Asanne Jun Dios Ey, Jaꞌton Jehová
44
Jaꞌ Jehová chi alon jaxca tiꞌ: Jex Israel, yicꞌaal Jacob,majwej je yabꞌ tzet oj walaꞌ, yutol jin chejabꞌ jex, tol sicꞌbꞌil jex el wu.
2 Jain Jehová jin tiꞌ, jain jix jex jin waꞌne yet cꞌamto chex ali bꞌey yul yibꞌankꞌinal tiꞌ, jain chin colwa je yetoj. Cꞌam ojabꞌ chex xiw jex a Jesurún,a jex yicꞌaal Jacob, yutol jin chejabꞌ jex, tol sicꞌbꞌil jex el wu.
3 Tol jain oj wakꞌ aol jaꞌ jaꞌ oj el sne bꞌey txꞌotxꞌ cusiltaj txꞌotxꞌ, tol oj bꞌey jaꞌ snukꞌ jaꞌ tituꞌ. Jain oj waoc Wespíritu yin ebꞌ je yicꞌaal, catuꞌ oj wakꞌon jin yaxilal yibꞌan ebꞌ.
4 Jaxca wal chi yun ẍꞌibꞌ an cꞌultaj tol eyoc jaꞌ xol, queytuꞌ oj yun ẍꞌibꞌ ebꞌ, jaxca wal chi yun ẍꞌibꞌ teꞌ bꞌajmam bꞌey stiꞌlaj jaꞌ jaꞌ chi el sne.
5 Jaꞌ xol ebꞌ txꞌoj conobꞌal, ey mac oj alon jaxca tiꞌ: Jain tiꞌ yet jin Jehová, ẍi; jaxa wanojxa xin, oj yaoc sbꞌi Jacob yin. Ey pax junojxa xin, jaꞌcaw oj tzꞌibꞌen oc yin skꞌabꞌ. Yet jin Jehová, ẍi, catuꞌ oj yaon oc Israel stzꞌajiloj sbꞌi, ẍi Dios.
6 Jaꞌ Jehová Naj Rey, jaꞌ chi akꞌon jajcha el ebꞌ Israel. Jaꞌ chi alon jaxca tiꞌ: Jain ton Jehová jin, bꞌabꞌel jin sattaj masanil, ey jin cꞌal ecꞌ yet slawubꞌal, asanne jin Dios jin, catuꞌ cꞌam junojxa.
7 ¿Mac junoj laan wetoj? Ta ey junoj, kꞌanabꞌoj abꞌi, catuꞌ chi yalon tzet yeocoj. ¿Tumi ey junojxa mactxequel jix alon can tzet ecꞌnaj el yet tax yichbꞌanil, yetoj pax tzet oj jul yet cu sattajto tuꞌ? Ta ey xin, yal ojabꞌ tzetyetal tuxa oj juloj.
8 Cꞌam ojabꞌ chex xiw xin, tecꞌan che yute je bꞌa, jaex tiꞌ jin testigo jex, tol walnaj can jun tiꞌ yet tax cꞌal peyxa. ¿Tumi ey junojxa dios cꞌal junojxa colwawom? Jain tiꞌ, cꞌam junojxa wotaj, ẍi Dios.
Ey Sjowal Scꞌul Dios Yin Wan Comon Dios
9 Jaꞌ ebꞌ chi waꞌnen yechel junoj comon dios, junelne cꞌam niꞌoj yeloc apnoj ebꞌ. Cꞌam pax yeloc apnoj wan echele chi scamcꞌulne ebꞌ tuꞌ. Jaꞌ ebꞌ chi oc eyilal tet wan tuꞌ, jaxca tol cꞌam chi skeꞌ yilwi ebꞌ, cꞌam snaꞌbꞌal ebꞌ. Yu jun tuꞌ, yuxan tuxa cꞌal oj qꞌuixwoj can a ebꞌ yu. 10 Jaꞌ ebꞌ chi waꞌnen yechel comon dios yetoj chꞌen chꞌen, catuꞌ chi oc ebꞌ yin eyilal tet jaxca xacꞌal tol dios yaloni, jaꞌ jun tuꞌ, naꞌbꞌacꞌal smulnail. 11 Masanil ebꞌ tol eyoc snaꞌbꞌal yin wan yechel comon dios tuꞌ, yetoj cꞌal ebꞌ chi waꞌneni, oj qꞌuixwoj can a ebꞌ, yutol naꞌbꞌa ánima ebꞌ chi waꞌnen wan echele tuꞌ. Ta chi syambꞌa oc sbꞌa ebꞌ, catuꞌ chi xꞌoxon sbꞌa ebꞌ jin sattaj, yet chin naꞌon oc yin ebꞌ, qꞌuixwiltaj xacꞌal chi yun can ebꞌ, catuꞌ chi xiwcan a ebꞌ.
