2 ¿Mactxequel junoj Naj oj akꞌon txeclo a junoj rey yetcꞌulal bꞌey chi aol cꞌu, jun oj skeꞌ yakꞌon eyqꞌuey jowal? ¿Mactxequel oj skeꞌ scolwa yetoj, yet watxꞌ oj skeꞌ yakꞌon eyqꞌuey mimej conobꞌ yul skꞌabꞌ jun rey tuꞌ, catuꞌ oj yiꞌon ey sbꞌa ebꞌ rey tet? Jaꞌ yetoj yespada, cꞌal yetoj sjulbꞌal jun rey tuꞌ, catuꞌ oj sajlemtoj ebꞌ jaxca chi yun stoo smatzꞌical ixim tiriw yu kaꞌeꞌ.

3 Oj el wanojxa ebꞌ rey sattaj, jal pax jun rey tuꞌ xin,^a yin cꞌal tzalacꞌulal oj yun sbꞌey stoo ebꞌ, yu yakꞌon eyqꞌuey conobꞌlaj. Jaꞌ yet oj bꞌey cꞌal stoo tuꞌ, jaxca tol man oj ey linan sat txꞌotxꞌ.

4 ¿Mactxequel jix akꞌon yun wan tiꞌ? ¿Mactxequel jix naꞌbꞌalnen el masanil tzet oj yun yin tax cꞌal yichbꞌanil? jain Jehová jin chi wakꞌ yun jun tiꞌ. Asan jin Dios jin yet yichbꞌanil, masantaꞌcꞌal slawubꞌal.

5 Oj yil ebꞌ mimej conobꞌ bꞌey sattajto jaꞌ mar, caw oj xiwa ebꞌ yet oj yilon oc ebꞌ. Oj bꞌilwoj a ebꞌ conobꞌ caan bꞌey slawubꞌal yul yibꞌankꞌinal tiꞌ, catuꞌ oj syambꞌan sbꞌa ebꞌ, ẍi Dios.

6 Jaꞌ ebꞌ mulnawom yin waꞌnem tzetyetal, jaꞌ ebꞌ chi ijbꞌan yet mulnawomal yin wan mulnail tuꞌ.

7 Jaꞌ ebꞌ chi waꞌnen yechel comon dios, jaꞌ ebꞌ chi ijbꞌan naj bꞌonom echele yetoj oro, caw watxꞌ chi yute yaon oc chꞌen oro naj yin junoj echele tuꞌ, jaꞌ chi iptzen naj makꞌom oc lawuẍ, catuꞌ chi yaloni, caw watxꞌ jun cu nusbꞌal chꞌen tiꞌ, ẍi. Caw eyman chi yaoc slawuẍal jun echele tuꞌ, yet watxꞌ cꞌam chi eyqꞌueyi.

8 Chi yalon Jehová jaxca tiꞌ: Jaex Israel jex tiꞌ, abꞌwej. Jex sconobꞌ Jacob, jin chejabꞌ jex toni, jaex ton jix jex jin sicꞌ eloj, jaex tiꞌ yicꞌaal jex naj wamigo Abraham.

9 Jain ton jix jex wiꞌtej bꞌey slawubꞌal txꞌotxꞌ txꞌotxꞌ tiꞌ. Jix walon ey jex, tol jin chejabꞌ jex. Jain jix jex jin sicꞌ eloj, catuꞌ cꞌam bꞌey chex wintajne can eloj.

10 Cꞌam cꞌal chex xiwi, ey jin cꞌal ecꞌ je yetoj. Cꞌam ojabꞌ chex oc il, jain ton je Diosal jin. Jain chi wakꞌ je yip, jain chex jin coloꞌ. Jain chex jin teyne, chex jin quetzon bꞌey yetoj wipalil chin kꞌanbꞌalne yin sjichanil.

11 Masanil mactxequel tol cꞌam chex ocheni, oj cancan ebꞌ yin qꞌuixwilal, cꞌal yin yeynajilal. Jaꞌ ebꞌ chi akꞌon jowal je yetoj, oj qꞌueycan el ebꞌ.

12 Oj to je seyecꞌ ebꞌ chi jowi oc je yin, manxa oj ilcha oc ebꞌ je yu, jaꞌ ebꞌ chi yakꞌ jowal je yetoj, oj qꞌueycan el ebꞌ jaxca tol cꞌam cꞌaltaꞌ ebꞌ.

13 Yutol jain tiꞌ, jain ton Jehová je Diosal jin. Jain chex jin quetz bꞌey yetoj jin watxꞌ kꞌabꞌ. Jain ton jix wal ey jex jaxca tiꞌ: Cꞌam ojabꞌ chex xiwi, oj jex jin coloꞌ, jin chi.

14 Chi yalon pax Jehová jaxca tiꞌ: Jex Israel yicꞌaal Jacob, caxcꞌal mi txenne je bꞌisil, caxcꞌal mi cꞌamto wal je yip, cꞌam ojabꞌ chex xiwi. Oj jin oc je yetoj. Jain ton je Diosal jin tol Asanxane jin Ocoj, je Colomal jin.

15 Oj jex waoc jaxca junoj chꞌen makꞌbꞌal tiriw tol acꞌto, caw eel yee sicꞌlebꞌil. Oj je makꞌ poꞌo txꞌotxꞌ mimej wonan, pojoj xacꞌal oj je yute cantoj txꞌotxꞌ, yetoj cꞌal txꞌotxꞌ tzalquiltaj, kocꞌ xacꞌal oj je yute cantoj jaxca scꞌail yajan ixim tiriw.

