2 Ta oj jex ecꞌtoj yul jaꞌ tol naat yich, ma che kꞌaxbꞌone jaꞌ mimej jaꞌ, man oj je jiꞌtoj jaꞌ, yutol ey jin cꞌal ecꞌ je yetoj. Jaꞌ yet oj jex ecꞌtoj xol kꞌakꞌ, man oj jex tzꞌaꞌtoj yu kꞌakꞌ.

3 Yutol jain Jehová je Diosal jin tiꞌ, je Colomal weocoj, yutol asanne jin je Diosal jin. Jain jix wakꞌbꞌalne ebꞌ a Egipto, ebꞌ a Etiopía cꞌal ebꞌ a Sabá je tooloj.

4 Jaꞌ ebꞌ ánima bꞌey wanxa conobꞌlaj jix wakꞌ cam ebꞌ je qꞌuexeloj, yet watxꞌ chex colcha can el jaex tiꞌ, yutol caw miman je yeloc apnoj yul jin sat, caw chex jin camcꞌulne.

5 Cꞌam ojabꞌ chex xiwi, ey jin cꞌal ecꞌ je yetoj, oj jin yambꞌa oc ebꞌ je yet conobꞌ bꞌey chi aol cꞌu, cꞌal bꞌey chi too cꞌu, oj wakꞌ meltzotej ebꞌ, junxane oj je yunne.

6 Oj wal tet conobꞌ ey yetcꞌulal norte jaxca tiꞌ: Akꞌwej meltzotej ebꞌ jin conobꞌ, jin chi tet ebꞌ. Jaxa ebꞌ conobꞌ ey yetcꞌulal sur, oj wal tet ebꞌ jaxca tiꞌ: Cꞌam ojabꞌ che mitxꞌoc tucan ebꞌ. Iꞌwejtej ebꞌ jin cꞌaal, cꞌal ebꞌ jin cutzꞌin caw naat eycantoj bꞌey slawubꞌ yul yibꞌankꞌinal tiꞌ,

7 yutol eyoc jin bꞌi yin ebꞌ. Jain jix jin waꞌne ebꞌ, jix jin waꞌne ebꞌ yu wiꞌle a can yu ebꞌ, jin chi.

8 Iꞌwejtej ebꞌ jin conobꞌ tuꞌ titiꞌ, ey sbꞌakꞌ sat ebꞌ, cꞌam pax chi skeꞌ yilwan ebꞌ, ey xiquin ebꞌ, cꞌam pax chi yabꞌ ebꞌ.

9 Je masanil jex conobꞌ, cꞌal jantaj jex mimej nacionlaj, yambꞌawej oc je bꞌa. Che yaloni mac che yaloc je diosaloj. ¿Tumi ey junoj ebꞌ alnen canoj tzet yunnaj yet peyxa, ma chi skeꞌ yalon ebꞌ tzet oj jul cu sattajto, ma yalnaj can el ebꞌ yet yalantoj tzetyetal lalan yunen tinaniꞌ? Yiꞌ ojabꞌtej stestigo ebꞌ, ta tol yel, yet watxꞌ chi yal wanxa nación tol jaxca ton tuꞌ, ẍi Dios.

10 Jaꞌ Jehová chi alon pax jaxca tiꞌ: Jaex Israel jex tiꞌ, jin testigo jex, jin chejabꞌ jex, sicꞌbꞌil jex el wu, yet watxꞌ chin je yotajne eloj, catuꞌ chin je yaon oc yin je cꞌul, catuꞌ chi naꞌcha el je yu, yutol asanne jin Dios jin. Cꞌam junojxa dios jix ecꞌle yet yalantoj, tam wal junojxa oj pitzcꞌu a yet yatoj tuꞌ.

11 Asanne ton jin Jehová jin, cꞌam junojxa chi skeꞌ scolwa je yin, ẍi Dios.

12 Jain walnaj canoj tol oj jex jin coloꞌ, jaꞌ wan tuꞌ tuxa jix eloc tinaniꞌ. Jain caw jix wal yet yalantoj, manaj ebꞌ comon dios txꞌoj yeli jix aloni. Jin testigo je yeoc jaex tiꞌ.

13 Jaꞌ yet peyxa tuꞌ, Dios jin cꞌaltaꞌa. Cꞌam mactxequel chi skeꞌ scolon el sbꞌa yul jin kꞌabꞌ, cꞌam mactxequel chi skeꞌ stenon el jin naꞌbꞌal yin tzet chi wunne, ẍi Dios.

14 Jaꞌ Jehová Naj cu Diosal jaon Israel jon tiꞌ, Naj jix cu colon eloj, jaꞌ chi alon jaxca tiꞌ: Jaꞌ tzet oj wute jex jin colon el jaex tiꞌ, tol oj jin chejtoj ebꞌ soldado yakꞌ jowal bꞌey Babilonia, catuꞌ oj ela ebꞌ Caldeo tuꞌ ey jex,^a oj tojcan ebꞌ yul barco, yutol jaꞌ wan barco tuꞌ eyoc yipoj scꞌul ebꞌ yet peyxa.