12 Jaꞌ tinaniꞌ, oj kil wal tzet chi yute mulna sbꞌa naj waꞌnem chꞌen: Tol chi yiꞌa smitxꞌkꞌabꞌ naj, yet tuxa chi tzꞌaꞌ chꞌen chꞌen tuꞌ yu bꞌey xol stzakꞌakꞌ, catuꞌ chi smakꞌon oc chꞌen martillo yin, chi lawi tuꞌ, chi swaꞌnen ey yin yechel comon dios. Yetoj wal yipal skꞌabꞌ, catuꞌ chi swaꞌnen eyoj. Chi tit swail, chi cꞌuumbꞌi a yin smulnail tuꞌ, ta cꞌam chi lowi, ta cꞌam chi yucꞌ jaꞌ, chi pax yip.
13 Oj kil cꞌal pax tzet utbꞌil chi yun smulna junoj josom teꞌ: Chi yeche yetoj junoj echbꞌal, chi yaon oc yechel yetoj tzꞌibꞌbꞌal, cꞌal yetoj chꞌen compás. Chi lawi tuꞌ, chi sjolon yetoj chꞌen tzꞌujubꞌ chꞌen, queytuꞌ chi yute swaꞌnen ey junoj echele tuꞌ, jaxca xacꞌal swatxꞌil yili junoj ánima chi yute. Chi lawi swaꞌxi ey yu, catuꞌ chi yaon octoj ebꞌ yul junoj templo.
14 Jal pax junoj naj josom teꞌ xin, chi too naj xol-laj teꞌ, chi skꞌajon ey junoj teꞌ kꞌuteꞌ, chi swaꞌnen ey junoj echele yetoj teꞌ. Ma xin, chi satne oc junoj teꞌ qꞌuisis ma junoj teꞌ jii bꞌey xol-laj teꞌ, masantaꞌcꞌal yet chi oc teꞌ miman teꞌal, catuꞌ chi swaꞌnen ey yin sdiosaloj. Ma xin, jaꞌcaw jun winaj tuꞌ chi awon junoj teꞌ kꞌuꞌta, jaxa nabꞌ chi akꞌon chꞌibꞌoj. 15 Chi lawi tuꞌ, chi skꞌajon ey teꞌ yin siꞌal, chi yiꞌontoj niꞌoj teꞌ yet chi kꞌaẍni oc yin. Catuꞌ chi skꞌanon cꞌal pax yet chi ta sloꞌbꞌe. Jacꞌalaꞌ yetoj niꞌojxa teꞌ, chi swaꞌnen a junoj yechel yet chi oc sdiosaloj. Chi lawi tuꞌ, chi cꞌoli yey noan yin eyilal tet.
16 Jaꞌton yetoj teꞌ siꞌ tuꞌ chi yaoc skꞌakꞌ, chi sbꞌolon ẍiꞌbꞌe, catuꞌ chi lowi, watxꞌ xacꞌal chi yun sno scꞌul yetoj noꞌ bꞌolbꞌil chiꞌbꞌe tuꞌ. Chi lawi tuꞌ, chi kꞌaẍni, chi yalon jaxca tiꞌ: Caw wal watxꞌ xacꞌal jin kꞌaẍni yin jun kꞌakꞌ tiꞌ. Caw wal jix jin kꞌaxna a chi wabꞌe, ẍi, chi yaloni. 17 Jacꞌalaꞌ yetoj niꞌojxa teꞌ teꞌ tuꞌ, chi swaꞌne pax a junoj echele yet chi oc sdiosaloj, catuꞌ chi cꞌoli yey noan sattaj. Chi oc tean yin, chi yalon jaxca tiꞌ: Col jin eloj, yutol jin diosal jaach, ẍi tet.
