2 Jaꞌ wan echele tuꞌ, chi ey telanoj, catuꞌ chi eyqꞌueyi, tam wal ey niꞌoj yipalil scolon el sbꞌa. Chi skeꞌ yiꞌletoj bꞌey junojxa txꞌoj conobꞌal.

3 Yu jun tuꞌ, chi yalon Jehová jaxca tiꞌ: Jex yicꞌaal Jacob, jantaj jex ey jex cantoj bꞌey yul-laj conobꞌ yul yet Israel, jex tol iꞌbꞌil jex xacꞌaltaꞌ oc wu yet cꞌamto chex ali; tol jain lacnen jex ocoj yet ijbꞌil jexto oc yu je txutx.

4 Jacꞌalaꞌ queytuꞌ oj wun cꞌal je yetoj, caxcꞌal icham ánima jex xa, ey jin cꞌal ecꞌ je yetoj, caxcꞌal sajxa xil je jolom. Jain jix jex jin waꞌne, oj jex jin teyne cꞌal. Oj jin oc cꞌal je yetoj, catuꞌ oj jex jin colon cꞌal eloj.

5 ¿Mac yetoj chi skeꞌ jin je laanbꞌanen tinaniꞌ? ¿Mac laan yeoc wetoj, je naꞌoni?

6 Ey mac chi yiꞌatej oro yul xꞌuy, catuꞌ chi yechen plata yul echbꞌal, catuꞌ chi seyon junoj waꞌnem chꞌen yu swaꞌxi junoj sdiosal, catuꞌ chi ey noan sattaj, cꞌal xali tet.

7 Chi yaon atoj sjolom xicꞌ chi yiꞌontoj. Chi lawi tuꞌ, chi yaon atoj yibꞌan junoj meẍa. Jaꞌ tituꞌ chi cancan kꞌean junelne, yutol cꞌam chi skeꞌ sbꞌeyi. Caxcꞌal chi el yaw jun ey yet tuꞌ, yu chi skꞌan scolwal tet, cꞌam chi skeꞌ stakꞌwi, tam wal chi colwa yetoj yet eyoc syaꞌilal.

8 Jex penawom, naꞌwejtej jun tiꞌ, chi cam je naꞌon yin tzet che yunne.

9 Naꞌwejtej tzet jix wun yet peyxa tiempo, tol asanne jin Dios jin, cꞌam junojxa, tumi ey junojxa dios chi skeꞌ slaanbꞌane sbꞌa wetoj.

10 Jain jix wal can el slawubꞌal yet tax cꞌal yichbꞌanil. Yet tax cꞌal yalantoj, jix wal can el tzettaj yetal tol to oj juloj. Chi walaꞌ tol oj yun tzet naꞌbꞌil wu, yal cꞌal tzet chi yoche jin cꞌul, oj wunne.

11 Tuxa jix wawte jun winaj yetcꞌulal bꞌey chi aol cꞌu, naat tacꞌal oj tit jaxca junoj noꞌ chii. Jaꞌ jun tuꞌ oj wakꞌ yun masanil tzetyetal naꞌbꞌil wu, jaxca jix wute waloni, Queytuꞌ oj wunne.

12 Jex ánima tol pit je naꞌbꞌal, jex naat ey jex el yin sjichanil, abꞌwej tzet chi walaꞌ.

13 Jaꞌ colbꞌanile chi wakꞌa, cawilxa eyecꞌ wu, manxa naat oj ey. Eyman oj jin colcan el conobꞌ Sión, caw oj bꞌinale ecꞌ conobꞌ Israel wu, ẍi Jehová.