16 Oj je tiẍcantoj xol kaꞌeꞌ, jaxa kaꞌeꞌ oj ijontoj. Jaꞌ cajxuchum oj sajlemnen cantoj. Queyton wal tuꞌ oj yun stzala a je cꞌul win jain Jehová jin tiꞌ. Oj jin meyne jin bꞌa je yu, yutol je Diosal jin, yutol chi skeꞌ wu masanil.

17 Jaꞌ ebꞌ ánima mebꞌa, ebꞌ tol cꞌam tzet ey tet, caxcꞌal chi seyecꞌ jaꞌ ebꞌ chi yuqꞌueꞌ, manxa oj ilcha oc jaꞌ yu ebꞌ. Caxcꞌal mi lalan scam ebꞌ yu tajin tiꞌal. Jain Jehová jin tiꞌ, oj wiltej ebꞌ, man oj jin bꞌejcan ebꞌ, yutol je Diosal jin jaex Israel jex tiꞌ.

18 Oj wakꞌ aol jaꞌ mimej jaꞌ bꞌey sjolomlaj wonan, cꞌal jaꞌ niẍtej snukꞌjaꞌlaj bꞌey snanlaj acꞌal. Yaax txꞌotxꞌlaj xacꞌal oj wute cantoj txꞌotxꞌ cusiltaj txꞌotxꞌ. Catuꞌ oj wakꞌon aol jaꞌ mimej jaꞌ bꞌey txꞌotxꞌ caw sat.

19 Jaꞌ bꞌey txꞌotxꞌ cusiltaj txꞌotxꞌ tuꞌ oj wakꞌ chꞌibꞌ teꞌ kꞌuteꞌ, teꞌ acacia, teꞌ arrayán, cꞌal teꞌ olivo. Jaꞌ bꞌey txꞌotxꞌ tajin sat tuꞌ oj wakꞌ chꞌibꞌ teꞌ kꞌuteꞌ, teꞌ ta, cꞌal teꞌ qꞌuisis,

20 yet watxꞌ chi yil masanil ánima, catuꞌ chi naꞌcha el yu ebꞌ, tol jain ton Jehová jix jin waꞌne wan tiꞌ yetoj wipalil; yutol je Diosal jin, tol Asanxane jin Ocoj, yuxan jix waꞌxi wan tiꞌ wu, ẍi Dios.

22 Titanwej, jul alwej ey jon, tzet ecꞌnajxa eloj, oj cu chaꞌ kabꞌ tzet oj je yalaꞌ. Catuꞌ che yalon cꞌal pax kabꞌe yu tzet oj jul cu sattajto tuꞌ, oj cu chaꞌ kabꞌ ey jex, yet watxꞌ oj kil tzet oj yun yeloc apnoj. Alwej skꞌaneal yu tzet oj jul yet bꞌakꞌin.

23 Ta yel wal tol dios jex, alwej ey jon tzetyetal oj jul cu sattajto tuꞌ; unwej tzetyetal chi skeꞌ je yu, unwej swatxꞌil cꞌal spenail, yet watxꞌ chi qꞌuey cu cꞌul kilon ocoj, yutol ey je mey.

24 Jal jex jaex tiꞌ, caw cꞌam je yeloc apnoj, tumi ey niꞌoj tzet chi skeꞌ je yu. Jaꞌ ebꞌ chi yiꞌey sbꞌa ey jex, smoo chi intajnele el ebꞌ.

25 Jix wakꞌ txeclo jun ánima bꞌey chi aol cꞌu, tol oj yal sbꞌa ey jin, catuꞌ oj tit naj bꞌey norte tiꞌ. Jaꞌ oj tecꞌon ey ebꞌ yaaw yeoc xol conobꞌ, jaxca chi yun stecꞌle ey stzokꞌom, jaxca chi yun stecꞌon ey naj tzꞌajom tzꞌajbꞌeal txꞌotxꞌ.

26 ¿Mactxequel jix alon el skꞌaneal jun tiꞌ yet tax yichbꞌanil, yet watxꞌ chi kabꞌ skꞌaneal jon? ¿Mactxequel jix alon yin eyojto cꞌal yet peyxa tuꞌ, yet watxꞌ chi kalaꞌ tol yel chi yalaꞌ? Tumi ey junoj jex echele jex tiꞌ jix je yal tzet oj jul cu sattajto tuꞌ, tumi ey ánima jix abꞌen je yaloni.

27 Yet tax yichbꞌanil, jain jix wal jun skꞌaneal tiꞌ bꞌey Sión, chi cam je yabꞌen tzet jix wal tuꞌ, jain ton jix jin chejtoj jun jin chejabꞌ bꞌey Jerusalén yin yalon el watxꞌ kꞌane.

28 Chin maj wilaꞌ, tumi ey junoj comon dios chi wil sjuli, tam wal ey junoj chi skeꞌ yakꞌon niꞌoj cu naꞌbꞌal, tam wal ey junoj chi skeꞌ stakꞌwi tet junoj chi yakꞌ skꞌanlebꞌal.

29 Cꞌam junoj ey yeloc apnoj, cꞌam junoj tzetyetal chi skeꞌ swaꞌneni, yuxan naꞌbꞌacꞌal wan echele tuꞌ, ẍi Dios.