2 Watxꞌ che yute kꞌanabꞌ je bꞌa tet ebꞌ a Jerusalén, che yalon tet ebꞌ tol cꞌamxa junelojxa oj oc ebꞌ yin yakꞌomaloj servil, yutol tuxa jix jin toolane can el spenail ebꞌ cꞌal spitalil ebꞌ, tuxa jix apni ian waon oc syaꞌilal ebꞌ jaxca smooalil, ẍi Jehová, je chi.

3 Ey jun mac chi awi, chi yal jaxca tiꞌ: Waꞌnewej junoj bꞌe sattaj Jehová bꞌey txꞌotxꞌ cusiltaj txꞌotxꞌ, caw jichan che yute je waꞌnen junoj bꞌe tet cu Diosal, bꞌey sat txꞌotxꞌ tajin txꞌotxꞌ.

4 Akꞌwej no masanil jobꞌelaj; akꞌwej pananbꞌoj masanil txꞌotxꞌ wonanlaj, cꞌal txꞌotxꞌ tzalquiltaj. Akꞌwej jichlo sat txꞌotxꞌ pacꞌanlaj, yetoj cꞌal txꞌotxꞌ jobꞌelaj, panan xacꞌal che yute can eloj.

5 Queyton wal tuꞌ, oj yun xꞌoxon yipalil cꞌal stzejejial Jehová. Masanil ebꞌ ánima oj yil ebꞌ yin. Jaꞌcaw Jehová jix aloni, ẍi jun mac chi awi tuꞌ.

6 Ey jun jix wabꞌ yoc jaxca tiꞌ: Ael ja waw yin ipal, jix jin kꞌanlen jaxca tiꞌ: ¿Tzet kꞌaneal oj wal yin jun aw tuꞌ? jin chi. Jix takꞌwi jaxca tiꞌ: Aleloj tol masanil ánima, laan ebꞌ jaxca an ita. Eyman chi etex el swatxꞌil yili ebꞌ jaxca chi yun yetex el an xumac teꞌ ey xol-laj teꞌ.

7 Jaꞌ an cꞌultaj yin jun txolan chi tajcan el an, jaxa xumac an teꞌ chi pujeloj yet chi ecꞌ el skaꞌeꞌal Jehová xol an. Yel toni, jaxca ton tuꞌ yeoc ebꞌ ánima.

8 Jaꞌ an cꞌultaj, chi tajcan el an, catuꞌ chi pujel xumac an; jal pax skꞌane cu Diosal xin, ey cꞌal ecꞌoj, ẍi ey jin.

9 Jex a Sión, aanwejtoj sjolom junoj miman wonan. Caw ip chi yun yel je yaw, yet che yalon watxꞌ kꞌane. Jex a Jerusalén, cꞌam ojabꞌ chex xiwi. Alwej tet ebꞌ conobꞌlaj ey yul yet Judá: Ilaꞌ tol lalan sjul Naj cu Diosal, je chi.

10 Lalan sjul Jehová cu Diosal yetoj masanil yipal. Yu ton yipalil tuꞌ, yuxan chi yiꞌey sbꞌa masanil ánima tet, iꞌbꞌil oc spajtzebꞌal smulnail junjun ebꞌ yu.

11 Jaxca junoj ilom meꞌ chi yun sjuli, chi ẍelon a noꞌ yuneꞌ meꞌ, catuꞌ chi steyne noꞌ txutxe tol to jix ali yuneꞌ.

13 ¿Mac junoj xax otajnen el snaꞌbꞌal Jehová, ma tol ey mac xax akꞌon snaꞌbꞌal?

14 ¿Mac junoj xax akꞌon scꞌul Jehová, ma xin, ey junoj xax akꞌon snaꞌbꞌal? ¿Mactxequel junoj jix cuyon yin naꞌbꞌale cꞌal yin sjelanil?

15 Jaꞌ yul sat Jehová, jaꞌ mimej conobꞌlaj, laan ebꞌ yetoj junoj tꞌuan jaꞌ, ma jaxca niꞌoj pojoj yul junoj echbꞌal. Jaꞌ wan mimej conobꞌ bꞌey snan xol jaꞌ mar, laan ebꞌ jaxca junoj kꞌetxan chꞌen arena.

16 Jaꞌ masanil noꞌ noꞌ ey bꞌey Líbano, cꞌam chi tzaji noꞌ yoc yin xaambꞌalil tet Jehová. Jaꞌ masanil teꞌ steꞌal txꞌotxꞌ Líbano tuꞌ, cꞌam chi tzaji teꞌ yoc siꞌaloj yet xaambꞌal tuꞌ.

17 Masanil wan mimej conobꞌ bꞌey yul yibꞌankꞌinal tiꞌ, cꞌam yeloc apnoj ebꞌ yul sat Naj, cꞌam niꞌoj yopiso ebꞌ yu.

18 ¿Tumi ey junoj mactxequel oj skeꞌ slaanbꞌane sbꞌa yetoj Dios tuꞌ? ¿Tumi ey junoj echele tol laan yetoj?

