2 Ocan mitxꞌan yin chꞌen jutxꞌon tiriw, catuꞌ cha jutxꞌon ixim yetoj chꞌen, cha wiꞌon el smajil ja sat, jitza ja pichil yin ja xubꞌ, catuꞌ chach kꞌaxbꞌon ecꞌtoj yul jaꞌ jaꞌ yul ja wet.

3 Il-le ojabꞌ oc ja mimanil tol tꞌiran eloj, txequel ojabꞌ ja mimanil tol qꞌuixwiltaj yili. Jaꞌ jun tuꞌ oj wakꞌ spajtzebꞌaloj ey jaach, cꞌam cꞌal junoj mac oj skeꞌ jaach scolon eloj, ẍi Jehová.

4 Jaꞌ Naj cu Colomal jaon Israel jon tiꞌ, jun Dios miman yeloc apnoj. Jaꞌ chi alon yin conobꞌ Babilonia jaxca tiꞌ:

5 Jaach Babilonia, jaach jaxca kꞌopo ix, eyan chotan yin cuscꞌulal xol kꞌejkꞌinal, tol cꞌamxa bꞌakꞌin oj jaach bꞌina yin yaawilal yibꞌan wanojxa mimej nación.

6 Jaꞌ yet eytej sjowal jin cꞌul yin ebꞌ jin conobꞌ, jix waoc ebꞌ yul ja kꞌabꞌ, yet cha wetnen ebꞌ. Caw ma okꞌ ja cꞌul yin ebꞌ, jix ja waoc syaꞌtajilal yibꞌan ebꞌ, ma cꞌal okꞌ ja cꞌul yin ebꞌ icham ánima, caw jix yetne scꞌul masanil ebꞌ ja wu.

7 Jix ja walon cꞌal pax jaxca tiꞌ: Jain tiꞌ yaaw jin. Cꞌam wal niꞌoj jix ja naꞌ yibꞌan, tam wal niꞌoj jix ja naꞌ tzet jix ja wunne, ma pax ja naꞌ tzet oj yun yeloc jun tiꞌ.

8 Yu jun tuꞌ xin, jaach conobꞌ Babilonia, abꞌ tzet oj walaꞌ: Laan jaach jaxca chi yun swaꞌnen sbꞌa junoj ix amul ix, tol asan yin spenail eyoc snaꞌbꞌal, tol watxꞌ xacꞌal ja weey chotan bꞌey ja despacho, catuꞌ cha naꞌon yin ja naꞌbꞌal tol cꞌam junojxa laan jaxca jaach tuꞌ. Cha naꞌon cꞌal pax oj tol cꞌam chach can yin tol cꞌam ja wichamil, tam wal yin cꞌam ja wuneꞌ.

9 Caxcꞌal syaawil jaach ebꞌ atxum, caxcꞌal jelan jaach ja naꞌon el junoj kꞌane, yin junne cꞌual oj yun stit caabꞌoj tujan syaꞌtajilal ja wibꞌan. Oj jaach can yin cꞌam ja wichamil cꞌal yin cꞌamxa ja wuneꞌ.

10 Cha naꞌ tol watxꞌ xacꞌal ja weoc yin ja penail tuꞌ, catuꞌ cha naꞌon cꞌal pax oj tol cꞌam mac chach iloni. Jaꞌ tzet ja wotaj yetoj ja jelanil tuꞌ, jaꞌ chach etneni. Catuꞌ cha naꞌon yin ja naꞌbꞌal tol asanne jaach jelan jaach, catuꞌ cꞌam junojxa.

11 Jaꞌ yet oj jul syaꞌilal ja wibꞌan, manxa oj skeꞌ ja colon ja bꞌa yetoj tzet cuybꞌil ja wu tuꞌ. Oj jul cuscꞌulal ja wibꞌan; manxa oj skeꞌ ja colon ja bꞌa tet jun miman syaꞌilal tuꞌ. Jaꞌ yet man naꞌanoj el ja wu, yin jun txolan oj yun sjul jun syaꞌilal tuꞌ ja wibꞌan.

12 Bꞌeybꞌalne cꞌal atxumal tuꞌ, yetoj cꞌal tzet cuybꞌil ja wu yet tax cꞌal jix jaach titoc yin ja kꞌopoal. Oj ja wilaꞌ ta tol oj to oc yopiso ja wu, oj ja wilaꞌ ta tol oj xiw ebꞌ ánima ey jaach.

13 Ilaꞌ tol caw ecꞌal ebꞌ akꞌom naꞌbꞌale jix syambꞌa oc sbꞌa ja wetoj, jix tibꞌi el ebꞌ ja wu. Jul ojabꞌ ebꞌ ilom weycan tuꞌ tinaniꞌ, ebꞌ chi skeꞌ snaꞌcha el yu yaloni, ebꞌ chi skeꞌ sbꞌison xꞌaaw, catuꞌ yotaj ebꞌ tzetyetal oj jul ja wibꞌan yaloni. Jul ojabꞌ ebꞌ jaach jul scolon el tinaniꞌ.

14 Jaꞌ ebꞌ tuꞌ, laan oj yun ebꞌ jaxca yajan ixim tiriw, kꞌakꞌ oj akꞌon tzꞌaꞌ ebꞌ, manxa oj skeꞌ scolon el sbꞌa ebꞌ tet xaj kꞌakꞌ tuꞌ. Jaꞌ jun kꞌakꞌ tuꞌ, man laan oj jaxca kꞌakꞌ chi skeꞌ key chotan kꞌaẍnoj scꞌatan, jaꞌ jun tuꞌ, yel xacꞌal jow oj yunne.

15 Queytuꞌ oj yun yelcan apnoj ebꞌ chach colon el tuꞌ, jaꞌton ebꞌ bꞌey jix ja kꞌanle ja naꞌbꞌal yet jix jaach bꞌeycꞌaltej. Oj jaach bꞌejlecan yu ebꞌ masanil, catuꞌ junjun xacꞌal ebꞌ oj tojcan yin qꞌueycꞌulal, junelne cꞌamxa junoj mactxequel oj jaach colonoj, ẍi Jehová.