15 Jex Israel, jain Jehová jin jix jex jin waꞌne, je Diosal jin, je Reyal jin cꞌal pax oj, ẍi Dios.

16 Jaꞌ Jehová jix waꞌnen jun bꞌe yul jaꞌ mar, jaꞌton jun bꞌe jix ecꞌtoj snan xol jaꞌ mar tuꞌ.

17 Jix yakꞌ eltej jun miman bꞌulan ebꞌ soldado iꞌbꞌil oc carruaje cꞌal yetoj noꞌ che yet jowal yu ebꞌ. Jix eyqꞌuey ebꞌ masanil, ma xa skeꞌ ya waan ebꞌ. Jix tan xacꞌal el ebꞌ jaxca chi yun stan skꞌakꞌal junoj tzejtebꞌal.

18 Jaꞌ tinaniꞌ chi yal Dios tet ebꞌ sconobꞌ jaxca tiꞌ: Cꞌam ojabꞌxa che naꞌtej wan tzet ecꞌnajxa eloj, cꞌam ojabꞌxa che naꞌtej yu tzet jix wun yet yalantoj.

19 Jaꞌ tinaniꞌ, ey jun tzetyetal oj wunne, yutol cꞌamto juneloj chi yunne, ilwej ton abꞌi. Ey wal jun bꞌe oj jin jaj ecꞌtoj bꞌey txꞌotxꞌ cusiltaj txꞌotxꞌ, catuꞌ oj wakꞌ aol jaꞌ mimej snukꞌ jaꞌ bꞌey txꞌotxꞌ tajin txꞌotxꞌ cꞌaltaꞌa.

20 Oj iꞌle a can jin bꞌi yu noꞌ xol-laj teꞌal noꞌ, noꞌ mimej ooj, cꞌal noꞌ avestruz, yutol oj wakꞌ pitzcꞌu a jaꞌ jaꞌ bꞌey txꞌotxꞌ cusiltaj txꞌotxꞌ. Oj el sne jaꞌ bꞌey txꞌotxꞌ tajin txꞌotxꞌ cꞌaltaꞌa, yet oj skeꞌ je yuqꞌuen jaꞌ jaex jin conobꞌ tol sicꞌbꞌil jex el wu,

21 waꞌnebꞌil jex wu, yu je yalon watxꞌ kꞌane win bꞌey masanil yul yibꞌankꞌinal tiꞌ.

22 Asan xin, jaex Israel jex tiꞌ, jaex yicꞌaal jex Jacob tiꞌ, ma xacꞌal jin je yawte je yetoj, jaꞌ jun jix je yunne, tol jix jex cꞌuumbꞌi el yu jin je naꞌontej.

23 Ma xacꞌal je yakꞌ tzꞌaꞌ noꞌ meꞌ yin xaambꞌalil ey jin, tam wal eyto weloc apnoj yul je sat yetoj je xaambꞌal tuꞌ. Ma jin kꞌan cꞌal ofrenda ey jex, ma cꞌal pax jin oc tean je yin, yu jin kꞌanon teꞌ incienso tol sukꞌukꞌi yoc sabꞌ.

24 Tumi jix je man teꞌ teꞌ sukꞌukꞌi yoc sabꞌ yin je yakꞌon tzꞌaꞌ jin sattaj, ma je yakꞌ tzalabꞌoj jin cꞌul yetoj sukꞌukꞌial sabꞌ ẍepuꞌal noꞌ noꞌ chi akꞌle yin xaambꞌal ey jin. Jaꞌ tiꞌ je yet, tol asan cꞌal spenail che yunne; caw chex tibꞌi el wu, manxa jantajoj che txꞌemtej sjowal jin cꞌul yu jantaj je penail che yaocoj.

25 Jal jin jain tiꞌ, yu wal jin camcꞌulal je yin yuxan chin joꞌqꞌuey je penail, cꞌamxa cꞌal bꞌakꞌin oj jin naꞌtej je penail tuꞌ.

26 Ta ey wal tzet chi skeꞌ je yalon win xin, ocojonwej ian kalon tinaniꞌ, Alwejtej tzet utbꞌil je yeocoj, catuꞌ oj kiloni ta yel cꞌam je penail.

27 Jaꞌ ebꞌ je mam icham bꞌabꞌel ocnaj spenail ebꞌ, jaꞌ ebꞌ je cuywam, caw jix jowi oc ebꞌ win.

28 Yu jun tuꞌ xin, ma yal jin cꞌul tol chin yakꞌ servil ebꞌ yakꞌomal je xaambꞌal jaex Israel jex tiꞌ, jex yicꞌaal jex Jacob, oj jex jin bꞌejcanoj yet watxꞌ chex qꞌueyle can eloj, cꞌal je yetnelei, ẍi Dios.