Eyoc Yopiso Naj Ciro Yu Jehová
45
Jaꞌ Jehová oj sicꞌon oc naj Ciro yin reyal,jaꞌcaw oj quetzon bꞌey yetoj swatxꞌ kꞌabꞌ, yet watxꞌ chi yakꞌ eyqꞌuey wan mimej conobꞌ, cꞌal yiꞌon el yopiso ebꞌ rey. Jaꞌcaw Jehová oj akꞌon jajcha spuertail mimej conobꞌ sattaj naj Ciro, tam wal ey junojxa oj skeꞌ smajcheni. Jaꞌ tinaniꞌ, chi yal Jehová jaxca tiꞌ:
2 Jain wal caw oj jin bꞌabꞌoj ja sattaj, oj wakꞌ pananbꞌoj bꞌe bꞌey jobꞌqꞌuiẍtaj yoqui, catuꞌ oj jin makꞌon poꞌo wan puertalaj tol bronce chꞌen eyoc yin, cꞌal jin kocꞌ tujnentoj chꞌen hierro eyoc yipomaloj.
3 Catuꞌ oj wakꞌon wan bꞌeomal ey jaach tol cꞌubꞌabꞌil el bꞌey ewantaj, yet watxꞌ cha wotajne eloj, tol jain ton Jehová jin, sDiosal jin Israel, jain chi wakꞌ bꞌina ja bꞌi yet chach wawteni.
4 Yu wal jin camcꞌulal yin ebꞌ jin chejabꞌ yicꞌaal Jacob, jaꞌton conobꞌ Israel sicꞌbꞌil el wu, jix wal ja bꞌi yet jix jaach wawteni. Caw miman ja bꞌina wu, catuꞌ ja wotaj sicꞌlebꞌil.
5 Asanne jin Jehová jin. Cꞌam junojxa Dios, asanne jin. Jain oj wakꞌ ja wip, caxcꞌal man jin ja wotaj oj,
6 yet watxꞌ chi otajne el yu masanil ánima kaan yetcꞌulal bꞌey chi aol cꞌu, masantaꞌcꞌal bꞌey chi too cꞌu, yutol asanne jin Jehová jin, cꞌam junojxa Dios jin sattaj.
7 Jain jix jin waꞌne sajkꞌinal, cꞌal kꞌejkꞌinal, jain chi wakꞌ pitzcꞌu a watxꞌcꞌulal, jain chi wakꞌ cꞌal pax pitzcꞌu a syaꞌtajilal. Jain Jehová jin chi wun masanil wan tiꞌ.
Yel Xacꞌal Ecꞌbꞌan Yipalil Dios
8 Ey ojabꞌtej sjichanil bꞌey satcan, jaxca chi yun stit nabꞌ xol asun. Ẍaꞌ ojabꞌ txꞌotxꞌ txꞌotxꞌ tiꞌ jun tuꞌ, yet chi a can colbꞌanile, cꞌal sjichanil jaxca chi yun ẍꞌibꞌ an cꞌultaj. Jain Jehová jin oj wakꞌ yun jaxca tuꞌ, ẍi Dios.
9 Okꞌbꞌal wal cꞌul mactxequel chi yakꞌ jowal yetoj Dios, Naj jix waꞌnen jun mactxequel tuꞌ. Jaꞌ jun cambꞌeal ánima tuꞌ, laan wal yeoc jaxca txꞌotxꞌ tzꞌajbꞌeal txꞌotxꞌ cꞌuun spoꞌotoj. Tumi chi yal txꞌotxꞌ tzꞌajbꞌeal txꞌotxꞌ tet mac chi tzꞌajon tuꞌ jaxca tiꞌ: ¿Tzetyetal cha wunne? Jaach tiꞌ, man ja wotaj oj chach mulnai, man ẍi oj.
10 Caw okꞌbꞌal cꞌul junoj uninale chi yal tet smam, ma tet xutx jaxca tiꞌ: ¿Tzet yu, yuxan queytuꞌ jix jin je yute jaxca tiꞌ?
11 Jaꞌ Jehová cu Diosal jaon Israel jon tiꞌ, Naj miman yeloc apnoj, Naj jix cu waꞌneni, jaꞌ chi alon jaxca tiꞌ: ¿Tumi ey je yalon je yet je kꞌanlen ey jin yu tzet oj wunne? ¿Tumi jaex oj je yal tzet oj jin waꞌne?
12 Jain jix jin waꞌne txꞌotxꞌ txꞌotxꞌ tiꞌ, yetoj cꞌal masanil mac caan bꞌey. Jain jix jin jenbꞌatoj satcan, catuꞌ jix waloni tol chi pitzcꞌu a masanil weycan.
13 Jain Jehová jin tiꞌ, oj waoc yin snaꞌbꞌal naj rey Ciro yet chi yun sjichanil, catuꞌ oj jin jichlone masanil bꞌe sattaj. Jaꞌ oj caꞌ waꞌne a jin conobꞌ Jerusalén tiꞌ junelxa. Jaꞌ oj colwa yetoj ebꞌ jin conobꞌ tol preso yeocoj, oj jajcha el ebꞌ yu, yin tol cꞌam cꞌal tumin oj yakꞌ ebꞌ, cꞌam cꞌal spaj oj yakꞌ ebꞌ, ẍi Jehová.
