2 Man comon cꞌal oj el yaw skꞌanabꞌi, man oj abꞌle yel yaw yul-laj calle.

3 Ey ebꞌ caw okꞌbꞌal cꞌul yeocoj, jaxca wal teꞌ poꞌoil aa, ma jaxca junoj tzejtebꞌal tuxa chi tan skꞌakꞌal, queytuꞌ yeoc ebꞌ. Jaꞌton jun jin chejabꞌ tuꞌ oj colon el ebꞌ, man oj yakꞌ low yin ebꞌ, yutol oj yun yin sjichanil.

4 Man oj xewoj, tam wal oj yakꞌ caabꞌcꞌulal, masantaꞌcꞌal chi sbꞌeybꞌalne sjichanil bꞌey yul yibꞌankꞌinal tiꞌ. Jaꞌ wan conobꞌlaj ey bꞌey skꞌaxepal ecꞌtoj jaꞌ mar, oj ẍaꞌ yabꞌ wan cuybꞌanile ebꞌ oj yakꞌa, ẍi Dios.

5 Jaꞌ Jehová Dios, jaꞌ jix waꞌnen satcan, catuꞌ jix sjenbꞌan cantoj. Jaꞌ jix waꞌnen txꞌotxꞌ txꞌotxꞌ, cꞌal masanil tzetyetal chi chꞌibꞌ sat txꞌotxꞌ. Jaꞌ chi akꞌon scawil cꞌal skaꞌeꞌ ebꞌ. Jaꞌ chi alon tet ẍejabꞌ jaxca tiꞌ:

6 Jain Jehová jin tiꞌ jix jaach wawte, catuꞌ jix waon oc ja wip, yet watxꞌ cha wun sjichanil bꞌey sat txꞌotxꞌ txꞌotxꞌ tiꞌ. Jaach oj jaach wakꞌbꞌalne yet oj wakꞌon jun jin wa kꞌane yetoj ebꞌ ánima, jaxca ojabꞌ sajkꞌinal ja weoc tet ebꞌ txꞌoj conobꞌal.

7 Chi yoche jin cꞌul cha jaj can sat ebꞌ cꞌam chi skeꞌ yilwi, catuꞌ cha jajon eltej ebꞌ majan oc yul preso yul-laj cuartolaj bꞌey cꞌam sajkꞌinal.

8 Jain ton Jehová yoc jin bꞌi tiꞌ, man oj jin chaꞌ al-le watxꞌ kꞌane tet junojxa yu tzet jix wunne, man oj jin chaꞌ iꞌle a can sbꞌi wan echele tuꞌ jin qꞌuexeloj.

9 Ilwej ton abꞌi, masanil tzet jix wal yet yalantoj jix cꞌal yun masanil. Jaꞌ tinaniꞌ, ey wanxa cꞌamto chi walaꞌ oj wal ey jex. Yin eyojto cꞌal chi walon can ey jex yajbꞌan cꞌamto chi yunne, ẍi Dios.

11 Tzala ojabꞌ ebꞌ conobꞌlaj caan bꞌey txꞌotxꞌ cusiltaj txꞌotxꞌ, yetoj cꞌal ebꞌ yicꞌaal naj Quedar. Ebꞌ a conobꞌ Selá, bꞌitnoj ojabꞌ ebꞌ yin tzalacꞌulal, apnoj ojabꞌ yel yaw yul snukꞌ ebꞌ sbꞌitni bꞌey sjolomlaj wonan.

12 Masanil ebꞌ conobꞌ ey stiꞌlaj jaꞌ mar, yal ojabꞌ watxꞌ kꞌane ebꞌ tet Jehová.

13 Oj eltej Jehová yetoj sjowal scꞌul, jaxca junoj akꞌom jowal chi a yaw yakꞌon jowal, oj eyqꞌuey ebꞌ tuꞌ yu.

14 Jaꞌ Jehová chi alon jaxca tiꞌ: Naatil jix jin tzꞌini eyoj, numomi jin xacꞌal, cꞌamxa cꞌal tzet jix walaꞌ. Jaxa wal tinaniꞌ xin, oj el waw jaxca junoj ix ix lalan yali yuneꞌ, chi el yaw yu syaꞌil, catuꞌ chi siꞌson scꞌul yiꞌon skaꞌeꞌ.

