ey yul skꞌabꞌ naj tet ebꞌ, jaxca chꞌen plata, chꞌen oro, perfume, cꞌal aceite caw wal watxꞌ, yetoj cꞌal bꞌey yaman oc masanil mitxꞌkꞌabꞌe yet jowal, yetoj cꞌal masanil tzetyetal ey bꞌey scꞌuanbꞌal. Pilan cꞌal jix xꞌox masanil tet ebꞌ. 3 Jix lawi tuꞌ, jix too Isaías, naj ẍejabꞌ Dios yilon naj rey Ezequías, jix skꞌanlen tet jaxca tiꞌ:—¿Bꞌeytuꞌ jix titoc wan winaj tuꞌ? ¿Tzet jix jul yal ebꞌ ey jaach? ẍi tet.
Jix takꞌwi naj Ezequías, jix yalon jaxca tiꞌ:
—Jix tit ebꞌ bꞌey jun conobꞌ caw wal naat, jaꞌton bꞌey Babilonia, ẍi tet.
4 Jix takꞌwi naj Isaías tet jaxca tiꞌ:
—¿Tzetyetal jix yil ebꞌ bꞌey yul ja despacho tiꞌ? ẍi.
Jix yalon Ezequías:
—Jix jin txꞌox yil ebꞌ jantaj tzetyetal ey yul jin despacho tiꞌ, yetoj jantaj tzet yaman ecꞌ wu an. Pilan cꞌal jix jin txꞌox tet ebꞌ.
5 Jix yalon naj Isaías tet naj rey Ezequías jaxca tiꞌ:
—Abꞌ tzetyetal chi yal skꞌane Jehová: 6 Oj apnoj scꞌual, tol jaꞌ masanil tzetyetal yaman ecꞌ bꞌey ja despacho tiꞌ, yetoj cꞌal masanil tzetyetal jix syambꞌa can oc ebꞌ ja mam icham, masantaꞌcꞌal yet jun cꞌu tiꞌ, oj iꞌletoj bꞌey Babilonia, catuꞌ cꞌamxa tzet oj canoj. 7 Jacꞌalaꞌ tol oj iꞌle pax toj ebꞌ ja wicꞌaal, oj iꞌle eltej sbꞌakꞌ swinajil ebꞌ. Catuꞌ oj iꞌletoj ebꞌ yin yakꞌomaloj servil bꞌey Babilonia, ẍi Dios ey jin, ẍi naj Isaías.
8 Jix lawi tuꞌ, jix yalon naj Ezequías tet Isaías jaxca tiꞌ:
—Jaꞌ jun kꞌane jix yal Jehová ey jin tiꞌ, watxꞌ cꞌal wal yeocoj, ẍi. Yutol chi snaꞌ naj tol cꞌam tzet oj eloc yet iquisto naj.