14 Jix yalon Jehová tet ebꞌ Israel jaxca tiꞌ: Jaꞌ jantaj sbꞌeomal ebꞌ a Egipto, cꞌal ebꞌ a Etiopía, je yet cꞌal ocoj. Jaꞌ ebꞌ winaj a Sabá tol mimej steel, oj yaoc sbꞌa ebꞌ yul je kꞌabꞌ, catuꞌ oj oc can ebꞌ je chejabꞌoj. Kꞌalbꞌil ey ebꞌ yetoj cadena, yet oj toj ebꞌ je yintaj, oj ey kaan ebꞌ je sattaj, catuꞌ oj yalon ebꞌ ey jex jaxca tiꞌ: Caw yel eyecꞌ Dios je yetoj jaex tiꞌ, cꞌam junojxa Dios. Jaꞌton jun Dios tuꞌ eecꞌ je yetoj, ẍi ebꞌ, ẍi Jehová tet Israel.
15 Jaach cu Diosal, yel toni tol Dios jaach, ey jaach ecꞌ yin yesalil ketoj, yutol cu Colomal jaach jaon Israel jon tiꞌ.
16 Jaꞌ masanil ebꞌ chi waꞌnen wan yechel comon dios, qꞌuixwiltaj xacꞌal oj yun cantoj ebꞌ, yeynajil oj yun cantoj ebꞌ, cꞌam niꞌoj yeloc apnoj ebꞌ catuꞌ oj sbꞌoson el sbꞌa ebꞌ.
17 Jal jaon Israel jon tiꞌ xin, jaꞌcaw Jehová oj cu colon el yin junelne. Cꞌam bꞌakꞌin tol yeynajil oj kunne, cꞌam pax bꞌakꞌin oj el cu qꞌuixwil.
18 Jaꞌ Jehová Dios jix waꞌnen satcan yetoj cꞌal txꞌotxꞌ txꞌotxꞌ tiꞌ, caw watxꞌ jix yute canoj. Jix swaꞌne, man yu oj tol tucꞌal eyecꞌ yin naꞌbꞌacꞌal, tol jix waꞌnelei yu skaey ecꞌ ebꞌ ánima sat. Jaꞌ chi alon jaxca tiꞌ: Asanne jin Jehová jin, cꞌam junojxa Dios laan wetoj.
19 Jain tiꞌ man yin oj ewantajil chin kꞌanabꞌi, tam wal bꞌey kꞌej jolinaj yul-laj scꞌul txꞌotxꞌ txꞌotxꞌ. Cꞌam cꞌal tzet jix wal tet ebꞌ yicꞌaal Jacob jaxca tiꞌ: Awte jin ecꞌ yin naꞌbꞌacꞌal, man jin chioj. Jain Jehová jin tiꞌ jaꞌ tzetyetal jichan, cꞌal yel, jaꞌ chi walaꞌ.
Jaꞌ Jehová Yetoj Wan Yechel Comon Dios Bꞌey Babilonia
20 Chi yalon Jehová jaxca tiꞌ: Je masanil jex ey jex cantoj bꞌey junjun conobꞌ, yambꞌawej oc je bꞌa catuꞌ chex tita. Caw cꞌam je naꞌbꞌal, jaꞌ teꞌ teꞌ che yaloc je diosaloj, che bꞌatxon ecꞌoj, catuꞌ chex oc eyilal tet wan dios tol cꞌam chi skeꞌ scolwa je yetoj.
21 Kꞌanabꞌanwej, catuꞌ che yalon yin je naꞌbꞌal junjun jex, jun laan ojabꞌ chi yun je laatiꞌnen je bꞌa. ¿Mactxequel jix alon el wan tiꞌ yet tax cꞌal yichbꞌanil? ¿Mac jix alon el yet tax cꞌal peyxa? ¿Man mi jain Jehová oj jin jix wal wan tuꞌ? Cꞌam junojxa dios jin sattaj. Asanne jin chi eloc tzet chi walaꞌ, yet chex jin coloni.
22 Jantaj jex caan jex bꞌey slawubꞌal yul yibꞌankꞌinal tiꞌ, titanwej yu je colbꞌanil, yutol asanne jin Dios jin, cꞌam junojxa.
23 Jain caw chi walaꞌ, catuꞌ chi wakꞌon jin tiꞌ. Yel cꞌal tzet chi walaꞌ, man oj jin qꞌuex jin kꞌane. Tol oj ey kaan masanil ebꞌ ánima jin sattaj, catuꞌ oj yakꞌon stiꞌ masanil ebꞌ ey jin.
24 Oj yalon masanil ebꞌ win jaxca tiꞌ: Asanne Jehová yel cꞌal tzet chi yalaꞌ, catuꞌ ey yipalil, ẍi ebꞌ. Jaꞌ masanil ebꞌ cꞌam chin ocheni, tuxa cꞌal oj qꞌuixwoj can a ebꞌ.
25 Asanne win oj yiꞌ swatxꞌcꞌulal ebꞌ yicꞌaal Israel, oj yakꞌon tzalabꞌoj scꞌul ebꞌ, ẍi Jehová.