15 Oj wuchcan ey txꞌotxꞌ mimej wonanlaj cꞌal txꞌotxꞌ tzalquiltaj, catuꞌ oj wakꞌon tajtoj masanil teꞌ teꞌ, oj wakꞌon tantoj jaꞌ mimej jaꞌ; jaxca xacꞌal yili txꞌotxꞌ cusiltaj txꞌotxꞌ oj yun cantoj, oj wakꞌ tantoj jaꞌ naabꞌ jaꞌlaj.

16 Jaꞌ ebꞌ cꞌam chi skeꞌ yilwi, oj wiꞌtoj ebꞌ bꞌey wan bꞌe tol man yotaj oj ebꞌ. Jaꞌ kꞌejkꞌinal, oj wakꞌ meltzo yin sajkꞌinal tet ebꞌ. Jaꞌ bꞌey pacꞌanlaj yili, panan xacꞌal oj wute cantoj. Masanil wan tuꞌ, sowalil oj wakꞌ elocoj.

17 Jaꞌ ebꞌ ánima chi yaoc yipoj scꞌul yin wan comon dios, catuꞌ chi yalon ebꞌ tet wan echele tuꞌ jaxca tiꞌ: Jaach tiꞌ jin diosal jaach, ta ẍi ebꞌ, masanil ebꞌ chi alon jaxca tuꞌ, caw qꞌuixwiltaj oj yun sqꞌueyle el ebꞌ.

19 ¿Mactxequel ebꞌ junelne cꞌam chi ilwi? Jaꞌton ebꞌ jin chejabꞌ sicꞌbꞌil el wu. ¿Mactxequel ebꞌ junelne tol chacan? Jaꞌton ebꞌ yalomal el jin kꞌane tol chejbꞌiltej wu.

20 Jex Israel, jantaj tzetyetal che yil yetoj je sat, caw cꞌam chi cam je yiloni; caw watxꞌ je yabꞌeni, cꞌam pax che chaꞌ je yabꞌe.

21 Jain Jehová jin tiꞌ, caw chi woche chin colwa je yetoj, yuxan jix wakꞌ wan watxꞌ cuybꞌanile tiꞌ ey jex.

22 Yu je pital tuꞌ, yuxan chi elkꞌaneletoj masanil je tzettaj yetal yu ebꞌ je cajat, jix jex iꞌletoj yin yakꞌomaloj servilal yu ebꞌ txꞌoj conobꞌal, jix jex majchele octoj yul preso cꞌal yul-laj nachꞌen, cꞌamxa mac jix jex colon el tet ebꞌ. Jix elkꞌaneletoj je tzettaj yetal yu ebꞌ, cꞌamxa junoj mac chi iꞌon ecꞌ je tzetyetal tuꞌ tet ebꞌ elkꞌom tuꞌ.

23 ¿Mactxequel jex bꞌejan je cꞌul je chaꞌon je yabꞌ tzet oj walaꞌ? ¿Mactxequel jex bꞌejan je cꞌul je chaꞌon je yabꞌ tzet oj jul cu sattajto?

24 ¿Mactxequel jix bꞌejon can ebꞌ Israel, yicꞌaal Jacob, yet chi elkꞌaneletoj stzetyetal ebꞌ? ¿Man mi toloj jaꞌ Jehová? Yutol jix oc spenail ebꞌ sattaj. Yutol ma yal scꞌul ebꞌ jix sjije wan watxꞌ bꞌeybꞌale txꞌoxbꞌilcan tet ebꞌ, tam wal jix sjije wan cuybꞌanile yalnaj canoj.

25 Yu jun tuꞌ xin, yuxan jix tit sjowal scꞌul Jehová yin ebꞌ, catuꞌ jix ale oc syaꞌilal yibꞌan ebꞌ. Jix jul jowal xol ebꞌ jaxca chi yun ya chulna xaj junoj kꞌakꞌ, queytuꞌ jix yun sjul yin ebꞌ, man wal yu oj tuꞌ, jix snaꞌ sbꞌa scꞌul ebꞌ niꞌoj.