19 Jaꞌ junoj waꞌnem echele, chi swaꞌne jun echele tuꞌ yul smolteal, jaꞌ junoj waꞌnem chꞌen chi bꞌonon yetoj oro, catuꞌ chi swaꞌnen oc chꞌen plata yelawiloj.

20 Jaꞌ mactxequel cꞌam chi tzaji stumin smanon wan tuꞌ, jaꞌ teꞌ teꞌ caw skꞌaꞌtoj, jaꞌ chi seyaꞌ, catuꞌ chi seyon junoj josom teꞌ tol jelan, yet chi swaꞌne jun yechel comon dios tuꞌ, chi slinbꞌa aoj, chi yaon oc slawuẍal, yet watxꞌ cꞌam chi telcꞌotoj. Jal wan comon dios tuꞌ caw man laan oj ebꞌ yetoj Dios.

21 ¿Tumi man je yotaj oj jaex tiꞌ? ¿Tumi cꞌam mac jix alon je yabꞌ yet tax cꞌal yichbꞌanil? ¿Tumi cꞌam chi naꞌcha el je yu mac jix waꞌnen jun yul yibꞌankꞌinal tiꞌ?

22 Jaꞌton Dios ey sdespacho yibꞌantoj syaxil satcan. Jaꞌ satcan tuꞌ noan ey yibꞌan jun txꞌotxꞌ tiꞌ yu. Catuꞌ chi il-le eytej ebꞌ ánima yu, jaxca noꞌ kochiꞌ noꞌ yili ebꞌ yul sat. Jaꞌ Dios jix jenbꞌantoj satcan tuꞌ jaxca junoj kꞌap, catuꞌ jix swaꞌnen a jaxca junoj kꞌap na chi oc weybꞌaloj.

23 Jaꞌ Dios chi qꞌuexontoj ebꞌ mimej winaj yin tol cꞌam yeloc apnoj, catuꞌ chi qꞌueyle el ebꞌ yaaw sat txꞌotxꞌ tiꞌ yu.

24 Laan ebꞌ yaaw tuꞌ jaxca an cꞌultaj tol to chi awlei, tol cꞌamto xeꞌ chi too yul txꞌotxꞌ; ta chi xutoj skaꞌeꞌ Dios yin, chi tajcan eloj, catuꞌ chi iꞌletoj yu cajxuchum kaꞌeꞌ jaxca chi yun yiꞌletoj smatzꞌical ixim tiriw.

25 Jaꞌ Dios Naj Tol Asanxane Ocoj, jaꞌ chi kꞌanlen jaxca tiꞌ: ¿Mac wal yetoj oj skeꞌ jin laanbꞌanen jin bꞌa tinaniꞌ? ¿Mactxequel laan wetoj? ẍi Dios.

26 Aanwejtej tꞌanan satcan tiꞌ: ¿Mactxequel jix waꞌnen masanil wan weycan tiꞌ? ẍi Dios. Jaꞌ Jehová jix waꞌneni, jaꞌ chi iꞌon eltej, catuꞌ chi sbꞌison masanil weycan, catuꞌ chi yawten sbꞌi junjun ebꞌ. Yutol miman yeoc yipalil Dios, cꞌam junoj chi qꞌueya yul skꞌabꞌ.

27 Jex Israel, yicꞌaal Jacob, ¿tzet wal yu, yuxan chex wejlabꞌi yel je yaw? ¿Tzet yu, yuxan che yal jaxca tiꞌ: Jaꞌ Jehová cꞌam chi cu yiltej niꞌoj? Jaxca tol cꞌamxa kalon ket yul sat, je chi.

28 Tumi man je yotaj oj. ¿Tumi man je yabꞌnaj oj tol jaꞌ Jehová Dios eyecꞌoj? Jaꞌ Naj jix waꞌnen jun yul yibꞌankꞌinal tiꞌ, cꞌam slawubꞌal, cꞌam chi el yip, tam wal chi cꞌuumbꞌi. Cꞌam chi alcha jantaj sjelanil.

29 Jaꞌ Naj chi akꞌon yip mac chi cꞌuumbꞌi, jaꞌ mac chi el yip, chi ale oc yip ebꞌ sicꞌlebꞌil yu.

30 Jaꞌ ebꞌ achꞌe chi cꞌuumbꞌi cꞌal pax a ebꞌ, chi el yip ebꞌ, caxcꞌal mi caw ey yip ebꞌ, chi telcꞌotoj ebꞌ.

31 Jal pax ebꞌ asan Jehová chi yaoc yipoj scꞌul xin, caw chi ale oc yip ebꞌ. Oj skeꞌ sbꞌey ebꞌ jaxca chi yun yecꞌ jenenoj noꞌ chii, oj skeꞌ yakꞌon ani ebꞌ, cꞌam chi el yip ebꞌ, man oj cꞌuumbꞌoj el ebꞌ sbꞌeyi.