2 Che yaloni tol a conobꞌ jex bꞌey jin conobꞌ, catuꞌ chin je yaon oc yipoj je cꞌul, jain Jehová je Diosal jin, yaaw jin.

3 Jaꞌ yet tax cꞌal yichbꞌanil jix walon can ey jex tzetyetal lalan yunen tinaniꞌ. Jain caw jix wakꞌ je yotajne eloj tol oj wunne, jaꞌ tinaniꞌ yin eymanil jix yunen jantaj tzet walnaj can tuꞌ.

4 Wotaj tol caw pit jex, cꞌam che yiꞌey je bꞌa, tam wal chex xiw niꞌoj jin sattaj.

5 Yin eyojto cꞌal, jix walon can el ey jex, yet cꞌamto chi yun wan tzetyetal tiꞌ. Yu jun tuꞌ, yuxan ma skeꞌ je yalon yin wan yechel je comon dios tuꞌ jaxca tiꞌ: Jaꞌ cu diosal tiꞌ jix naꞌon can jun tuꞌ, jaꞌ jix unen jun tiꞌ, man je chioj.

6 Jaex tiꞌ, jix cam wal je yabꞌen masanil wan tzet jix wal tuꞌ. Chi cam wal je naꞌon yin, catuꞌ sowalil che chaꞌ je yabꞌe tol yel toni. Jaꞌ tinaniꞌ xin, oj wal can wanxa tzetyetal ey jex, tol ewan cꞌuan yeocoj, tol man je yotaj oj.

7 Jaꞌton tzetyetal tol jato wal tinaniꞌ chin chaꞌoc waloni, man albꞌiloj can el yet tax cꞌal peyxa, wan tol cꞌam cꞌal bꞌey jix je yabꞌ skꞌumal yal-lei masantaꞌcꞌal tinaniꞌ. Yu jun tuꞌ, yuxan man oj skeꞌ je yaloni, tol je yotaj xa jun tuꞌ.

8 Yel toni, jaꞌ jun tuꞌ cꞌam tocꞌal bꞌey jix je yabꞌe, tam wal eyxa bꞌey jix je yotajne eloj, tol tax cꞌam tocꞌal che yabꞌ jun tuꞌ tinaniꞌ. Yutol wotaj cꞌaltaꞌa tol man jijemoj jex, caw pit jex yet tax cꞌal jix jex ali.

9 Jain tiꞌ jix wakꞌ mimancꞌulal je yin, yet watxꞌ man pena oj chi al-le win, yuxan chin mitxꞌoc tucan sjowal jin cꞌul eytej je yibꞌan. Yet watxꞌ, watxꞌ chi yun jin bꞌinai, yuxan cꞌam chex wakꞌ qꞌueyel yin eymanil.

10 Jain jix jex jin sajbꞌane eloj, man laan oj jix yun je sajbꞌanele el jaxca chi yun sajbꞌanele el chꞌen plata xol kꞌakꞌ; yutol yetoj wal syaꞌilal jix jex wakꞌon porobꞌal.

11 Yu jin mimanbꞌilal, yuxan queytuꞌ jix wute, yet watxꞌ cꞌam chin al-le penail. Jaꞌ watxꞌ kꞌane smoo chi al-le win, yutol cꞌam chi ẍaꞌ jin cꞌul ta jaꞌ tet comon dios chi al-le watxꞌ kꞌane jin qꞌuexeloj, ẍi Jehová.

13 Jain jix jin waꞌne txꞌotxꞌ txꞌotxꞌ tiꞌ yetoj jin kꞌabꞌ, jacꞌalaꞌ jain jix jin jenbꞌatoj satcan yetoj jin watxꞌ kꞌabꞌ. Tucꞌal jix wakꞌ bꞌina wan tuꞌ, catuꞌ jix pitzcꞌu masanil tzetyetal.

14 Yuxan yambꞌawej oc je bꞌa je masanil, abꞌwej tzet oj walaꞌ: ¿Mac wal junoj wan comon dios oj skeꞌ yaloni tzetyetal tuxa oj juloj, tol jaꞌ jun mac sicꞌbꞌil el wu, jaꞌ oj waꞌnen masanil tzet jix jin naꞌ yin conobꞌ Babilonia, jaꞌ yipalil oj akꞌon eyqꞌuey ebꞌ Caldeo?

15 Jain jix walaꞌ, jain jix wakꞌ titoj, yuxan jix jul jun mactxequel tuꞌ. Yu jun tuꞌ, yal cꞌal bꞌey oj ecꞌoj, oj eyqꞌuey masanil tzetyetal yu.

16 Jitzwejtej je bꞌa jin cawilal, abꞌwej tzet oj walaꞌ: Yet tax cꞌal peyxa, cꞌam junoj jin kꞌane jix wal yin ewantajil. Jaꞌ yet jix yuneni, ey jin cꞌaltaꞌ ecꞌ tituꞌ, ẍi Jehová. Jaꞌ tinaniꞌ xin, Jaꞌ Jehová, Naj Yaaw jix jin chejontej yetoj Yespíritu.

17 Jaꞌ Jehová, Naj cu Diosal jaon Israel jon tiꞌ, jaꞌ chi alon jaxca tiꞌ: Jain Jehová je Diosal jin, jain chin txꞌox ey jex tzetyetal tol oj oc je watxꞌiloj, jain chin txꞌox jun bꞌe ey jex tol smoo che bꞌeybꞌalne.

18 Toloj wal che jije jin chejbꞌanil, chex caey ecꞌ yin watxꞌ, laan jex jaxca jaꞌ mimej jaꞌ cꞌam chi tantoj, jaxa syaaxilal ey, ey jex, laan mi jaxca chi yun ya pomna sat jaꞌ mar.

19 Cꞌamxam chi bꞌischa jantaj sbꞌisil je yicꞌaal, laan xacꞌal mi sbꞌisil ebꞌ jaxca yarenail jaꞌ mar; ta jaxca tuꞌ, ma mi jix jex wakꞌ qꞌueyeloj, tam wal jix jex wiꞌel jin sattaj, ẍi Jehová.

20 Chi yalon pax Jehová jaxca tiꞌ: Elanwejtej bꞌey Babilonia, elanwejtej xol ebꞌ Caldeo. Alwej el skꞌaneal jun tiꞌ, el ojabꞌ je yaw yu tzalacꞌulal, catuꞌ che yakꞌon otajnele eloj masantaꞌcꞌal bꞌey slawubꞌal yul yibꞌankꞌinal tiꞌ. Alwej jaxca tiꞌ: Tuxa oj apnoj scꞌual yet oj cu yakꞌ jajcha el Jehová, jaon yicꞌaal jon Jacob, jaꞌton jun ẍejabꞌ, je chi.

21 Naꞌwejtej yet jix ecꞌ el ebꞌ je mam icham bꞌey txꞌotxꞌ cusiltaj txꞌotxꞌ, tol ma yabꞌ syaꞌil tajin tiꞌal ebꞌ. Jain jix wakꞌ jajcha snan chꞌen mimej chꞌen, catuꞌ jix elol secna jaꞌ mimej jaꞌ tol jix bꞌey yel sne jaꞌ.

22 Jal pax ebꞌ penawom xin, cꞌam niꞌoj watxꞌcꞌulal yet ebꞌ, ẍi Jehová.