18 Jaꞌ ebꞌ ánima chi yun jaxca tuꞌ, man yotaj oj ebꞌ, cꞌam chi naꞌcha el yu ebꞌ. Jaxca tol mutzꞌan sat ebꞌ, jaxca tol cꞌam chi skeꞌ yilwan ebꞌ, majan el snaꞌbꞌal ebꞌ, cꞌam chi skeꞌ snaꞌcha el yu ebꞌ. 19 Cꞌam chi cam snaꞌon ebꞌ, yutol caw cꞌam snaꞌbꞌal ebꞌ, yuxan cꞌam chi naꞌcha el yu ebꞌ, chi yalon jaxca tiꞌ: Jaꞌ nanoj jun teꞌ tiꞌ jix wakꞌ tzꞌaꞌoj, jaꞌ yin teꞌ jix ta jin paat, jaꞌ yin teꞌ jix jin bꞌol cꞌal pax jin chiꞌbꞌe, catuꞌ jix jin lowi. ¿Tumi watxꞌ chin waꞌne junoj yechel comon dios tol yaabꞌetaj yetoj niꞌojxa teꞌ tiꞌ? ¿Tumi watxꞌ chin oc eyilal tet jun skꞌoal teꞌ tiꞌ? man ẍi oj. 20 Jaꞌ mactxequel chi yaoc comon dios tuꞌ yipoj scꞌul, laan ebꞌ jaxca tol stikꞌakꞌil taan chi sloꞌeytoj. Yutol etexnaj xa el snaꞌbꞌal ebꞌ, yuxan chi qꞌuey xacꞌaltoj ebꞌ, cꞌamxa chi skeꞌ scolon sbꞌa ebꞌ, cꞌam chi yal jaxca tiꞌ: Jaꞌ jun tzetyetal waꞌnebꞌil yu jin kꞌabꞌ tiꞌ, caw cꞌam niꞌoj yeloc apnoj, man ẍi oj ebꞌ.
Jaꞌ Jehová Chi Yakꞌ Mimancꞌulal Yin Israel
21 Jix yalon Jehová jaxca tiꞌ: Jex conobꞌ Israel, yicꞌaal Jacob, naꞌwejtej tol jin chejabꞌ jex, jain jix jex jin waꞌne, yet chex oc jin chejabꞌoj, yuxan cꞌam ojabꞌ bꞌakꞌin chin too qꞌueycꞌulal je yu.
22 Jain jix jin joꞌqꞌuey je penail cꞌal je mul, jaxca wal chi yun sqꞌueya asun. Titanwej ey jin an, yutol jain jix jex jin coloꞌ, ẍi Jehová.
23 Jaꞌ satcan, el ojabꞌ yaw yin tzalacꞌulal yu masanil tzet qꞌueyubꞌtaj jix yun Jehová. El ojabꞌ yaw mimej jobꞌelaj sat txꞌotxꞌ txꞌotxꞌ tiꞌ. El ojabꞌ yaw txꞌotxꞌ mimej wonanlaj, yetoj cꞌal txꞌotxꞌ tzalquiltaj, el ojabꞌ yaw txꞌotxꞌ yin tzalacꞌulal, yutol jix xꞌox stzejejial Jehová yet jix col-le el ebꞌ Israel, jaꞌton ebꞌ yicꞌaal Jacob.
24 Jaꞌ Jehová cu Colomal, chi alon jaxca tiꞌ: Jain jix jex jin waꞌne yet cꞌamto chex ali bꞌey yul yibꞌankꞌinal tiꞌ. Jain Jehová jin jix jin waꞌne a masanil tzettaj yetal. Jain jix jin jenbꞌatoj satcan, jain jix jin jenbꞌa cꞌal pax toj txꞌotxꞌ txꞌotxꞌ tiꞌ, cꞌam cꞌal junoj mactxequel jix colwa wetoj.
25 Jain chi wetnetoj skꞌane ebꞌ atxum, catuꞌ chi wakꞌon naꞌcha el yu ebꞌ ánima tol cꞌam snaꞌbꞌal, ebꞌ naꞌom el kꞌane yaloni. Chi wakꞌon somcha el snaꞌbꞌal ebꞌ, jaxa ebꞌ jelan snaꞌbꞌal yaloni, suc xacꞌal chi yun can el snaꞌbꞌal ebꞌ.
26 Jain tiꞌ, chi wakꞌ eloc tzet chi yal ebꞌ jin chejabꞌ, yet watxꞌ, watxꞌ cꞌal chi yun yeloc skꞌane ebꞌ chi yalaꞌ. Jain ton chi walaꞌ tol jaꞌ Jerusalén oj noel yetoj ánima junelxa, catuꞌ oj caꞌ waꞌnele wan conobꞌlaj yul yet Judá. Jain oj wakꞌ waꞌnele a junelxa bꞌey etexnajtoj.
27 Jain tiꞌ chi skeꞌ walon tet jaꞌ mar: Tanan aoj. Yutol masanil jaꞌ snukꞌ jaꞌ, chi skeꞌ wakꞌon tantoj jaꞌ.
28 Jain chi wal tet naj Ciro jaxca tiꞌ: Jaach ey jaach oc yilomaloj wu. Jaach oj ja waꞌne masanil tzet chi woche, jin chi, jaach oj ja wal yin Jerusalén: Tol oj caꞌ waꞌnele aoj, oj ale cꞌal pax ey yich xeꞌ templo junelxa, ẍi Jehová.